Central Ohio Rang Ngai In A Thangcho

USA ah Laimi kan khualipi Indianapolis le USA Khualipi Washington DC karlak I-70 cung in, khualtlawngmi nih cun, Ohio hi pal lo awk a tha lo. Ohio khualipi Columbus zong pallo awk a tha lo. Cucaah USA chaklei deuh ummi Laimi tam deuh nih cun, Ohio hi an pal theu lai tiah ka ruah. 

Ohio hi ramkulh fate a si. US ramkulh dihlak ah lianh ah 34 nak lawng a si nain, minung tam ah 7 nak ah a um. 2018 ah hin, minung 11.69 million an um lai tiah ruah a si. Ohio hi, US Midwest timi area ah a um i, Northeast le Midwest a pehtu a si. USA ah minung an tamnak bik ram laili bik pakhat a si i, Ohio ah hin USA Highway 10% tluk hi a um ti. Lam a tam caah le minung chahnak area ah a um caah, North America minung dihlak i, 50% hi Ohio in suimilam pakhat thluk motor mawnghmi area ah an um.

Ohio hi killi meng 44,825 a si i, killi meng khat ah minung 283.3 an um caah, USA ah minung chahnak bik 10 nak ah a um. Minung kharh ning cu a fum ngai nain, minung hi an chah ngaingai. Ohio ah minung chahnak bik hna cu, Columbus, Cleveland, Cincinnati, Toledo, Akron le Dayton an si. 

Columbus Area hi Central Ohio tiah ti asi. Central Ohio timi ah hin, a biapi cem mi khua cu, Columbus a si. A umnak cu Franklin County ti a si i, county lian ngaingai a si. Hi Franklin County ah hin minung 1.25 million kuakap an um. Franklin County hi minung le sipuazi a thanning a rang taktak i, minung hi 10% in kum 10 chung nawn an karh cang. Hlan ahcun Indianapolis nih hin, minung tam ah a tei tuk nain, 2018 ahcun Columbus hi 16,000 tluk in an tam deuh cang ti a si. 

Columbus

Central Ohio hi USA ram pumpi ah a thangcho ngaingaimi area pakhat a si. A lamkip in a thangcho taktak nain, Laimi mi tampi nih a sining an theih tuk lo caah, capar ah ka van tialmi a si. 

Central Ohio ah hin, county dangdang 7 an i um. Cu hna cu: Fairfield county; Franklin County; Hocking county; Licking county; Madison county; Marrow County; Perry County an si. Hi county (7) huap in, Columbus Metropolitan Area ti a si.

Central Ohio hi, minung an karh ning a rang ngaingai. A ruang cu sipuazi tuahnsk a tha. Inn man aa deng. Ohio cozah hi a mah tawk cun a rum ngai fawn. Khuacaan a tha. Kokek rawhralnak a tlawm. Inn hlan man aa deng. University le college tha zong an um hna. Sizung lian le sizung tha zong tam ngai a um. A lai ngai caah, umkalnak a fawi i, khual an tam. Conference tuahnak le tuktak ah an hman duh ngaingai. Conference i khualtlunnak caah hotel thatha an sak cuahmah lio hna a si.

Khatlei ah US khualipi Washington DC le Nitlaklei ram hna i hlatnak I-70 cung ah a um caah a si. Cun I-70 le I-71 aa tonnak ah a um caah sipuazi lampi pahnih umnak si caah a that khunnak asi. I-70 hi USA ah sipuazi tambik a controltu lampi pakhat a si. Cun Columbus hi, vanlawng umkalnak a fawi ngai. Zeicatiah US i khua lianlian-New York, Los Angelese, Chicago, Houston, Dallas, Washingtom DC, Denver, Phoenix, Orlando le San Fransisco hna he direct vanlawng a um i, a man zong aa deng.

Columbus hi, USA pumpi zoh tikah minung tam ah 14 nak asi. Kum khat ah 22,000 tluk in an karh caah, apartment an i ting lo. Apartment hi khan 142,000 a um. Kum khat ah apartmdnt khan thar 3,900 tluk lawng an sak khawh caah inn hlan hi a har ngai. Inn hlan ding hi 4% tluk lawng khan lawng a um i inn hlangmi hi 4-5% an karh ti asi.

Columbus Downtown

Nihin ni ah Columbus Downtown ah apartment lianlian tam ngaingai an sak hna. Dot 8 in dot 30 karlak an si. Asinain minung an khat changmang ti a si.

Khua a cheukhat cu downtown hi business an thi ngai nain, Columbus cu an downtown hi a nung. Sipuazi a tha. Cucaah zungkhan tampi an sakmi chung ah hin, 6% lawng hi a lawng ti a si. Downtown a hlunhlaitertu bik cu USA i university lian bik pakhat a simi Ohio State University le Nationwide Insurance riantuantu hna ruang le Hotel lianlian an um ruangah an si.

Columbus area hi a thancho ning a rang taktak i, a ruang pakhat cu, mifim cathiam tam tuk an rak i thial caah a si an ti. Atu ah hin, USA ram pumpi ah “young professional” tambik an umnak hmun pakhat a si. Millenial timi mino tambik umnak khua (8) nak asi. Mino a van i thialmi an tam tuk inn cawmi an an tam ngai i ram pumpi ah Housing Market a sannak ding (4) nak ah a um i, inn le hotel thar sakmi a tam caah, Construction a tam ngaingai.

Construction rian hmun khat

Hi bantuk in a thancho caah, Amzon zong nih hin Fulfillment Center lianlian pali an on cang. Data Center zong an on. Company tam ngai Columbus ah an van i thial i, sipuazi zong a kai chin lengmang bantuk in downtown ah apartment le Hotel zong tam taktak an sak hna. Apartment hi dot 8-30 karlak hi tam taktak an sak nain khan lawngmi hi a tlawmte ti a si. Khan dihlak i 96% hi an hman ti a si.

Atu hi Columbus khua a chaklei kam te ah, Planet Oasis timi Entertainment and Sport Complex hi I-71 kamte ah ser ding in an timh lio a si. Planet Oasis hi acre 350 a kau lai i, dollar billion (2)  a dih lai ti a si. Nay Pyi Daw saknak hmanh ah dollar billion (5) tluk lawng a rak dih. Hi Planet Oasis hi, Disney World nak in a kau deuh lai i, a lengmi zong an tam deuh te lai tiah tuak a si. Motor lutchuak a tam ngai lai caah, lam dang cawh chap hau an ti i, a tu ODOT nih EXIT thar an siam lio a si. Planet Oasis an lim in cun, Central Ohio hi minung an thlunghlai chin lengmang lai i, inn man hi a kai chinchin lai ti a si. Planet Oasis an lim cun, Central Ohio hi, minung million in lenmi entertainment center hmunlai ah aa chuah te lai ti a si.

Hi bantuk in a thancho ning a ran ngai caah hin, Central Ohio ah hin, Mirang tampi an rak i thial. Planet Oasis umnak Delaware County lei cu, inn an sak tharmi tampi a um. Siangngakchia zong an karh tuk caah sianginn pahnih an sak chap nain an i tha lo ti a si. Minung an karh ning hawih in cozah nih sianginn an sa ko zokzok lo i, cu zong cu harnak pakhat a si ve.

Planet Oasis

Central Ohio a thatnak pakhat cu, khuapi le hmunpical a si nain, Crime a tlawm ngai. Tihnung bik timi khua 50 chung ah aa tel lo. Ohio ah hin, Cleveland le Dayton te hna hi, tihnung bikmi khua ah ai tel ve nain Columbus hi cu aa tel lo. Gang zong an um lo ti tluk a si. Cucu a thatnak pakhat a si ve.

Hi bantuk in thancho a ran ngai caah 2015 ah Intelligent Community Forum nih "Vawleicung khua vialte lak i City of the Year ah an rak thim." 2016 zong ah U.S cozah Transportation Department (ODOT) nih tuahmi zuamnak "Smart City Challenge" zong ah "Pakhatnak" ah an rak thim caah ODOT nih $40 million bawmhnak an rak pek. Columbus ummi company dangdang nih bia an kamhmi million 90 an pek i, a zapite million 140 laksawng zong an rak pek. Columbus hi zeidang award tete zong a hmuhmi a tam ngai cang.

Smart City Challenge program i laksawng a hmuhmi nih a hrinmi theipar cu "self-driving electric shuttles" timi minung phurtu motor hi December 10, 2018 in Columbus khualai ah minung thiartu ah an hman cang. Hihi motor hi amah tein aa mawngmi a si. USA ah a pakhatnak bik mah tein a mawngmi passenger phurtu a hmang hmasatmi cu Columbus a si. Columbus khualai hlunghlai seh tiah cozah nih an tuahmi a si i, a lakka in cit a si.

Self-Driving Shuttle Columbus khuachung ah aa chawh lio

Rian a tam. Bank, Insurance, Wal-Mart le a dang company lian tam ngai a um. Sianginn a tha ngai. Crime a tlawm. Lamsul a tha. Sizung lianmi 17 a um. Sekhan an tha. Kawlram lei sizung tia a simi sekhan hi tam tuk a um caah silei riantuanmi caah rian a tam. Call centers zong a tam taktak i, US ah telephone a au bimi le leiba a cawh bikmi khua cu Columbus an si ti asi. Khua a thianghlim. Rian a tam. Inn hlan man a fawi. Cozah lei in Medicaid le Food Stamp progam zong a that caah sifak ca zong ah nunnak a fawi ngaingai.

Abik in sianginn, sizung, bank, insurance le warehouse tam ngai a um caah, "Young Professionals" tampi an i pemnak khua a si i, a thangcho peng dingmi khua pakhat a si ko. Khua lai i apartment dot 10-30 tiang a simi tam ngai an sak hna i, cucu "Young Professionals" pawl nih a zapi te ngacha in an hlan hna ti a si. Columbus ah sizung timi 17 a um i, University le college hi 11 tluk an um.

Waxner Medical Center at OSU

Cu lak ah Ohio State University cu sianginn tha le lian taktak a si i, cu ruang hrimhrim ahcun Central Area hi ramdang siangngakchia zong tampi an kainak hmun a si. Hi sianginn nih hmun (3) ah sizung an ngeih i, Waxner Medical Center timi Main Campus lawng ah hin, doctors 800 renglo an um. Cu University ah cachimtu professor lawngte 5,000 renglo an um i, caan tling riantuanmi 23,000 tluk an um.

Cu tluk sianginn tha le sianginn lian ah Laimi zong a tu minung pathum an kai lio ve. Engineering le Medical lei la dingmi an kai lio hna. Hmailei ahcun Laimi zong Central Ohio i sianginn tha le rian thatha ah mi tampi an lut te ko hna lai tiah ruahchannak nganpi aum ko.

Bible sianginn tha ngai pathum an um: Methodist Theological School of Ohio, Trnity Lutheran Seminary le Catholic sianginn Pontifical College of Josephinum an um. Cun Evangelical Seminary a simi Valor Christian College le New Life Bible College and Seminary zong an um. Nitlaklei deuh ah Cedarville University zong a um. Hihi radio station zong a ngei i minthang ngaimi bible sianginn a si. Central Ohio he aa hlatlonak ah bible sianginn fatete zong an um rih hna.

Nai Ocobter thla 27 ah USA ramchung i a pakhatnak bik "ralkap museum" zong Columbus ah an on. Ralkap caahcun free in an luhter hna. USA hi ral a tu bikmi ram pakhat an si. An ralkap zong hi nunnak a pemi an tam taktak cang. Asinain rm pumpi miphun huap in tuahmi, ralkap museum hi Columbus i an sak tiang ah pakhat te zong a um rih lo ti a si. A min ah "National Veterans and Memorial Museum" ti a si. USA ah hin a tu lio bak ah ralkap pension million 20 renglo an um ti a si. USA an serka tein ralkap pension zapite million 40 fai an um cang nain, an mah upat peknak taktak i tuahmi ram pumpi ralkap museum hi a u rih lo ti a si.

NVMM 

Central Ohio hi a thatnak pakhat cu bicycle citnak lam le hlei a tuahmi a tam. Park thatha an um. Saram dum tha taktak "Columbus Zoo" zong a um. Cun museum tam ngaite a um i, tuanbia zoh ding tam ngaite a um. Community dum tampi a um fawn i, an chimnak ah USA ram pumpi ah Community Dum a tamnak bik khua a si tiah an ti.

Columbus hi lentecelhnak lei zong ah an thangcho ngaingai. Abikin bawlungchuih lei ah a min thang ngaimi an si. Zeicatiah USA ram pumpi ah Bawlung caah tuah hmasat bikmi certual Crew Stadium tiah rak timi hi Columbus ah a um. Cu Crew SC timi bawlung club hi USA ah min thang ngai ve mi a si. Naite ah Austin, TX ah kan i thial lai tiah an ti i, Columbus cu an thin a phang taktak. Asinain Columbus ah um seh  ti a duhmi company nih Crew SC a ngeitu cu an cawk hna i, Columbus ah um ding an i tim than. Crew SC Stadium thar zong sak ding in an timh cuahmah i, $ 645 millions kuakap dih in sak ding an timh lio a si.

Columbus khua le Crew SC Stadium thar sak dingmi

Cun miphun kip an tam caah minung lungput a kau ngaingai. Atu lio ah hin Somali hi 50,000 fai an um lai an ti. Nepal in a rami Bhutan hi 35,000 renglo kan um lai ti a si. Korea le Tuluk zong an tam ngai. Syria, Iraq le Arab miphun zong tam ngai an um. Buddhist zong tam ngai an um ve I, hmun hnihthum ah temple zong an ngei ve. Refugee an tam ngai caah, an governor zong siseh, Columbus Mayor zong siseh refugee le ramdangmi cungah dawtnak an ngei.

Central Ohio hi sipuazi, sizung, sianginn le zeidang rian a tha. Crime  tlawm. Nunning a fawi caah, ramdangmi tam tuk khua an sa i Laimi zong duhsah tein kan karh pah ve. Nihin ni ah Chin timi dihlak hi, minung 1,300 kuakap kan si kho men. Sushi dawr zong hi tam tuk a um i, Laimi cu sushi tuah huammmi ka si caah, hi pinlei zongah duhsah tein a karh dingmi kan si caah, nikhat caan khat ahcun Laimi zong tampi kan um te theu lai tim ruahchannak a um ko.