---------------------------------
USA hi minung thahmi le a tlaumi tam taktak an um. Kum fatin in minung nutling patling tampi an tlau. A cheu cu an ruhrang lawng an hmuh hna i, a cheu cu hmuh lo bakmi zong an um. A cheu cu an ruh an hmuh nain an hngal kho ti hna lo. A cheu cu thil pakhatkhat tein ahodah asi ti an hngalh khawh tawn.
A liamcia kum 3 lio ah Tennesse ramkulh ah ngaknu dawh ngaite Holly Bobo timi nu te cu a tlau. A tuanbia zeihmanh theih lo in a lo ko. Cu nu cu Country music hlasak thiam, Whitney Duncan i chungkhat a si. Kum 3 renglo hnu ah naite ah a ruhro an hmuh.
Ruahlo piin pa pahnih cu Decatur County ummi tupi thinglak ah ram aithing (ginseng) an kawlnak ah, ruhro an va hmuh. Cu thinghmawng umnak cu Holly Bobo a tlaunak kong he pehtlai in an lunghrinhmi minung hna lak ah, mi pakhat nih a ngeihmi thinghmawng a si.
Ruak hlathlaitu pawl nih an zoh tikah, a ha a rak i siammi ha le a tuanbia an zohkhek tikah, cu ruh cu Holly Bobo ruh asi tiah an ti. University of Tennessee in ruhlei thiammi hna nih cu ruh kong cu an hlathlaimi asi.
Tennessee ramkulh i, Bureau of Investigation Director Mark Gwyn nih cun, "Hi thihnak kong hi aa lim cang tinak asi deng rih lo. Kan hlathlai cuahmah lio asi" tiah a ti.
Bobo cu nurse kai lio mi asi. April 2011 hi a donghnak an rak hmuh a si. Cu a hmutu cu atapa a si. Cu atapa nih a chimmi cu, "Mipa pakhat ka hmuh i, cupa cu ka farnu i a hawpa ah ka rak rel palh sual. Cupa nih cun kaa farnu cu khuate kan umnak Darden, Tennessee ah a rak lak i, aa kalpi" tiah a ti. Darden cu Tennessee khualipi Nashville in nitlakthlanglei meng 90 hlatnak ah a um. Nashville cu keimah zong ka rak phan bal ve.
Bobo a tlau kum hi kum 20 asi lio asi. Cu ni cu sianginn kai ding in aa timh lio asi. Pa pahnih Jason Wayne Autry le Zachary Rye Adams a thattu nan si tiin sual an puh hna i, taza an cuai lio hna asi.
Tennessee unau hna pahnih-Mark le Jeffrey zong hi nu a tlaunak kong he pehtlai in, thil fianglo ding in nan hrawhhral timi kong ah taza an cuai ve than hna. Nan nih zong nan i pehtlai ve ti in an ti hna.
Decatur County palik bawi Keith Byrd nih, "midang zong tlaih ding an um rih lai. Kan kawl rih hna lai. Kan bang hna lai lo" tiah a ti.
Bobo a chungkhar hna sihni, Steve Farese nih cun, "Hi ruh an hmuhmi cu a khami-thlum asi ee" tiah a ti. "Zeitin dah an tuahto ning, an thahnawn ning le Bobo zeitindah kan chungkhar sin in an lak i lo diam an kalpi timi cu, kan thei kho bal ti lai lo. Asinain Bobo thattu pawl nih an thlarau an thlau ko ee" tiah ca an tial i an chuah.
District Sihni Matt Stowe nih cun, "Keimah ka zung nih cun Bobo thattu hna hi thihnak dan tat ding hi ready kan si; kan duhmi zong asi i a tuah zong kan tuah khawhmi asi" tiah an ti ve.
Chungkhar le khuaram caah tampi san a tlai dingmi le bochan tlak asi dingmi Bobo cu chan tim hlan ah, misual mi hna kut in a nunnak a liam.
USA ah hin Holly Bobo bantuk in ngaknu dawhdawh a tlaumi le atuanbia hlat khawh tilomi tampi an um. Kan nih Laimi zong nih kan tong lai lo ti khawh asi ve lo.
Cucaah Lai ngaknu hna zong nih atanglei thil hna hi ralrin kan herh. Mirang hmanh nih an ton ahcun, miphun dang nih cun hi bantuk thil hi ton a fawi tuk.
1. Boy friend i chiahmi hi na fian a herh. Miphun dang he i uar lo cu a tha bik.
2. Chun pek zan pek a himbawm lonak hmun ah kal lo ding
3. Umkal tikah lamphawk zulh lo in lampi puam minung tamnak zulh ding
4. Zan mui hnu le zingka tuan tuk ahcun mah lawng in umkal le vahvaih lo ding
5. Theih fianlomi motor i cit lo ding.
6. Lam kal tikah pawngkam ngiat chaih le hnuhmai her bu tein umkal ding
7. Na pawngkam ngiatchaih bu in kal ding. Zumh lo mi minung na hmuh hna ahcun zam ding
8. Theihfian lo mi he umkal ti lo ding. Theihlomi cu zumh tuk lo ding
9. Hriamnam tamnak ram asi caah, zan a muih tuk hnu ah mah lawng umkal hman lo ding
10. Tihphan awk minung nih an tlaih asiloah an zulhdawi ahcun aukhuan ding asi.
11. Motor chung luh cangka tein motor innkhar le thlalangawng vialte hrenh dih ding
12. Motor chung i na hngilh asi zong ah a chung in hrenh dih ding
13. Zan i datsi rawn le dawr len tikah innka he aa naihnak bik le a ceunak bik ah motor park ding
14. Apartment siseh, pumpak inn siseh zan a muih tikah, secutiry mei tha tein ceu peng ding
15. Tihphannak ton tikah 911 auh tih lo ding. 911 auh ruang ah thih asi lo ti theih ding.
Reference:
(Reporting by Tim Ghianni in Nashville and Eric M. Johnson; Editing by Nick Macfie and Peter Cooney)
No comments:
Post a Comment