Rilpi Cancer Damter Khotu Piat le Daidim

Nihin ni vawlei cung minung ngeihmi cancer hma zawtnak hi zoh tik ah, minung tambik nih an ngeihmi cancer pakhat cu "rilpi cancer" a si. Cucu Mirang nih "colon" cancer tiah an ti. Rilpi timi cu, rilte le tawl (rectum)  karlak i a ummi ril a lianmi khi a si. Nihin ni ah, vawleicung hmun zakip ah rilpi cancer hi a karh ngaingai.

Hi damlonak hi, kum 50 cung a simi pa ah a tam khun ti a si. Cucaah USA ahcun kum 50 tlin bak in, rilpi cancer na ngei maw ngeilo timi hniksaknak "colonoscopy" timi hi an tuah tawn hna. A tu chan ahcun, kum 50 na no deuh minung zong nih tam ngai an ngeih cang caah kum 45 kuakap cun hniksak le i zoh ah a tha tiah ti a si cang.

Rilpi cu kan eimi rawl a chiami, "ek" ah a chuak dingmi an i khawnnak le dilnak hmun a si. Cucaah ril hi thiang tein chiah a herh. Ek hi nem tein umter ah tha. Culo ahcun chung a hnomh i, pawngkal ning a hman lo ahcun rilpi hi a hnawm kho taktak. Cucaah rilpi cancer zong hi, tawl he aa naihnak bik hmun ah hin, zatuak ah 50% cu a chuak ti a si. A dang ahcun 20%-5% an chuak i, tawl kam hi tam bik a chuahnak a si an ti. Cucaah tirawl ei tik ah, chung a thianter kho tu rawl ei le tii tampi din a herh.

Rilpi cancer a chuahtertu bik thil cu, "Sa tam tuk ei ruang, zudin le khuahsi in sermi cakuak zuknak ruang ah a si" an ti. Khuahsi in sermi thil ah hin, "sadah, khaini, raja a dang khuahsi in sermi thilri paohpaoh kha an i tel."

Rilpi cancer hi tih a nun khunnak cu, tuan ah theih a har. Cancer a dot san ngai hnu lawng ah minung nih fah an theih tik ah, an theih tik ahcun damh a har ngai cang. Rilpi cancer nih a chuahpimi damlonak cu, hi bantuk in an si:

*Chungthlet
*Chungfer
*Ek ah thi a um
*An tha a baa
*An rihnak a zor
*An paw a fak. Paw nuamlo in an um peng
*An pawpi a khim i an cik-irh
*Pawngkal ning a hman kho lo

Hi viale damlonak hi kan taksa ah a um ahcun, rilpi cancer a si kho timi kha ruah ding le ralrin ding le chek ding a si. Rilpi cancer cu ngeih hnu ahcun, si le dinei lawng in thlawp khawh a si i, a em in em awk a har ngai. Cucaah ah i cik piak le hlot hi tam bik an tuahmi a si. Tih a nung tukmi cancer a si caah, a chuahter khotu tiah an ruahmi dinei hna hi, hrial ah a thami a si.

Rilpi cancer hma (Credit: www.pinterest.com)

Tuluk ram mifim nih an hlathlainak pakhat ahcun, daidim le piat le piathnah tibantuk hman tein nifatin te ei ahcun, rilpi cancer hi tampi a zorter khawh tiah an ti.  Daidim le piat ah aa telmi dat pawl hna nih hin, cancer thisen pawl kha an tei khawh ti a si. An hlathlainak ah, piat hman tein einak nih cancer hi 79% a zorter khawh tiah an ti.

Piat hi phun (5) a um. Cu lak zong ah piat a senmi hi a tha khun tiah an ti. Daidim zong hi piat ci phun cu a si ve thiamthiam. Pathian nih in, kokek thingram le vawlei chuakmi thil in, damnak hi a rak chiah ve ko. Minung nih kan theih le theih lo lawng hi a rak si.

Hi Tuluk ram i thil an hlathlainak ah hin, minung 800 kha a bubu in an then hna i, kum hnih chung an hlathlai hnu ah an hmuhmi a si. Minung 800 cu Group A le Group B ah an then hna. Group A kha nifatin te rawl an ei tik ah, piat kha hman tein an pek peng hna. Group B kha tlawm te lawng an pek hna. Kum hnih hnu ah an hmuhmi cu, Group B minung kha rilpi cancer ngeihnak ding ah a lam tam deuhpi a um ti a si.

Dr. Zhi Li nih, "Daidim le piat phunphai eidin nih rilpi cancer hi a zorter deuh hrimhrim ko. Kam ah hin, rilpi cancer hi a tam ngaingai caah, hi thil kan hmuhmi nih mi thinlung a thawhter ngaingai" tiah a ti.

Rilpi cancer damter khotu piat le daidim phunphun (Ref. eattodefeat.org)

Piat ei tik zong ah, kio le reu timi phun silo in, a hringmi nih hin cancer ngeihnak ding hi a zorter deuh" tiah hlan ah an rak hmuh cang. Cucaah a chumh in ei lo in, a hring ei hi thapek ding a si. Zeicatiah daidim le piat hi an chumhchuan tik ahcun, a chung ummi dat 30% cu a zor ti a si.

Piat he an ci aa lomi, daidim nih hin sam zong hi a thatter khawh i, tohkuai le kitlaih zong hi a kham khawh deuh ti a si. Daidim phawmhphawmh i dip tein nifatin ei ahcun "senten" te hna zong a damh khawh tiah an ti.

Cucaah rilpi cancer ngeihlonak ding caah hi, cancer a chuahter khotu eidin paohpoah hrial le nifatin nunnak ah daidim le piat hring ei hi thapek ding a si. Riantuannak ahcun zapi lak a si caah ei ding ahcun a nam deuh caah, zanriah tibantuk mah chungkhar lawng umnak ah ei hi a tha deuh ding a si.


-----------------------------