Cheuhra-Cheukhat

Cheuhra-cheukhat hi Mirang nih cun "Tithe" tiah an ti. Cafang in an tial ahcun, "One-tenth" ti zongah an tial. Lai holh in tial tik zongah, "cheuhra-cheukhat"tiah biafang pakhat ah chiah i tial ah a tha ding a si.  

Mirang biafang Tithe timi hi, Mirang holh hlun "teogapa" timi biafang in a rami a si. Cucu "pahra-nak" (tenth) ti a si. Cucu hmuhmi chung in a miakmi asiloah chuahmi thilri vialte chung in "cheuhra chungah cheukhat" tinak kha a si. Lai ruahnak he aa dangmi a um lo. 

Cheuhra-cheukhat timi hi Krihfa le Judah biaknak nih cun kan chim ngai nain, Bible ah a langhnak a tlawm ngai. Bible zoh tik ah, Mirang nih "a tlawm le tam" caah hmanmi biafang an ngei. Mirang biafang ahcun a tam caah 's' asiloah 'es' chap a si. 

Mirang bible ahcun a tlawmmi cafang  "tithe" timi hi voi (13) a lang i, a tammi cafang "tithes" timi hi voi 21 a lang. A zapite 34 a lang. Hi biafang hi voi tam a lang lo nain, Judah biaknak le tuanbia zoh tikah, Minung le Pathian i pehtlaihnak le Pathian riantuannak ah, a herh taktakmi thil a si. Krihfami le Judahmi caahcun tuah lo awk thalo le tuah ding hrimhrim thil a si. An biaknak ah a herh tukmi a muru thil pakhat ah an rak chiah. 

Bible tuanbia zoh tikah, Cheuhra-cheukhat hi, Abraham nih a thawkmi a si ti kan hmuh. Cheuhra cheukhat a pekmi cu Melkhizedek a si. Cu pa cu Canaan ram Salem khua siangpahrang a si. A mah cu Cung Nung Bik Pathian tlangbawi tiah Genesis ahcun aa tial. Hi thil ruah tikah, Abraham hlan ah, Melkhizedek cu Cung Nung Bik Pathian thlangbawi a rak si cang ti nak a si. Cucaah Abraham hlan in "Cung Nung Bik Pathian" hi Melkhizedek khuami nih an rak biak ko cang ti zong a langhter. A mah nih Abraham zong cu thluachuah a pek. Thluachuah a pek tik zong ah a chimmi bia hna nih, a mah hi zeibantuk minung le zumhnak a ngeimi dah a si timi cu a langhter ko:

Van le vawlei sertu Cung Nung Bik Pathian nih, Abaraham cu thluachuah in pe ko seh.

Na ral an teitertu Cung Nung Bik Pathian cu thangthat si ko seh (Gen 14:19,20)

Melkhizedek hmanmi biafang hna hi aa dawh, an tha i an thuk ngaingai.  Melkhizedek sin ah Abraham nih a pekmi cheuhra-cheukhat hi, Bible ah cheuhra-cheukhat pek aa thawknak a si. Abraham nih a pek tik ah, raltuknak i a hmuhmi "hranchaw" chung in a pekmi a si. A pekmi Melkhizedek cu Salem siangpahrang zong a si i, tlangbawi zong a si. Melkhizedek hi Jesuh Krih kan tlangbawi i a hmanthlak le hmelchunh a sisnak kha, Hebrew ah a kan chimh (Hebrew 7 zoh chih).

Bible ah cheuhra-cheukhat umtuning hi hmun zeimawzat ah a lang. A tawifiannak tein zoh u sih. Bible ah rel chih lawng ah a fiang kho ding a si caah, careltu nih bible rel chih a herh. Hi ka zawn ahcun cheuhra-cheukhat kha a tawinak in 1/10 tiah a caan ahcun ka tial.

Biakam Hlun

Biakam Hlun zoh tikah, Abraham nih ral a tuk i a hmuhmi hranchaw cheuhra chung in cheukhat kha, Melkhizedek a pekmi hi, cheuhra-cheukhat aa thawknak a si. Jacob nih Esau sin in a zam lio ah, a pa inn i Pathian nih dam tein a ka hruai than ahcun, "ka hmuhmi dihlak in cheuhra-cheukhat kan pek lai" tiah bia a rak i kam (Gen. 28:22). A pek taktak le taklo cu Bible nih a tial lo caah kan thei taktak lo. Hihi zeiruang ah dah aa kam hnga timi ruah tik ah, a pu Abraham le a pa Isaac nih an rak pek lengmangmi kha a hmuh caah a si lai timi cu a fiang ko.

Cuticun chan a hung kal i, Egypt sal tannak in Israelmi an luat i, Sinai ramcar chung an um lio ah, Moses nih cheuhra-cheukhat pek ding hi Sinai Tlang ah nawlbia a lak. Cu nawlbia ahcun Arron tefa Levites pawl cu Pathian nih biakam ram chungah ro a pe hna lo (Exodus 4:14; Number 3:10). Ro le covo an ngei lo. Pathian tu kha an nih caah an covo le an ro a si (Number 18:20). Puan biakinn an zohkhenhmi ca le rian an tuanmi ruang ah, cheuhra-cheukhat kha, an ro can ah pek an rak si (Number 18:21-24). Cucaah Cheuhra-cheukhat cu Levites pawl caah a rak si:

Levi mi cu tonnak thlam chung I an rian, cu riantuan man ahcun Israel mi hna lak I cheuhra-cheukhat kha ka pek hna (Number 18:21; 24).  

Cucaah hi nawlbia ning tein kal ahcun cheuhra-cheukhat paoh cu Levites pawl ca ding a si tinak a si (Tu chan ahcun bible ning cun zulh taktak cu a um theng lo).

Moses nih nawlbia a pek rihmi hna cu, Levites zong nih hin, Israel mipi sin in an hmuhmi cheuhra-cheukhat chung in an nih zong nih cheuhra-cheukhat pek ve ding kha a si. Aaron le a tefa hna zong Levites an si caah, cheuhra-cheukhat kha pek ve ding cu an si. An nih cheuhra-cheukhat tu cu "Tlangbawi Arron sin ah nan pek lai" (Number 18:26-28) ti a si. Arron pin cu pek ding a um ti lo caah, a donghnak a si cang.

Biakam Hlun zoh tikah cheuhra cheukhat pe ding in bible nih a timi hna cu a tanglei minung lawng an rak si:

1. Lo le dumhau tuahmi (Deut 14:12)
2. Levites pawl (Lev. 25:32)
3. Satil zuami   (Num 18:25-29)

Hi chan ah hin, a cunglei rian hna hi minung tambik an pawcawmnak a rak si. Hlanlio ah sehzung a um lo. Thilri cawkzorh in pawcawm a rak tlawm i, zapi an pawcawmnak hawih in Bible nih pek a rak fialmi hna a si. Tu chan bantuk in thlahlawh ei rian a rak um lo. Paycheck a rak um lo;. Tangka pek in riantuan zong a rak um tuk lo caah, an mah chan hawih in Bible nih a tialmi a si. Tu chan tu ahcun amah le chan sining hawih in, pek viar ding timi in ruah a si.

Cheuhra-cheukhat tuanbia zoh tik ah, Biakam Hlun ah hin an rak tuah taktakmi thil pakhat a si. A biapi tuk ah an rak chiah. Cucaah cheuhra-cheukhat timi hi Biakam Hlun ah tam deuh kan hmuh i a tanglei Biakam Hlun ah hitin a tuanbia kan hmuh khun:

1. Abraham-Melkhizedek kha hranchaw chung in 1/10  a pek. (Gen 14:20; Hebrew 7 zoh chih)

2. Jacob nih vision a hmuh hnu ah, a pa ram, Biakam ram ah na ka phakter than ahcun ka hmuhmi dihlak i 1/10 hi kan pek zungzal lai tiah bia a kam. Jacob nih cheuhra-cheukhat hi a pe zungzal maw timi cu a tial ti lo nain, a pek ko lai timi hi zumh a si.

3. Moses nawlbia nih 1/10 pek ding tiah a thawk (Leviticus 27:30-32). Hika ah hin, cheuhra-cheukhat cu "Bawipa ta asi; a thiangmi a si" (holy/sacred) ati. Thei le ram chung thil chuak vialte, thlaici cinmi dihlak i cheuhra-cheukhat kha Bawipa ta an si" a ti. 

4. 1/10 cu "Levites pawl nih puan biakinn chung i rian an tuanmi caah ti a rak si." (Number 18:20-32)

5. Jordan tiva an tan hnu ah 1/10 kong ah zeitindah nan pek ning a si lai timi kong ah Moses nih a cawnpiak hna (Deuteronomy 12:5-11)

6. 1/10 kha zeitindah nan phawt ning a si lai timi Moses nih a cawnpiak hna (Deut 26:12-15)

7. Pathian nih Israel mi kha thluachuahnak an hal hlan ah zeitindah 1/10 kha thianter a hauh timi kha a chimh hna. (Deut 26:12-15)

8. Siangpahrang Hezekiah nih biaknak a remh "1/10 rak chiahnak ding hmunhma kha a dang tein a zuah." (2  Chanrelnak 31:5-12)

9. Nehemiah chan ah Israel mi hna nih Pathian nawl an ngaih caah 1/10 kha Pathian rawkbuk ah an rak rawn (Nehemiah 10:37-38)

10. Nehemiah nih 1/10 a kilvengtu le zohkhenhtu officers a rak thiah hna (Nehemiah 12:44)

11. Nehemiah nih thilri khawnnak inn chung in Tobiah kha a chuah I, 1/10  caah thilri khawnnak inn kha 1/10 caah a thianh. Cun zulh ding order a chiah (Neh 13:5-12)

12. Pathian nih Prophet Amos hmang in 1/10 kha Bawipa sinah rak pe than u tiah a ti. Cu ti nan tuah lo ahcun "chiatserhnak" (curse) kha nan cungah a  um lai a ti (Amos 4:4)

13. Malachi 3:8-10 "Malachi nih cheuhra cheukhat pek kha a herhnak le Pathian sin ah a dingmi raithawinak tuahter ding kha a chimh than hna."

Biakam Thar

Biakam Thar ah hin, Biakam Hlun tluk in cheuhra-cheukhat kong hi a um lo. Jesuh thihnak in a thawh than hnu i Krihfabu a dir tik zong ah, kum zabu pakhatnak Krihfa pawl nih hin, cheuhra-cheukhat hi a cawn zong an i cawnpiak tuk ti lo i, a hman zong an rak hmang ti lo. Mah lungtho tein peknak kong tu hi biatak tein an rak i cawnpiak (1 Cor 16:2; 2 Cor 9:7). An ngeihchiah thilri zong kha an zuar hna hi Pathian le an bu caah an pek ko hna nain cheuhra-cheukhat pek bantuk in an rak hmang lem lo. Paul cawnpiaknak zong ah cheuhra-cheukhat kong hi kan hmu ti lo.

1. Jesuh nih Pharasees pawl kha 1/10 an peknak kong ah a mawhchiat hna (Matt 23:23). Jesuh nih cun "Thinlung" (Moral hi biapi ah a chiah; Luke 11:42 he aa khat). Jesuh nih cheuhra-cheukhat pek hi, a sawi lo. A thloh hna lo. An pekning an lungput tu kha a sawi hna. Uanthlarnak an hmanmi, dinfel tuk ah an i ruahnak lungput, a pe lomi kha sual tuk ah an ruahmi hna Pharasees lungput le thinlung kha a sawimi a si. Cheuhra-cheukhat pek hlan ah, 'thinlung' kha remhta a herh deuh ah Jesuh nih a chiah.

2. Luke 18:12 "Pharisees nih Nawlbia an zulhmi le 1/10 an pekmi hi an i uanthlarpi nak kong" kan hmuh. Cucaah cheuhra-cheukhat te hna hi, kan mah chaw a si lo i, Pathian tat pek thanmi khi a si ko caah, uanthlar ding a rak si lo. Uanthlarnak lungput le ka ding, ka tha, hawinak in ka zum le ka fel timi lungput phun in pek hi, Jesuh nih a doh taktakmi a si. Cheuhra-cheukhat pek te hna hi, uanthlarnak hna ah hman lo ding a si. Midang zuamnak, teinak le neknak hna ah hman lo ding a si nak kha, Bible nih a ka kan cawnpiak.

3. Hebrew 7:5-9 ahcun Abraham nih a rak pekmi 1/10 kha "Tlangbawi riantuannak ah thlennak a umnak a langhtertu a rak si" (Hebrew chung cu a sau ngai caah kan fianger kho tlu lai lo).

Biakam thar ah khuaruahhar ngai a simi pakhat cu, Jesuh le zultu hna nih cheuhra-cheukhat hi an peknak kong aa tial lo. An pe ve hnga dek maw?

Jesuh Nih Cheuhra-Cheukhat A Pe Ve Maw?

Bible thiammi hna nih an ruah tikah, Jesuh nih hin cheuhra-cheukhat a pe lai lo tiah an ruah. Biakam Thar zoh tikah Jesuh nih cheuhra-cheukhat a peknak zong a um lo. Jesuh nih hin, cheuhra-cheukhat a pek awk a si lo tiah an ruahnak a ruang pathum a um:

1. Amah cu zungthiamnak (carpenter) in aa cawmmi a si (Mark 6:3)
2. Thiamnak in aa cawmmi a si.
3. Amah cu Judah cithlah a si (1 Samuel 16:12-13)

Cunglei ah kan rak tial cang bang in, Israel mipi chung in cheuhra-cheukhat pe dingmi hna cu "lo tuahmi, satil zuami le Levites pawl" lawng an rak si. Jesuh hi Judah cithlah a si. Kut zungthiamnak in aa cawmmi a si caah, hi mibu pathum chungah aa tel lo. Hlanlio Hebrew tuanbia zoh tikah, chawlet, ngatlai, innsa, puaninn sermi le zungthiamnak in aa cawmmi hna hi, cheuhra-cheukhat an rak pe theng lo ti a si. Cucaah Jesuh zultu ngatlai pawl zong ngunkhuai le cheuhra-cheukhat an rak pek lo nak a si tiah an ti.

Moses Nawlbia Ning In Tlinh Khawh A Si Maw?

Cheuhra-cheukhat Pek

USA ah hin pastor cheukhat cu "tithe" an pe lo. A cheu cu an pek ve. A ruang cu Aaron le a fale cu priests an si i, cheuhra-cheukhat pek kha fial an rak si lo tiah an ti. An pek timi zong a um lo caah asi. Cheuhra-cheukhat pek timi hi, Pathian nih hnekmi a si lo nain, Malachi chung kan zoh tikah, pek lo ahcun "Pathian chaw fir" (rob) bak a si. Kawl holh in chim ahcun "Damiah taih" ti kha a si i, pek hrimhrim a herhmi a si. Bible zoh tik ah, Aaron le a fale nih cheuhra-cheukhat an pek timi cu aa tial lo nain, an pek ko lai tiah ruah a si.

A ruang cu Levites pawl cu puan biakinn i riantuantu an si caah,

Cheuhra-cheukhat pek kong ruah fate, Moses Phungbia ning bantuk cun, Judahmi le Krihfa zong nih tlinh khawh ding a si lo. Zeicatiah pekchanhnak vialte van tuak tikah, minung pakhat I a hmuhmi i 23% cu thawhlawm ah a kal ding a si. Moses Nawlbia ning in cun, "Dum le lochung theitlai i cheuhra-cheukhat vialte, minung le satil fater vialte, hmuhmi thilri vialte i cheuhra-cheukhat vialte van ti tik ahcun, tlinh ding a rak har tuk.

Moses phungbia ning bantuk taktak in kan pek lai ti ahcun, Jesuh chan i Pharasee pawl nakin kan fel deuh lo ahcun tlinh khawh ding a si lo. Jesuh chan Pharasee cu cheuhra-cheukhat pek an i zuam tuk caah, putinan le hamhhmuai tiang in an pek. Cu hmanh ahcun an tlinh rih lo.

Tu chan Krihfami nih kan pekmi cheuhra-cheukhat zong hi Moses phungbia ning cun a tling mi a si lo. A tling kho hrimhrim lo. Moses phung in tah ahcun, tu chan Krihfa nih kan pekmi hi a tam bik ah 10%-15% kan kai lo. Moses phung ning taktak in tuak ahcun 22%-23% hi pek ding a si.

USA ah Laimi Krihfa nih kan pekmi zong ah a tling kho lo. A ruang cu mi tampi nih cun lahkhah chung in tax zuh hlan in pek ding a si kan ti. Cu hmanh zong cu va si ko seh. Kan tlinh kho rih lo.

Laimi mi tampi refugee rami kan si caah, "Food Stamp kan hmu rih. Tangka bawmhnak kan hmu rih. Medical Medicaid kan hmu rih." A cheu thilri zong kan hmu rih. Dumhau chuak zong kan ngei rih. Khi vialte zong khi kan chungkhar ah a lutmi thilri le chawva an si dih hna. Medicaid zong cozah nih thlachiar te a zat aa thei in a liammi an si. Cucaah income paoh ti in tuak ahcun "cozah bawmhnak vialte-food stamp le tanga bawmhnak-tibantuk chung zong in, cheuhra-cheukhat hi kan pek ding a si. Cu tluk in kan fel lawngah Pharasee cheuhra-cheukhat pek ning in kan pek khawh lai.

Pharisee hna nih cheuhra-cheukhat pek hi biapi tuk ah an rak chiah. A hleihluan tuk in phung an ser i, an mah zong nih an pek taktak ve i, mipi zong pek an fial ve hna. Asinain an lungthin le tuahsernak cu Jesuh hmai ahcun duh a rak nung lo tuk. Cucaah Jesuh nih cun, "putinan le hamhhuai tiang in cheuhra-cheukhat nan pek. Asinain Pathian nih biapi deuh ah a chiahmi dinfelnak hna cu nan kaltak tung.." tiah a rak tinak hna kha a si. Jesush nih cun cheuhra cheukhatnak in dinfelnak tu kha biapi deuh tuk ah a rak chiah (Asinain cheuhra cheukhat kha tlolh ding a ti duhnak a si lo).

Biakam Thar zoh tikah Jesuh nih cheuhra-cheukhat a pek timi hi kan hmu bal lo. Pawl le zultu dangdang zong nih an cawnpiaknak ah cheuhra cheukhat kong hi an rak cawnpiak bal hna lo. An cawnpiakmi hna cu, "Siang tein pek; mah lungtho tein pek; hnek chawm lo in pek lo ding le hmuhleinak in pek lei ah lawmhnak a um deuh timi kha ruat bu tein lunglawm thanuam tein pek" timi tu kha an rak i cawnpiak.


Cheuhra-Cheukhat Hi Zeitin dah kan pek awk a si?

1. Pathian nih ka chaw/ta a timi a si caah Pathian chaw cu Pathian sin ah pek ding a si. Culoahcun Pathian chaw fir (damiahtaih) kha a si. Cucu Malakhi nih tha tuk in a kan cawnpiak.

2. Huam le lungthawh caan ah lawng siloin thlachiar tein pek peng ding a si. Hmuhmi chung in caan hman tein pek hi, Bawipa nih a duh. Pek zong a lem i, pek lo zong mi a lem fawn.

3. Mah member luhnak Krihfabu te ah pek ding a si. Midang Krihfabu ah pek ding a si lo. Mah lungchuahnak Krihfabu paoh ah pek ding ti in a cawnpiakmi hna cu, "Member a ngeimi theng an ssi lo." An mah khi member ngei hna sehlaw, khi ti khin an cawnpiak lo men hna lai.

4. Siang tein le lungtho tein pek ding a si. Hnek chawm pek hi thil tha a si lo. Zeicatiah "siang tein, lungtho tein pek kha Pathian duhmi a si i, thluachuah a pek duhmi zong a si."

5. Mah nih tha tein tuak i hihi a hman bik a si tiah ruah ning in pek ding a si. Zeicatiah cheuhra-cheukhat pek tikah za ah za bak in dik seh timi cu zapi caah a si kho mi a si lo.

6. Ruahchannak in pek ding a si lo. Cheuhra cheukhat ka pek ruang ah, ka dam lai, ka sipuazi a kai lai, kan chungkhar kan tluang lai tibantuk ruahchannak in pek ding a si lo. Cuti pek ahcun, Pathian sin in siloin Satan sin in tukforh dangdang a ra kho.

7. Liamcia caan i hmuhmi thluachuah rel bu tein, pek ding a si. Hmailei thluachuah hmuh ruah ah pek ding a si lo. Cucu bibal nih a chim ning a si lo.

8. Cheuhra-cheukhat ka pek ruangah thluachuah ka hmuh lai timi ruahchan ding a si lo.

9. Midang nih an pek ve le tiah mi hmaikhahlo ruang ah pek ding a si lo. Cucu Pathian pek a si lo.

10. Midang zuamcawh in pek ding a si lo (Bulletin hmanh ah langhter ding a si lo).

11. Midang nih an pekmi a hman le hmanlo kong ah buai ding a si lo. Petu le Pathian karlak thil a si.

12. "Na tuh bantuk in na zun lai" ti a si. Cheuhra-cheukhat cu Pathian chaw a si caah, Pathian sin i pek tik ah kan mah ta a si lo. Pathian ta kan pek than timi pawm ding a si. Asinain "zumh tlak" tein a pemi hna cu, Bawipa nih a philh hna lo timi cu zumh le pawm a herh.

13. Min that, lar duh le nawl ngeih duh ah pek ding a si lo. Midang nih lawmhnak an chim lo zongah pek ding a si. Porhlawtnak in pek ding a si lo (American Krihfabu cu an pek tuk ko nain, cheuhra-cheukhat hna hi Bulletin le zapi hmuh ah cazin chuah an duh lo. Bible he aa kaihmi a si lo an ti caah, a si. Lai le Kawl phunphai paoh cu, zapi theih ah thanh le langhter kan hmang).

14. Cheuhra-cheukhat pek kha i porhlawt ding a si lo. Nikhat caan khat ahcun pek lo in um khawh a si ve. Midang a pelomi kha sual ah ruah lo ding. Zeicatiah na pek lo caan ah midang nih sual ah an in ruah ve than lai.

15. Cheuhra-cheukhat pek hi vanram kainak zong a si lo i, peklo zong hi hell kalnak a si hlei lo.

16. Cheuhra-cheukhat hi Krihfabu caah ka pek timi lawng in tuak ding a si lo. Bawipa chaw a si caah Bawipa ka pek timi in tuak ding a si. Cu lungput cu Bawipa nih a duh bikmi a si.

17. Cheuhra-cheukhat pek tik ah, Nuhmeinu thawhlawm pek bang, "Bawipa nih lungthin a zoh" timi philh lo tein siang tein pek ding.

18. Pharisee bang in a phung a si timi rumro in pek ahcun Pathian duhmi a si lo.Lungthin a duh.

19. Duh-chih-nak (DCN) he he zei tik hmanh ah cheuhra cheukhat pek lo ding a si. Tahchunhnak ah, lar duhnak, mi cung cuan duhnak, hruaitu si duhnak, mi thangthat duhnak, thluachuah hmuh duhnak, ngandam duhnak timi DCN pawl he pek lo ding a si. Cuti a pemi hna caahcun a lakka a si.

20. Pathian nih pekmi chaw a tlawmtam a zoh lo. Dinfelnak le lungthiannak lungthin a zoh timi philh lo tein cheuhra cheukhat pek ding a si.

Luphihnak

A donghnak le a biapi bik cu, hihi a si. Thil hi a ratnak hrampi (source) hi Pathian nih biapi bik ah a chiah. Pathian nih a kan duhmi cu, dinfelnak he riantuan le kawlhawl hi a duh. Thadi zangba in riantuan i, tuan man hmuhter hi a kan duh. Kawl nih "Cianphan" an ti le rut-reuh le firkhut in riantuan i, tangka le chawva hmuhter hi a kan duh lo. Pathian duhmi cu, a hmanmi riantuan i a hman ning tein tangka/chawva hmuh hi a si.

Cu hman tein hmuhmi tangka le chawva lawng hi Pathian sin in a rami a si i, cu chung in cheuhra cheukhat khi ka ta a timi a si. Lih le firkhut riantuan ruang i hmuhmi phaisa/chawva hna cu, Satan sin in a rami an si. Pathian sin in an si ti lo. Cu chung i cheuhra cheukhat zong khi Pathian nih "Ka ta a ti ti lo." A hal zong a kan hal ti lo. Zeicatiah Pathian cu a rum tuk. Kan chawva a duh lo. Kan ziaza le lungthin a duhmi a si.

Cucaah cheuhra-cheukhat pek tik ah, pekmi chaw hi, dingte le hman tein hmuhmi chaw lawng pek ding. Thil thalo tuahmi chung in hmuhmi tangka le chawva hna hi cheuhra cheukhat pek ding a si lo. Zeicatiah Pathian duhmi hi tangka le chawva a si lo. Thinlung a si.

Tahchunhnak ah, hlawhhlannak in hmuhmi, zu zuarnak in hmuhmi, bing le ritnak si zuarnak in hmuhmi, Tax return hna hmanlo in tuahmi chung in hmuhmi, firmi thilri in hmuhmi tangka, lihchim in hmuhmi, mi hlenthawi in hmuhmi tangka tibantuk hna hi, Bawipa hmai ah chuahpi ding an si lo. Lihchim bu in hmuhmi tangka le chawva paohpaoh cu Pathian sin in a rami an si lo. Satan sin in a rami an si. Cucaah "Satan sin in a rami cu Satan sin ah pek ding a si i, Pathian sin in a rami Pathian chaw cu Amah Pathain sin ah pek ding a si."

Zeicatiah kan Bawipa Jesuh nih pei hi tin a ti kha: "Caesar chaw cu Caesar va pe u law, Pathian ta cu Pathian va pe u." Cucaah kan hmuhmi chawva kha Caesar (Satan) sin rami a si ahcun Caesar (Satan) sin ah pek ding a si i, dingfel tein kawlmi Pathian sin rami a si ahcun Pathian pek ding a si."