CNF Hi Kan Zoh Sawhsawh Ko Hna Lai Maw?

Chin miphun hmelchunh pakhat Victoria Camp

 
Biahmaithi

Columbus cu Laimi kan tam lo. 850 fai lawng kan um. Asinain CNF riantuannak caah thazaang biapi taktak a simi Chinland Club tha a pemi a tanpi duhmi khua pakhat kan si ve. Cucaah December 3, 2016 zan ah Chinland Club hruaitu Pu Tial Hmung le Rev. Tluang Hre cu December 2, 2016 ah Indianapolis in Columbus, Ohio dam tein an rak phan. December 3 ah, CNF Chairman Pu Zing Cung zong a umnak Denver in zanlei 3:30 PM ah a rak phan ve. Caan sunglawi tuk kan hmang ti hna.

Columbus ummi Laimi hna he, 7:00-11:30PM tiang biaruahnak caan kan ngei hna. Upa tling lawngte 60 fai an chuak. Cu tonnnak kan ngeihmi le bia kan i ruahmi nih, atanglei thil hna hi tampi a ka ruahter. Laimi ca zongah ruah ding a herhmi asi tiah ka ruah caah, ka van tial.

Keimah cu pastor riantuanmi sawhsawh ka si. CNF member ka si lo nain, CNF a tanhmi le Chinland Club tha a pe mi ka si. Zeicatiah Chinland le Chin miphun caah rian tuan a duh ve mi pakhat ka si. Kan ram caah rian kan tuah lai ti ahcun, lam dang vialte nakin CNF le Chinland Club lam in kan tuah ah hin, a tha bik cemmi le hmual a ngei bik cemmi a si lai tiah ka ruah caah a si.

January 5, 2018 zongah Chinland Club Central Committee Meeting cu Columbus, Ohio tuah a si. Salai Thla Hei a ra kho i, bia sunglawi taktak tampi a kan chimh i kan i lawm taktak. Meeting kaimi zong kan thahnem ngai. Kan Krihfabu zong kan i lawm ngaingai.

2016 lio i Rev. Tluang Hre le Pu Zing Cung a kan tlawn lio i an chimmi bia hna le 2018 Chinland Club Central Committee lio i, Salai Thla Hei le Pu Tial Hmung bia hna ka ruah tik ah, "Chin miphun nih hin ram le miphun caah kan pekmi a tlawm tuk" timi ka hmuh. Kan mah le innlo, khua le tlang caahcun kan pek ngai nain "Miphun ca i kan pekmi cu a tlawm taktak" tiah ka ruat.

Laimi Ruah Dingmi Biahalnak

Lai (Chin) aa timi miphun nih, CNF riantuannak he pehtlai in a tanglei biahalnak (5) hi a ka ruahter ngaingai. Careltu zong in ruahter hna seh ti ka duh:

(1) Mi zeidah kan si (Who we are?)

(2) CNF hi zei dah an si taktak? (Who they are?)

(3) Zei ca dah ramleng kan phanh (Why we are here in foreign land?)

(4) Ramleng Laimi zeidah kan rian a si? (Responsibility?)

(5) Kan tuanvo kan tuan maw? Zei dah kan ram le miphun caah kan pek ve?


Hi biahalnak hna hi, Laimi dihlak nih kan ruah a herh. Hi hna hi kan ruah lo ahcun, "Mi zei dah kan si ti zong kan fiang taktak lai lo i, CNF zong zei dah an si taktak?" timi kan fiang kho hlei lai lo.

Columbus i tonnak kan ngeihmi nih, CNF hi zei bantuk dah an si? Zei dah an i tinhmi taktak a si? Zei tluk in dah dinfelnak an tanh i, zeitluk in dah phunghram fek an ngeih le dirhmun an ngeih? Zei tluk in dah ram le miphun caah an nunnak an pek?" timi kha a kan fianter ngaingai. Hi catawi te ahcun CNF hi zeidah an si takttak timi fiang tein kan tial kho thlu lai lo nain, an nunnak le an sining kan tial mi nih, "Zei bantuk dah an si?" (Who they really are?) timi cu careltu thinlung ah a fianter lai ka zumh.

Thil hi chimtu um lo ahcun theihfian a har. Chimtu zong nih mah mit hmuh le kut tongh chimmi le midang chimmi, chimchinmi cu aa dang tuk. Tutan kan i tonank ah, Rev. Tluang Hre nih a kan chimhmi cu, Victoria Camp chung CNF nunnak cu ngaihchia taktak khi a si. Kan miphun ralkap hna, cu tluk har in kan rak umtermi hna le cu tluk harnak tuar in an rak ummi nih khin, Laimi hi, "Mi zei dah kan si?" (Who we are?) timi khi a ka ruahter. Cu tluk har in mah miphun ralkap a chiami, miphun hi "who we are?" timi ruah taktak a haumi miphun kan si. "Who we are?" timi kan ruah bak i, "Who I am?" zong ruah chih a hau.

Pastor Tluang Hre nih, kan theih ballomi Camp Victoria ummi hna kan miphun ralkap (CNF) an nunning taktak (real life) kha fiang tein a kan theihter.  Cu hlan ah mi tampi nih kan rak ruahmi cu, "CNF hi, ramdang nih an bawmh hna; NGO hna nih an dirpi hna; EU tibantuk cozah hna nih an bawmh hna le an i nuam tuk rua???" tiah mi tampi nih kan rak ruah sual. Kan ruah palh dipdep timi kha a kan fianter.

Camp Victoria ah caan sau ngai a thu dirmi nih, kan miphun ralkap hna an temtuarnak le harsatnak a chimmi cu, celh ding a si lo. Nu hrin fanu cio? Nuhrin fapa cio? Sining tha an duh ve ko. Cawnnak sang an duh ve ko. Ram dang ah kal in nun nuam tein nun zong an duh ve ko. A nuamhnak khuapi le hmunhma nuam ah um an duh ve ko nain, zei ca dah hi bantuk nunnak hi zei ca dah an rak i thim deuh hnga? timi ruah lo awk a tha lo.

Laimi tampi nih cun Victoria Camp kan ti ahcun, Laiza bantuk, Manapalaw bantuk in kan ruah men lai. A si naisai rih lo. A lang cun fingtlang aa dawh caah duh a nung ngai nain, a chung ah a thudirmi hna ca ahcun, harnak chim cawk lo an tuar (Hmanthlak zoh chih).

Victoria Camp timi cu, "Teinak Camp" ti asi nain, ral taktak tei hlan ah, a chung ah tei dingmi ral tam tuk an um rih. Kawl ralkap doh hlan ah doh ding ral tam tuk an ngei rih.

Sifahnak ral, tirawl-eidin harnak ral, zawtfahnak ral, khuacaan harsatnak ral, thilri-hnipuan ngeihlonak ral, sianginn ngeih lo ral, innlo chiat ral, biakinn ngeihlo ral, pastor ngeihlo ral, dumhau ngeihlo ral, thinphannak ral, ngeihchiatnak ral, lungretheihnak ral, lunglennak le hmailei zeidah kan si lai timi tinhmi ngeih awk a tha tuk lo mi ral....

Chim cawklomi ral doh ding an ngei. Victoria Camp ummi hna le camp dangdang ummi hna an tuarnak a kan chimh tikah, lungthin a kekkuai tuk. A chimmi vialte tial cawk ding a si fawn lo. Va hmuhton lawng ah theihfian khawh ding khi an si.

CNF hi, hmurka le biafang nih a tlinhlomi temtuarnak tiang in an tuar timi theih khawh a si.

Harnak an tuarmi vialte pakhat hnu pakhat in chim ahcun a dong kho ding a si lo. Pastor nih a chimmi ah thinlung in tuar a har ngaimi hna tampi an um. Hi tin a kan chimh.

Tio le Lahva tikhu le khuasik an tuar. Chun ah nilin khua-al an tong. Innlo riahnak inn tha-thi le a um fawn lo. An innlo hna cu, Laimi sifak bik khua hmanh a tluk hna lo. An hruaitu pakhat nih, "Kan di hna cu, arfi thlapa rel khawh dih in an var ee. Thli cu hurhur in zalawng tein innchung ah an lut ko" tiah ati. Pastor quarter cu "Nichiar tii toih lo ahcun a buan tuk i a khu tuk ee.

Cu vial cun an innlo mitthlam ah suai khawh asi cang. Victoria Camp hmanh cu tluk asi ahcun, camp dang cu zeidah an lawh hnga timi cu, mitthlam ah suai khawh dih asi cang.

Cu dirhmun in "Kawl cozah he, Kawl ralkap he zei tin dah artlang in an dir khawh lai? Zei tin dah cabuai pakhat ah bia an i ruah khawh lai? Cabuai cung i biaruahnak ahcun "fmnak, thiamnak, hngalhnak lawng zong a za lo. Thazaang a herh" timi hi Lai miphunpi kan fian a herh. Kan thazaang a thawn lo ahcun, midang he zeitin dah bia kan i el khawh lai?

Camp Victoria khi, Laimi caah miphun aiawhtu hna headquarter a si. Kan miphun thazaang khi Camp Victoria zoh in a lang kho. Victoria Camp khi, kan miphun hmanthlak pakhat a si. Kan sining fiang tein kan i hmuh khawhnak ding kan thlalang pakhat a si. Khi thlalang le hmanthlak khin, Laimi hi zei dah an si tiah Kawl nih a kan tahnak te dingmi kua a si.

Cucaah Victoria Camp hi, Laimi nih kan zoh sawhsawh ko lai maw? Khi camp khi, Kawl nih zei an rel lo ahcun nangmah le keimah zong zei ah a kan rel lo chih cia" ti kan theih a herh. Cucaah khi Victoria Camp le ka dang camp dangdang ummi hna khi, kan miphun ning pi in dirpi kan herh cang hna.

Camp Victoria ah caan saupi thudirmi Rev. Tluang Hre nih an harnak kong cu cat lo in a chim.
:

"CNF nih an harnak hi chim an duh lo i, a tuar tein an tuar ko ee. Kan miphun nih zeitluk in dah an har le an re a theih timi kan rak thei lo ee ati. A chimmi chung ah thinlung a khoih bikmi cu, "Nau a pawimi nu hna eidin a chiat ruang i thlano an theih tuknak, an damlonak, an kutke a hihnak le nau chuakka hnuk an i zaat lo nak le an vitamin baunak a chimmi ko ah, hnarno a tam ko."

Kei zong fa pasarih Bawipa nih a ka pek. Nu nau pawi a harnak le nau ngeih a harnak kong cu ka fiang ngaingai. USA  a si rih. Thau ka um lio ah nau pawi le nau ngei cu kan hmuh peng hna. A harnak a tam tuk. Victoria Camp i an har ning cu, a fak khun in ka thei. Mah le nupi le sining he epchun tikah, ngaihchia lungzur a si.

Ka ruat than. Kachin, Shan le Karen te hna zeitindah kum tam tuk ral an doh khawh timi ka ruat. Karen le Kachin cu an rum deuh i, chan tampi ral an do kho. An lungthin zong a thawng i an doh khawh pengnak a si. Dothlennak caah thinlung thawn lawng a za lo. Rumnak zong a rak herh tuk.

Sifah tuk ahcun thinlung zong a thawng kho lo. Dothlennak tuahtu hna um nak ahcun, cozah ralkap he kah sual ah inn-lo tha taktak cu sak khawh le sak awk a that lo hmanh ah, plastic rihmi rumro cu a si kho hrimhrim lo. Khi thil nih kan miphun sihfahnak kha a langhter. Laimi nih thuk deuh in khuaruah taktak kan herh. Nang le kei innlo thatha-aircon le heat-he kan um lio ah kan miphun hruaitu hna umnak cu zoh ah, "Lai mipi nih miphun le ram dawtlonak a lang ngaingai ko."

Camp Victoria

Chinland ah dothlennak a donghlonak ding caah, CNF kan fale an dam le an thawn a herh taktak. Chungkhar an khim le ngandam a herh taktak. Cucaah Laimi nih pumlawng lomi kan Chin ralkap nupi le hna zeitindah kan tuah hna lai? An fale ngandam tein an chuah i a cak i a thawngmi mibu an sinak hnga zeidah kan bawmh ve hna lai?

Ralkap van zoh rih hna u sih. Pa ralkap cu pa an si. An temtuar zong ah a zia deuh. CNF nu-ralkap ngaknu tete, thilri an ngeihlonak kong, eidin an harnak kong le ngaknu no tete an damlonak kong le an vitamin a baunak kong kan theih ahcun, mitthli a luang. Thinlung akuai. Upa thangthat awk tlak le hmaizah awk tlak taktak an si.

Asinain an harnak kan hrawmpi tung hna lo ahcun zeidah a thahnem timi ka ruat. Nu nih nu kong theih deuh a si. Lainu hna nih zeidah nan tuah lai? Hi dothlennak ah Lainu vialte tel dih a herh ko hnga lo maw? Hmun kip um Lai nusal tha hna nih an harnak zei tin dah nan hrawmpi hna lai? Abik in ram rumthawng ummi Lai nusal tha hna nih nan chanh hna lai maw?

Rev. Tluang Hre ka hal i a ka chimhmi nih ka thinlung a ka kuaiter taktak. A chimmi cu hitin asi:

"Camp Victoria in gospel team kal ding in hla kan cawng. Kan i tim tuah dih cang. Kal caan a rak phan i, 'Saya kan kal lai lo. Kan kal ngam lai lo' tiah an ti i an i leet viar ati. Cu tik ah, "Ziah nan kal ngam lai lo?" tiah ka van hal hna. An ka lehmi cu, "Saya, uniform lawng pei kan ngeih cu. Thilri thlennak hni le angki kan ngei tung lo an ka ti i, ka ngaihchiat bak hi ka celh lo ee."

Cu sining ruah ah, Victoria Camp i Lai nusaltha hna tuanbia cu kan fiang viar cang lai tiah ka ruat. Kan umnak ram cio vial ahcun, hni fenh cawk lo? Angki hruk cawk lo? Laithil hruk cawk lo? CNF kan nu-ralkap hna caah, "Thil thlennak hmanh ngeih lo?" Chin miphun hi, "Who we are?"  timi ruah a za taktak.

Ram tha kan um tik ah, voi tampi cu midang harnak khi kan ruat lo hrimhrim. "Concern" kan ngei kho lo. Syria le Iraq ral ram te hna harnak, Kachin ram te hna harnak, a theih lawng kan theih i, ngaih nuam sawhsawh bantuk ah kan ruah. Asinain Victoria Camp harnak theih ahcun hnarno a tam. A celh in celh a si lo.

Rev. Tluang Hre nih a chimmi a tam lengluang. Cu chungah ka philh khawhlomi cu, hihi asi. Victoria Camp kan kal lai ah, "An har ngai le nan taklawng cun kal hlah u" tiah a kan ti i, heh tiah kan tuaktan hna i, facang tun 20 le chiti le zeidang eidin aphunphun he kan va phan. Ahmun kan phanh cu, an i lawm tuk. "Saya ra hlah u law, thaizing zeidah kan ei hnga? tiah pei kan khuaruah a har cang cu. Rasen tun (2) lawng a um cang ee" tiah a kan ti a ti. Meh kong cu chim ding a um lo. Rasen hmanh khim tein an ei lo ti a si caah.

Pastor cu ka hal than. Nifatin zeidah an tuah? Zeitluk in dah eidin an har tiah. An harnak chim hi an duh lo nain, na ka hal caah ka chim ko lai:

"Victoria Camp ummi hna hi, an temtuar taktak ko. An dam lo caan ah si mum ei ding a um lo. Rai nih a fanh hna. Khuasik ahcun chum a zaam i, chun tiang khua chiat le that hi theih khawh a si lo. Asinain zingka tein ralkap cu an tho i, an i cer. An mah le an tuanvo rian cio an tuan. Chun nitlak din lo in an tuan peng ko. Lakphaktii din awk zong an ngei lo. Zarh khat ah lakphaktii hrai khat hmanh an ding kho lo ee ati. An eidin a chiat caah, an derthawm ngai ee. Lakphaktii hmanh zarh khat ah voikhat lawng an ding kho."

"An fel tuk. Keimah din ding ah tii in, coffee ka kenmi a um. Rawl a ka chumh piaktu CNF ralkap pa kha, ka tuah piak ve i, 'Coffee ding u sih" tiah ka sawm. A ka lehmi cu, "Kei ka hawi le an ding ve lo. Cucaah ka ding lai lo" a ka ti i, a ding duh lo. Cun kei zong ka ding kho ve ti lo. Cucaah kan pahnih nin dinglo in kan um. Ahnu ah, nu-ralkap tu kan va pek hna. Cuticun asi le ei zong ah kaa a thaw lo. Din zong ah kaa a thaw lo ee" tiah a ti.

Cucu an har lio caan zong ah, CNF nih ralkap upadi (code of military) fek tein a dirpimi le an zulhmi a si. Ralkap taktak nunzia cu, cucu an si awk a si. Mah lawng him le mah lawng khim a ngah lo. Khim ah khim ti, tam ah tam ti cu, ralkap tha hna lungput le nunnak asi. Cu CNF pa lungput bantuk tein CNF tampi an nun caah, nihin ni tiang Kawl cozah zong nih upat hmaizah awk tlak an si.

CNF ralbawi pakhat ka hal. Ramdang ummi CNF nan hruaitu upa hna hi zeitindah an i cawm cio? An har cio hna maw? ka ti. "Aw na ka hal cu te. An umnak cozah nih CNF an si ruangah, a hleice in an bawm hna lo. A cheu cu an har tuk ruangah nuleva aa thenmi zong an um. A cheu cu leiba torcheng in a ngeimi hruaitu zong an um hna ee...anih a nih te hna..Chungkhar zong rawk cikcek tiang in pei ramkhel rian an tuan cu. A cheu cu an dam lo le an har taktak. ian an tuan kho fawn lo. Cuticun nun sivang in a ummi kan hawi le an um ko. Asinain cucu kan i ruahchih bu tein ramkhel rian kan tuan ko ee" tiah a ti.

 Chungkhar ngei ve mi le harnak tampi ramdang ah a tuarmi ka si ve caah, ka theihthiam ngaingai. Ram hruaitu tampi hna cu an rum theng bal lo. Acheu cu an thih ah leiba zeimaw zat a thihtakmi ram hruaitu tampi an um ve hna.

CNF hruaitu tam deuh cu, an rak har ngaingai hna timi hi, keimah mithmuh a si ve. Zeicatiah ramkhel rian an tuan. Tangka kawl caan an ngei lo. Nifatin nunnak ah tangka a herh peng fawn. Tangka lo in nun a ngah lo. Lahkhah le an ei fawn lo. Cucu an dirhmun asi. Cu hmanthlak suai ahcun, an sining a fiang dih ko lai.

Cucaah Laimi dihlak nih kan mah tein bia kan i hal a herh cang. Victoria Camp i, pumlawnglo ummi kan nu le hmanthlak ruah a herh. Vitamin a bau taktakmi fano cawnmi nu le hna; vitamin bau taktakmi ngakchia chuakka hna; derthawm ngai in sianginn a kaimi ngakchia hna; Tio le Lahva tikhu le khuasiak lakah khua a sami ralkap hna; si mum khat din awk a ngeilomi raifanh le zeidang damlonak in a ril ko mi hna; zarh khat ah voi khat hmanh lakphaktii a ding kho lo mi hna; thilri thlennak a ngeilomi nu-ralkap ramdawtu tete hna......nang le kei khawi dah kan um?

Nang le kei khawi dah kan um hna?

Kan I Hal Dingmi Biahalnak

Laimi u le nau dihlak nihin ah, biahalnak tampi ruah ding kan ngei.

Kan tuanvo kan thei maw? Kan tuanvo kan tuan maw? Kan tuanvo kan tlolh tuk sual maw? Laimi hi zeidah kan si? Kan ruahnak zeitluk fang dah kan si? Miphunpi ruahnak kan ngei kho ve lai maw? Kan ram le miphun cu Kawl miphun le cozah kut in him seh ti kan duh ah, zeidah kan pek ve kun lai? Caan maw, fimnak maw, nunnak maw, thlanti maw, phaisa le chawvamaw? Kan i sensomi le pekchanhmi a um maw?

Chungkhar dawt cu kan rian. Mah khua, mah tlang dawt cu kan rian. Asinain mah khua mah tlang timi a fa tukmi ah, kan buai tuk lio ah, a ngan taktakmi thil kan Chinland pi khi philh khawh a si.

Nang le kei nih kan mah pumpak, khua le tlang cio te lawng kan ruah ahcun, Chinland timipi khi Kawl nih an dolh dih ahcun, na khua, na tlang, na peng cu a him hlei lai lo. Na fingtlang a him hlei lai lo. Pura in an khat dih kho. Na biakinn, na sianginn, na holh, na ca, na innlo an him hlei lai lo.

Vawleicungah miphun a tlaumi an tam tuk cang. Atu a tlau cuahmah mi an tam tuk rih. A tlau chawm ding an tam tuk cang. Cauk cung lawng ah an tuanbia tial awk in a um cangmi le a um cuahmahmi miphun an tam tuk cang.

Cu bantuk miphun ah kan i chuahlonak ding caah, Laimi zeidah kan tuah lai? Mah tein uk ding; mah tein upadi ser ding; mah tein i hruai ding kan si. Cucu a dikmi Federalism asi i, cucu CNF cawlcanghnak lo in cun hmuh ding a lam a um lai lo. Cucaah nihin ni ah, zeibantuk minung kan si hmanh le zei bantuk riantuanmi kan si zongah, CNF cawlcanghnak hi thapek a herh i, Chinland Club le United CMission

Nang le kei nih zeizat dah kan pek khawh ve lai? Chinland Club nih kum khat ah $150 te bawmhnak a kan hal. Cucu tidur man in tuak u sih. Tidur aa dengmi cu dur khat ah pia 99 a si. $150 cu tidur 151 man lawng a si. Cucu Ni 365 in phawt ahcun, nikhat ah tidur durcheu man lawng a kiah.

Lairam ah ngaknu tlangval tampi cu riantuan lo in, "motor cyle chukcho cit i chawhleh lawng an rian ko ti a si." Lung a rawk taktak. Motor cyle in nikhatte chawk lo in um i, CNF Camp caah pekchanh a tha deuh hnga lo maw? Lairam mino hna nih "nuam-sul menmen le khua tuaktan setsai lo in kan um ahcun, hi hnu kum 30-50 kar ah kan miphun nih kan tuar te lai." Nuam menmen in nun chan a si ti lo. Kan Lairam mino hna nih, "Zeitindah dah tangka kan hmuh lai i kan mah tein kan i cawm ve lai? Ram le miphun caah aa pumpemi hna hi tluk har an tuar lio ah, kei nuam menmen in chawhvah hi thil thalo le sual a si" timi kan fian a herh. Kan tha a thut i ramdawtnak lungput kan ngeih lo ahcun miphun dang sal ah kan tla taktak lai.

Cucaah kan chuahkehnak kan ram, kan laihri tannak kan ram, kan laihri thisen a luan hmasatnak kan ram caah, nikhat ah tii thawl tan hmanh kan pek sian lo le kan pek khawh ti lo ahcun, hihi ruah ding asi, "Who we are?"

Kan miphun hruaitu hna umnak Victoria Camp 

A Chambaumi

CNF Camp phanmi le a tlungkal nih kan ralkap pawl le chungkhar harnak ning an chim lengmang. Cu tluk an har bu ah an lung a thawnning le mual an inning an chim lengmang. An sining ruah tikah,  CNF hi zoh sawhsawh awk le an mah lawng rinh awk an tha lo ti a fiang. Chin miphun ram kip kan phan nain, CNF thazaang ngei ngai in kan chiah khawhlomi hna hi a pawi taktak. Mipi leikap in kan tuanvo kan tlolh tuk ko rua tiah ka ruat. 

Naite CNF Camp a phanmi Pu Duh Cung nih a kan chimh. A celh in a celh lo. Hihi ram kip ummi Laimi hruaitu nih ruah taktak cio kan hau. Krihfabu zong nih ruah taktak cio kan hau ko hna. A chimmi tampi chung in tlawmte ka van char:-

"Camp ka va phak cu, mitthli lawng a haak ko. Sau zong ka um kho lo. An sining ka ruah ah ka celh lo. An damlonak hmuh ah lung a rawk tuk. An harsatnak, an temtuarnak, an nilin khua-al, ngalsang seh tuar, raifanh le zawhfah dangdang tuar, fale sianginn kainak caah tangka herhbau a si. Si-ai tlamtlin lo a si. Nau pawimi zong an hawhai i an tem-ing tuk. Ngakchia zong zaangfak tuk an si. Edidin zong an har tuk hna. Meh cu chim lo, an rawlbuk ah facang tun hnih-thum lawng a um. India le Kawlram ah sianginn kaimi caah bawmh an hau ee. Lung a fak i, ngaih a chia tuk. Kan miphun ralkap hna an temtuar ko. An thilri zong a chia. Innlo zong a chia. Biakinn zong a chia. Ralbawi umnak hmanh a chia tuk ee. Kan miphun hi tan kan lak deuh a hau."

Cu bia ka theih ahcun, amah bantuk in ka celh ve lo. Victoria Camp a va hmumi hna paoh cu, an thinlung a kuaiman dih ko. Cu nih a langhtermi cu, "Kan miphun ning pi in CNF hi kan tanh hna le dirkamh an hau" timi a si. "CNF hi kan zoh sawhsawh ko hna lai maw?" timi biahalnak zong hi, careltu pumpak pakhat cio kan i  hal i, kan tuah khawh tawk tuah ve ding kha, hi CAPAR nih aa tinhmi a si.

Victoria Camp kudawng

Biafunnak

Chinland Club a dirka te ah, Salai Thla Hei, Pu Tial Hmung le Ralbawi Solomon a rak kan tlawng. Cucu Chinland Club aa thawknak tuanbia pakhat a si. Cu kum in kei zong member ka si ve. Kum chiar $150 thawh. Cu ceu cu ram le miphun caah ka pek khawhmi a si. Chim ningzak a si nain, ka lunghmuih. Ka lawm. Zeicatiah "Ti khawh tawk tein ram le miphun caah ka tel ve caah a si. Ram le miphun caah CNF lawng rinh ding kan si lo. Kan i tel cio a hau."

Pathian dawtnak in vawleicung ram tha bik USA kan phan hna. Kanaan ram bantuk in cawhnuk le khuaihliti in a luannak ram khan a si. An tangka man a ngeih tuk caah, USA kan um lio hi ram le miphun caah riantuan a that bik lio caan a si. Cu caan tha cu tha tein tlaih le hman thiam i zuam cio hna u sih law, $150 tein ram le miphun caah riantha tuan cio hna u sih ti hi careltu sawm kan duh hna.

Mipi kan dihlak caah aa pumpemi CNF le an chungkhar hna hi, kan miphun a dawhtertu, min a ngeihtertu le miphun vision phurtu an si. Kan sunhsak, dawt le tanpi ding an si. An nunnak kan i hrawm ve ding le kan nunnak kan hrawmh ve dingmi hna a herh tuk. Ram le miphun caah kan tuan ti a herh taktak. Cucu aa fiangmi hna nih cun an pek ko. A cheu Krihfabu cu an budget i 1% a pemi zong an um hna. Kum khat ah $25,000 tiang a bawmmi Krihfabu zong an um hna. Lunglawmhnak taktak a si.

Ram le miphun caah cun biaknak le vawlei kan dirti a herh. Hihi then ding an si lo. Israel miphun caahcun an Pathian, an biaknak, an nunphung, an vawlei, an politics le an zumhnak artlang in an kal zungzal bantuk in, Lairam Pastor le Evangelist zong nih Israel miphun bantuk in ram le miphun kongkau hi aupi le chimrel a herh. Ram le miphun a loh ahcun, Krihfa biaknak zong a lo ve ding a si caah, kan i tel ve a hau.

Ram le miphun ca riantuannak caah Chinland Club ah tampi pek ka duh nain ka pe kho lo. Asinain Cu $150 te ka pek tikah, Victoria Camp le ka dangdang ummi CNF ralkap le chungkhar hna, an nunnak ah ka va tel ve. Nunnak chang ka cheuh hna a si, Ka nun ka hrawmh hna a si i, an nunnak ah ka va hrawm ve a si. Nunnak i hrawm hi a biapi tuk. $150 in an nunnak ka va hrawm ve tik ah, ka lawm. An harsatnak, lungretheihnak, tam-haalnak, an thlanti le temtuarnak ah ka va hrawm ve a si.

Cucaah lunglawm le thanuam taktak in ka pek peng. Hi hnu zong ah ka pek peng rih lai timi hi ka tinhmi a si. $150 ruang ah ka rum hlei in ka si a fak hlei lo. Ka nuam hlei in ka nuam lo hlei lo. Keimah ning peng ka si ko. Ka miakmi cu, "Ram le miphun caah ka pek ve. Ka tel ve" timi ka theih tik ah ka lawm i, ka lunghmuih. Midang zong pek cio ding hi kan tuanvo a si.

Zeicatiah Jesuh nih a kan chimh: "Na chawva umnak ah na thinlung a um" a ti. $150 te ka pekmi nih, ka thinlung hi CNF Camp le Lairam le Lai miphun sin ah a um peng zungzal.

USA ummi Laimi riantuanmi vialte nih hin kum khat ah $150 te in ram le miphun caah rian kan tuan ahcun tam tuk kan tuan lai. Kawl cozah zong nih a kan nek ngam lai lo. A kan tihhu ve lai. Nihin ni ahcun kan Lairam le miphun caah kan pekmi hi a tlawm tuk. Chim tlak a si lo.

Cucaah careltu zong biahal kan duh hna. "Nang ram le miphun caah kum khat ah zeizat dah na pek ve? Kum zeizat dah na pek ve cang? Hi hnu kum zeizat dah na pek ve rih lai? CNF nih thluak, thazaang, thlanti, thisen le nunnak an pek lio ah, nang le kei nih Chinram le Chin miphun caah phaisa tal kan pek ve lo ahcun zei dah ram le miphun caah i chim awk nang kan ngeih ve lai? Kan ram le miphun khi an hmai kan khap hna lai maw?"

Thuk deuh ke kau deuh in khua na ruah le ka ruah a herh. Chin miphun i ti ve tung i, kan Motherland Chinram caah zei tal kan pek ve lo ah, kan chuahkehnak ram te khi hmai khah ding a si hnga maw?Kan tuanvo kan tuan ko kan ti kho hnga maw? Kan ram kan dawt kan ti kho hnga maw?"

Nang zong kan chuahkehnak kan ramte nih khin an herh. Kan miphun nih an herh. Nang zeidah na pek ve lai? Kum khat ah $150 te tal in na chuah semnak na Lairam caah na pe siang ve lai lo maw?" Na pek sian lo ahcun "Ho dah ka si Zei miphun dah ka si?" timi khi ruah than ngai a hau ding a si ko hnga lo maw?