Minung kan karh chin lengmang lai. A tlawmbik ah Greater Hakha cu 3,000,000 tlum ding in kan ser a hau. Cucaah a tlawmbik ah atu Hakha nakin Greater Hakha cu a let 20 lian in ser ahau. Atu lio Hakha hi, 12.5 killi meng lawng asi i, Greater Hakha cu a tlawmbik ah killi meng 250 asi lai. Cucu vision ah chiah chung a hau.
Greater Hakha cu atu Hakha nakin a let 15 in akau lai (Ref. www.google.com)
Khuaveltu Lampi (Beltway) kan ser lai i, cu Beltway nih cun Chin-Oo-Sii in Hniarlawn in Chuncung in Ritkuangtlang in Taungzalat Golf Course in Chin-Oo-Sii ah a chuak than lai. Chin-Oo-Sii in Matupi Lampi le Gangaw Lampi zong an i tong ve lai. Cuticun hmun tampi ah "lamton" (lansung) dawhdawh kan ser khawh hna lai. Khi tik ahcun Hakha cu vawleicung khua dawh bik pakhat ah aa chuah kho lai. Greater Hakha area cu a kau ngaingai lai i, Beltway zong a ngei kho lai i, khua ropui taktak ah aa chuah kho lai.
USA hi vawleicung ramdang nih an tluklonak pakhat cu, an khuapi tampi cu beltway an ngei. Beltway ngeimi khua cu an i dawh khun; umkal le luhchuah a fawi tuk. Cun a puak khomi motor le truck paoh cu khualai lam zulhter lo in, khuahriang Beltway an zulhter hna i, minung caah himbawmnak an si fawn. Tahchunhnak ah, vawleicung khuaropui bik pakhat Washington DC beltway bantuk in Hakha zong Beltway ngei in ser ve a herh. Washington DC Beltway bantuk hi Hakha ah tuah khawh a si ve lai.
Washington D.C Beltway (Ref. www.wikemedia.org)
Thanchonak caah a biapi bikmi cu "infrastructure" timi lamsul hi asi. Cucaah USA cu vawleicung zei ram hmanh nih lamsul ser ah an tluk lo. Lam a tam tuk pin ah an fek tuk. Beltway tuah hi khua thanchonak ah a biapi taktak i, khua tampi cu beltway tling an ngeih lo zong ah tlawmpal tal cu an tuah piak hna. A man a fah tuk caah le a cheu cu tuahnak a rem lo caah asi. Beltway nih khua a hlumter pin ah, sipuazi a thatter deuh ti asi. Cucaah a cheu khua cu an belhway hi rili le fingtlang cung ah hlei an dongh i, cuka cun an kal. A cheu cu beltway thap-2 hna an ngei kho. Acheu cu thap hnih pin ah beltway bantuk aa chapmi an um rih.
Houston Khua Beltway thapthap
Khua an lianh deuh paoh ah beltway tam deuh deuh ngeih a herh. Tahchunhnak ah, USA ah Dallas hi a than a rang bikmi khua pakhat asi. Khua a kauh tuk pin le minung an tam tuk pin ah, Airport le warehouse tam tuk an um caah, beltway an herh chin lengmang. Cucah beltway hi tam taktak an tuah i, USA ah beltway le lam thatbiknak khuapi pakhat asi. Dallas-Forthworth area cu lamsul hi sur tah in aa tak. Khuaruahhar asi.
Dallas-Forthword Beltway Pawl
Acunglei thil sining zoh in, Greater Hakha zong hi Beltway a ngeimi chanthar khua bantuk in ser ding asi.
Greater Hakha khua caah zohchunh awk a tha ngaimi cu Aizawl sining asi. Tlangcung khua ahcun Aizawl hi khualian ngaingai asi cang. 1966 tiang khuate pakhat bantuk asi rih. A than a rang ngaingai i, nihin ni ahcun a kauh hi killi meng 176 asi. Minung 293,416 (2011) an um. Aizawl hi minung an karh ning a rang ngaingai i, hi tining tein an than ahcun 2050 ahcun 1,000,000 an um te kho men. Hakha cu killi meng 12.5 fai lawng asi rih. Nihin ah, 30,000 kuakapa lawng minung kan um rih ti a si i, kan tlawm taktak rih. Hi lio caan ah vision nganpi ngei in Greater Hakha ser a herh.
Aizawl hi, vision um setsai lo in tlakmi khua asi caah, nihin ni ahcun tii zong an i za lo; lamsul zong ah minung le motor aa tet tuk cang. Innkang meitet um sual ahcun meihmihnak motor luh zong a har tuk ding asi cang. Cucaah a lang zohnak lawng in aa dawh i a chung ah um a nuam lo ngaimi khua cu Aizawl khua asi.
Aizawl khualipi
Vawleicung khua nuam le khua tha bik tiah timi hna hi, za a lawngmi le a chung um a nuammi khua an si. Aizawl te hna cu khua nuam ah a i tel kho bal lai lo. Cucaah Hakha zong hi Aizawl bantuk in a lian ve te lai i, cucaah Greater Hakha Town Plan hi atu tein kan cozah nih ser a herh. Aizawl nak tha le dawh in kan ser lai timi i timh i, khua tha tatkak ser ding hi a biapi ngaingai. Hi lio caan ah Chin State Government an fim, khua an ruah le vision chiah thiam a biapi taktak.
Aizawl lampi i motor aa tet ning cu hitin asi
Cucaah nihin ni thawk in, cu Greater Hakha simanking cu cozah nih ngeih i, lam an dot tik ah siseh, innlo an sakter tik hna le inn hmun an samh tik ah siseh, cu vision in riantuan a biapi taktak. Cu thil cu atu Chin State government nih tlolh lo tein an tuah chung a herh.
Kawlram dirhmun zoh tik ah, khua tawng tampi a um nain Beltway a ngeimi khua an um rih lo. Yangon, Mandalay, Nay Pyi Daw, Taungyi, Kalaymyo, Monywa, Malamein, Sittwe le Myitgyina zong ah Beltway tling an ngei rih hna lo. Cucaah "Hakha hi Kawlram khua vialte lakah, a pakhatnak bik belway ngeimi khua ah ser ding" hi Chin State cozah zong nih vision ngei in, khua timlamhnak (town plan) ngei kho sehlaw atha bik ding asi. Cozah uktu nih vision le plan an ngeih lo ahcun hmai ah kal kho ding asi lo caah, an biapi tuk.
Greater Hakha cu atu lio Hakha nak in a let tampi a tha lai tiah ruahchannak ka ngei. Hi atanglei bantuk in Chin State Government nih an ruah le an tuah ahcun, Greater Hakha cu a lian lawng silo in khua tha taktak asi lai timi a fiang. Greater Hakha Town Plan ah ruah chung le tuah ding hrimhrim a herhmi hna cu:
1. Khuachung lam an kau deuh lai.
2. Khuachung lam an phei deuh lai.
3. Khuachung lam ningcang tein an kal deuh lai
4. Khua ningcang (system) ngei tein an kal deuh lai.
5. Sizung, University, collge le High School hna umnak hmun thatha ah an um te lai
6. Khua a let in a kau lai i, hlan nakin hmunhma a rem deuh pinah aa dawh deuh lai
7. Hmunkip ah meihmittu motor a lut kho lai
8. Lamtonnak (lansung) a tha deuh lai
9. Khua a kauh lai caah, minung umnak zaa a lawng deuh lai.
10. Hmunhma a feh deuh lai caah inn lian le sangmi sak zong ah phan ding aum ti lai lo
Tutan Hakha aa rawk tik ah lungrawk le mitthli tla in thut ding asi lo. Zeicatiah Hakha nih hi voi khat te lawng hi rawhnak a ton a si. Jerusalem te hna hmanh voi tampi hrawh an tong i, vawleicung khua lianlian asimi Los Angeles, Tokyo, Kobe le Mexico City te hna hi lihnin le meikang ruangah an rak i rawk tawn ko. Mipi an lung a thawng, cozah an i zuam i a thar in a tha deuh in an ser lengmang hna.
Rome khua tuanbia kan zoh tik ah, Rome khua hi vawleicung ah million a phan hmasatmi khua asi ti asi. Cu khua cu inn an rak i tet i, khua hi a rak nuam lo tuk. AD 64 ah Rome Khualipi cu a kang. Cu a kangh lio ah Emperor Nero cu a innsang in meikang cu a cuan i nuam taktak in hla a sa. Music aa tum i a au i, hla asa. Cucaah Nero nih Rome khua hi a duahter hramhram mi hna asi ko lai tiah an puh phah. Harnak a ton ve tikah, amah nih Krihfa a puh hna le Krihfa hremnak tiang a chuak. Zeihmanh va si sehlaw, Rome a kangh hnu ah Nero nih amah tangka bak in Rome khua cu dawh taktak in a rak sak than ti a si. Tuanbia tialtu hna nih Nero hi cuka zawn ah minthatnak an pek ve.
Rome kanghnak nih Rome khua cu vawleicung khua lianngan bik le khua tha bik pakhat ah a rak chuahter i, vawleicung pumpi nih upatmi le theihmi khua mintang bik a rak si ter. Vawleicung khua lianngan bik sinak ding caah kum tam tuk an ser. Cucaah Mirang phungthluk ah, "Rome khua cu ni nikhat ah an ser lo hme cu" ti asi. Greater Hakha zong ni nikhat, kum kum khat ah kan ser kho lai lo. Vision tu chiah phawt i, kum tampi hnu ah Beltway a ngei khomi tlangcung khua ah aa chuah kho lai.
Thil hi a tha deuhmi umnak ding caah rawhta hna a hau tawn. Thlarau pum i kan cannak ding caah titsa pum theh a hauh bantuk asi. "Pale dawhdawh a chuahnak ding caah, Kamakaung cu an thih a hau." Cu ve bantuk in, Greater Hakha chuahnak ding caah Hakha khua a chiatnak cu aa rawhta zong a herh ve. Hakha aa rawhmi kong ah kan i lawm lo. Kan ngaih a chia. Harnak cu chim cawk lo a chuak taktak. Asinain cu harnak le ngaihchiatnak nih kan thinlung a kan tei lo le hrawh lo a biapi.
Cucah Rome kanghnak cu Rome thatnak ah an hman bantuk in Hakha rawhnak cu Greater Hakha sernak tu ah hman i, Hakha hi vawleicung khua dawh ah minthangmi khua ah ser ding tu hi, Laimi dihlak kan thinlung ah umter a biapi. Kan lung thawnter le kan kut thawnter a biapi.
Nehimiah nih Jerusalem khua aa rawkmi le vampang rawk nelnul an ummi a hmuh tik ah, Persian Siangpahrang Cyrus tiang a va nawl i, Jerusalem khua le a kulh vilte a rak remh. A rak remh lio ah a hmanmi biafang cu khuaruahhar in thawnnak a ngei. Cu biafang cu "Tho u sih law sa u sih" ti asi.
Kan nih Laimi zong Greater Hakha sernak ding caah, kan kut thawnter caan lungthin thawnter caan asi. Hi lio ah Laimi kan der awk asi lo. Kan thawn chinchin awk le kan lungpurup chinchin caan asi.
Chin State Cozah hruainak in Laimi dihlak nih hitin chim ve u sih: "Tho u sih law Greater Hakha cu sa u sih"ti in!!
No comments:
Post a Comment