Lungpi Chungah Ka Thlarau A Thuh

Krihfa hlabu chung i, hla vialte lakah hi hla hi ka duh bikmi hla pakhat a si. A hlan zong ah ka duh i, voikhat van sang taktak i kan zuan lio, vanlawng chung i, thinphannak le thlalaunak ka ton lio ah, ka hnahlam i ka theih hnu in, ka duh chin lengmangmi hla a si.

July 29-31, 2016 ah Chin Christian Church of Houston ka va tlawng hna. Mino Leadership traning ah ka va kalmi a si. Ningani zan in Zarhpini chun pumh tiang sunglawi taktak in can kan hmangti hna. August nikhat ah, Pa Rung Hlun nih NASA Space Center ah a ka lenpi. Chun hnu in Columbus lei ah tlun ka thawh i, Detroit ah vanlawng thlen ding a si.

Houston in Detroit tiang American Airline in ka zuang. Meng 1,105 tluk a hla. Suimilam pahnih le cheu fai zuang a si. A lam a hla ngai. Detroit in Columbus ah zuan than ding a si. Vanlawng cu a hme pah. Minung 120 kuakap tlum a si men lai. Cu ni cu, khua a chia ngai. Khudawm a chah tuk.

Khawika State cung kan zuan lio a si cu ka thei lo. Kan hmai ah khudawm a sang taktakmi cu, thlang bantuk bak in aa chawng. Kan vanlawng cu nichuahlei ah aa mer zuahmah. Cunglei ah a kai pah thluahmah in khuadawm cu a hrial. Pe thawng zeizat in dah a zuan ka thei kho lo.

Khuadawm cu a hrial thlu rua lai tiah ka ruat nain, hrial thlu lo in, khuadawm nak taktakmi chungah luh aa tim. Kan hei pal dingmi khuadawm cu, a chah tuk. A nak he a rang he. A pih bak in a pit. Tihnung taktak a si. Minung mit cun a zeitihmanh in, khua hmuh khawh ding khi a si lo.

Minute pahnih-thum rauh ah, vanlawng cu duhsah tein a thir chin lengmang. Cuticun khuadawm nak taktakmi chung ah "duup" tiah a van lut zuahmah. A rauh hlan ah, vanlawng cu a thir thluahmah ko.

Vanlawng riantuantu hna nih, "Khuadawm a chah tuk caah le thli a fah ngai caah, nan taisawm tha tein i hreng u" tiah an van thanh. Kan hung lau ngai.

Kan van luh tlawmpal ah, vanlawng cu lung phahmi lam cung i a tlimi motor bantuk in a tur. A hlawh bak in aa hlawk. Thli nih caku a chemmi bantuk in fawi tein a kenkip ah aa thui. A can ah a hlonh bantuk in aa hlonh. "Turtur" in a thir thluahmah. A lei rumro in aa lei. "Vancung thlichia he kan tong sual. Naisawm tha tein i somh u" tiah an van au than i, kan lau chinchin.

Kan vanlawng cu a thir tuk cang. A cheu cu an ai. A cheu an ni. Tlak ahcun nunnak ding lam cu a um lo. Vanlawng zong a man viar ding a si. Minutes sau nawn a si. Zamnak nih le tha hlah. Ka zuang lai ti awk um ti lo. Vanlawng ah kan nunnak cu, aa hngat ko cang. Khuadawm nih le a dong kho ti lo.

Thin a phang i tih a nung taktak. "Nihin cu kan thih ni maw a si ko ne?" ti khi chikkhatte cu ka van ruat. "Ka nupi le ka fale; ka Krihfabu" timi khi ka van ruat. Ka thin a phang. Ka lau. Ka kun i, Pathian sinah thla ka cam. "Bawipa kan khamh ko sawh. Ka nunnak na kut ah ka ap" tiah thla ka cam. Pathian dah ti lo cu, bochan ding dang a um ti lo.

Cu cangka cun, ka hnathlam ah, van sangpi khin mi tampi nih sakmi choir hla ngaih nuam taktak mi ka van theih. Ka hna a khing rua ka ti. Hna khin he aa lo lo. Vanlawng thawng ka hnatlam ah a lengmi a si rua ka ti. Vanlawng thawng cu thawng dang tein ka theih than. Ka mit ka au i khu ka zoh. Vanlawng le khuadawm dah ti lo cu, hmuh ding a um lo. Ka hnathlam ah hla cu aa sa peng fawn. Ka mit ka chim tik ah, "Puan rang aa aihmi choir bantuk bak khin ka mitthlam ah ka hmuh hna. An aw le music a fiang tuk in ka theih peng. Vanlawng thawng hmanh khi ka ruat kho ngelcel ti lo."

Cu hlaremh aw cu khawika in dah a rat ka thei lo. Ka thinlung ah a chuah sawhsawh bia maw a si ka thei lo. Vanmi hla a si le si lo zong ka thei lo. Ka thinlung le hnathlam ahcun, aw tling tein aa sa peng. Aw a tling dih Base le alto tiang in ka theih viar. Caan tawite a si fawn lo. Caan saupi a si. Ka hnakhaw ah a tliang tuk in, hla cu aa zel. Chim ah hin, lih chim ko a lo. Cu hla cu zeidang hla a si lo. "Ka Thlarau A Thuh" (CBC.62) a si. Cu hla cu hitin a si:

                                                             "Ka Thlarau A Thuh"

                                                           

        1. Jesuh ka Bawipa cu ka Khamhtu a si….Khamhtu khuaruahhar ngai a si...  

             Lungpi chungah ka thlarau kha a thuh i... Lawmhnak tiva kha ka hmuh hna.

           

      CHO: Lungpi chungah ka thlarau kha a thuh ko…...Thladem petu lungpi chungah                                   Amah dawtnak chung ah-khan ka nunnak cu....A chiah i a ka huhphenh fawn                                 A kut in a ka huphenh ko.

2. Jesuh ka Bawipa cu ka Khamhtu a si…. Ka thilrit kha a ka lakpiak….                               Amah nih a ka dawmh i ka ril lai lo...…..Nifatin thazang a ka pek.

3. Thluachuah relcawklo in a ka pek zungzal….Thiltha ka hman cawk lo tiangin…               Ka lunglawmh in Pathian cu ka thangthat ko, Cu bantuk keimah Tlantu cu.

4. Puanrang aih in van i A-mah ton awkah... Keimah cu ka hung kai tikah…                         Mi thong tampi hna he A-mah dawtnak cu....Kei zong fak pi’n ka sa ve lai.

Ka khuaruah a harmi cu, hla bia le a aw a tlian tukmi a si. A cang khatnak in aa sa lengmang i, a chorus nak van nolh can ah khin ka thinlung khi a dai khun. Ka hna a ngam khun tuk. Mah hla ka theih hlan ahcun, tihnak le phannak vialte an lo dih.

Ka hnatlam ah a cang khatnak "Jesuh ka Bawipa cu ka khamhtu a si…..Khamhtu khuaruahhar ngai a si...Lungpi chungah ka thlarau kha a thuh i…..Lawmhak tiva kha ka hmuh hna…" a van ti bak ah, "Jesuh nih lungpi chungh ka thlarau a thuh ve ko. Kei misual zong hi..." timi kha ka van i fiang. Cu tikah, ka hna a ngam thluahmah. Cu hnangamnak cu zei hmanh nih a tluk ti lo.

Ka thinlung ah ka khuaruah a har taktak. Cuticun khuadawm chungah sau tuk kan zuang. Leng lei zoh ahcun, a langmi zeihmanh a um lo. Khuadawm lawngte a si peng. Cu kan zuan chung vialte cu, choir ngaih pah in khual a tlawng bantuk in, lunglawmhnak tein vanlawng cu ka cit thai. Cuticun, dam te le tluang tein, zanlei sang deuh ah, Detroit pawng kan phan.

Ka nunnak lamthluan ah, Bawipa nih minung chonh bantuk in bia a ka ruah bal lo. Ka thinlung chung te tu ah khin, theihnak a ka pek ve tawn tiah ka ruah. Asinain cu tan ka khualtlawnnak i vanlawng cung thil ka tonmi cu, ka khuaruah a har. Hla ka theihmi hi can tawite si sehlaw ka hna khing ka ti ko hnga. Asinain ka hnathlam i a len chung hi a sau tuk. Khuadawm lak ah suimilam pakhat fai chung kan zuang. Cu hla cu Detroit kan tum cang lai tiah aa sa peng in ka theih. 

Cu hla ka theih bak in, ralchiatnak le thinphannak vialte an lo dih. Vanlawng a tla lai timi zong ka phang ti lo. Vanlawng a tlak zong ah, "Pathian a dawtnak, a velngeihnak, a zaangfahnak le ngaihthiamnak thawng in, ka thlarau kha lungpi chungah a thuh ko cu te…" tiah ka ruahchan caah, hnangamnak le lunglawmhnak ka ngei ko.

Hi ka tonmi thil nih, a hnu i vanlawng in khual ka tlawn fate, daihnak le hnangamnak a ka pek. Vanlawng ka cit fate, tihnak le phannak ka ngei kho lo chin lengmang.

Hi ka theihmi choir hi, zei dah a si taktak timi ka thei kho lo. Pathian nih ka hnathlam ah a lentermi zong a si kho men. Ka hna a khin bia zong a si kho men. "Cucu a si; khakha a si" tiah ka chim kho lo. Ka theifiang kho lo. Nihin ni tiang zongah ka fiang kho lo. Asinain cu ni ka tonmi cu, ka nunchung k philh kho ti lai lo.

Ka chim khawhmi tu cu, "Cu tluk in ka thinphan lio le tihnak ka ngeih lio ah, mah hla ka theihmi nih, hnangmnak le lungthin diaihnak a ka pek i, tihphanak vialte an lo dih" ti cu, ka fian bakmi a si.

Cu tan i, vanlawng cung i tihphannnak nganpi chung kan um lio i, ka hnathlam ah choir ah an sakmi ka theih hnu cun, hi hla ka sak tik ah a thawt ning aa dang. Hlan i ka rak sakning he aa lo ti lo. Lawmh ning zong aa dang. Thlarau thazaang zong a ka pek deuh. Hi hla nih ka thinlung le nunnak ah a taktak in thazaang a ka pek i, hla phuahtu Fanny Crosby cung zongah ka lawm!!

                        ----------------------------------End-----------------------------
                                                                                                 
                                                     

Note: Hlaphuahtu Tuanbia

Hlaphuahtu hi Fanny Crosby (1820-1915) a si. Thla ruk a si ah, surgery aa tuahnak ah a mit a cawmi a si. Khua a hmu lo. Vawleicung le van hi zeidah a lawh timi zong a thei lo. Cucaah "A nu hrinnak mit cun khua a hmu lo nain, a thinlung in khua a hmumi a si. Minung hi zeidah an lawh? Minung hmai hi zeidah a lawh?" timi a hmu kho lo nain, Pathian hmai hi zeidah a lawh tiah a hmu khotu a si. A titsa nunnak cu harnak in a khat nain, thlarau lawmhnak a khatmi a si. "Na mit a cawtmi hi thaizing ah, a thami mit in kan in hlen hna lai ti hna sehlaw, ka siang lai lo" tiah hla a phuahtu zumtu pakhat a si. Uar a um taktak!