CRDP Hruaitu He Vahvaihnak

                                               CRDP Hruaitu He Vahvaihnak

CRDP hruaitu Rev. Neely Lai Uk cu June 18, 2012 ah Columbus, Ohio a rak phan. CRDP an riantuannak vialte a kan chimh tikah, lung aa lawm tuk. CRDP caah, ruahnak zeital a kan pe kho ve hnga maw timi ruahchannak he, a cam chungah thil theihtlei tete kan va zoh hna.

Bob Evan Dum

Cawn Nithumni (June 20) zingka tein, Columbus in meng 98  hlatnak ah a ummi Bob Evan Farm ah kan va leng. Bob Evan cu 1953 in, minung pakhat Bob Evans timi nih lamkam ah a tuahmi eidin dawr fate in aa thawkmi a si. Nihin ni ahcun states 23 ah eidin dawr a um. 2009 ah riantuantu 49,000 an um.  Museum tha ngaite an ngei. Salchan lio innlo museum tete le belkheng tampi a um. Khuate te asi ko nain 2011 ah minung 19,000 hrawng nih cu museum cu an rak zoh ti a si.

 Bob Evan Company aa thawknak inn

Dayton Khua Ah

June 21 (Thursday) cu Dayton khua i tuanbia robuk pawl zoh ding in kan kal. Dayton cu kum 10 sianginn ka kainak khua a si. Vanlawng siamtu the Wright Brothers khua asi. Cash register an sernak, motor amah tein nunternak (self-starter) an sernak khua a si caah, khua minthang le tuanbia a ngei ngaimi khua a si.

 

                      Dayton Kualaili

Pakhatnak ah Hawthorn Hill (The Wright Brothers inn) kan va zoh. Dayton khualai kamte, tlangbo cung, mirum sang ah a ummi asi i a ropui taktak. Inn dawh taktak a si.

Cun the Wright Brothers nih a voihnihnak an rak sermi vanlawng umnak, Carolton Historical Park ah kan va kal. Luhman $10.00 kan pek. Motor hlun le thil hlun tampi an zuarnak hmun asi caah, luhman a um. Thilthlun phun tampi aum.  

Carillon Park Darkhing Suimilam

 Cu hnu ah, The Wright Brothers Cycle museum kan va zoh. Cuka ahcun, The Wright Brothers hriamnam phunphun an chiah hna. A liamcia kum 100 kuakap Wright te u nau hmanmi thilri, hriamnam le an cycle te hna hmuh tik ah ngaih a chia ngaingai. An thi ko cang nain, midang caah thatnak a tuahtu hna tuanbia cu a lo kho ti lo, an tuanbia anung peng.

Wright Brothers cycle company inn

Wright te cycle company inn kan zoh dih hnu ah, vawleicung ah a lian bik le a hlun bik Air Force Museum kan va zoh. Hika ah hin, the Wright Brothers nih vanlawng an serkami thawk in, chanthar a hnubik a chuakmi Raptor (F-22) tiang museum ah cun an chiah hna. Imax Theatre ropui taktak a um. Hika ah science, raltuknak hriamnam, universe le zeidang thil khuaruahhar asimi kong tampi muicawl an piahnak a si. 

                Imax Theatre

Hika robuk ah, a ummi vanlawng minthagmi hna, F15, F16, B-2 bomber le Vietnam ral le Korea ral lio in vanlawng viatle an tling dih. Hitler nih a rak hmanmi raltuknak vanlawng, bom zuangmi (V2) te hna, Russia vanlawng thabik Mig phun te hna, Japan ram I an rak thlakmi atom bomb "Little Boy" le "Fat Man" le atu chan Thermonuclear bomb vialte an tling dih.

Air Force Museum cunglei in thlakmi

Thlapa cung kainak ah an rak hmanmi Apollo 15 Module le thlapa vawlei zong an chiah. A mawngtu umlo mi Dron vanlawng zong an um. Vawleicung ah sangbik a zuang khomi U-2 vanlawng tiang in a tling dih. Vanlawng 400 kuakap a um I, minung 1.3 million lengmang nih kumchiar an zohmi asi.

US cozah nih an i uanthlar cemmi B-2 (Spirit of Freedom) 

F-22 Raptor. Hnubik chuakmi vanlawng

Zanlei 4:30 ah kan rak kir. Ni  alin, kan tha a di ko nain, "Kan Baa Lo" timi ah kan chuak.

Columbus Khuachung Lennak

June 21 (Ningani) cu Columbus khuakam i dum le tiva an khammi pawl kan va zoh hna. Pangpar an cin ning, tii an toih ning, thei an cin ning, an man le zeitindah sipuazi an tuahning asi timi kan va zoh. Columbus hi rili he aa hlat nain a khualaiva ah tiva pahnih aa tonnnak aum caah le tii an khammi a tam caah nga a tama ngaingai. Kan hmuhmi thil kip hi, Laitlang caah mitthi lawngte an rak si ko.

       

Wendy's Restaurant

Chun ah, Wendy's Restaurant headquarter ah kan leng. Wendy's cu vawleicung fast food company ah lianh ah pathumnak asi. 1969 in minung pakhat te nih Columbus downtown ah dawr fate in aa thawkmi asi. Nihin ni ahcun, dawr 6,650 an ngei; riantuantu 42,800 (2012) an um. Ram dang ah dawr tam ngai a um cang.  Zuamnak theipar pakhat asi.

 

Wendy's Headquarter Innpi

Galaxy Games and Golf

Laitlang zong ah tuah awk atha ngai dingmi golf celhnak kan va zoh than. USA cu tangka minung nuamhnak tuahnak in tangka tampi an kawl tawn. An tuahmi pakhat cu "miniature golf" timi, ngakchia in upa tiang nuamsul tuk khawhmi golf celhnak bite an tuah. Tangka in luh le celh a si. Eidin an zuar chih. Abu in zuamnak khawh  asi. CRDP dum ah tuah khawh ahcun tangka tam ngai hmuh khawhnak ding asi.

Galaxy Games & Golf Celhnak

Theithu Hang Siamnak

Adonghnak ah, "theithu" hang an sernak kan va zoh. Sehfate a si. Saya Lai nih hi bantuk seh hi, Rangoon zongah ka hmu rih lo a ti. Theitu amah ten a hawng a kheh. A rial i a hang ah a ser; a mu le a naang a dan. Minute pakhat hnih ah theithu cu , a thiang taktakmi hang ah a van chuah. Electric in mermi sehte a si. Laitlang zongah, hi bantuk theithu rialnak sehte hi, um ve sehlaw, a pum lawng in zuar lo in, a hang in siam atha chinchin ding a si.

Theithu hang simanka seh ($2000 leng a si)

Chun Mang

CRDP hruaitu Saya Neely Lai Uk he, hi thil vialte kan va zoh dih hnu ah, thinlung ah hihi an chuak tuk. CRDP Bob Evan dum museum bantuk in CRDP Museum hna um ve sehlaw zeitluk in dah Laimi tuanbia caah a va that hnga? CRDP Orange Juice hna um kho ve sehlaw, zeitluk in dah Lairam caah a va that hnga? Hihi CRDP chungmang tal ah um kho sehlaw, nikhatkhat ah a taktak ah a tling kho ve ko hnga timi ruat bu in.