Chicago Ah A Luangmi Thisen

Christmas lai a si. Krihfa tampi caah, minung thinlung a thar lio le nuamh bik lio caan a si. Innlo, dawr, biakinn, lamsul aa dawh bik lio caan a si nain, Chicago khua i chungkhar tampi  cu, "Ramah ah, Rachel a tah bantuk in an tap ko hna."

Jesuh a chuah lio ah, chungkhar nu hna tampi an rak tap. Zeicatiah an fale kum hnih tang kha Herod nih thah ding in nawlbia a rak chuah caah a si. Bible nih a chimmi cu:

"Ramah khua chungah thawng a thang. Cu thawng cu tahnak le ainak thawng a si. Rachel nih a fale cu a tah hna; an dihlak in an thih dih caah, a tap lengmang ko. Ngamh khawh a si ti lo" (Matt 2:17,18).

Jesuh chuahka ah, Ramah khua ah aihramnak le tahnak thawng a rak than bantuk in, 2016 cu Chicago khua zong ah tahnak le ainak thawng a thang ve. Zeicatiah chungkhar tampi cu, an fanu maw, an fapa maw meithal le zeidang hriamnam in, an nunnak a liam i, an nih caah Christmas nuam tein hman awk a tha ti lo. Chungkhar tampi cu "tahnak le aihramnak in an khat."

Chicago (Sears Tower cung in ka thlakmi)

Chicago khua hi, Illinois State ah a ummi a si. Lake Michigan in nitlaklei kap ah a um. A chaklei ah Wisconsin State a um. USA ah lianh ah pathumnak a si. A khua aa dawh. Khuachung lam an ding i an tha. Zan ahcun Chicago nak khua dawh hi ka hmu rih lo. Zoh a dawh taktak. Innlo a tha. Lake Michigan kam ah a um caah, beach tha taktak an ngei i tlawnlen a nuam. Khua nuam asi caah, mi tampi nih sipuazi an tuah i, thanchonak tampi a um.

Hlan deuh ah kum tam ngai vawleicung inn sang bik sinak a comi Sears Tower umnak a si (Sears Tower hi aa dawh tuk. Voi (2) ka kai ve cang). A dang inn sang minthang Trump Tower te hna an um. Vawleicung khua ah khuadawh le khua rum tiah chim ve mi a si. O'hare International Airport cu vawleicung ah aa manh lo bik le a lian bik pakhat a si. Laimi zong tampi an um caah, kan pal lengmang cio mi khua a si.

Chicago khua cu, a leng zoh bantuk a si lo. A khua aa dawh tuk nain a chungril cu tih a rak nung tuk. Gang, drug, nu le zeidang firtlei a tam taktaknak khua a si. Tihnung ngaingaimi khua pakhat a si. Hi tining tein a kal ahcun, hmailei kum tampi ahcun hi bantuk mithah lainawnnak nih Chicago khua hi rawhnak a phanhter khawh. Chicago khua chung damlonak hi, "chungril chung cancer bantuk a si" cang.

Chicago ah mithah lainawn a karh tuk i, October thla chung lawng ah 76 an kahthat hna. December chuakka ca an chuahmi ah, "Chicago ah minung 701 an thah cang hna. Kum dih ah 726 an thah te hna lai tiah an ruah" tiah an tial. Asinain December 18 zah ah minung pakhat an kahthat i, cucu 2016 chungah minung 738 an thahnak asi cang. An rak chim chungmi nakin, minung12 tam deuh an thah cang hna. Atu ahcun, "2016 chungah 750 an thah te hna lai tiah ruah a si" an ti than cang. Minung 750 tlinnak ding caah, 12 lawng aa duh. Cu chung ah a ho dah a va tel te hnga? Tihnung le tuksapur a si. Hi bantuk hmun ahcun, daihnak Bawi chuah camtuak Christmas zong ah thinphan dai lo a si.

Chicago khua ah minung an thahmi hna cazin zoh tikah, kum 20 chung ah tu kum hi a tam bik a si an ti. "2016 ah, USA i mithah lainawn le sualnak fak hi a tum nain, USA khualianlian 30 ah mithah lainawn 14% a karh" tiah New York khua ummi, Brennan Center for Justice nih an ti. Hi tluk i mithah lainawn a karhnak hi, Chicago kua chung lawng hmanh ah, mithah lainawn hi 43.7% a karh caah a si i, Chicago i mithah lainawn a karhmi nih hin, zatceu hi cu a kaitermi a si an ti. Chicago lawngah, 2016 chung meithal kahnak 3,400 a chuak cang.

Chicago hi mithah lainawn a rak tam hrimhrim ko. Amah nakin a lian deuh vingmi New York khuapi ah 2015 ah minung 352 lawng an thah hna i, 2016 thahmi number hi 336 a phan te lai tiah Brennan Center nih an tuak chung. Cu tluk khua lian hmanh ah, 336 lawng an thah te hna lai ti a si i, Chicago ahcun 738 an thah cang hna caah, hihi a luan tuk. Cucaah Chicago khua ah hin, kan sawh khawhlomi "thilbuai" (problems) nganpi a um tinak a si.

Chicago lawng ah mithah a karh maw tiahcun a si lo. USA ram pumpi khuapi 30 ah mithah a karh ti a si. Lai khualipi kan timi, Indianapolis zong hi, mithah a karh biknak khua 15 chungah aa tel ve. 2016 chungah Indianapolis ah minung 145 an thah ve cang hna. Houston, Dallas, Fort Wayne, Kansas City, Atlanta le Phoenix zong ah mithah a karh ti a si. USA ram pumpi ah hlannak cun mithah lainawn a tlawm deuh an ti nain, 2015 ah 15,696 an thah hna. 2015 ah sualnak fak (crimes) voi 1,197,704 a chuak ti a si.

Sears Tower le a pawng innsangmi

Chicago Sun-Times nih a tialnak ahcun, 2016 ah hin Chicago ah meithal kahnak in mi an thihlo caan sau bik hi, April thla ah a si i- ni 3, suimilam 9 le minutes 23- a si a ti. 2016 chung ah thahnawnmi dihlak 769 an si cang; cu chungah 11 cu nikum i an rak kahmi le hma pumi i a thimi an si. 2016 chung i meithal kah bak a thi cangmi hi 693 an si tiah an ti. Ruah lengmang ah tuk a sum tuk. 

Kan i lawmh awk ngai a simi tu cu, Chicago ah Laimi tampi khua an sa nain, mi pakhatte hmanh 2016 thahnawn an tong hraw lo. Laimi umnak cu sang a that deuh ca zong a si kho men. Chicago ummi Laimi zong Pathian nih rungveng hna sehlaw, himbawmnak pe ko hna seh tiah saduh ka thah piak ve hna.

Kain nih a thahmi a naupa, Abel thisen nih Bawipa a auh (Gen. 4:10) bantuk in, "Chicago Ah A Luangmi Thisen" vialte nih Bawipa an auh hrimhrim lai i, nikhatkhat ahcun Chicago ah daihnak le remnak a um te lai; mipi le chungkhar kip zong, meithal kah tihphannak um lo tein, dai le hnangam tein an tlawnlen khawh caan a um te ko lai timi ruahchannak he!!!