Sunday, December 30, 2018

Indianapolis Ah Lainawn A Karh

Indianapolis cu ramleng ah Laimi tambik kan umnak khua a si caah, "Ramleng Lai Khualipi" tiah kan ti tawn. Mirang cheukhat hmanh nih, "Chindianapolis" tiah capo in an ti tawnmi a si. Kan Chin miphun tampi an um caah kan i lawm i, Indianapolis tlawn hi kan i ngaih ngaimi khua a si.

Rian thatha zong a um. Sianginn le sizung thatha zong a um. Laimi khuasaknak ding caahcun khua tha ngai a si. USA ah hmun lai ngai ah a um caah, Laimi kan caah luhchuah a fawi. Innhlan man zong aa deng. Inn man zong aa deng ngai i, nunnak hi a fawi ngai. Lam tampi aa tonnak khua a si caah, "Crossroad of America" tiah timi khua zong a si.

Khatlei ah tha a chiat ngaimi cu USA ram chungah mithah lainawh le sualnak a tam biknak khua pakhat ah an chiah ve. 2017 ah hin USA ah tihnung bikmi khua (10) chung ah aa tel. Cucu FBI nih "sualnak" (crime) an timi tahnak in an tahmi ning in a si. Cu sualnak timi tahnak ahcun "mithah lainawn" hi aa telmi mi a si. Mark tambik an pekmi cu, "lawinawn" hi a si.

2017 ah hin Indianapolis ah minung 157 an thah hna i, cucu Indianapolis tuanbia ah mithah a tam bik kum a si. 2018 hi a dihnak ding caah nikhat aa duh. Cu ahcun Indianapolis ah minung 158 an thah cang hna. Nikum nakin pakhat a tam deuh cang. Cucu Indianapolis ah tambik mi an thah kum ah a tla than. Phun dang in chim ahcun, 2017 nakin 2018 ah hin Indianapolis ah "sualnak" (crime) a karh deuh tiah kan ti khawh.

A donghnak bik i lainawnmi cu kum 20 kuakap tlangval a si. Inn motor luhnak pawngah meithal hma in a rak thi ko. Cucu Rinni 11:50 PM hlan deuhvak te ah, minung pumpak inn umnak area, East 34th St, 4500 Block ah a si. Cucu Sherman Drive le Emerson Ave karlak ah a si.

"Indianapolis ah 2017 ah minung 157 an thah hna. 2018 i 157 nak an thahmi cu, kan mah Laimi ngaknu kha a si. Cucu Indianapolis thlanglei sang ah a si" tiah an ti.

Indianapolis hi Laimi tampi kan umnak a si caah, "SAFETY"  hi biapi taktak ah ruah a hau cang. A va tlawngmi zong nih, "SAFETY" hi biapi ah kan chiah chih a herh. Zeicatiah Indianapolis cu a phunphun ruangah Laimi kan tlawn peng lai caah a si.

USA ah Laimi kan thutdir ning cu kan hna a ngam tuk. Zan ah innleng mei (security light) van te hna kan hmang lo. Mui dup in inn kan chiah ko. Kan semrel tuk ruang ah a si kho men. Hihi himbawmnak ah tih a nung ngaingaimi a si.

Zan chuah zong kan i ralring lo. Kan umnak area hi himbawmnak a si maw silo timi zong tuaktan tuk lo in, "gas station" kal le zantlai ah a herh tuk lo zong ah chuah kan hmang. Cun mah lawng umkal tikah ah, vikvak vikvak tiah kal lo le hnuhmai her setsai lo in umkal zong kan hmang. Kan hna a ngam. Lai lei tlawn in kan tlawng. Ngakchia zong kan thhlah thlam tuk hna. Hihi miphun kip cawhbur in umnak ram ah a phung a si lo. Kan umnak ram thil sining le tiluan hawih in, kan umnak khua cio ah thil sining zoh, cuanh, tuaktan le ralring tein um hi a herh tukmi a si.

Zeicatiah vawlei i minung titsa in kan nun lio caan ah a biapi cemmi cu "Himbawmnak" (Safety) hi a rak si caah a si. Khawika kan um zongah, zei rian kan tuan zongah, zei bantuk sift kan tuan zongah, him tein kan um hi a biapit tuk caah a si!




Thursday, December 27, 2018

John the Baptist Chuahnak Khua


Tipilpetu Johan chuahnak khua hi Bible nih "a min" a tial lo i, a chuahnak hi dik tein theih khawh a si lo. Asinain Catholic biaknak hruaitu upa hna hi, tuanbia hlathlai an thawng ngai i, hlanlio Franciscans pawl hna riantuannak thawng in, thil tampi hi theih khawh a si.

Bible ah John the Baptist chuahnak khua min hi ziah dek a tial hnga lo? Bible tialtu hna nih an tial lio ah an hlathlai khawh lo caah a si kho men. Asiloah a fawinak in dek ca an rak tial caah an lak sual bia a si hnga. Thawngtha cauk tialtu hna lak ah, Dr. Luke nih Johan chuahnak khua kong hi, tawite a tial.  Cu lawng cu John chuahnak khua kong kan theihmi a si.

Mary cu Vancungmi Gabriel nih a ton i, "Na chungkhar nu Elizabeth zong nau a pawi i, a tu cu thlaruk a si cang" a ti hnu ah, Mary cu Elizabeth tlawn i a va kalnak kong ah khan Elizabeth khua kong cu hi tin Luke nih a tial:

"Mary cu khulrang in aa tim i, Zachariah inn a umnak, Judea tlangram i a ummi khuapi (town) pakhat ah a va kal i Elizabeth cu a va biakchonh" (Luke 1:39-40)
Luke nih a tial ning bak tein rel ahcun, Mary hi Nazareth khua an inn in, "duak" tiah innpa len bantuk in va kal duak bantuk khi a lo. Nazareth le Elizabeth khua khi aa naih tukmi, chikkhatte le luklak i phak khawhmi khua bantuk khi a lo.

Asinain Luke nih a tialmi zoh tik ah, Elizabeth khua hi "Judea ram tlangcung khua a si" timi kha theih khawh a si. Cucaah Galilee peng Nazareth in Judea ram hi a buaktlak in meng 70-90 karlak hlat ah a um kho. "Khawika khua dah a tlawn?" timi khin tuak a hau. Cun a tlawnmi khua cu, Luke nih "town asiloah city" tiah a ti caah, khuapi fate a si tinak a si. Tu chun hmanh ah a hme ngai i, Elizabeth te chan ahcun a rak hme taktak ko lai timi cu a fiang.

Hi lio caan ah tu chan bantuk in, lam tha tuk an rak um lo. Cucaah khual tlawn hi a har i, tha a rak di ngai. Cucaah meng 70-90 hi a tlawmbik ah ni 5-7 karlak kal a si. Cucaah Mary zong hi fawi tein a kalmi a si lo. A zarh deng in a rau lai. Cu vial lawng cu, Elizabeth khua kong hi, Baibal nih a kan chimhmi a si i, cu pin cu theih khawhmi a um lo.

Hlanlio biaknak hruaitu hna nih an tuak lengmang tik le thil sining tuanbia an hlat lengmang tik ah, Tipilpetu Johan a chuahnak khua, a tu chan i "Ein Karem" timi a si tiah an ti. Hihi Arab holh a si i, a sullam cu "Spring of the Vineyard" (Mitsurdum Cerhtiput) tinak a si. Hi khua hi, cerhtiput nih cun khua hi tii a pek i, khuasaknak a rem caah hlan lio chan in minung khua an rak sa cang ti a si. Dar Chan (Bronze Age) timi BC 3300-1200 karlak minung hmanmi thilri tete hi, hi khua ah an hmuh caah khuahlun taktak a si ko tiah, thilhlun cotu hna nih an ti.

Ein Karem hi 1948 in Jerusalem District ah a ummi Palestinian Arab khua a si. Minung hi 2000 tluk an um. Jerusalem in Nitlakthlanglei meng nga tluk a hlatnak ah a um nain, tu chan ahcun Jerusalem hi a kauh tuk caah Jerusalem khuakam te ah a um cang. Bethlehem he aa hlat tuk lo. Bethlehem cu Ein Karem in nichuah thlanglei ah a um. Bethlehem le Ein Karem hi, Judea ram ah a um veve mi an si. Nazareth in Ein Karem kal ahcun Jerusalem hi pal pah lo awk tha lo a si.

Hlanlio khualtlawnnak lam in tuak tikah, Nazareth in Ein Karem hi meng 90 tluk a hla. Mary hi cu ka khua a va tlawn tik ah, nau cuan ka a si caah nikhat ah meng 15 in a kal ahcun, ni (6) rau ding a si.

Luke nih a kan chimhmi cu, "Mary hi a mah te lawng khual va tlawn dawh a si. Cun nau (Jesuh) a pawika te a si fawn. Nu sining cun thlano a theihka hrawng a si kho. Luke nih hi Elizabeth khua te hi, a min tial lo in, "tlangram khua" tiah a tial. Baibal cheukhat ahcun, Elizabeth te khua hi, "Judah tlangtluan ah a ummi" ti zong ah an tial. Jerusalem he an umnak tlangtluan aa khat ti a si.

Cu ka khua te ahcun "Mary cu thla thum a cam" ( Luke 1:56 ). Thla thum ahcun a nau zong a lian ngai cang lai. A thlano theih zong aa lim deng cang lai. A paw zong aa thei pah cang lai. Cu hnu ah Nazareth ah a va kir khi a si. A tlun pah zong meng 90 tluk a ke in a kal than. A temtuar taktak lai. Cu hnu ah, vat ding in aa thimmi le an i hammmi Joseph kha Mary nih bia a va ruah ding khi a si. Joseph sinah vancungmi aa phuang rih lo. Mary nau a pawi timi a thei rih lo. Mary a tlun lei lamthluan cu, Mary caah cun khuaruah ding a tam tuk. Ngaihlah dingmi thil a tam tuk. Lungleng le lungthin kekkuai taktak in Nazareth lei tlun hi aa thawh ding a si. A lamthluan hei tuak ve ko law? Zeidah a va lawh hnga?

Mary a va lennak khua Ein Karem ah hin, Elizabeth le Zakhariah hi inn pahnih an ngei lai tiah mifimmi nih an tuak. A ruang cu Zakhariah cu "tlangbawi a si." Hi lio tlangbawi cu an nung kho ngai. Mi nih upat tihzahmi an si. Zachariah timi sullam cu "BAWIPA Theih" (Remember Yah) ti a si. Hi ka zawn ah,  "Yah" cu "Yahweh (LORD)  tinak a si.

Zachariah te inn pakhat cu nelrawn ah a um. Pakhat cu thal a linh deuh lio caan i, thlikik an donnak deuhnak ding le a daih deuhnak ding caah an sakmi a si i, a sannak deuh tlangpang ah a um. Cuka cun Elizabeth zong thla 5-6 chung leng chuaklo in a umnak a si i, Mary a va lennak hmun zong a si an ti. Cu ka ahcun "Churh of Visitation" timi hi 1955 ah Franciscans nih an sak. Hi hi Ein Karem ahcun biakinn dawh bik a si an ti.

Mary a lennak hmun ah sakmi Church of Visitation

Zachiariah inn pakhat cu Nelrawn deuh ah a um. Ein Karem ah hin Church of John the Baptist timi pahnih an um. Mi tambik theihhngalhmi cu Roman Catholic sakmi the Nativity of St. John timi a si i, khuacuanhnak sang taktak a ngeimi a si. Hi biakinn hi a niamnak deuh, nelrawn deuh ah a um. Hi ka ah hin John the Baptist hi a chuak i, a pa Zachariah zong bia a chim khawhnak thannak an inn a si an ti. Hi zong hi Spanish siangpahrang bawmhnak in, Franciscans nih an sakmi a si.  A dang pakhat cu 1894 ah Eastern Orthodox nih an sakmi a si.


Ein Karem khualai ummi Church of St. John the Baptist




Ein Karem Russian Orthodox Church 
Mary a va lennak tiah timi Church of Visitation in nichuahlei kap deuh ah hin, cerhtiput tha ngaimi a um. Cucu Mary nih a va tlawn pah hna ah a dinmi tiput a si tiah an ti caah, "Mary's Spring" tiah an ti. Hlan ahcun din khawh a si nain, tu chan ahcun pawngkam ruangah a hnawm deuh i din ngam tuk a si ti lo ti a si. Hi cerhtiput (spring) cungah hin, Muslim nih Mosque sang ngai an sak cang.

Hi bantuk in Mary va tlawnmi Elizabeth khua (John the Baptist chuahnak) a si caah, a zoh duhmi an tam ngaingai. Cucaah tourist an tam ngaingai i, kum khat ah 3,000,000 kuakap lengmang nih, Paghian biak pah in an va lenmi khua a si. Vawleicung biaknak lei khual tlawng cheuthum cheuchat nih an pal peng ti a si. Cucu nihin ni ah Ein Karem an tangka hmuhnak a that biknak zong a si. Kut in sermi thilri tuktak zuar in minung tampi an i cawm.

Jerusalem in a hlat lo caah tlawn fawite zong a si. Tuanbia zoh ding ding tampi a um. Sizung minthang taktak Hadassah Medical Center zong a umnak a si. Hlan ahcun a rocar tuknak khua a si nain, Israel cozah nih thingkung tam tuk an cin caah, a pawngkam hi hring dildel tein a um aa dawh tuk caah lenvah zong a nuam taktakmi khua a si.

Cucaah ruah lengmang ah hin, Jesuh Krih hi "Kan sualnak in kan thlarau khamhtu lawng siloin kan sifahnak chung in mi khamhtu zong a si chih ko" tiah an timi hi, Erin Karem khua sining ah a tling taktak. Jesuh cu kan zeizong te a si taktak ko ti lo awk a tha lo!


Mary's Spring

Ein Karem le Church of Visitation
-------------------------------------------------------------------------------------------------------------------








Sunday, December 23, 2018

Lairam Nih Pathian Theimi Motor Driver Kan Herh

December 23, 2018 ah Tulukram Xinhua News ah Hakha peng motor accident kong hi tin an tial:
"Kawlram Chin State i motor accident ruangah minung panga an thi i, hleiriat hma an pu" tiah Home Affairs Ministry nih Zarhpini ah an thanh. Cu motor accident cu Hakha peng ah Rinni ah a cang. A ke paruk ummi truck nih minung 23 a phurh hna i, truck cu an rungveng kho ti lo i, cheng balang ah ah a tolh i meter 183 tluk a thukmi horkuang ah a va tla. Cu khawndennak cu Hakha-Gangaw karlak lampi meng 41/2-3 ah, zanlei 1:00 Pm ah a cangmi a si. Aa khawngdengmi cu Hakha sizungpi ah an chiah hna.
Hi bantuk in Hakha peng ah accident um tikah, ngaih a chia tuk. A bik in Christmas nisunglawi lai ah, minung panga an thih tikah, lungthin a rawk ngaingai. Chungkhar zeitluk in dah an ngaihchiat le an tuar hnga? Khua le sang nih zeitluk in dah an ngaihchiat hnga? Hakha hrawnghrang cu minung kan tlawm tuk caah, Hakha khua cu minung thinlung a mui ko lai; zeitluk in dah minung thinlung a rawk hnga timi ka ruat. Kan umnak hmun in, kan ngaih a chia cio. Hi accident hi zei ca dah a can hnga timi ka ruat. Ka lungthin a nuam lo ngai. 
Motor accident hna hi, thanchonak he a ra timi thil pakhat an si. Lairam zong duhsah tein a van thangcho ve. Lamsul a thancho bantuk in, Motor cycle le motor zong a tam chin lengmang ve. Thanchonak hi ningcang tein (systematically) tein a thancho lo ahcun, thanchonak nih rawhnak tampi a chuahpi tawn. Lairam ah umkalnak motor le motor cycle a tam deuh bantuk in, accident zong a tam deuh chin lengmang ve ding a si. Asinain motor khawndennak zeitluk in dah a tlawm lai timi cu, ruah le tuak lengmang a hau.  

Lairam zong motor le motor cycle a tam deuh chin paoh ah, himbawmnak (safety) hi biatak tein ruah a hau. USA hi himbawmnak lei ahcun an i ralring bak i, lamsul zong a tha tuk nain, accident a tam lawng silo in chickhat ah accident tongmi zong an tam chin lengmang. November 3, 2002 ah, Los Angeles, California i, I-710 ah motor voikhat pah ah motor 216 an i pah. Minung 41 hma an pu. Vanthat ah pakhat hmanh an thi lo. Lairam zongah motor a tam deuhdeuh ahcun, chikkhat pah zong ah tam deuh zong pah caan a ra te kho mi a si caah, himbawmnak hi tha kan pek taktak a hau.

"Lairam ah motor a tam tuk cang. Motor cycle a tam tuk cang" an ti bak in, lungre zong a thei cia. Zeicatiah kan thancho zong hi ningcang te thancho a si lo. Minung kan nunning, motor cycle le motor an mawngh ning zong hi, ningcang tein a si lo. Cun Laimi hi sikan ngeih le ningcang tein nun kan thiam lo. Duhpoh in nun hmangmi kan tam tuk. USA zongah kan si. Ningcanglo motor mawngh ruangah,  tlaihmi, tazacuaimi le dantatmi kan tam tuk. Hi ningcanglo nunnak hi, kan miphun nih ralrin kan herh. USA ca zongah Laimi nih tam tuk sunghnak kan chuahpi cang. 

Lairam accident tam deuh cu, ningcanglo in motor cycle mawngh le motor mawngh ruang ah an si deuh kho men. Kan milu le motor tlawmtam in tuak ahcun, Lairam accident hi a tam bak. Accident lo nak ding hmun ah kan accidentnak a ruang tampi a um. Accident um tik ah, pumpak, chungkhar, sang le khua ah sunghnak nganpi a si. Laimi cu kan tlawm tuk caah, mino le mizaza hna an thih tikah, kan miphun ca tiang in sunghnak a si. 

Hi bantuk accident um tikah, Chin State cozah nih a fakmi he, a dinmi he, tling tein hlathlai le a ruang kawl a herh taktak. "A ruang le a phi" hmuh hnu ah, Cozah hruainak in, "Hi bantuk accident hi a chuah than lo nak ding caah, zeidah kan tuah lai?" timi cu ruah le a hlankan khamnak tuah hrimhrim a herh. Culoahcun Lairam ah accident hi a tam chin lengmang lai i, kan miphun caah "zatlaknak nganpi" ah a cang kho. Kan thanchonak le sipuazi tiang a rawkter khotu a si kho. 

Lairam accident vialte zong cozah nih cazin (statistic) tuah a hau. Zatuak ah minung zeizat dah accident a um? Zatuak zeizat dah an thi? Motor zatuak ah zeizat dah an accident an tong? Driver dihlak chungah driver zeizat dah accident an tong? Accident tong tambik hi zeibantuk driver dah an si? Zeiruang dah an accident? Hawi hlan ah hi bantuk accident hi a rak tong bal maw? A tawngmi a si ahcun hawi hlan accident cu teh zei ruang dah a si?" timi biahalnak a phunphun kha hlathlai a herh.

Hi pin ah, zeibantuk accident ton hmanh ah, a tanglei thil hna hi ruah le tuak hrimhrim cu a herh: 

1. Khawika dah an accident?
2. Lam aa kikuaih ruang ah maw si? Lam a chukcho tuk ruang maw si?
3. A muih ruang maw si? Khuadawm ruang ah maw a si?
4. Ruahsur ruang le lamnaal ruang ah a si maw?
5. Driver teh kum tling a si maw? Licence tha tein a ngeimi a si maw?
6. Motor chiat ruang le thilri rawh ruang ah a si maw?
7. Driver daithlan ruang ah a si maw? Cell phone a chonh pah ruang ah a si maw?
8. Minung le thilri a hlei tuk in an khin (overload) ruangah a si maw?
9. Motor rang tuk in mawngh ruangah a si maw?
10. Lam kikuai ah "sign" (hmelchunh) um lo ruangah a si maw?
11. Lam vawlei aa ruanlo ruangah a si maw?
12. Driver zurit ruang le si-ai rit ruangah a si maw?

Hi a cunglei pin ah hlathlai ding tam tuk a um rih. Lairam ah khawndennak tambik an tonnak hi, hlathlai a um tuk lo caah, hi ca ah tial awk ka thei kho lo. Lairam ummi nih hihi hlathlai a herh.

USA ahcun minung tambik khawnden an tonnak hi, "ritnak si le zurit" ruangah a si an ti. A pawinak cu, an ram hi zu a tam tuk. Kum 21 cung cu, zudinnak nawl an ngei. Zurit bu in motor mawngh lo ding timi a si ko nain, cucu za ah za in an kham kho lo. 

Cu zuri mi ruang ah, midang a dinglomi zong khawnden le thihloh an tong hna. Cucaah "Zurimi driver" hi USA ahcun tih an nung taktak. "Zurimi driver" ruangah kum chiar in minung thawng tampi an thi peng. Lam zeitluk a that zongah zurit hnu ahcun, an thi thiamthiam. Lamthat ruangah himnak a um dih kho lo. Driver tu hi an biapi. 

USA National Highway Traffic Safety Administration nih ca an chuahmi ah, 2017 chungah lamcung accident in minung 37,133 an thi i, cu chungah minung 10,874 9 (29%) cu zurit bu motor mawngmi ruangah a si an ti. USA ah hin, zurit tahnak a um. Thisen le zun ah zu BAC (0.08) nak tam um ahcun tlaih khawh a si. Lamcung thimi driver lak ah a thimi 68% (7,368) cu BAC 0.15 nak in an sang deuh ti a si. Hi tluk rit bu motor mawngmi cu "thih-hri-molh" (THM) an si ko. THM hi "Bible degree a si lo." Thih-hri-molh pawl tinak an si. Hi hna pawl hi, zeitihmanh in motor mawng kho ding an si lo. An zudinmi a sang tuk cang. 

1997 in Lairam ka chuahtak cang. Lairam motor cycle le motor accident tam deuh kong hi, a lang in ka hlathlai tawn i, a ruang an chim bikmi cu, (1) Rang tuk mawngh ruang; (2) Licence tha tein ngei lo nain motor cycle cit le motor mawngh hman ruang; (3) Zurit ruang ah a si bik tiah an chim. Hi thil pathum hi, Lairam ah accident an tonnak bik a si. Lamchiat ruang nakin, driver palh ruang i accident hi a tam deuh ti a si. 

Cucaah Lairam cu fingtlang a sang. Horkuang a thuh caah lam a chukho. Lam aa kuai. Cucu zeitihmanh in kan thleng kho ti lai lo. Lam phei deuh le kau deuh in kan cawh khawhmi lawng hi kan remh khawh dingmi a si. Kan vawlei muihmai cu aa thleng kho ti lai lo.

Cucaah thlen ding kan ngeihmi cu, "motor le motor cycle licence ngeihnak training" le himbawmnak training kaimi lawng, licence pek hi a tha ding a si. Traning le upadi tha tein zulh ding hi" Laimi caah kan himbawmnak ding cem a lam a si. 

Naite ah Laimi nih kan upat ngaingaimi hna nuva, USA a kan tlawng. An nu cu fak ngai in motor accident a rak tongmi a si. "Zei ca dah accident nan ton?" tiah ka hal. "Kan motor zu a rit caah a si" a ti. "Ziah, zu a dingmi driver mawnghmi motor cu nan i cit?" tiah ka hal. "Tahan kha tuan ah phanh kan herh. Tahan phanh tuan kan duh i, motor dang um ti lo caah a si" tiah a ti. Cu zuri driver ruangah a nunchung pumsa tlamtling lo ah aa chuah. Ngaih a chia. Lung a fak tuk.

USA ah voikhat cu sekhan ah ka kal. Ngandamlomi cycle (wheelchair) in a ra mi Mirang pa he kan i tong. Bia kan i ruah. Cu pa cu aa dawh tuk. A pumrua tha tuk. Asinain a ke cu pahinh in a tlawng. Buddhist pathian (Bodah paya) hmanthlak aa suaimi milempi a cuangmi angki aa hruk. Ka lung ah a chuak i, "Ziah mah angki hi na hruk? Buddhist maw na si?" tiah ka hei hal.

"Buddhist ka si lo. Japan in ka hawipa Marine ralkap pa nih a ka kuatmi a si. Kei zong hi Marine ralkap ka rak si. A khonh in USA ah ka rak tlung. Columbus ka caam chung ah zurimi driver pa nih a ka pah le ka ke pahnih in a kiak. A dam kho ding si ti lo i, an ka cik piak le mah tin ka si ko hi?" tiah a ti. Ka lung a tha lo taktak. Zurimi driver hi tih an nung taktak. Cu pa cu, ka mitthlam ah a cuang peng. Zurimi driver hi zeitluk in dah tih an rak nun? Mah le mah thah a duhmi bantuk an si.

Zuri ruang ah USA cu aa khawngmi an tam tuk. Nikhat ah minung 300,000 tluk hi zurit bu in motor an mawng ti a si. Cu chungah nikhat ah 2800 lawng hi an tlaih khawh hna. Zurit bu motor mawngmi ruangah USA hi minung pakhat nih kum khat ah $500 cio cawi khan in cozah tangka a dih ti a si. 2014 ah zurit bu in motor mawngmi 1,100,000 an tlaih hna ti a si. Cu tluk cun USA hi zurit bu in motor mawng an tam. USA si zong ah an rit hnu cu, an him hlei lo. Zurit hnu ahcun, lam that zong ah tihnung thiamthiam. 

 Lairam zong hi, zuri ruang ah minung zeizat dah kan i khawng cang? Minung zeizat dah kan thi cang? Chungkhar zeizat dah sunghnak kan tong cang? Tangka zeizat dah kan sungh cang? Mitthli zeizat dah a luang cang?" timi hi tha tein hlathlai a herh cang.

Lairam khawndennak kong hi ka hlat tawn. A tambik cu "driver" zurit ruangah a si an ti. Lairam ah a pawi tukmi cu, "Driver cu zu din phung a si timi ruahnak le nunphung an ngeihmi a si." RTC chan lio zongah, voi tam tuk hi zu an din ka hmuh hna. Ri nawn in an mawng. Ke in kal awk tha lo. An rit pah bu in an mawnghmi zong cit a rak hau. A rak pawi tuk. 

A pawi tuk rihmi cu, "Eidin dawr nih tangka hmuhnak ding caah, driver kha zu in an mawn hna le khan dang teah an tlonhtlamh lengmang hna" ti a si. Edidin dawr dihlak an si lai lo. A simi an tam ti a si. Hi bantuk in tangka hmuhnak ding caah, zu in driver a tlawnhtlamhmi cu, Laimi nih an dawr hrial ding an si. An sipuazi a tlak pitpet tiang hrial ding an si. 

Zeicatiah hi bantuk thil pawl hi, Krihfa ram sining le Krihfa zumhnak he aa kalh. Lai miphun ca zongah minchiattertu an si. Kawl nih a kan zohnak zong ah zoh a chia. Zu in driver a tlonhtlamhmi eidin dawr nih an hmuhmi tangka cu cheuhra cheukhat pek lo a tha rih fawn." Theih ahcun, Biakinn zong nih cohlan ding an si lo. Laimi driver zong nih theih bak ding a si. "Zurit bu in motor an mawngh i, accident an ton ahcun KAN KUT AH THI AA NEH timi philhlo a herh. Dawr ngeitu nih an dinhmi zu ruangah a rit i motor accident an ton ahcun dawr ngeitu zong nih ruah a hau ve mi cu, KAN KUT AH THI A NEH timi a si. Zu danghtu le zurimi hi an palh veve. 

Lairam ah motor accident tam tukmi hi ruah taktak a hau cang. Kawl Buddhist a si ahcun zeihmanh kan ti kho lai lo. Asinain a rit ahcun "motor ngeitu le company sin ah lungtlinlonak langhter ding a si." Cun Laimi Krih a si ahcun, tha tein motor ngeitu le company nih chimhrin le cawnpiak an herh. A ngeitu sin zongah lungtlinlonak le duhlonak langhter a herh. 

Himbawmnak hi a biapit tuk. Cucaah Lairam ah motor ngeimi nih driver hlan tik ah, "Pathian a theimi le a piangtharmi driver hi thim deuh ding a si." Cun mipi khualtlawngmi zong nih, "Na driver zu a din le a rit ahcun ticket caw hlah. Na cawk zong ah khirh law a tha ding a si. Chungkhar sahlawh cingla zong nih, zudin a hmangmi le zurit a hmangmi nan unau caah motor le motor cycle cawk piak ding an si lo." 

Zeicatiah zurit bu in motor a mawngmi cu "Thinnak lampi cung i kalter tluk a si cang." Kan Lairam le Kawlram motor lam nih le an tha lo i, "Accident nak ding caah an rem tuk i an tha tuk" ti a si fawn. Na chungkhar kha zu din na khap khawh tunglo in, motor maw, motor cycle maw na cawk piak ahcun, "chantim hlan ah va thi te ko" timi chiatserh tluk a si cang.

Cucaah Lairam motor cycle mawngmi le motor mawngmi pawl hi Pathian theih le Pianthar an herh taktak cang. Mipi phurmi (passenger) phurmi motor ngeimi nih driver hlan tik ah, interview tuah a herh bak mi cu, "Zu na ding maw? Pathian na thei maw? Na Pianghar maw?" timi hi hal ding a si cang. Pathian a theihnak le a pianthar nak cu tah awk a tha lo men lai nain, a nuncan ziaza le a tuanbia zoh in theih khawh a si ko. 

Cu ti kan tuah ahcun, "Lairam ah minung tampi kan himbawm lai."  Cucaah, Lairam ah kan mipi an himbawmnak ding caah, Lairam nih a tu lio kan herhmi tampi lak ah, "Pathian a theimi driver kan herh khun."








Thursday, December 20, 2018

Matthew Tialmi Ramah Khua Kong Hrilhfiah

Ramah khua hi Christmas lai ahcun lungthin ah a chuak than lengmang. Ramah khua kong hi Jesuh chuahnak kong ruah ahcun ruah chih lo awk a tha lomi a si. Matthew nih Bethlehem khua hrawnghrang pangakchia thahnak kong le Ramah ah Rachael a tahnak kong a epchunmi ka rel fate, ka lung a fiang kho bak lo. Midang zong mi tampi an fiang lo men lai tiah ka ruat theu tawn.

Matthew thawngtha tialtu hi a ho set a si hi theih fian a si lo. Hihi A.D 80-110 kar ah tialmi a si lai tiah ruah a si. Cu catialtu nih a tialmi ahcun, "Jesuh chuah ka i, Bethlehem khua hrawnghrang pangakchia (boy) kum hnih ri in a tanglei vialte kha Siangpahrang Herod nih thah ding in nawlbia a chuah i, cu ti thil a tlinnak cu Jeremiah nih a rak chimmi a tlinnak hnga caah a si" tiah a ti.

Cu Matthew nih a tialmi ahcun hi tin a si:-

Ramah khua chungah thawng a thang,
Cu thawng cu tahnak le ainak thawng a si.
Rachael nih a fale cu a tah lengmang hna,
An dihlak in an thih dih caah a tap lengmang ko i hnemh khawh a si ti lo"
(Matt 2:17,18)
Matthew nih aa cherhchanmi hi Jeremiah cauk chung (Jer 31:15) a si. Matthew nih a voikhatnak bik Jeremiah aa chirhchan a si. Jeremiah nih a chimmi le Matthew nih a chirhchanmi hi a tuanbia zoh ahcun a kaihkawh lo tiah bible thiamsang pawl nih an ti. Tuanbia dang pipi veve a si tiah an ti. Ramah le Bethlehem hi zeidah an i pehtlaihnak a um? Zei ca dah Matthew nih Jeremiah hi a va chirhchannak a si hnga?

Ramah khua hi, hlanlio Israel ram khuahlun pakhat a si. Ramah timi a sullam cu "a sannak hmun" ti a si. Israel phun (12) ram an rak i cheuh lio ah, Benjamin cithlah an comi ram a si. Ramah i nitlaklei ah Gibeon le Mizpah an um. Thlanglei ah Gibeah a um. Nichuahlei ah Geba a um. Tu chan khuathar "Er-Ram" timi hi, Ramah khuahlun a si tiah thilhlun cotu nih an ruah. Er-Ram cu Jerusalem khualai in Km 8 tluk hlatnak ah a um. A tu ahcun Jerusalem khualipi a khuakam te ah a um i, Palestinian khualipi Ramallah le Jerusalem karlak ah a um. Ramallah he aa tlai nawn.



Ramah le a pawngkam khua hna (Ref: Bibleatlas.org)

Ramah timi khua hi Joshua 18:25 ah a voikhatnak bik aa tial. Gibeah khua pawng ah a um. Biacaihtu chan lio ah, Levite kha Gibeah ah a ra, cucu Ramah phanh lai te ah a si (Biacaihtu 19:11-15). Ramah cu Prophet Samuel nu Hannah le a pa Elkanah khua a si. An cin caah, fa an ngeih khawhnak ding caah, an nupa tein Ramah in Shiloh khua i Pathian temple ah thla an va cam tawn. Bawipa nih fapate a pek hna. Samuel nih a hruai lio hna ah, Ramah ah tonnak an rak tuah tawn (1 Sam 1-2; 8:4).

Chaklei pennak Israel siangpahrang Baasha nih Ramah khua cu a kulh i, Jerusalem lei luhchuahnak vialte phihkhar dih a timh i Ramah khuakulhnak cu biatak tein a rak ser.  Thlanglei pennak siangpahrang Asa nih, Syrian siangpahrang Ben-Hadad aa rawih i, Baasha hi a rak tukter. Baasha ram khua a cheukhat kha a lak hna caah, Baasha nih Ramah ser kha a ngol. Ramah sernak ca i an hmanmi thilri vialte cu Asa nih a hrawh dih i, Judah ram Geba le Mizpah khua sernak caah  a hman hna (1 Siang 15:16-22). Asa le Ben-Hadad hi an pale hi hawikom an rak si caah, an i tanpinak a si.

Chaklei Pennak Israel cu BC 722 ah Assyria nih a tuk i a hrawh dih cikcek. An minung zong ramdang ah sal ah a hruai hna. Israel ah miphun dang a van chiah hna i, Israel Pennak cu aa rawk. Cun Thlanglei Pennak Judah lawng a tang.

Judah siangpahrang Jehoiachin chan BC 597 kuakap ah Judahmi cu a voikhatnak bik Babylon ah sal ah an hruai hna. Jehoiachin le a chungkhar, Judah bawi le mifim le riantuantu thawng tampi sal ah an hruai chih hna. Judah ram cu Babylon kuttang ah a um.

Tlawmpal ah Jerusalem cu Nebuchadnezzar nih BC 586 ah a hrawh i, a voi hnihnak sal ah an hruai than hna. Sal i an hruaimi hna vialte cu, Ramah khua ah an rak pumh hmasat hna (Jeremiah 40:1). Cun a runpi in Babylon ah sal ah an rak hruai hna. Ngaihchia taktak khi a rak si. Judahmi cu, mitthli tla le tah-ai bu bak in, Jerusalem le Judah ram cu an chuahtak i, Babylon ah an kalpi hna.

Cucaah Jeremiah nih:

Ramah in authawng (voice) theih a si; ngaihchia tuk le fakpi tahaihramnak cu; Rachael cu a fale hna ruangah a tap lengmang; hnemh zong duh lo in, zeicatiah an (a fale) an um ti lo caah a si" (Jer. 31:15; Mirang Bible direct in lehmi a si). 

Rachael hi- Ephraim, Manasseh le Benjamin- cikor pathum hna a hringsortu an nu a si. Genesis 30:1 nak zoh tikah, Rachael hi fa a rak duh tuk hringhran i, cu fa ka ngeih lo ahcun "ka thi lai" ti tluk in fa a rak duhmi a si. Cu fa ngeih lo ahcun a rak thih phah ding in a rak um.

Jeremiah nih hin, "Babylon ralkap nih an thahmi hna asiloah sal ah an hruaimi hna ruang ah hin, Rachael cu thi deng in fa a duhnak kha a epchun i, a rak tialmi a si." Zeiruang dah Rachael ngelcel a epchun le a tahchunh ti ahcun, Rachael cu Benjamin nu a si i, Ramah cu Benjamin cithlah pawl khua le ram a si caah a si. Rachael telefa pawl sal i an hruaimi hna kha, Rachael caah cun ngamh awk thalo in tahnak a si ko.." timi Rachael lungfah le ngaihchiat kha ruahchih in a chimmi a si.

Bikam Thar kan zoh tikah, Matthew catialtu nih Jeremiah hi a van char than i a van tial than. Siangpahrang Herod nih Bethlehem le a chehvel i kum hnih tang pangakchia vialte a thahnak hna hi, Prophet Jeremiah chimchungmi bia a tlinnak a si tiah Matthew nih a rak tinak a si (Matt. 2:18). Matthew 2:18 le Jeremiah 31:15 an i pehtlaihnak hi cu, fianter awk a har ngai. Zeicatiah an tuanbia (context) aa dan tuk caah a si.

Jeremiah nih a chim duh taktakmi cu, "Ramah khua ah Judahmi thawng tampi an tlaih hna i, sal in an hruaimi hna ngaihchiatnak le mitthli tlaknak kha, Rachael nih a fale thi deng in a dawtnak hna le an mah an um lo ahcun thi deng tah ding a si nak kha, chuan khan in a chimmi tu a si." Jeremiah ning bakbak cun hmailei a cang te dingmi chuankhannak in chimmi khi a si theng lo.

Chanthar Biakam Thar thiammi pawl nih, Jeremiah nih a chimmi le Matthew chimmi hi a kaihkawhmi tuanbia a si theng lo an ti. Zeicatiah Bethlehem le Ramah hi a hlat zong aa hlat ngai. Cun Ramah cu Benjamin cithlah ram a si. Bethlehem cu Judah cithlah ram a si. Ramah le Bethlehem karlak ah Herod umnak Jerusalem khualipi zong cu a rak um. Cucaah Jeremiah chimmi le Bethlehem hrawng cangmi hi, an tuanbia aa dang tuk ti a si.

Cun Jesuh chuahnak kong tha tein a hlathlai i, Johan chuahnak le Jesuh chuahnak tling taktak in a tialtu Luke nih hin, "Bethlehem khua hrawnghrang i pangakchia thahnak kong hi, a thei bak ve lo" ti a si. Cucaah Jesuh cu "Bethlehem in Nazareth ah a kal in Luke nih cun a tialnak a si." Judah tuanbia tling taktak in a tialtu Joshephas zong nih hin, Herod kong hi tling taktak in a tial i, a nu a thahnak, a nupi le a fale a thahnak hna hmanh tling tein a tial nain, pangakchia thahnak kong hi a tial lo. Cucaah Matthew catial tu nih hin, hi kong hi khawika dah a va lak hnga timi hi ruah awk ngai in a um.

Hlanlio Ramah khuarawp 

Ramah hi a tu chan "Er-Ram" timi khua hmun zawn hi a si tiah ruah a si. Cucu "Al-ram, A-Ram, al-Ramm (Arabic) zong in an tial. A tu lio ahcun Palestine ukmi khuapi pakhat a si. Jerusalem nichuahchaklei ah a um. Jerusalem hi a  kauh chin lengmang tikah, Jerusalem khuakam ngacha ah a um ti tluk a si. An tuaknak ah a tu lio a minung 58,000 tluk an um i, zatceu renglo cu Israel rammi sinak a ngeimi an si. A tu chan ahcun tourist tampi an kalnak khua lianpi a si cang.

-------------------------------------------

Zohchihmi ca

1. Bible Hub timi Encyclopedia ah an tialmi Ramah timi ca zohchih in tialmi a si.
https://bibleatlas.org/ramah.htm

2. "Ramah," Wikipedia.org





Monday, December 17, 2018

Khawi Dah A Um Ve Cang Hnga?

Ka Philh Khawh Lomi Yangon Tuanbia a si. Fa 7 ka ngei. Nupi fate he rem tein ka um. Pastor zong ka tuannak a sau cang nain, hi tuanbia te hi cu ka philh kho hrimhrim lo. Krihfami kan sinak ah hin, dawtnak, zawnruahnak, zaanfahnak, hnakkartenhnak ngeih, harnak tongmi bawmhchanh le kan mah he aa pehtlai setsai lo mi cung zongah, "Krihfa siaherhnak" hi zeitluk in dah a rak lianh timi kha, hi tuanbia ah fiang tein a lang. Tuanbia cu hitin asi.....

--------------------------------------------

MIT a kum (2) nak ka kai lio 1994-95 sianginn kai kum ah a si. Kyukung Nichuahlei sang ah kan rak um. Kan umnak inn cu canphio inn asi. Kan umnak area ah lenhmui, theikawllawng, ungkung, hai le thingkung dang tete an um caah, hmun nuam ngai asi.

Kan inn in nitlaklei kap ah, Phongyi Kyawng a um. A area cu Ungkung a tam. Phongyi Kyawng chak deuh ah, Karen inn dawt (2) le Kawl inn dawt (2) an um. Kan chaklei ah Karen inn dawt (2) le innfate a um than. Khi pin lei cu yatkuat ningpi in inn a va tlai thluahmah. Lam a tlawm caah, kan inn hmai lamte cu a hlunghlai; a zungzal deuh in a zulmi minung an tam ngai tawn. MIT kar le Kyukung kar ah a um caah, a hlunhlai khunnak pakhat a si. 

MIT umnak ah hin, Karen Bible Sianginn le Kawl Bible sianginn a um i, bible sianginn pathum bak aa tlai in a um caah, a nuam taktak. Lungthin a dai tuk i, chawhvah le umkal khi a rak nuam tuk. Kan inn hmai lamte zong cu, kan hawi le bible siangngakchia a tu le tu an i chawhnak le hrawnmi a si.

BD ka kainak Myanmar Institute of Theology
Kan inn nichuahlei ah tivahor a um. Cu pin lei ah Karen dum kaupi a um. Kan umnak inn in a thlanglei ah, chungkhar pakhat nih an tuahmi plastic sehzung a um. Cu sehzung kam ahcun, lenhmuikung nganpi a um i, a tlai tuk tawn. Va nih a thei an tlanh i, vate onh thawng hi a thang ngaingai tawn. Cu sehzung in nichuahlei kap ah, Kawl inn dawt (2) a um. A tang tlakrawh, acung pyingato in sakmi inn tha ngai asi. 

Cu inn ahcun tleirawlnu kum 16/17 kuakap a um. Muisam dawh ngaingai a si. A ngo tuk fawn. A sam a tawi; a hnar a sau i a zum; a tung a sang i mi thialzai te a si. Cu nute cu, an inn hnulei innleng ah, ca a zoh tawn. Cu innleng cu ka umnak thlalang awng in, a langh caah, a caciah khi ka hei hmuh lengmang. Kawl cu an caciah a thang ngai i, cu nute zong cu a carel khi a thang ngai tawn. Zan 10 hrawng tiang cu a mei a ceu i, a caciah khi theih khawh peng a si. A caan i ca a rel lo caan ah khin, aa thei ngai. King dimdiam te khin an inn cu a um tawn. 

Kan inn cu, a niam ngai. Inn dangnih an lonh dih caah a caan ahcun a lin ngai ve.  Innchung ah thut i cazoh a har ngai caah, kan innkam i inn lawng a ummi inntang hna hna ah, vawlei ah pher kan phah i, kawmtang ah kan zoh tawn. 

Kan innkam ah Plastic sehzung a um i, a khu ngai. A rim a nam tuk fawn. A celh in celh asi tawn lo. Cucaah lungfimnak deuh ah tiah, kan sawng in nichuahlei tivahor kam ah ca ka va rel tawn. Kan inn kam ahcun theikung tam ngaite an um. Ruaphur dawh tete zong an um hna. 

Voikhat cu kan inn pawng ah ca ka ciah. Theikawlawng ka hei lawh pah. Kan inn pawng ummi nu te nih cun, “AKo, thei ka pe ve” tiah a ka ti. A nih an dum lei ah a um i, kei kan dum lei ah ka um ve. 

 “Ziah mah cu, hi bantuk Kawl nute nih, thei cu a ka hal hnga?” tiah ka ruat. Kawl cu misingpi he khiti chonh khi an dan a si tuk lem lo i ka khuaruah a har ngaite. Thei cu ka lawh i, a pawng i a ummi ngakchia pa te he ka pek hna. An inn kulhnak a san caah har ngai in ka hei banh i, ka pek. “Kai lawm” a ti. A merh pah in a ka zoh i, an dum kam ahcun a naupa te he an dir. Cucu a vokhatnak naih tein ka hmuh a si. Naihte in ka hmuh tik ah, a rak in dawh chinchin. Duh a nung taktak. 

A nu le nih kan i chonh maw an theih hnga? An van auh hna i an lut. "Aw..a pawi ngai. An si sual hnga maw?" ti khi ka ruat ngai. 

Cuticun ca ka ciah caan paoh ah, an inn hnulei ah ca a rak ciah ve lengmang. Minung timi hi a mak ngai. Miphun kan i khat lo. Bia zong kan i ruah lo. A chonh zong kan i chawn lo. A theih zong kan i thei lo nain, ca ka ciah caan paoh i an dum ah a rak i hell tawn tik ah, ca ka ciah lio caan i ka hmuh lo ahcun, "Khawi dah a um ve hnga?" tiah ka thinlung tein ka hlam ve. Cucu duhnak kan ti hnga maw? Tlaihchannak kan ti hnga maw? Nu le pa karlak ah, minung thinlung ah a um duh kho ngaimi a si. 

A caan cu December thla ah a si. Yangon cu a nuamh silingte a si. LBC Krihfabu zong Christmas thla a si caah pumhkhomh a nuamh siling a si. Ka hawi le cu Laitlang ah an tlung dih i, keimah lawng a sawng ahcun ka um. Ka um cu a har ngai tawn. Ca zoh ding a tam caah le tangka a dih tuk ding a si caah, Yangon ah ka umnak a si. Yangon zong cu a kik ngai i, a numah siling te a si. 

Voikhat cu, zingka te ah kan innchung ah nitlang toh pah in, ca ka zoh. Ka cazoh lio ahcun, thlalang nih  "zuk...zuk" tiah a ka cerh lengmang. Ka van zoh i, kan innpawng nu te cu a si. Ka zoh paoh ah a zam. Ka zoh lo paoh ah a ka cerh lengmang.

Cu nute cu dah? A mui le aa dawh fawn; a ngo tuk fawn. Mirum chung an si fawn. “Kawl fanu i mah cu ti um cu? A hngaltam ko?” tiah ka hei ruat. A ngakchiat ngai caah uar ding phun cu ka lung ah a um lem lo nain, khati a ka tuaitam lengmang tik ah, a hnu ahcun ka thinlung tein ka hlam ngai ve awn. Cucu minung phung asi ko rua? Zan ah thang nawn in ca a ciah tawn thawng ka theih lengmang. A ca ciah thawng ka theih lo caan ahcun ka hlam ve than. 

Voikhat cu ca a zoh ve khi a lang in ka hei hmuh. "Thlalang in a ka cerh ve ko kha te. Ka cerh ve lai" ka ti i, ca zoh thiam lo in ka cerh ve. Amah cu ka cerhmi aa theihter lo bantuk in a um peng i, sau taktak ka cerh. Cuiticun kan i chawn bal lo nain, kan thinlung cu aa ngamh ngai. Ca ka zoh caan i a rak zoh ve tawnmi kha, a zoh ti lo ahcun ka thinlung in ka hlam ngai tawn. Cucu uar kan ti hnga maw? Minung phung asi ko kan ti hnga dek?

Cu Yangon nute kong ka ruah ah, ka lung ah a tap ngai tawnmi thil pakhat a um. A umnak inn cu motor pahnih an ngei. Yangon i taih inn ngeih le motor pahnih ngeih cu an rum ngai tinak asi. Inn ngeitu nuva cu a nakmi Kawl an si. Cu an fanute lawnglawng cu an innchungkhar i a ummi fa a si. Fa dang an ngei lo. Cu nute cu motor in sianginn ah an thlah i an don. Zeitik hmanh ah ke in an kalter bal lo. Aleng in zoh ahcun an fanu te cu an dawt tuk ti awk khi a si.

Asinain, cu ngaknu te cu a thilri te khi a chia ngai. Khuasik ngai zong ah angki lum khi aa hruk theng lo. “Angkilum a ngei hnga lo maw? Anu le pa nih an cawk piak hnga lo maw? Hi tluk rum ko tung thil chiahru tuk he an chiah?” tiah ka lungthli in ka ruat theu tawn.

Cun mirum fanu asi ko nain, a mithmai zoh ah ni a tlang tuk lo. Aa nuam lomi a lo. Ka hmuh caan paoh ah mithmai chia nawn  tein aum peng. Cun a nu le pa vial an nak ngai tung? A nih le a ngo tuk fawn i, aa dawh tuk fawn. Hihi an fa taktak asi lo men lai. An i cawmmi maw asi maw? An sin um dah?  ti khi ka ruat tawn. Sin um asi lai ti le a ngakchia fawn; sianginn a kai fawn. Asi kho lo ka ti, ka lung ah a tap ngai tawn.

Laimi si ahcun ka lung a fiang lomi vialte ka hal dih hnga. Kawl le asi fawn tung. Va hal awk a tha lo. Cuticun ni le thla an liam lengmang.  Asining ka zoh ah ka fiang lo. A umtu le thil hrukaih zoh ah cun, mirum fa a lo lo. Zaang fak ngaite khin aum. Cun hawikomh nuam ngai le mi tluangtlam ngaite a si.  Nih a huam. Amah cu mi hmai panh te a si. Hi nute hi zei bantuk minung dah asi hnga ti khi ka ruat lengmang. Cuticun ni le thla cu duhsah tein an liam.  



Voikhat cu 1995 January chuakka, Kum Thar khawh te khi a si.  Zanlei 2 pm hrawng ah inn chung ah ka thu ko. Ca ka zoh. Ka hawi le cu Laitlang ah an tlun caah an phan rih lo i, an um lo. Sianginn khar a si rih. Cu lio ah, kan inn cu lung in, “kong..kong…kong” tiah a van i chep lengmang.

“Mi zeidah an si hnga? Cuti inn cheh piak cu?” tiah ka van zoh. Kan inn pawng tlairawl nu te cu asi ko. “Ra zawkzawk” tiah a kut in aka auh. An inn kulhnak pawng ahcun ka va kal. Tawng khat tein a cauk vialte cu a sanh i, van la ta; nan inn ah rak ka chiah piak” ati. Ka lau tuk cang. Lak le ka ngamh lo. Lak lo le mi nih an kan hmuh ahcun hihi a pawi tuk lai ka ti. A ruah awk ka thei ti lo.

Mi chahnak kan um caah, kan rauh deuhdeuh le a kan theih lai ti ka phang fawn. Mi thawngpang cu a ring lulh ko. Nichuah, nitlak, chaklei, thlanglei ka zoh. A sullam zong ka thei kho fawnlo. Ka thin a phang ngai i khuaruah awk zong ka thei ti lo. Mi nih a kan hmuh ahcun, “Hi nu te hi a fir” tiah an ka ti lai i, khuaci ka muih tung lai ka ti. Ruah lo le ruah lo ka ruat. Caan sau ngan deuh le a piahtana kho ngai ding kan si cang cang.

“Hi nute hi piahtana harsatnak a ngei ko lai hih?” Bawmh a hau ko lai?” ka ti . A tawng cu ka lak zawkzawk i, kan inn chunglei ah ka kalpi.

Mi nih a kan hmu hnga maw ka ti. Ka thin a hlawk in aa hlawk. Innchung ka phak hnu, suimilam pakhat tluk ah, a ke in a ra i, kan inn chung ahcun a rak lut. Cu le bang ahcun ka thintur a zual.
Mirum le an si fawn. Kan innpa nih le an theih dihmi hna an si fawn. Payapuai te hna ah an chungkhar ning in kan umnak innpawng ah a ra lengmangmi an si fawn. Kan inn kamte ah Kawl dawr fate tuahmi an um fawn. Minung fa thinphan lo awk a tha lo. Cuticun kan inn chung ahcun, amah le keimah te lawng cu kan thu ko. A nih tuang ah a thu; kei ka cabuai todan ah ka thu. 

A mui ni le aa dawh tuk. A ngo le a ngo tuk fawn. A pumrua le duh a nung tuk. Cu bantuk minung hna, kan sawng chiate chung i a van luh khi ruah ah khin, “Zan khuamui siling i thlapa var taktak a rak chuakmi bantuk asi.”

“Na min a ho dah asi?” tiah ka hal.  “Tin Za” ka si tiah ati. 

Ruah lo tuk in kan sawng i a rat tik ah, ka lau tuk. Kan inn ahcun sau umpi awk a tha lo. Khulrang in thil pakhatkhat tuah zawk a hau ti kha ka ruat. “Ziah nan inn in na rak chuah? Zeidah tuah na duh? Zeidah kan bawmh khawhmi um?” tiah ka hal.

“Ka umnak inn hi ka pate le an si. Ka nu cu  N. Dagon ah a um. Ka nu hi a si a fak tuk i, a ka cawm kho lo i, ka pate le nih an ka cawm. An sin um hi a har tuk le ka nu sin tu ah kal ka duh. Ka nu sin ka kal hlan ah, ka ni le sin ah kal ka duh” tiah a ti.

“Na ni le cu khawidah an um?” tiah ka hal i, “8 Miles ah an um” tiah a ka leh.

“Na kal thiam lai maw?” ka ti. “An address lawng ka theih i zeidin dah Bus cit ning asi timi ka thei lo. Na ka thlahta kho hnga maw?” a ka ti than.

Cucun ka thinphan a zual. Zeicatiah kan pahnih in bus station tiang va kal than ding asi. Thlah lo le a kal kho ding asi fawn lo. Ka inn i umter peng ding le asi kho lo chinchin fawn. Inn in van chuahpi ding le ka ngamh bak fawn lo. Kan inn pawng lam zulh a hau ding a si. Mi an hlunghlai tuk. MIT siangngakchia he zong ton a fawi. A mah chungkhar he ton sual a fawi tuk fawn. 

Cuticun a mah ruang ah tartahak in ka um ko cang. Zeitin dah thil ka tuah lai? Amui dawh te he..cucu keimah lehlam thilrit a ka khinh ko cang hi ta tiah ka ruat pah lengmang. Aa duhmi le aa uarmi va si ahcun harnak va ton zong ah a pawi ka hei ti lem hnga lo. Cucu kan si fawn lo. 

Cuticun kan innchung ah a um sau deuhdeuh le tihnung deuhdeuh khi a si. A pawi ka ti tuk. A nulepa sin va chiah than ti le a zaam cangmi cu, "harnak a ngeihmi a um caah a si lai" tiah ka ruat i, ka zaang a faak than hawi. Mi nih an hmuh lai ti le ka phang tuk fawn. Sau tuk chiah ahcun harnak kan tong lai ti ka phang i....

“A si ahcun a rannak in, hika inn in kan chuah a hau. Na cauk bag le tawng hi na kalpi lai maw?” tiah ka ti.

“Ka u. Ka kalpi ngam lai lo. Zaangfah tein rak ka ken piak ko law, a hnu ah ka Ni he kan rak lak te lai?” tiah a ti.

Kan pahnih cun kan i tim. Bus station umnak Map ka suai piak. Cuka hmun cu KM khat deng a va hla rih. A mah lawng cun a zei ti hmanh in a kal thiam ding a si lo.

Kai thawh i, 

"Tin Za tha tein ngai law kan chimh lai. Kan inn in inn 6/7 dan hrawng lansung tiang khi nangmah te lawng, tuition kai bantuk in, huamsam tein rak kal chung. Cun na hnu in kei ka ra lai. Ka chawn lai ci. Cun ka hnu in ka zul law, Bus station tiang kan thlah lai” …..tiah ka ti.

Kan inntual lam cu, mi an cat setsai lo. A nu le pa nih an kawl cang hnga maw? Kan chuah lio hna a kan hmu sual hnga maw? Plastic sehzung ngeitu hna nih an kan hmu sual lai maw? Kan innpa Kawl dawr tuahmi, Karen chunkhar hna le Phungki pawl nih an kan hmu sual lai maw? timi ka ruah ah, ka lungre a thei taktak. Ka thin a domh in ka domh. Kirter awk le a tha lo. Ka sin ah um ko ti awk le a tha lo. Leng chuahter ding le ka ngamh fawn lo. Zeitindah ka tuah ne lai ti a ruah awk bak ka thei ti lo. 

Mi nih an kan hmuh ahcun, loh bak ding asi. A sawilem le a zampi ti in an ka ti dingmi khi 100% a fiang. A si lo mi si ko nain, an kan tlaih ahcun ka phisin khawh ding khi a si lo. Upadi in a luat kho ding ka si ti lo. Kan tlai hna sehlaw, Thau tiang ka thangchiat dingmi ka ruat fawn. Ngaihlahmi a tam tuk.  Ka thin a phang tuk. Phungki zong cu an innleng ah an thu tung ko hna. A hlat cu an va hla pah nain, a lang in theih khawh tuk khi kan si. Zeicatiah Phungki pawl cu Tin Za a umnak inn a nulepa he aa thei tukmi cu an si hna. Thinphan ding a tam tuk. Zungtum caan le a si cang fawn. Tlai ahcun bus cung umkal a cah tih a nung hawi. 

Lam ah mi ka zoh hna. Kan innpa ka chek hna. Mi an tliantlai lio bik caan ka zoh. Ka thin a phang i, umtu awk ka thei lo. A rem bik caan ka zoh i, mi an tliantla liote ka thim.

"Tin Za...Tin Za... ra zawk. A rannak in kan kal a hau. Va chuak zawk" tiah ka ti i, ka chuahter.

An innlei kalmi lam cu zulh awk a that lo caah, lam dang in kal ka fial. Chaklei Insein lei lamphawk in ka kalter.  Cucun a hnu in lamhlat nawn tein ka zulh. Ka thin a tur bak in a tur. Ka hei zoh i, lam a thei setsai lo i, laklawh ngai in a um khi ka hei hmuh. Cu cun ka thintur a zual. 

“Kan innpa Kawl hna nih an kan hmu hnga maw? Kan inn in a chuah lo hna an hmu sual hnga maw? An kan thei sual lai maw? An kan theih ahcun, minungfir hmuh in,  an ka tlaih lai a fiang ko?” tiah ka thin a domh in ka domh. "A tlikzampi tiah an ka ti lai i, taza an ka cuai lai i, ka lo bak ko lai" tiah ka ruat. Ka caah tih a nung taktakmi thil a si. 

Vanthat ah, kan innpa Kawl dawr tuahmi hna cu, innchung ah an rak luh lio ngelcel te ah, Tin Za cu an inn hmai lam a tan khawh. Ka hei zoh ko. Ka thin cu a vamh in aa vaam.

Caan tlawmpal ah, a hnu ka hei zulh. Leng chuak bal lo kan ti cu, ka phak hlan dungdang ah, kalnak a rak thei ti lo. Lam fate aa tonnak ah a rak dir ko. Kalnak a thei ti lo. Lansung ah lungawtawm in a rak um. 

Ka van hmuh i, ka thinphan a zual.  Zeicatiah cuka hrawng cu dawr fate a um i, minung an i theih ngai hna caah asi. Chonh le ka ngam lo. Chonh lo awk le a tha lo. 

Ka va phak cang in a thei lo bantuk tein, ka chawhkanh. "Ka hnu in ka zul" tiah ka mit le lu in ka piah i, lam hlat nawn in ka hnu in a ka zulh. Cuticun ka kalpi. MIT pawng sekhan kan van phak cun, MIT hrawnghrang siangngakchia lutchuak le michawkvai an tam caah, aa thei kho ti ding a si lo i, ka hna a ngam zuahmah. Ka thilrit a zaang thluahmah. Cuticun “B.O.C Bus station”  tiang ka va thlah.

BOC cu Insein khua hlunhlainak cem ah a ummi asi. MIT kam te asi. MIT cu, bo nawn te ah a um caah, zanlei sang ahcun thla a panh tuk. Nika liam lai khi aa dawh tuk tawn. Zanlei sang ah lamlengmi tampi an um i, lung a leng ngaingaimi hmun a si. 


                      
Insein lampi hmunkhat


Insein lampi kam ummi BOC kan phak ahcun, ni cu a zanlei cang. Lampi ahcun bia ka ruah ngam lo. Piahtana kan chuak sual lai ti ka phan caah asi. 

Nika cu a niam ngaingai cang i, tlak aa tim pah ciahmah cang. Kan i chawn ngam lo nain, kan thinlung cu a cawlcang veve ko. Minung aa chawkmi an tam. Bus car cu pakhat hnu pakhat in an ra i an kal hna. Kan pahnih in artlang in kan dir ko. 

“Hika hin, Bus number(?) cu zat cu hngak law? Tamaing 8 Miles tiang na va cit lai?” tiah ka ti. "Ee" ati i, cuticun bus cu kan hngak ti. Kan thinlung ah khua cu kan ruat veve cio. Anih zeidah a ruah hnga cu ka thei lo nain, kei cu khuazaza ka ruat. 

Riantuan nak in inn lei an an lun silingpi hna asi i, line car cu arawng aphunphun in an van dir hna. A ruah hlan ah kan i then cang lai ti kha ka theih. Ka thinlung ah ka zaang maw a fak? Ka ngaih maw a chia? Ka lungre maw a thei? Ka nuam dah?" timi a ruah awk ka thei lo. 

"Tin Za" tiah ka van auh. A mit pum ririai tein a ka zoh. Cucu siarem tein naihte in ka zoh cu asi. A ngo pin ah a hmaithlak aa dawh tuk; suai chawmmi tunu te bang in zoh cim lo khi asi. A ngo, a hmaithlak a sau, a hnar a zum, a mit a pum i a tial in a tial. 

Tuan ahcun lam hlat lawng in kan rak i hmu tawn i, aa dawhnak naih tein ka rak hmu bal lo. Atu ah naihte in ka van hmuh tik ah, aa dawh tuk. Zei he hmanh tahchunh awk a tha lo. Tin Za hmai dawh te ka van hmuh ahcun, hla lak ah hla dawh bik an timi Solomon Hla  khi ka thinlung ah a chuak:

In zoh rih lang...ka dawt na muisam a tha.....
Naa dawh tuk ah zei na lo dah maw?...
Na mitte zong thuro mit lo ai hna dah ngai....

(Solomon Hla 1:15)

Bus cu an van ra thluahmah. Ka thawh i, "Tin Za"tiah ka van auh. "Ready te in um mu. Bus a phan deng cang lai! Tumnak na thei lai maw?" tiah ka hal.

A mit tial ririai tein a van ka zoh than. A mithmai a panh lo, A thinlung ah a khing a rit timi hmuh khawh asi. Asinain aa zuam i, "Asi. Tumnak ka theih ko lai, ka U" tiah a ka leh. A panh kho lo nian aa panhter hramhram. A nih ah duh a nung chinchin. Ahmur cu pum viviai te le chah nawn tein a um. A siam in siammi a lo. Hmursenzi zong aa thuh lo nain a hmur cu sensirsiar tein..zoh cim lo a si. 

Solomon nih amah hlah maw hla a phuah ti tlak in, Solomon Hla cu ka thinlung ah a chuak than:

Hei zoh tuah lang muisung ka dawt...
Muisung tak si ko ai hrim...
Hmai khuh dumdang puanzar khuh toi ah...
Na mitfang nih tial ririaite in thuro mitfang bang...
Sawm ai sam zong Gilead tlangpar ttum...meheh run ko lo ai hna...
Na hatian nih remkaw...hmul riamka tuute bang in..
Zoh remlo in pakhat hmanh um lo, kem cingcengte in...
Na hmurte nih sensiiriar in...maanla te khi bang
An dawh nunnem iangngei hmurka tha...

(Solomon Hla 4:1-3)

Cuti khua ka van ruah lio ah, "Tamaing...Tamaing...8 mines...8 mines" tiah an van aumi ka van theih in, ka lung a van i thleng than.

"Tin Za, Bus a phan cang. Hika hin va cuang" tiah ka ti. 

Mi an tum dih cang ka in, "Ka lawm" tiah din tein a chim ta i, lunglawmhnak mit he a ka zoh i, bus ahcun a kai.  Mi an tam caah, bus chung i mi lak ah aa tenh colh i, cuticun a lo cawlh. Ka hmu kho ti lo.

Tin Za he kan i tonning le tu chun ni tiang asi ning ka ruah ah, tuanbia phuah cawpmi a lo. Kumpi kum khat dengmang inn pa kan rak si. Kan i thei lo nain, kan thilung cu a rak i chawn lengmang. Hi tluk ngaknu dawh, tu chun te ah ka sin a phan i, cu a phanhmi zong cu, thil nuammi ruang ah asi fawn lo. Duhnak ruang zong asi fawn lo..............

Caan tawite chung ka pawng ah aum i, atu caan tawi te ah a kal than, i a lo than. Ka min zong a ka thei ta manh lo. Hihi zeidah asi hnga? tiah ka ruat. 

"Bus chung a kai dih hnu ah, khua ka ruat. "Atu hi maw kan i hmuh a donghnak asi ko ne lai?" tiah.

Bus cu a chuah rih lo caah, bus dirnak ahcun ka dir ve ko rih. Khuazaza ka ruat pah. Hi nu te hi, zei bantuk minung dah asi hnga? Kan innpa mirum hna fanu te ah ka rak ruah. Asinain a muisam le aa dawh tuk fawn. Fanu fang khat asi nain, a thilhrukmi a chia nawn tete an si fawn? A nu le pa kha an hmai a rak panh setsai bal tawn lo. "Ziah hi nu te hi zaangfak te asi? Mirum fanu zong a lo lo. A angki tete an pan tuk, a khua a sik hnga lo hme maw?" tiah ka rak ti tawn mi kha, atu hihi maw asi? Zei bantuk ngaihchiatnak dah a ngeih hnga? ti khi ka ruat i, ar ko in ka dir. 

Krihfa kan sinak ah, zaangfahnak thinlung ka van ngei thluahmah. Zaangfah zong ah, zei hmanh tuah awk tha a um fawn lo.  

Cuticun ka thinlung khuazaza ka ruah lio ah...........

"Tamaing....Taming" tiah driver bawmtu pa au thawng nih, ka thinlung a van ka hlauh than. Tin Za citmi bus ke cu duhsah tein an ril i, Bus cu aa thawn ziahmah i, Einsein Highway lam dingpi cung  ahcun bus cu a kal zuahmah. 

Ka dir bu in, a hnulei in bus cu ka hei zoh peng. Duh sah tein a hme chin lengmang...a hme chin lengmang...Liam lai sian lo zong ah, Tin Za phurtu bus cu a liam riangmang. Nitlaklei ah khuadawm sentete tang ah, January Nika dawh te zong cu a van liam riahmah ve.  

Tin Za thinlung ahcun zei a um cu ka thei lo. Asinain kei ka thinlung cu dar bang kuai aa zal. "Ee, Tin Za atu te kan i tong; atu te kan i then than. Atu hi maw kan i ton a donghnak asi ko ne hnga?" ti ka ruat. Khingrit taktak le lung nuam lo taktak in inn lei ahcun ka tin. Ziah mah cu a duh zong kan i duh lo mi? Mah tluk cun ka thinlung a kuai hnga ka ti. Ka lungthin aa tuai taktak. 

 Khatlei ah ka lungretheihmi thilrit pi cu ka thumh nain, Tin Za kha zei bantuk minung dah asi hnga? A nunnak ah zeidah a cang hnga? Hi tluk muidawh tung le cu ti nunnak lungrethei um cu a va pawi hringhran dah? Minung sining hi aw tiah ka ruat pah. Mirum i kan rak ruahmi hna zong, an rak i nuam theng lo hme hi ti zong ka van ruat. 

Innlei cu duhsah tein ka van tin. Zanlei sang asi. Khua cu a mui pah ziahmah cang. Inn ka van phan. An inn lei cu ka hei zoh. Voidang ahcun, zanchiar tein a aw ringlengmang i, ca a zoh tawnak khan te cu, mei a ceu ti lo. Mui dimdiam tein a um ko.  An inn cu, “King dimdiam tein a um.” Zei thawngpang hmanh a ring lo. An innkhar aa khar dih. A umnak inn nu le pa cu an um ko nain, zei thawngpang hmanh ka thei ti lo. Atu lio ah a nu le pa nih zeidah an va ruah ve hnga? An fanute hi an kawl hnga maw? An lungre hna a thei hnga maw?"  ti ka ruat.

Zan cu a hung tlai chin lengmang. Minung thawng zong a dai ziahmah. Zan 9 hrawng asi cang.Voi dang ahcun, atu tik ah Tin Za cu a khan te ah ca a zoh zungzal. Voidang ahcun, atu tik ah a carel thawng tete ka rak theih tawnmi kha, zei thawng hmanh a leng ti lo. 

Ca a zoh tawnnak innkhan te zong cu, mei aa vang ti lo. Mui dimdiam tein a um ko cang. A ihnak khan mui dimdiam tein a ummi ka van hmuh tik ahcun, "lung a leng tuk hringhran." Ziah hihi maw duh kan timi asi hnga? tiah ka ruat. Ka thinlung tein ka hlam. Zeicatiah asi tawn mi asi ti lo caah asi. A um tawnmi kha a um ti lo!

Khua a mui tuk cang. Innpawng ah va le khaubawk tuktak awnh thawng lawng nih kan pawngkam cu a khuh dih. Ka hawi le an um lo. Um har asi. Tin Za kong ruah asi. Keimah te lawng king dimdiam tein ka um. Zanriah ei zong ka huam ti lo. Ka ka a thaw lo nain, tlawmte ka bar i, cuticun ka cabuai ah ngawi ko in ka thu. Zei tuah awk ka thei lo. Ka lung khi a tha lo tuk. A zaamnak a ruang ka theih lo tik ah a si.

Atu a va phan cang hnga maw? Lampi hna ah a tlau hnga maw? Kan innpa a nu le pa nih teh zeitluk in dah an hlam hnga? An um lo kar a zammi asi tikah zeitluk in dah an kawl hnga? Asiloah cakuat hna a tial ta hnga maw?" ti in, khua zaza ka ruat.

Khua nih a sik. Hawi nih an um lo. Voidang ahcun atu tluk hrawng ah, "Tin Za" ca rel thawng cu a rak thang ngai tawn. Um har a rak pheng ngai. Pa kan si caah ngaknu dawh te carel cu, fiakfai va onh ngaih a nuamh bantuk in, ka hnakhaw chung ah ngaih a rak nuam tawn.  

Asinain, tu zan cu a king dimdiam ko cang. A carel thawng kha ka hnathlam ah a leng peng. A caan ah, thla-lang a ka ceuh i heh tiah a ka dehdai kha ka ruat. A caan ah, ca ka zoh lio i, an inn area chung in keimah he naih tein ca a rak zoh ve tawn kha ka mitthlam ah a cuang. 

Zanleisang deuh asi tik cah, a nu le pa nih, an auh tawn i, huam setsai lo in innchung aluh tawn kha, ka mitthlam ah a cuang hringhran. 

A caan ah tu chun i a cangmi tuanbia vialte le bus station i ka va thlahnak vialte mitthlam ah an cuang dih....Atu khawika dah a phak hnga? Inn a phan cang hnga maw? ti in, ka thinlung cu Tin Za sin aum cang? A nu le pa sin aum can? A kalnak ding a Ni le sin a um caan? A umnak inn thing le ihnak khan i a um can ti in, ka thinlung cu ..

"Pangpar tlanmi palep te bang, a kenkip ah a zuang."

“Tu chun thil cangmi cu zeidah asi ee?” tiah tu chun tonmi thil nih ka lung a ka nuamhter lo. Ka ngaih a chia bantuk.....ka lung a leng bantuk in ka um. Kai fiang lo. Nute zong cu ka zaang a fak bantuk in ka um. Cazoh ka lung ah a chuak ti lo. Zeihmanh huamnak zong ka ngei ti lo. Cu nute kong ka ruah ah, ka lung ah a tap peng. “Kha nu te kha zeibantuk minung dah asi hnga?” ti kha ka thinlung ah la bang aa zel. Amui nih aa dawh tuk fawn i, mithlam ah a cuang peng. Mah nute cu kei ka caah zeidah aa saing?’ ti khin van ruat i, philh ko ning law ka ti zong ah, philh awk a tha lo.

“A pawi tuk ee” tiah ka ti.

"Pathian sin ah thla ka cam piak." Ka it i ka hngailh kho ti lo. Ka pawng ah aummi a cauk bag le tawng chung cauk ka van zoh ah, ka lunglen a zual.

"A kal lai teah, hi cauk hi zei tik dah na rak lak lai?" tiah ka ti i, "Ahnu ah ka rak lak te lai" ti lawng a rak ka leh kha. Hi cauk ah hin, amah kong theih khawhnak zeital a um hnga maw? Cu nu te cu dah ngai? Ka thinlung a ka tuaitam ko tiah ka ti.

Amah a um tung lo. A um lo kar i a cauk bag zoh piak le a tawng cauk le tuktak zoh piak kha a tha lo i a thiang lo tiah ka ruat.

Sihmanh sehlaw, a muisam, a sining le tu chun thil cangmk nih ka lungthin a ka tuaitam tuk cang i, a zei si hmanh ah ah, a cauk bag le cauk pawl hi ka zoh ko hnik lai? Hi nu te hi zeibantuk minung dah asi hnga? tiah ka ruat i, ka duh tuk lo lem lo nainn, a bag le a cauk tawng chung cauk cu ka hlai hna.

Camipuai caah a herhmi cauk le a sianginn kainak ca deuh lawngte an si. Hmun khat ah Krihfa ca phunphai tete an i tenh. "Ziah hihi Krihfa maw asi hnga?" tiah ka ruat i, ka lung ah "question" a tam chin lengmang than.

A umnak inn mirum hna le Buddhist an si fawn. Anih hi Krihfa maw asi hnga? A ca tete hi midang nih dah an pek sawhsawhmi asi hnga? Krihfa a rak si ruang ah hlah maw, kha ti khan a rak ka ngamh le a rak ka dehdai ngam tawn kha asi hnga? Ka theih a tlai tuk ko ne lo maw? Ziah thapek awk hnga tluk in thapek awk ka rak thiam lo asi mu tiah ka ruat.

A muisam le aa dawh tuk fawn. A rak ka capo tawn lio ah khan, Krihfa a rak si caah hlah maw lunghngalh in a rak ka capo tawn hnga? Ziah Kawlnu tlairawl te nih hi tin a ka capo ngam hnga tiah ka rak ruah mi kha, Krihfa asi ruang ah hlah maw a rak si hnga?

A muisam zoh ah Kawl taktak a lo deuh lo? Tuluk phun alo fawn. Zei miphun dah asi hnga? ti khi ka ruat chin lengmang.

Hmunkhat ah cakuat pahnih te aa tenhmi khi ka hmuh. Sanh ding in a tial nain sataih ah thla lo in aa chiahmi asi. Thil pakhatkhat ruangah thla lo in a rak um ko rua. Cu cakuat aa tenhnak cauk te ahcun amah hmanthlak te zong aa tenh chih i, a um ve.

Cu cakuat bawm cu ka phoh i ka rel.....A cakuat pakhatnak cu a hawi nu Japan ram, Tokyo khua i a ummi Thuza sin i cakuat a tialmi asi. Cakuat ahcun, a hawinu a ngaihnak, an rak i dawtnak, an si a fah tuknak, anu a harsatnak le a pate te sin i a ummi aa nuamh lo nak kong vialte a tial dih. A cakuat hi nihin ni tiang, ka thinlung ah a caam peng ko.

Dear Ka Hawi Thuza,

Na dam maw? Japan ram kong ca na ka kuatmi ka hmuh i kai lawm tuk. Kei zong tang (8) ka kai ve cang. Sanchawng No. (  ) cu zat ah ka kai. Ka pate te sin ah ka um. Ka pate te nih, leng chuah zong an ka senh lo i, cakuat zong hi sataih thlak hi ka thla kho lo. Sianginn ah motor in an ka thlah i, motor in an ka don. Leng ah hawi he zong ka kawm kho lo. Thuza a har tuk ko. Hika hin ka chim duh ti lo ee. 

Tuza aw...kan ngai tuk cang. Ka nu cu a si a fak tuk le ka nu cawm ka duh ko. Ka nu nih a ka cawm khawh lo caah, ka pate te sin ah ka um. Mi sin um cu a mah duh in um awk a tha lo. Ka um a har tuk. Midang len zong an duh lo; keimah zong leng ah an ka chuahter lo i, a har tuk. Ca zong kan kua kho lo. 

Ka nu hi a upa cang. Cawmtu a ngei lo. A si a fak tuk i, ka nu zoh le cawm hi ka duh tuk ve cang. Cucaah Japan ram ah van ka au law, na sin ah rat ve ka duh ko. Tangka cu zeihmanh ka ngei lo i, na sin ka phanh tikah rian ka tuan lai le kan pek ve than ko lai. Zei kan ti hnga, ka hawi, rak ka bawm ve ko. Ka nu ka zaang a fak tuk. Na sin rat ka duh ve ko. A ngaih zong kan ngai tuk ee...Tuza aw..

Ca a tialmi cu vial hrawng in a ban. A lim thlu ta lo. Sataih zong ah a kua lo. A cakuat ka zoh i, a sining ka van fiang deuh ziahmah. A nu hi mi sifak asi. Anu nih a zoh khawh lo ruangah, a pate sin ah a chiahmi asi ti kha hmu khawh asi. Mirum fanu asi ko nain, a mithmai a chia nawn...a thilri chia nawn tein a um..tiah siarem lo ngai in ka rak um tawnmi kha, a cakuat ka van hmuh cun ka fiang ziahmah.

A dang cakuat pakhat ka van rel than. Cu ca cu a nu sin a kuatmi asi. A nu cu N. Dagon ah a um. Anu address cu tha tein a tial nain, cakuat cu a sanh thai lo. N. Dagon a umnak inn hi, Hmunlipi Pu Ngun Su te inn he an rak i hlat tuk lo ding khi asi. Anu sin cakuat a tialmi ahcun:

Dawtu Amu,

Na dam maw? Na fanu te zong ka dam ve ko. Amu, ka nu le pa nih an ka dawt tuk ko. Sianginn ah motor in an ka chiah i an ka don. Leng bel ka chuak kho lo. Hawikomh zong an duh lo. Cakuat kan duh tuk ko nain, cakuat thlaknak zong caan ka ngei kho lo. Ka nu le pa nih an ka chuahter duh lo le zeitiawk ka thei lo. 

Amu, ka khua a sik tuk. Thilri zong ka ngei lo. Angki lum ka ngei lo le zinglei le zanlei ah ka khua a sik tuk. Amu, na har tuk zeihmanh ka chim ngam lo. Amu, na tha rak chia hlah mu. Ka upat tik ahcun keimah nih kan zoh te ko lai. Na fanu ca ka zuam ko. Amu, a si khawh ahcun ka pate te sin um ka huam ti lo. Nangmah sin in sianginn kai ka duh ko. Hika um cu an ka dawt tuk ko nain, a har tuk. Ka thinlung a nuam lo. 

Amu, asi khawh chung in hawng ka la than ko. Zeitluk in na har zong ah na sin te ah um ka duh ko. Amu kan ngai tuk. Ka mang ah kan hmuh lengmang le na sin ah rat ka duh ko. Phone zong kan chawn kho fawn lo. Ka pate te nih leng lei he pehtlaih an duh lo le Amu a har tuk. Kan ngai tuk ee. ......

Ca cu cu vial cu asi. Ka van rel dih. A thinlung a fahnak le a tuarmi vialte ka van hmuh tikah, ka ngaih a chia tuk. Ka mitthli a haak ko. Mirum fa ah ka rak ruah i, ziah hme thilri pan tete he a um tawn hnga" tiah ka rak ruahmi biahalnak kha a cakuat ka hmuh cun a van fiang ruangmang. Rak thei ninglaw tangka hmanh ka ngei lo chin ka rak pek hnga ti tluk in, ka thinlung a ka suk. 

Dawtnak um lo nak hmun ahcun...taihinn tang um zong a rak nuam lo hme hi...motor thatha cit zong dawtnak um lo ahcun thawngtla motor cit tluk pei si ko hi...dawtnak um lo nak hmun ahcun, zeiltuk tangka ngeih le rum ko zong ah, thil lum zunkhat ca te hmanh... cawksian lo in khuasik in pei a rak si ko hi....dawtnak um lo nak hmun ahcun....innlo tha le motor tha hna zong hi sullam an rak ngei lo hme hi... hi ruang ah pei..mirum fanu a lo lo, a thilri a chia tuk... amithmai apanhlo ee tiah ka rak ti tawn kha asi lai hi..tiah ka ruat.

Anu sin tialmi cakuat zong hi a kua thai lo. A nithla ka zoh le a tialnak November ah asi cang. "Amu" timi cu Karen holh asi i, "Ka Nu" tinak asi. Einsein ah kan um cah, Karen holh tlawmte cu kan rak theih pah.

Cu cakuat ka van rel cun, Tin Za hi "A nu, Karen, a pa Kawl asi; amah hi a nu hruainak ruangah Krihfa pakhat asi lai" timi ka van theih khawh.

Cakuat pahnih ka relmi cu, amah nawlpeknak a um lo caah ka lung cu a tha bak lo nain, ka lungthin a dai deuh ngai. Thla ka cam piak i, ka it. Ka ih bu in khuazaza ka ruat. Ka hngilh kho bak lo. Zeitik caan ah dah ka hngilh ti zong ka thei lo. Zingka teah kan innpa Karen hna dawng nih, "Saya..saya" tiah an ka auh thawng ka theih ceu in ka van i thang. Zinglei 8 asi cang.

Thaithawh ka chum pah. Tin Za tuanbia kong ka ruat pah i, lung nuam lo ngai in ka um. Rawl ka ei. Cucun ka hawipa Saya Bawi Er sin tal ah va kal ko ne ning ka ti i, amah sin ah ah ka va kal. Ka hawipa cu ka va auh i, nizan i a cangmi tuanbia vialte ka chimh. Ka sawng ahcun ka kalpi. Tin Za hmanthlak cu ka piah i a cakuat cu ka relter ve.

Saya Bawi zong Tin Za cu, a zaang a fak tuk ve.

"Pa Vung, ngaihchia tuk hei asi hi. Khuaruah tam taktak asi. A mui le aa dawh tuk fawn. A pawi tuk ee" tiah a ti i, ka hawipa zong cu, a cakuat a rel ah, a mitthli a haak. Zei hlei tuah awk a tha lo.

Cuticun a sianginn bag le cauk tawng cu ka sin ahcun a um peng. Telephone zong a ka chawn ti lo. A hlam zong a rak hlam ti lo. "Ka rak hlam te lai" tiah ati ko i, ziah hme a tu tiang a hlam bal ne hnga lo? Sianginn kai le a za deng fawn tiah ka ti. Nikhat hnu nikhat a liam lenmang. Zarh khat in zarh hnih ah aa thial i, a thla in a liam cang.

Ziah a tu tiang a rak lak bal hnga lo? Hihi rak laknak ding hmun a theih ti lo bia hna asi hnga maw? Zeitindah ka pehtlaih than lai? A Ni sin phan lo in a tlau hna asi hnga maw?" tiah khua zaza ka ruat.

Ati awk ka thei ti lo. Cucaah a cauk zoh than ko ne ning ka ti i a cauk cu ka hlai than hna. Cuka ahcun "Aunti" ti in telephone number pakhat te khi ka hmuh. Mah hihi a Ni cu a si theu lai tiah ka ruat. Telephone number cu ka tial i, Insein lei ah ka va kal. Telephone cu ka van auh.

Telephone cu an van tlaih i, "Anih ka si. Tin Za a ni le nan si maw?" tiah ka van hal. "Kan si ko" tiah a ka leh. "Tin Za a rak phan maw?" tiah ka ti hna i, "A rak phan. Atu hi kan mah sin in sianginn a kai than lai" tiah an ka leh.  Cu ceu cun ka hna a ngam. Dawtnak kan timi cu rihma a um lo. Miphun rihma a um lo. Minung siaherhnak, zawhruahnak, hnakkar tenhnak, bomh duhnak le nun-hromhnak a si caah, a Ni bia ka theih cun ka thinlung hna a ngam taktak. A thla deng in ka khingrihnak duak tiah a tla. "Aw..a tha tukmi Ni pei a rak ngei ko hi" tiah ka ruat i, ka lungthin a dam ngaingai.

Tamaing hrawng cu mirum an tam caah, a Ni le cu an nung kho deuh theu lai tiah ruahchannak ka ngei. Ka Ni tiah a ti ko nain, a pa lei chungkhat silo in a nu lei in chungkhat tu an rak si. Cucu telephone chung in minutes 4-5 bia kan i ruahmi chung in ka theihmi a si.

"A thilri kha zeitik dah nan rak lai lai?" tiah ka hal. "Tu zarh Nirukni ah kan rak lak lai?" tiah a ka ti.

Tangka zong ka ngei ve lo. Asinain Tin Za nunnak le sining ka ruah tik ah, ka zaang a faak tuk. Ka ngaih a chia tuk i, catlap pakhat ka tial i, cabawm pakhat chung ah tangka 100 Ks he ka sanh chih. Ca ka tialmi ahcun, "Na kong ka theih lo caah, ka lung a nuam lo tuk i, na cakuat kha ka rel. Rel ka duh lo naih, na kong theih ka duh tuk caah ka relmi a si i, rak ka ngaithiam. Na caah thla kan campiak ve. Ka dawtnak langhternak caah Ks. 100 te hi na sianginn kainak caah laksawng ka sanh chih" tiah ca tlawmte ka tial i, a cauk kar ah ka tenh.

Tin Za a ra theu lai timi ruahchannak he, lunglawm tein ka hngak hna. Chun 11 tluk ah, Tin Za le a Ni cu ka sawng ah an rak phan. A thlithup tein a hrial tein an i hrial i an rak ra.

Tin Za zong cu, skirt tawite he a ra i, Hong Kong nu te bantuk asi. A Ni cu a mui a dawh nain a thau ngaite. Cu ti cun ka sawng chung ahcun an rak lut. A thilri tete cu ka timhtuah hna i, an nifa in an chuak than. "Saya kan i lawm tuk" tiah an ti i, an lawi.

                                                            x x x x x x x x x

"Ka duh maw?" ti le duh asi lo. Asinain cu ni cu lung a leng tuk. Ka lungthin khuazaza a ruat. A tawng le cauk te cu ka inn ah thla khat dengmang a um i, zanchiar te ka rak hmuhmi te asi. Tu chun van lak tikah lungthin phundang te asi than hawi. A dai cangmi lunglen a van zual than hawi.

Cu chun-ni-tlak cu ka lung a nuam lo. A ni he ka sawng ah caan tawite an ummi te kha, kei ka caah cun zungzal philh khawh dingmi asi ti lo. A nih nih tah zeitindah a va ruah hnga?

Duh sah tein thal a hung chuak. 1995 BD kum II Camipuai kan van tuah. Ka tlun hlan ah, Tin Za umnak North Dagon anu sin va len cu ka duh ngaingai. Ani sin maw aum hnga? A nu sin dah ti ka ruat. A Ni umnak cu ka theih lo caah, A Nu (Amu) umnak ah seh ka va len ta hnik ko tiah ka ti. Nikhat cu bus ka cit i, ka va kawl hna.

Insein in Sule Paya ah ka tum. Sule Paya in N. Dagon ah bus ka cit than. Bus driver ka hal i, ka zawn ah tum law na ka in kal khawh a si ko lai tiah a ka ti. March thla a si caah a lin ngai cang. Bus in ka van tum i, cu ka area cu Pu Ngun Su te umnak he aa hlat tuk lo. Mi pakhat hnu pakhat ka hal hna. Saihka zong ka hal hna i, a hnu suimilam pakhat deng ka kawl hna hnu ah, a nu umnak innte cu ka va phan. A nu cu va dang a rak ngei cang. An inn cu canphio a si. A vam cu thing a si. An pa cu a rak um lo. Fa a dang pakhat an rak ngei cang.

An inn ka phak tik ah a nu cu a khuaruah a har. A lau taktak. Asinain Karen a si caah tlangcung mi veve cu a rak ka theih thiam. Tihnak zeihmanh a ngei lo.

Ka thawh i, "Zeibantuk minung dah ka si? Zei ti dah ka rat i zeitindah Tin Za he kan i ton le kan i theih? Tin Za a zamnak kong ah zeitluk in dah ka rak bawmh i ka lungre a theih?" timi kha ka van chim.

Krihfa a si caah, aa lawm tuk. A mitthli heh tiah aa hrual. Tin Za ka hmuh lo caah ka van hal. "Tin Za teh a ni le sin ah maw um ko?" tiah ka hal.

"A si lo. Camipuai a dih bak in, Mokok ah a tapa te a um le lungcawh hna thal chung ka va hlawhfa lai i, sianginn kai zaat hlan deuh ah ka rak tlung te lai tiah a ti le khar cang ka tein Mokok a tapa sin ah a kal" tiah a ti.

A nu  a ngaihnak cakuat le a hawinu Japan ram ummi ca a kuatmi hna le a nu cawm a rak duh tuknak lungput le a tu Mokok a kalmi tiang ka van ruat le Tin Za hi, mi men lo taktak pei a si hi. Ngakchia te a si nain tiah ka lung ah a chuak.

Tin Za nu nih cun, "Lakphak kan cah piak lai" a ti i, a ka cah piak. An har caah din hmanh khi ka lung ah a chuak setsai lo nain tha tein ka din piak. Bia zong sau nawnte kan i ruah. "Saya nangmah hme maw, tangka 100 a rak thentu le bawmtu na rak si? Ka fanute nih na kong a rak ka chimh le na rak bawmh le ka lawm tuk ee" tiah a ti.

Suimilam pakhat tluk ka thu i, thlacamnak le thazaang peknak tawite ka ngeihta. "Anti, ka tin cang lai. Laitlang lei tlung ding ka si cang le" tiah ka ti.

Tin Za nu nih cun, "Saya, na rat than tik ah, Tin Za zong a rak tlung than lai le pello tein rak kan lengte mu. Kan i lawm tuk ee. Pathian nih thluachuah in pe ko seh" tiah a ti i, "Aw, June thla sianginn kai zaat tikah ka rak in leng than te hna lai" tiah ka ti i, Bus station lei kal ding in ka chuak.

Tin Za nu hi, "Zeibantuk dah a si hnga/" timi va hmuh ruah le a si khawh ahcun Tin Za zong va hmuh le thazaang va pek kha  ka sia a herh tuk caah, N. Dagon tiang cu ka va kalnak a si. Lam a sau. Bus hngah a har caah a baat zong ka baa ngai.

A nu cu ka ton i, ka lung aa lawm ngai nain, "Tin Za zong ka hmuh te khawh men ko" timi ruahchannak zong cu ka ngei pah nain, kan i tong kho lo i, ka lungthin ah bau nawn tein Inseein lai ah lawi ka thawh than. Pathian nih rem a ti ahcun June thla sianginn kai than tik tu ah ka leng hrimhrim te hna lai tiah ruat bu in, Insein lei kalmi Bus pi cu ka cit i ka tlung.

                                                         xxxxxxxxxxxxxxxxxxxxxxxxxxx


March thla dih ah, Laitlang lei ah ka va tlung i, May thla tiang Laitlang ah khua ka sa. Thesis tial aherh caah, cauk cawk ah Aizawl tiang ka va kal. Cu chung vialte zong cu Tin Za sining kha ka ruat lengmang tawn. Miza tuk a simi nih cawlcang kho lo le lungthin kuai tuk i, sifah hi zaangfak tuk an simi khi a celh in ka celh piak lo.

May thla canceu in MIT kai ding cu ka van i thawh. 1995-96 cacawn kum asi. Ka final kum asi. Laitlang in ka thawhka tein ka thinlung tein ka riah chihmi cu, Tin Za le a nu va ton ding asi. Ziah tiahcun ka sia a herh tuk.

Kha tluk muidawh le ca aa zuammi te kha? Kha tluk in a fel i nu le dawtnak a theimi nu te kha? A nunnak zeidah a va lawh ve hnga? Anu he an um ti hnga maw? Sianginn hna a peh zulh kho hnga maw? Kha tluk in muisam dawh tung le sifah tung kha a va pam tuk hringhran dah?  Ka va hmuh hrimhrim lai timi ruahnak ka rak ngei.

Thau in ka van i thawh. Thangtlang-Hakha-Kalay in ka kal. Mandalay hotel ah zan khat ka riak.

Mandalay in tlanglawng ka cit. Mandalay in zanlei sang 4 tluk ah kan chuak. Kyakse khua hrawng kan phak ah, ni sencuar asi. Shan ram lei tlang dawhdawh cu alang in zoh ah lung aleng hringhran. Thlalang awng kam ah ka thu i, khuazaza ka cuan. Khuatete kan tan pah hna. Fingtlang zoh ah aa dawh tuk. Thlizil a hrang pah i, thal lio nilin khua-al lio kan taksa linmi vialte a van nem thluahmah i thinlung a dai tuk hringhran.



                         Yangon-Mandalay Tlanglawng


Duhsah tein khua cu a mui i, khawn maw ka tete ah meiceu khi ka hei hmuh pah hna.

Tlanglawng cungah zan khuadei khua ka ruat.

MIT ka kai lio i, a sawng ka umnak in, Tin Za he kan i tonnak tiang...an umnak inn in a zam khawhnak ding caah ka bawmhnak vialte le bus station i ka va thlahnak vialte......

A Ni he an rat i thil an rak laknak lio te hna le a Ni he bia kan i ruahmi vialte ka ruat than. Mah tluk muidawh le fim tung le sifah cu a pawi tuk ka ti. Minung nunnak ngaite hi a pam tuk. Zaangfak tuk a si ka rak ti. Ka sawng i a kaltakmi a cauk, a bag le a kuttial pum tete kha mithlam ah a cuang. Japan ram a hawinu ca a kuatmi vialte; bawmhnak a halnak vialte le a nu a hei dawt tuk tung ning le a nu zohkhenh a duh tuk ko nain zohkhenh khotu a si lo nak vialte, ka mitthlam ah a cuang thluahmah.

An inn i ka va len i, a nu nih "Tin Za cu Mukok ah a ta sin ah a va kal ta. Sianginn kai zat in a rak tlung than te lai" tiah a ti i, an sifah hmanh ruat lo in "lakphak a ka danghmi te hna" tiang ka ruat i, lungthin vialte aa let dih.

Muisam nih dawh; pumrua nih that; nu le dawtnak thinlung ngeih tung fawn le lungput tha tein a nungmi a sinak nunzia tiang zong, mitthlam ah a cuang thluahmah. Cuticun Yangon ka phanh ahcun ka va leng hrimhrim hna lai timi ka ruat. Cuticun zan khuadei lungleng ngai in tlanglawng cungah khuazaza ka ruat.

Ka thinlung cu pangpar tlanmi papep te bang a kenkip ah a zuang. Ka hngilh kho lo. Zan khuadei khua ka ruat. Yangon phanh lai ka ngaih. Phanh lai ka hngah hlang ngaingai.

Cuticun Mandalay-Yangon tlanglawngpi cu, nelrawn, tiva, hawr le khua kip i buta pakhat hnu pakhat tan in...Yangon lei panh in ..."cung...ung...cung....cung.." tiah din lo in a tli thluahmah.

Yangon lei ah tlanglawng dinlo in a tlik bantuk in,  ka thinlung zong Tin Za he kan i tong lai timi ruahchannak he tlanglawng tliknak lei ah a kal tluahmah ve.

Tlanglawng dinlo in a tlik bantuk in, Tin Za hi, "Khawidah a um ve cang hnga? Yangon ah maw um hnga? Mokok ah maw?" timi ruat bu tein, ka thinlung zong aa din ve lo. Cuticun Yangon lei panh in, ka kal thluahmah......!!!



-------------------------------

Nawlnak: "Hi capar hi a dik mi maw asi si lo? timi a hohmanh nih hal lo ding in kan nawl hna.























Hmurhuh Huh Lo Ruangah February Ahcun 500,000 An Thi Kho

Covid-19 zawtnak U.S a phanh ka tein CDC doctors le scientists le NIAID (National Institute of Allergy and Infectious Diseases) director Dr....