666 le WCC

666 le WCC

Biahmaithi

WCC ti min theih ahcun, Krihfa cheukhat cu kan lau. Kan thin a phang. Kan tih. Zeicatiah WCC cu biaknak dang he aa komhmi buu, Pope nih hruaimi buu, sahrang number 666 a chuahtu buu, hlawhhlang buu" ti in kum tam tuk a kan cawnpiak caah a si. Cu cawnpiaknak cu, nihin ni USA  hrimhrim ah hin a tam tuk rih. Hi cawnpiaknak hi, Lairam le Mizoram ah a zual khun.

Kan tih zong ah kan mawh lo. Zeictiah zapi zaran cu carel le thil hlathlai kan huam lo. Thil hi asi tak hnga maw tak lo ti zong, thuk deuh in kan tuak lo. Chim thiammi chimmi paoh, kan zumh le pawm caah "biatak" kan thei kho lo. Theihhngalhnak kan ngeih lo tik ah, kan zumhnak zong a ral a chia. Cawnpiak thiammi nih biatak te an chimmi paoh khi, "thlarau nih hngalhnak a pek" ti phun in, za ah za in kan zumh tawn. Cucaah WCC hna hi 666 chuahtu ah kan ruah i, kan tihnak a si.

Cucaah thil fiangfai deuh le tliang deuh tein  kan theih i, kan zumhnak a feh khawhnak hnga caah, hi WCC kong hi ka tialnak a si. WCC kong hi missiology ah tampi kan relmi le caihhmaimi thil pakhat asi caah, cauk tampi ka relmi chung in, a tawifiannak in ka tialmi a si.

      
                              Acunglei ca hi WCC Logo an si

Dirh Kum

1948 ah Krihfabu 147 in hruaitu hna cu Amsterdam (Netheland) ah an itong i WCC cu an dirh. 1961 in "the International Missionary Council" le 1971 ah "the World Council of Christian Education" (18^th century Sunday school cawlcanghnak in an thawkmi buu) an rak lut. Cuticun buu ngan ngai ah aa chuah. 

Headquarter

Headquarter cu Geneva, Switzerland ah a um. United Nation Liaison Office hi New York, USA ah a um (New York ka rak tlawnka te ah, kan professor Rev. Dr. Norman E. Thomas nih a rak kan kalpi i, hi office hi 1999 kum ah ka rak phan ve). 

WCC Hruaitu Hna

Chungtel Krihfabu aiawhtu hna hi kum 7 ah voikhat meeting an ngei. Cuahcun president (8) an thim. Cucu ram kip in an si. Cun central committee ah member 150 an thim hna. Central committee nih a hme deuhmi (executive committee) an ser chap. Cun "mod­erator" pakhat le vice-moderators pahnih an thim hna.  Ruahnakpetu buu le commissions an tuah i cu hna nih central committee ah an cawlcanghnak cio ah thawng an thanh. Cucu an riantuan ning a si. Vawleicung politics le raldohnak phunphai ah zeihmanh telnak an ngei lo. Cozah a sualmi hna nih an mipi an hrem hna i, minung nawlngeihnak an buar (human right abuse) an tuannak ram tibantuk lawng ah hin, mipi tanh in, bichiam le catial tibantuk lawngah awka chuahmi an si.

Caantling riantuan 143 (2011) ah an um. Hi chungah 131 cu headquarter umnak Geneva ah riantuanmi an si. WCC ah tuanvo ngeibikmi hna cu General Secretary le Moderator an si. Atu lio ah General Secretary a tuanmi cu Rev. Dr. Olav Fykse Tveit asi. Amah hi Church of Norway chungtel pakhat a si. Moderator cu Rev. Dr. Walter Altmann a si i, 2010 in tuanvo a lak. WCC Assembly pakhat le pakhat karlak tuanvo latu asi. 

      Geneva ummi WCC Headquarter 

Tinhmi

"Krihfabu lungrual tein aw (voice) ngeih ding le vawlei ah tehtekhannak (witness) ngeih ding; Jesuh Krih zumhnak ah lungrual tein um ding le hawikawmhnak ngeih ding; cuti lungruannak thawng in vawlei nih [Jesuh) a zumh khawh nak hnga" ti hi tinhmi a si. 

Tlaihmi

WCC hi biaknak kip, Hindu, Buddhist, Islam, Judaism le biaknak dang aa telmi bu a si lo. WCC nih hrampi (Basis) ah aa tlaihmi thil cu "Jesuh cu Bawi le Khamhtu a si" timi a si. Jesuh a zumlomi le a pawmlomi cu luh khawh  asi lo. 1961 ah WCC zumhnak le pawmning cu Mirang ca in, hitin an tial:-

"The World Council of Churches is a fellowship of churches which confess the Lord Jesus Christ as God and Saviour according to the scriptures and therefore seek to fulfill together their common calling to the glory of the one God, Father, Son and Holy Spirit".

Tuanmi Rian 

(1) Krihfabu kip lungrual tein um le vawleicung pumpi thawngtha karhnak ah riantuanti ding

(2) Mission le evangelism riantuannakah tehtekhannak karhter ding

(3) Krihfa riantuannak ah tel ding (Daihnak le dinfelnak kawl ding; miphun karlak ah pehtlaihnak khamtu vampang hrawh dih ding; minung herhnak ah tel ve ding; sermi thil vialte zohkhenh le kilven ding)


Ramkip daihnak caah WCC meeting kaimi

Chungtel

WCC ah Jesuh zummi bu kip an itel. Tam deuh cu an ram miphun dirhmun (national level) in a dirmi Krihfabu an si. Krihfabu kip zalawngtein thimnak (free choice) an ngei. WCC cu chungtel hna cungah uknak le nawl ngeihnak zeihmanh a ngei lo. Chungtel hna caah zeihmanh biakhiahnak a tuah piak hna lo. Vawleicung ramkip Krihfabu pehtlaihnak le riantuantitnak caah dirhmi bu lawnglawng a si. WCC hi chungtel chuahnak nawl an ngei lo. A chuak duhmi cu an mah tein an chuak. WCC nih chungtel a chuah bal lo.

WCC ah hin, ram 110 fai in, Krihfabu 348 (2012 cazin) chungtel an si. Minung million 592 tluk an si. WCC Member ah aa telmi hna cu:-

(1) The Eastern and Oriental Orthodox churches chung um Krihfabu hna

(2) Anglicans le Protestant Krihfabu phunkip (Reformed, Lutheran, Methodist le Bap­tist; independent Krihfabu tibantuk)

(3) Pentecostal Krihfabu cheukhat zong an itel.

WCC dirhtu hna cu Europe le North America Krihfabu chungtel hna an si. Nihin chungkhar tambik cu, Africa, Asia, the Caribbean, Latin America, the Middle East and the Pacific in an si. Laimi he naihniambik ah "MBC" le Mara Evangelical Church" (Mizoram) zong member an si. Chungtel hi free tein, luh le chuah khawh a si. WCC an by-laws in rengh a um lo.

Tangka

WCC tangka hi Krihfabu kip nih an rak thawh cio. Cun alenglei in innlo le zeidang mi an hlanhmi hna in tangka lut zeimawzat a um ve. 2012 tangka hmuhmi 22.6 million a si (75% cu chungtel thawhmi a si). 

               Avoi 10 nak WCC Assembly Tlangtar

Assembly kaimi buu kip hruaitu hna

Catholic le WCC

Mizoram le Kawlram phungchimtu tampi nih WCC cu Catholic hruaimi ah an ruah. Pope zong WCC lutlai ah an ruah. Pope le WCC cu 666 chuahtu ding ah an ruah hna. Cucu an palh cikcek. WCC ah RC hi member an si lo. Pope zong WCC lutlai a si loh. Mission tuannak caah naih tein rian tuanti tu an izuam. Cucaah abiapi deuhmi WCC meeting ah RC nih observer a thlah tawn. Lungruaknak a um khawh deuh nak hnga, Pope nih "Faith and Order" ah minung 12 palai azungzal tein a chiah ve hna. World Mission and Evangelism ah "Catholic missionary bu" zong an itel ve. Cun Mission le Ecumenical Formation ah Catholic riantuantu pakhat an thlah ve. Ecumenical Institute Bossey ah Catholic saya pakhat an thlah ve. Cu lawng cu WCC ah RC an itelnak a si.  

Myth (Phuahcawp Tuanbia)

 "Myth" timi cu "fianter khawhlomi tuanbia" a si. Ngaih a nuam ngai nain, a diklomi le phuahcawpmi deuh an si. Tahchunhnak ah, "Thlapa cungah rirang kung a um i, cu rirang kung ahcun zawngtum a um. Cu zawng tum ahmumi cu an thi an ti" timi hi, kan ngakchiat lio ah a rak kan cawnpiakmi a si. Thlapa a lai lio te ah, cu zawngtum zoh cu heh tiah kan rak i zuam tawn i, ka hmuh ti zong kan rak ti lent awn. Keitlau tuanbia, Menrihai le Tainamkawng tuanbia, Phawvawm le phete tuanbia tite hna hi, "myth" timi cu an rak si ko. "Church Politics" ruangah, WCC kong ah, myth tampi phuah cawpmi a um. Cu hna cu:-

(1) Catholic Church (RC) hi WCC lutlai asi timi cu myth a si (RC hi WCC chungtel an si lo. RC le WCC a huami hna nih, lih an tawn chawm in, an chimmi bia a si).

(2) WCC lutlaitu cu Pope asi timi hi "myth" a si (Pope cu chungtel a si lo. WCC lutlai cu president 8 an si. Pope hi WCC he zeihmanh pehtlaihnak a ngeimi a si lo).

(3) WCC ah biaknak kip (Buddhist, Hindu, Muslim tibantuk) an itel timi hi myth asi (WCC chungtel cu Krihfabu lawngte an si. Biaknak dang pakhat te hmanh an itel lo. Chungtel cazin zoh khawh asi. WCC alutlomi le WCC a huami butetuai nih lih an tawnmi bia a si). A caancaan ah biaknak dang upa pawl he vawlei ah remdaihnak aum khawhngak hnga caah le zumhnak kongah biaruahnak ngeih kan hau an ti caah, tonnak an ngeih caan a um i, cucu mi tampi nih biaknak dang he rian an tuanti tiah an ruah palh sual caah a si.

(4) WCC hi 666 chuahtu ding asi timi hi myth a si. Zeicatiah 666 cu vawlei lei uknak in a ra dingmi a si. Biathlam baibal hrilhfiah tha tein zoh tik ah, 666 cu Krihfabu biaknak phunphai in a ra dingmi asi lo. Cun WCC ah azungzal in, President 8 an um. Pakhat nih mah duhpaoh in riantuan khawh asi lo. Hi hruaitu 8 hna hi, kum 7 ah voikhat an thlen hna. Caan tha a um ahcun Lai nu/pa zong president pakhat a si kho ve ko. WCC ah President hei si sehlaw 666 cu a chuah hnga maw? Amah cu sahrang cu a si hnga maw?

Biafunnak

Lairam le Mizoram hi, lih le hrawkhawl in phungchimmi le baibal duh paoh in hrilhfiah a hmangmi an tam tuk. Mah Krihfabu thatnak le chungkhar karhnak caah, midang Krihfabu duhpoah in sawksammi le lihchim a pawi a tilomi hruaitu an tam tuk. Mah ca thatnak ding caah, mipi kha hlen khawh chung in hlen an timh hna. Cu hna cu, cathiang nih "Naal prophet" timi an rak si ko.

Cu "naal prophet" hna nih cun, member karhnak asi paoh ahcun, baibal kha duhpoah in an hrilhfiah. WCC zong sahrang 666 an ti. RC zong sahrang 666 a si an ti. Baptist le Presbyterian tibantuk Krihfabu hna zong, sahrang an ti hna. Mipi nih an tihbik dingmi biafang thatha in an thihphaih hna. Cuticun dirhmun ngeilomi le theihhngalh ngeilomi Krihfa tampi cu, an mah lei ah an kuaih hna. Krihfa tampi nih le carel kan huam lo. Huam zong ah rel ding a um lo. Cu tikah, biachim thiammi nih an chimmi paoh kan zumh. Cucaah WCC kong zong ah, a siloning in cawnpiak kan rak si i, WCC kong zong, tuchun tiang tha tein kan theifiang kho ti lo.

USA kan phak hnu zong ah, lih in cawnpiak a hmangmi hruaitu Kawlram in mitam nawn an  ra rih. WCC kong zong an fian lo mi le an theih lomi kong tam tuk a rak kan cawnpiak. Voikhat ECBC kan Krihfabu zong ah , WCC, RC, EU le MBC zong a pehtlaihter dih hna i, sahrang (666) nan si ti in, saya pakhat nih ni 8 chung a kan cawnpiak. Crusade chung cu nuam ten ka ngaih ve ko. Cawnpiak a tha a chia sual lai ka ti caah a si.

Cusade a dih hnu ah, "Saya WCC le RC kong ah na kan chimhmi na fianlomi a tam tuk. Cucaah na kan cawnpiakmi chung in na palhmi tete kan chimh lai" tiah ka ti i, a kan cawnpiakmi a dilomi vialte pakhat hnu pakhat, cauk zohchih bu in, tha tein ka chimh. "Na cauk chuahmi zong ah tam tuk na palh" tiah ka ti. A donghnak ah a palhnak cu aa fiang cikcek. A lung zong a buai dih. Vawleicung ram kong asi rua tiah a rak ruahmi vialte kha a pingpang viar an si. Adonghnak ah, "Ka cauk edit tuahtu ah hawng ka bawm law" a ka tip hah. Cupa nih a kan cawnpiakmi cu, amah tawn chawmmi le lihchimmi cu a rak si theng lo. Midang nih lih le hrawkhrawl in an rak chimmi cauk chung  tu in a rak kan cawnpiak chinmi asi i, mawh phurh thlu ding a rak si lo.

Cucaah hruaitu tampi cu kan mah hmanh nih kan fianlomi le kan theihlomi khi, midang kan va cawnpiak hna. Kan mah hmanh nih kan theihlomi le fianlomi midang kha fiang tuk va cawnpiak cu, kan chungah "Biatak" (Truth) a um lo tinak a si. "Mitcaw le mitcaw hruai" timi cu, cucu pakhat asi ko. Cucaah WCC kong zong tlawmte kan fian deuhnak hnga ding caah le mitcaw le mitcaw kan i hruai sualnak hnga lo ding caah, hi ca hi ka tialmi asi.


Avoi 10 nak WCC Assembly (Korea hlasatu pawl)


Avoi 10 nak WCC Assembly Meeting Kaimi Hna

Zohchih dingmi

http://www.oikoumene.org/en/about-us/faq