IRAQ ah USA Aa Taap (Stuck) Cang?

Babylon umnak Mesopotamia Nelrawnpi hi B.C 2000 tluk lio in, ral an i tuk pengnak hmun pakhat asi. Abraham chan in nihin ni ISIS chan tiang raltuk hi Mesopotamia Nelrawn ah a cat setsai bal lo. Bible tuanbia le vawlei tuanbia zoh tikah, "Mesopotamia ah hin, kum tam daihnak aum bal lo" timi hmuh khawh asi. Kan baibal ca zong hi zoh tikah, Eden Dum thawk in Mesopotamia kong tel lo in cun, "Bible Biakamhlun hi a tlam a tling kho ding asi lo." Cucaah Baibal le Mesopotamia politics, sipuazi, gegraphy, upadi le raltuknak kong hna hi an i then kho lo. ISIS chan tiangah biaknak raltuknak hmun hi Mesopotamia ah asi. 

Hlanlio Mesopotamia (Rf.www.livebinder.com)

Cucaah 2003 Iraq Tuk lio ah ca ka rak tial pengmi cu, "Pre. Bush nih fawi tuk in aa tuak sual te lai i, Iraq ah aa chuahsual te lai. Cucaah Iraq in USA hi fawi ah a chuak kho te lai lo. Iraq ah US hi saupi aa taap te lai" tiah ka rak ti tawn. Cucu Mesopotamia ah a rak cang lengmangmi tuanbia zoh chih in le, nihin ni Iraq ram i miphun, biaknak, nunphung, tuanbia, politics le thil sining umtuning hawih ka rak chimmi asi. Bush Cozah nih, Iraq tuk a timhmi zong hi lih le hrokhrol asi i thil dik asi lo tiah, ka rak doh peng. Iraq rak kha tha a pe lo taktakmi pakhat ka rak si.

Pre. Bush hi Iraq dohnak caah lih zong a a rak chim tuk. Cucu thil diklo taktak asi. Cucaah Bush-Saddam Hussein Dialogue ti in ca voi tampi ka rak tial. A ka zawnruattu Laimi upatmi pakhat le bang nih cun, "Na catialmi hi Bush cozah nih an hmuh ahcun deportation an tuah sual lai dah kaw?" ti tian gin ralrin a rak ka pek. "Iraq tuk ruangah US sipuazi zong a tlak phah te lai" tiah mifim pawl chimmi zong a dik tiah ka rak ti i, Laimi cheukhat nih cun an rak pawm lo.

2003 Iraq kah lio

Asinain cu ka chimmi vialte cu nihin ni ahcun an dik ko. Zeicatiah 2003 in Iraq ah American ralkap an lut i, caan tlawmpalte an chuahmi dah ti lo cu, atu ca ka tial tiang an chuak kho ti lo. Iraq lawng hmanh ah luh si ti lo in, Syria le Jordan tiang luh a hau cang. Hi pin ah zei can dah an i taap rih lai? Cucu a dongh lei ah kan zoh te lai.

 Ataktak le a ngaingai tiahcun, ISIS zong hi 2003 Iraq Tuknak ruangah duhsah tein aa thawkmi asi. 2003 Iraqk tuk lio ah mithiammi tampi nih an rak timi cu, "Iraq tuknak nih a fak ngaingai ral dang tu a chuahpi khawh" tiah an rak ti. Ataktak ah 2003 in kum 11 a raoh tikah Al-Qaeda in ISIS ah aa chuah daih. Cucaah Bush le Tony Blair nih an rak tukmi IRAQ RAL hi, ISIS chuahtertu hrampi an si. Nihin ni buaibainak vialte a hrampi zong hi USA le Uk ruangah asi ko. Cucu Historian tampi nih an dirpimi asi.

Iraq tuknak in kum 11 nakah ISIS an chuak

US sipuazi teh a dawnkhan maw? Iraq rak tu hlah sehlaw, 2007-2008 sipuazi tlak kha tampi an hrial khawh lai. Iraq ralruang ah nihin ni tiang US cozah a sungh cangmi hi billion 3,000 a reng ti lo. Pre. Bush cozah nih billion 65-120 kuakap a dih lai an rak timi cu, a let tamtuk a dih cang.

August 2014 in ISIS dohnak lawng bak ah hin, nikhat ah US$11 million an dih. May 2016 tiang ah a zapite 7.2 billion an dih cang. Cucu an tuak tikah a buaktlak in suimilam pakhat ah $300,000-480,000 karlak tluk in adih ti asi.

Cu lio ah USA ah innlo ngeilo tamtuk lamcung an vak ko i aho nih zoh lo in uico vah in an vak ko. ISIS hlohnak ding caah zeizat dah a dih rih lai? Zei can dah an rauh rih lai? Ahohmanh nih chim khawh asi lo. Cucaah tangka in minung thazaang in zeizat remruam dah an dih rih lai timi cu aho hmanh nih tuak khawh asi ti lo. Cucaah "US hi zeitik ah a dong lai timi theihlomi ral hi Mesopotamia ah a tu cuahmah ko." Zeicatiah, tha tein hmailei cuanh tikah, IRAQ i raltuknak hi fawite in a dih kho ding asi ti lo timi hmuh chung khawh pah asi. A ruang zeidah asi timi kan zoh lai.

Kurdistan Independent 
 Kurdish miphun hi vawleicung ah ram ngeilomi miphun lian bik an si. Iraq, Syria le Turkey ramah independent a khelmi an si. Syria le Turkey ahcun independent hmuh ding hi a fawi rih lo nain, Iraq ahcun a lam a um cang.

Zeicatiah Iraq ram Kurdistan nih "Independent" lak ding hi kum tampi an i timh cangmi le thisen a luang cangmi asi. Cucaah atu ISIS an kah lio asi caah, chim caan asi rih lo i, dai tein an um ko rih. ISIS ral a dih cun Kurdistan Independent kongah Iraq ah buainak a chuak thiamthiam lai.

Iraq miphun aa then ning (Rf. conservativetruth.com)

Iraq ram ah hin, minung 37.7 million tluk an um i, hi chung ah 60-65 hi Shiite Muslim an si. 15-20% hi Sunni Arab (atu ISIS tapung thomi) le Kurdish hi 17% an si. Kurdish zong hi 98% cu Sunni an si; 2% Shiite an si.

Abuai le a pawi taktakmi cu, Iraq ah hin Sunni le Shiite hi ui le me bantuk in an i huatmi asi. An i huatnak hi, 2003 hnu in an zual chinchin caah atu ISIS tiang a chuahnak zong asi. Cun Kurdistan le Sunni Arab zong Saddam chan in fak taktak in aa huami an si hawi. Cun Kurdistan le Shiite Muslim cozah zong 2003 hnu in an i hua chin lengmang. Cucaah an pathum ning tein an i hua. Iraq a kuaitertu le a derthawm tertu asi.

Nihin ni ahcun, ISIS dohnak caah cun, USA nih Kurdishtan siseh, Iraq Shiite Muslim cozah siseh, Sunni Arab hruaitu pawl zong an zapi tein hawi ah aa ser dih hna. Cu a raal ngaimi mibu (3) kha hawikawm ah aa ser chung hna.

A dang a pawi rihmi pakhat cu, Iraq cozah hi Shiite Muslim an si caah USA nakin Iran he aa kawm deuhmi an si than. ISIS tuknak zongah Iran ralkap tampi an i tel lai tiah ruah asi. Iran nih hriamnam, tangka le minung thazaang in tampi a bawmh rih.

ISIS a dih bak in cun, Kurdishtan Ramkulh (Sunni) hi a tuan le tlai deuhvak lawng asi. Independent an khel cawlh lai. "Zeitluk in dah a buai te lai? Zei can tiang dah an buai lai?" timi bel chim khawh asi lo. Shiite hruaimi Iraq cozah nih fawi tein independent a pek ahcun a buai ning a din lai i, a tawi lai. A pek duh lo i ral an i tuk ahcun a buaining a fak lai i a rau lai. Cucaah ISIS dih hnu buai dingmi khi zeidah a lawh te lai timi cu, chim chung awk a tha rih lo.

Kurdishtan hi independent a lak hrimhrim te tikah Iraq ah zeidah a chuak than lai? Iraq nitlaklei ummi, Sunni Muslim (Saddam Hussein biaknak phun) nih Anbar Province ah Independent an khel than khawh. An khel zongah Kurdistan bantuk in nihin ni ahcun tapung an cak lo. Asinain an rum, an thawng, Saudi Arabia le adang Sunni ram thawngthawng nih an tanpi ve lai i, Sunni-Shiite kahnak a chuak than kho mi asi.

Sunni-Shiite kahnak a chuah ahcun Sunni lei cu Saudi Arabia, Turkey, Kuwait, Egypt le a dang Sunni ram thawngthawng nih an tanpi lai. Iraq Shiite cozah cu Iran le Syria nih an tanpi lai. Lebanon ram ummi Hezabollah (Shi'a tapung) nih an tanpi lai. Cucaah Sunni-Shiite dohnak khi Iraq ah fak taktak in a um kho. Khi bantuk caan a phak tik ahcun, atu Iraq cozah khi USA ral asi than lai.

Zei can dah an buai lai? Zeitluk faak in dah an buai te lai? timi bel chim khawh asi rih lo. Cuticun an buai cikcek hnu le kah cikcek hnu ah, IRAQ RAMTHAR hi aluatmi ram (3) ah atanglei bantuk in aa chuah te lai tiah mifimmi nih an tuak chung.



USA hi IRAQ ah zei can dah aa tap lai timi theih chung awk a har. Mifimmi chim bantuk in Iraq hi ram (3) i aa chuah taktak ahcun, US hi IRAQ ah hi ram (3) ah an i then dih hnu le an ram (3) ning te dai tein an um tiang hi IRAQ ah aa taap kho cang. Cu dai tein an um tiang cu kum zeizat dah a rauh te hnga timi cu chim khawh asi rih lo bantuk in USA hi Iraq ah zeican dah aa taap lai timi zong chim awk a tha rih lo!!!

----------------------------------"------------------------------------"-----------------