Semnak Lairam: Chungkhar Hmanthlak

Kan Chungkhar Hmanthlak

Mirang nih "Hmanthlak pakhat cu bia thawngkhat man tluk a si" tiah an ti. Kan chungkhar hmanthlak tete hi, tuanbia in tial cawk lo le chim cawklomi bia an si. Bawipa nih a kan pekmi tluachuah vialte lakah a sunglawi bikmi cu, chungkhar hi a si. Kan chiatnak ni le donghnak ni ahcun, chungkhar hi hnubik a tangmi an si. Cucaah chungkhar i dawt cu a biapi tuk.

Chungkhar Thawknak

Chungkhar timi cu Pathian nih a timh ciami le khan ciami asi. Gen 1 & 2 chung in Adam le Eve nih chungkhar cu an rak thawk. Noah chan ah fapa (3) a ngeihmi hna nih vawleicung miphun kip an chuahter. Babel innsang sak thawk in, vawlei hmunkip ah cu u nau (3) chung chuakmi miphun cu kan i thek dih.

Pathian theilo le Patian he pehtlai lo in, miphun kip cu vawlei ah kan vaak i kan i thek. Abraham chan in, Pathian nih vawleicungmi cu a kan kawh than i, a kan kawl than. Pathian nih Abraham cu "Ram le miphun nganpi si ding in bia a rak kamh." Cu bantuk si khawhnak ding caah, "mah le miphun le cingla rualchan chung lawng in a si kho lai" ti kha a hmuh caah, a fapa ngeih chun, Isaac cah Canaan ram in Mesopotamia tiang nupi a va kawl i, an tunu Rebecca an va thit.

Isaac nih fapa pahnih Esau le Jacob a hrin hna tikah, a hniang pa nih miphun ro a co. Unau rorah cuh ruang ah, Jacob cu apu Laban sinah a vung zam i, cuka ahcun, a pu fanu (2) Leah le Rachael nupi ah a van i thit hna. Hika zawn ah chim duhmi cu, chungkhar dirh abiapitnak le chungkhar hmanh ah, naihniam rak i kawlnak a biapitnak le miphun chung minung thitlak a biapitnak kha a chim.

Cucaah Laimi zong hi khawika kan umnak ah ah, Lainu nih cun Laipa vaat a biapi i, Laipa nih Lainu thit cu abiapi tuk ve. Keimah zong 1997 in USA ka phan. USA ah miphun dang tampi kan pawng ah an um ko hna i, thitlak khawh zong an si ve ko hnga. Asinain mah miphun theng thit ding hi, Pathian nih ka thinlung ah rian atuan caah, cu nupi ca cu kum (3) fai chung thla ka cam.

Cu hnu ah Pathian nih a ka zaangfah i, atu Pi Aye Aye Mu (Duh Thluai Par) cu Yangon in Pathian nih visa a van hmuhter i, 2000 December ah USA a van phakter. April 28, 2001 ah kan i um. Pathian nih fapa (5) fanu (2) a kan pek. USA ka phak hnu ah harsatnak le ngaihchiatnak le lungretheihnak chim awk tha lo in ka tong ko nain, hi kan fale te hi Bawipa nih a kan pekmi an si i, hi hna hi ka ruahchannak, ka thanuamnak, kai lawmhnak le Pathian nih a kan dawtnak le hi vawlei caah thluachuah lianbik a kan pekmi an si tiah ka ruah.

Psalm 127:3 ah "Fa le hi Bawipa sin in kan hmuhmi ro an si. Thluachuah a kan pekmi an si" tiah a ti bantuk i, hi kan fale hi an zapi tein "Bawipa ro an si. Thluachuah a kan pekmi an si" caah an sunglawi tuk. Pathian nih damnak le nun khuasau nak pe hna sehlaw, kum tling tein hi vawleicung ah a nungmi si ko hna seh tiah thla ka cam piak zungzal hna. Ca thiam hna sehlaw, dinnak, felnak, zumhtlakmi sinak ngei hna sehlaw, mi nih herhmi, hmanmi, bochanmi, lawmhmi si ko hna seh. Mi tampi caah thadit a huammi le mi tampi caah bawmtu tha si ko hna seh. Mi caah nun a siangmi le lawmhnak a chuahpitu, mi dang caah cite le ceunak bantuk si ko hna seh. An lam ding sehlaw, an nunnak ah, lunglawmhnak le thanuamnak khat ko seh. An unau tafar rual tein ca thiam hna sehlaw, vawlei muihnak chungah arfi bang ceu ko hna seh. Dawtnak, zaangfahnak, siaherhnak, midang zawnruahnak, hnakkar tenhnak le minung hawi a upat i minung hawi dihlak caah a thahnemmi le nun zia dawh in a nung mi si ko hna seh tiah thla za ka campiak hna.

Nulepa, chungkhar, khuaram miphun, USA ram minung caah le vawleicung hmunkip minung hawi caah eidin awk a tlakmi fanuu fapa si ko hna seh. An unau rual tein aa dawmi le aa bawm hniakmak mi si ko hna seh timi ruahchannak le hi hmanthlak hi ka tar. Hi hmanthlak hna hi, kan fale caah ca i tial lo mi tuanbia an si theu lai timi ruahchannak le zumhnak he ka karmi an si.

Dayton, Ohio ah 1997 in 2008 tiang kan um. Dayton ah fanu (1) le fapa (3) an chuak. October 4, 2008 in Columbus, Ohio ah kan i thial. Columbus ah fapa (2) le fanu (1) an chuak. An zate (7) an si. Pathian nih Krihfabu ECBC caah riantuan ding in tuanvo a kan pek tiah kan ruah i, kan i lawm ngai. Atu member 400 kuakap kan si. USA i University lianbik pakhat Ohio State University kam teah, ABCOHIO chungtel biakinn a simi University Baptist Church (UBC) kan hlan i, cuka ahcun kan i pum.