Hmailei Hakha

Hmailei Hakha (The Future of Hakha) kong hi biatak tein ruah a hau. Hakha khua cu Lairam khua vialte lakah hmunhma tha bik khua pakhat asi. A dawh zong aa dawh. A nuamh zong a nuam. Khua caan zong a tha. "Kawlram um vekvek ahcun, Yangon ah um ding. Lairam um ahcun Hakha ah um ding" tiah ka ti tawn. Zeicatiah Hakha cu a khuacaan a nuam, thli le tii a thiang, fingtlang aa dawh i, um le cawlcangh a nuamh tuk caah asi.


Liamcia k.100 lio Hakha khua. Inn a rak um set rih lo (www.lungchuak.com)

Hi acunglei hmanthlak zoh in, Hakha khua hi hmunhma a rak rem timi alang. Liamcia kum 100 ahcun Rungtlang hi tupi taktak a rak si i, Hakha khua Pyidawtha le Dawrthar hi, tuhmawng an rak si rih timi a fiang. Inn cu alang in hmuh awk a rak um rih lo. Atanglei hmanthlak hi, chanthar Hakha asi.


     Hakha khua le Rungtlang. Aminmi hi hmuh khawh ngai an si

Cu tluk in um a nuammi le aa dawhmi asi ko nain, Hakha khua ah kokek in a pawi ngaingaimi thil pakhat a um. Cucu zeidah asi tiah cun, khua chung vawlei an kah tukmi le an minh tukmi asi. Vawlei a fekfuan lo. Khuachung vawleimin pawl khi, lung, tlakrawh le mirangvawlei in kham khawh dingmi an si lo. Zeitluk ram fimmi hmanh nih kham khawh dingmi vawlei asi lo. Zeicatiah a thlanglei Tawngva kam in aa thawkmi leimin asi caah asi.

Tha tein zoh ahcun, Pyidawtha le Dawrthar hna khi, vawlei aa dilmi an lo. A liamcia kum million tampki lio ahcun, Rungtlang khi atu nakin a rak chah deuh kho men. Thil pakhatkhat ruangah, Runtlang khi rak i cheu in rak min sehlaw, Pyidawtha le Dawrthar khi a minmi vawlei vawr aa dilmi rak si sehlaw a dawh. Runglang in Pyidawtha le Dawrthar an kiahning le a rawnh ning le a tlakning zoh tikah, a minmi aa dilmi si a dawh bik.

Cucaah Hakha hi hmun khathnih lawng a minmi asi lo i, a khua ning piin a kenkip ah an min. A ning piin tivah kam vialte hi an tla thluahmah hna. Khua in atanglei hi saupipi in an kak i, an min hna. A ruang cu Tawngva kam in minh aa thawk caah asi. A ningpi in Hakha hi duhsah taktak in tanglei ah tolh ziahmah sehlaw a dawh.

A vawlei hi leivawr phun asi caah, Falam, Thantlang he hna an i lo lo. Vawlei avang; a sawp i a dawr. Lung hrephrawp in aum. Hi bantuk hmun ahcun ruahtii kha vawleichung ah khulrang in a lut i, tii a zawi ngaingai caah, a rit ngaingai. Cucaah a minh a fawinak asi.

Hakha khua hi zoh tikah, a khua area hi aningpi in an kak ti awk asi. Tawngva hna in aa thawk i, Sizungsang at hlanglei vialte le Chin Oo Sii tiang an kak viar. A tanglei in akakmi a si caah, nikhat caan khat ahcun, Hakha khua hi Pyidawtha le Dawrthar hi a ningpi in a lo kho te mi asi ko. A loh dihlo hmanh ah, a vawlei sining ruangah rawhralnak cu a tlawm le tam in a chuak peng dingmi asi. Cucu hrial khawh dingmi asi lai lo. Thing, tlakrawh le mirang vawlei in kham zongah, atanglei in aa thawkmi min asi caah, kham khawh dingmi asi lai lo. Kham hmanh ah, caan tlawmpal ca lawnglawng asi dingmi an si. A hrampi a fehlo ahcun, a cungpathual lanwg in khammi cu asi kho ding asi lo.

USA zong ah vawlei minh ruangah khua chuahtakmi an um len ve ko. Pe 20 thuk hna in van cawh i, mirang vawlei in fek taktak in an kham nain, vawlei aa thawnnak hmun ahcun, an khamnak zong a ningpi in a thawnpi i an kham kho lo. Hakha khua zong hi, minh sawh min mi asi lo caah, a thawn in aa thawnmi vawlei asi ve caah, kham khawh ding asi lo.


     Hmailei ah hmunlai asi te dingmi Khuathar Sang

Cucaah nihin ni ruahsur le tilian bantuk a chuah caan paoh ahcun, Hakha khua ah rawhralnak a tlawm le tam in a chuak peng lai. Nai July thlachung ruahsurmi nih a chuahtermi tilian le rawhralnak zoh tikah, tihnung ngaingai asi. Ruah zong kokek thil asi caah kan kham kho lai lo. Hakha vawlei zong kokek in a derthawmmi vawlei asi caah, vawleimin zong kham khawh asi ve lai lo. Ruah, tilu le vawleimin hi aa zul peng dingmi thil an si.

Cucaah Hakha ah innlo khuar a duhmi nih cun, inn saknak ding hmunhma hi vawlei fehfuannak asi maw silo timi kha biapi taktak in zoh in inn sak ding asi. Abik in Dawrthar, Pyidawtha, Sizung sang, Keisih sang, Khuachung le Saktalam lei kam lamthluan vialte ralrin a herh khun. Kum 100 ca in ruah ahcun, hi hmun hrawng ah inn tha tuk sak ding asi lo. Hmailei ahcun Chin-Oo-Sii in Khuathar laklak tu hi Hakha khualai ah hman ahcun a tha bik ding asi.

Hi tibantuk ruahsur, tilian le min minh in Hakha khua hi kokek rawhralnak a tong kho pengmi asi caah, "Hmailei Hakha" kong hi cozah le kan mifim le hruaitu hna nih biatak tein ruah le tuak ahau. Abik in atu Lairam cozah nih hin a rannak in ruah a hau. Pu Hung Ngai chan ah an tuah ahcun, Lairam caah a tha lai i, an mah cozah ca zongah minthatnak asi lai.


           Chin-Oo-Sii hi Hakha Town Khualai ah hman ding asi


Hmailei Hakha kong hi biatak tein kan ruat lai tiah cun, atu Hakha khua hi duhsah tein chuahtak i, khuathar le hmunhma thar ah "khuathar" (myo-thit) tlak a hau. Cu khuathar cu atanglei bantuk in ser ding asi:

1. Hakha area cu hmunhma tha le rem a tam tuk. Cucaah "Town Plan" hi cozah nih tha tein suai ding asi. Ningcanglo in lamsul kalter lo ding le innlo sak lo ding abiapi.

2. Cu town plan ahcun Chin-Oo-Sii tu hi khualai ah chiah ding asi (Vawlei a feh le fehlo zoh ding). Chin-Oo-Sii in Khuathar a donghnak (Falam le Thantlang lam pial) tiang hi, khualai ah a tla kho lai. Abik in khuathar hi "Sipuazi Khualai " (Business center) ah tla hnga. Chin-Oo-Sii kam hi cozah zung tampi umnak "Administration center" ah a tla hnga.

3. Chin-Oo-Sii in Hniarlawn lei ah lam phei tein tuah i Hniarlawn-Nabual tiang inn peh ding. Hi hmun hi vawlei a fehnak hmun ding asi.

4. Hakha-Falam motor lam le Hakha-Hniarlawn motor lam kar vialte khi lam a dawtdawt in ser ding.

4. Chin-Oo-Sii in Thantlanglei kalnak lam pakhat in ser than i Timit ah chuahter ding. Atu an hmanmi Hakha-Thantlang lampi pinah, lampi pakhat in chap ding. Taung-zalat Gohtii tuknak cung deuhvak tein tanphei in kalter ding.

5. Cu Chin-Oo-Sii in Timit kalmi lampi le atu Hakha-Thantlang motor lampi kar vialte, lam tampi in ser i inn hmun ah ser ding.

6. Chin-Oo-Sii in Matupi kalnak lam tanphei in hei dawt i, atu lamhlun he Rungtlang a donghnak lei ah tonter ding. Cu ahcun inn tam tuk a um kho lai.

7. Hakha-Falam lam hi orh thluahmah i Chuncung tiang khua peh ding. Vawlei fehnak paoh inn hmun ah samh ding. Hakha-Chuncung kar hi hmunhma a rem tuk. Lai Dil in, din-tii zong lak khawh asi lai.

8. Hakha sizungpi zong hi a himbawmnak hmunhma ngai asi lo. Cucaah sizung zong hi thial a herh i, atu kan chimmi hmunhma hrimhrim chung ah hin, hmunhma zoh piak cia a hau.

9. High School No.1 zong hi a fek lo. Cucaah thialnak ding hmunhma zohpiak chung ahau.

A Rannak In Thial Ding

Hahkha khua chungah Sizung sang in Keisih sang tiang hi vawlei kah le minh a zual ngaingaimi an si. Hi hmun ah hin, cozah le private nih inn sak ding asi lo. Hakha sizungpi a thar an sakmi zong hi, hi leimin kong hi an rak tuaktan lo caah asi. Hakha sizungpi zong hi zeitik dah a minh lai theih asi lo. A min ko lai. Hi hmun ah hi tluk sizung tha hi sak ding a rak si lo. Hihi hmunhma thar kawl i thial ding asi.


                   Thial aherhmi Hakha Sizungpi

Carson thlan hnulei zong hi a minh ning a fak tuk cang. Carson thlan zong hi, a min lai ti phan a um ngaingai. Tha tein zoh i, a min ding asi ahcun, sunglawi tein thial ding asi.
                                               

            Carson thlan zong hi ruah a hau

Atanglei hi Zion Krihfabu biakinn asi. 1997 ah a hnu bik ka hmuh asi. Hi ka len lio ah, a thlanglei kap hi ka tah i, pe 12 tluk lawng a minhnak he aa hlat. Zion Church hi min sehlaw ka khuaruah a har hnga lo. A minh lomi tu hi ka khuaruah a har. Hi zong hi thial a hau. Tuan ah a min khomi asi.



           Zion Church (Ref. Vakoklian.blogspot.com)

Hi bantuk hin Lairam cozah nih town plan tha tein a ser i, a tuah ahcun Hakha khualipi cu aa dawh lawng silo in lam an phei lai i, um a nuam lai. Motor cycle, thirrang le motor umkalnak a nuam lai. Innlo rawk le lamsul rawk a tlawm deuh lai. Laimi kan buainak pakhat cu hmunhma thar thial kan i harh tuk. Nay-pyidaw ah "Myodaw" an thial bantuk in, kan nih Hakha zong hi a pawng hrawng tal ah thial ve a hau ko cang.