Semnak Lairam: PALO DURO CANYON STATE PARK Ah ACCC Mino He

Palo Duro Canyon Tlangpar Ah ACCC Mino he

Vawlei kan nunnak caan, vawlei i kan i nuamh le leen caan hi, caan tawite a si. Hi caan tawite nun chungah, tuah le hmuh ka duh ngaingaimi cu, Pathian nih, hi vawlei ah thil khuaruahhar a rak cantermi thil zoh le hmuh asi. Cun thil lianngan a tuahmi kong chim hi asi.

"Video le computer lawng in hlah maw ka hmuh te rua lai" tiah ka rak ruahmi, USA i hmunhma dawh taktak asimi Palo Duro Canyon State Park cu, tu chun (Nov 26, 2016) ah Amarillo Chin Christian Church (ACCC) chairman, BYF upa cheukhat le Sunday School sayamate mino hna nih an ka lenpi. Phanh ka duh tukmi hmunhma asi i, ka hmuh khawh caan lunglawmhnak in ka khat. Ka caah zeitik hmanh ah philh khawhlo dingmi tuanbia pakhat, ACCC Mino hna nih an ka tial piak caah, an cungah kai lawm ngaingai.

Umnak le Kalnak

Palo Duro Canyon State Park cu, Amarillo khua in a thlanglei meng 36.6 a hlatnak ah a um. I-27 South in kan kal. Cun TX-217 E ah pial i kal ahcun phanh khawh asi. A lam a ding tuk i, motor a ran caah sau kan rau lo.

Hi park hi July 4, 1934 ah an rak on hmasat. Acre 29,182 a kau. Palo Duro Canyon hi tlangthluan saupi asi. Hi ka hmun hi Canyon lungpang a chaklei kam a donghnak ah a ummi asi. A kalnak lam hi a phei tuk. Canyon phak lai cu phawngphai tete in a um i, lung a leng i ngaingai. Laitlang a ka theihter tuk hringhran.

Gate kan phan lai teah luh man pek a hau i, ngakchia kum 13 tang ca aa dang i, upa ca cu a man a fak deuh. Chairman nih kan zapite ca in a kan liam piak. Kan i citmi motor a sang. Hmai ah ka thu i, hman ka thla pah. Ka nuam tuk hringhran.

Canyon luhnak gate. Hika ah tiket man pek a hau.

A Tunabia Tawi

The Civilian Conservation Corps timi nih 1930 hnu deuh ah, atu lio inn ummi hna le lam hna hi, riantuantu ca le park zohmi mileng caah an rak sak hna. Museum zong a um i thilri zong an zuar. Khawn maw ka ahcun riahnak inn tete zong an um.

Canyon hi meng 120 a sau i meng 20 tluk a kau. A thuhnak bik cu pe 800 a thuk. A sannak bik tlangpar cu rili in pe 3,500 a sang. Palo Duro Canyon hi USA ah a pahnihnak a lian bikmi canyon asi tiah an ti tawn.

A lianbik mi canyon cu the Grand Canyon asi i meng 277 a sau i meng 18 a kau i, pe 6,000 a thuk. Hi hmun hna hi, zeitik tal ah ka phan kho ve te hnga maw? Phanh ka duh ngaingaimi hmunhma asi i, phanhnak khawhnak caan tha Pathian nih ka pe te ko seh ti zong ka saduhthahnak asi.

Palo Duro Canyon hi, tlangcung vawlei kha tii nih a horh i, meng 120 a saumi Prairie Dog Town Fork of the Red River timi "thetse tiva" ah vawlei ne a tlakter i, tlangcung vawlei tii nih duhsah tein a ziah lengmangmi ruangh a chuakmi asi. Ruah tii nih canhyon vawlei kha duhsah tein a horh i a ne ah a tlakter caah a chuakmi canyon asi.

Tuanlio Spanich Khuaram kawltu (explorers) hna nih an rak hmuh hmasat i, "Palo Duro" tiah Spanish min an rak sak. Asullam cu cuka i an hmuhmi thing tampi a hakmi a keumi kha an auhnak asi i, "thing hak" timi sullam a si.

Palo Duro Canyon ah hin minung an umnak hi kum 12,000 tluk asi cang. Hlanlio a rak um hmasami hna cu a kenkip ah a rak vakvaimi miphun an si. Bison sia, mammoth le a dang saram lianlian kha an thah hna i, cuticun an rak i cawm.

Cu hnu ah Apache Indians miphun pawl an rak um. Cu hna cu Comanche le Kiowa Indians miphun pawl nih an rolh hna i, cu miphun hna cu 1874 tiang an rak um. Indian miphun ram a rak si.

Cu lio caan ah cuka ummi Indians pawl cu, Oklahoma ah dawi viar ding in, Col. Ranald Mackenzie cu an rak thlah. Col. Ranald Mackenzie le rakapbu 4th Calvary hna nih Indian pawl rang 1,400 hi an rak tlaih khawh. Rang tha bikbik a cheu kha an rak i lak hna i, a tangmi paoh cu Tule Canyon timi lungpang ah an rak thah dih hna. Native American pawl cu thilri phurhnak le umkalnak an ngeih ti lo caah, raal an rak sung i, an ram cu ramdangmi nih an rak chuh hna. Okalahoma leiah an rak dawi dih hna.

1876 ah Charles Goodright cu hi Palo Duro canyon ah a rak lut i JA Ranch timi satil inn a rak sak i, satil zuat a rak thawk. Cuka ahcun satil 100,000 a rak zuat. Goodright nih cu satil zuatnak cu 1890 tiang a rak hman. Cu satil zuatnak cu a cheukhat cu nihin ni tiang an hmun ko rih. Hi hmun hi saram zuatnak hmunhma ah a rem tuk caah, kan kalnak lamkam zong hi caw le rang tampi an um hna.

Zoh cimlo in aa dawhmi Palo Duro Canyon

Len Cim Lo Hmun

Grand Canyon hi vawleicung kokek thil khuaruahhar pakhat ah aa telmi asi. Hi Palo Duro Canyon zong hi khuaruahhar pakhat asi ko. Zoh cim lo asi.

Cawnpiaknak a dih in, 2:00 PM in Amarilo in kan i thawh. Mino 12, church chairman Pu Duh Hnin le keimah he 14 kan si. Minutes 50 tluk kan mawngh hnu ah a sannak bi, Palo Duro khuacuanhnak (viewpoint) hmun kan phan. Pumpak in siseh, abu in siseh hman kan i thla hna. ACCC mino cu an fel. Capo saih an huam. Lampi ah dailo in capo an sai i a kan nihter. Hawikomh an thiam i, kan i nuam tuk hringhran.

Zanlei sang asi. Khua a dawm pah. Tli zong a hrang pah. Khuacuanhnak hmun in Canyon i a ummi Museum kan va zoh. Cuka ahcun durbing an chiah i, lam hlat pi kha nai tein hmuh khawh asi. A zoh zia ka thiam setsai lo pin ah, khua a dawm deuh caah tha tein ka hmu kho lo. Mino pawl cu capo an sai. An i nuam tuk. Hman an i thla pah hna. Tlang cu lung a leng tuk i, thinlung a panh tuk.

Mino upa nih, "Saya, a tanglei pi ah kan kal than hna lai" tiah ati i, kan zapite in motor ah kan kai than. Tlangcung in a kuarhnak tiva nelrawn lei ahcun duhsah tein kan zuang. A cheng tuk nain, lam dottu Engineer pawl an thiam tuk caah, lam cu cho setsai lo tein an ngerh.

Motor cu a kai le he, a zuang lei he kan tam ngai. Lam aa ngerhnguaimi zoh ahcun lung a leng. Mokok lam hna a lo. Maymyo phak lai lamkual hna a lo. A caancaan ah Laitlang lam Vaar cho hna a lo i, thinlung phundang ngai asi. Kum 19 chung mah bantuk lamcho ka hmu ti lo i, ka lung a leng ngai. Laitlang a ka ngaihter. Hman kan i thla hna. Kan i nuam tuk. Kan thinlung a thar. Nih le kheh lawngte kan rian ko hna.

Kan Driver "Thawngthawng" nih a kan helpi i, a lang in kan hei cuanhmi hmunhma nuam vialte cu motor in kan vel i, kan i chawk. Lam tuah an thiam tuk i, zoh dawhnak hmunhma vialte cu a lang in tling tein kan hmuh khawh dih. Lung aa hmuih tuk. Hmunhma a remnak tete ah hman kan i thla pah hna.

Lampi ah chungkhar in a kalmi le abu in Camping a tuahmi zong an um ve. "Acheu cu an riak hna" tiah mino nih an ka chimh. Riah a nuam tuk ding khi asi. Camping tuah i riah ah a nuam tuk ding asi.

Zanlei sang a si nain, ngakchia tete zong tampi an um. Acheu cu ke in an i chawk hna. A cheu cu rangcung in aa chawkmi zong an um. A cheu tlangah a kaimi zong an um ve. An rak i nuam tuk cio hna. Vawleicung hi mah bantuk tein rak i nuamh ve hi, thil tha asi. Zeicatiah thaizing cu kan phanh lai le phanh lai lo aa thei ti lo.

Khua ka ruat. "Pathian nih USA cu a rak sersiam khun ko" tiah ka ruat. Lairam ah hi bantuk pakhat te tal rak um ve sehlaw zeitluk in dah a va that hnga ka ti. Zinghmuh Tlang hna zong tha tein tuah ve ahcun tourist caah kai nuam ngai le tangka hmuhnak a va si ve ko hnga tiah ka ruat ngai. Kan caan aa tet deuh caah, tlangpar tete kan kai manh lo. Tlangpar kai cu ka sia a herh tuk nain zeitiawk a tha lo.

Cuticun chawhnak a thatnak hmun a donghnak kan phanh in duhsah tein inn lei kan tin than hna. Ka khuaruah a har mi cu, kan i chawh pah ah, tlang cu pungsan aphunphun in aa thlengmi an lo. Pungsan phun tam tuk a rak um. Nelrawn in duhsah tein kan van kai cu, Laitlang a ka ngaihter tuk. USA ka phak hnu ah mah bantuk lam chukcho motor ka cit bal ti lo i, kan zuan leinak in kan kai lei ah thinlung phun dang deuh tein a um than hawi.

Cuticun khua kan cuanhnak tlangpar kan phan than. Kir lei cu kir tak sian ding in a um lo. Lung a leng tuk. Duhsah tein kan rak tlung i, chuahnak gate cu kan phan. Mi tampi an rak um hna. Cuka gate ahcun a ki a sau taktakmi caw lianlian 3 an zuatmi hna an um. Hman ka thlak ta hna hnu ah, 4:20 ah gate in kan chuak.

Canyon lunnak gate ah an zuatmi cawtum kisau

Hi hmunhma hrawng i, fingtlang aa dawh. Thingkung an niam tete. Farkung niam tete zong tam ngai an keu i, an thingram duh a nung. Motor lamkam cu rawn lawngte deuh asi. Khawn maw ka tete ah kuar dupdap le bo fatete an um. Shan Ram te ko a lo. Shan Ram ka tlawn lio a ka theihter tuk hringhran. Lam a ding ngai i motor cit a nuam. Mino ngaknu cheukhat cu an ba pah i, kir lei ahcun an ngu pah hna.

"Ka phan kho te hnga maw? Zeitik ah dah ka phanh khawh te hnga?" tiah saduh ka rak thah tawnmi Canyon dawh taktak pakhat ka phanh caah, lunglawmhnak in ka khat. Ka philh kho ti lai lo. Khirh awk a tha ti lo mi tuanbia asi.

Ka caah caan, thazaang le ngeihchiah a petu ACCC Mino le upate cungah kai lawm tuk. Canyon ka hmuh kawh caah, ka lunghmuih ngaingai. Pathian sermi thil hna hi, a lamkaltu an rak si taktak ko ti kha, Palo Duro Canyon nih a ka fianter. Zoh cim lo le len cim lo hmunhma ka hmuh caah ka lungsi ngaingai.

A ka zultu ACCC Mino pawl

Minung cu caan le hmunhma nih ukmi kan si caah, tluntak kan siang lo tuk nain tlun kan i thawh. Zan ah pumh than ding kan si caah, Canyon cu Bye--Bye kan tuah i, motor cungah kan kai hna. Motor kan kai hlan ah, a ka thlahtu dikak a donghnak ah an buu tein hman ka thlakta hna. Cuticun dinlo in innlei ah kan motor cu a tli thluahmah.

Canyon ah caan tawite- suimilam pahnih tluk lawng-kan um nain, Mirang nih "A life time memory" an ti bantuk in, zungzal philh khawh ti lo dingmi tuanbia pakhat ka thinlung ah aa tial. Aw...zeitluk in dah nihin ni hi a sunlawi ti ka ruat.

Innlei kan tlun pah ah, motor cungin khua ka cuan. Inntete ka hei hmuh hna. Satil zuatmi caw le rang tete ka hmuh pah hna. Dumhau dawhdawh an um. Khawnmaw ka ah electric mei tete an i vang cang. Khua a dawm pah i, thli zong a hrang pah. Motor chungah ka lungthin cu khua zaza ka ruat.

"Nikhat khat ah ka phan than kho te hnga maw? Ka phanh than tikah atu ka kalpi hawi hna hi an tling than te hnga maw?" ti in...!!!

-------------------------------------------------------------------------------------------------