Italy Ram Olumpic Champion Khua I A Ringmi Thihdar

Tu zing cu tuante in ka tho. Thla te ka cam. Online sermon pakhat tial ka lung ah a chuak i, Bible rel hnu ah, vawleicung thawngpang ka rel. Olympic champion pahnih an umnak Bergamo khua i mithi kong ka rel i, ka ngaih a chia. Ka lung a tha lo. Cucaah ka van tar ve.

Bergamo khua hi, Bergomum timi khuahlun a rak umnak a si. Cu khua cu Celtic miphun fate a simi Cenomani nih an rak tlakmi a si. BC 49 ah Roman khuapi pakhat ah a cang i,minung 10,000 tluk an rak um. Friuli le Raetia timi khuapi karlah a ummi, khuanuam taktak a si. Nihin ah minung 123,000 dengmang an umnak khuapi a si. 

Bergamo Khua

Olympic champion pahnih-Sofia Goggia le Michela Majoli umnak Bergamo khua cu "thihnak nih a kulh ko cang hna" tiah a ti. Cu catlang ka van hmuh bak ahcun kan ngakchiat lio, tang (2) hrawng kan si i, Thau i minung an rak thihnak kha ka mitthlam ah a cuang. Kan khua darkhing cu Japan ral lio i an rak hlakmi bomb a si i, a thawng a thang tuk. Zantim hna i, thihdar an tum ahcun ningti in a um. Kan lau dih tawn. 

Cu lio i kan khua, Thau cu, minung 1,000 hrawng kan rak um. Minung cu zatte umnak khuate ah nikhat ah ruak pahnih hna a rak i tong. Nichiar in thihdar a ring ti tluk a si. Senten zawtnak tlangrai a rak tlung i, kei le ka innchungkhar zong kan rak thi ciomau ko. Nikhat ah dar voi hnih hna a rak rin ahcun, ngaih a rak chia. Lung hi a rak dong tuk. Kan thi dih ko ne lai lo hme maw timi kan ruat. Sifah a si. Harsat a si. Pam a si. Tlangrai a si. Si nih a um lo. Sayama zong pakhat te lawng a si. Bawmtu van kan rak hai tuk. 

Cu lio ahcun, Dr. Hmuh Thang le a hawi le an rak tlung le kan hna a rak ngam tuk ning cu chim awk a rak tha lo. Dr. Hmuh Thang le hawi le kha Thaumi caahcun vanmi bantuk an rak si ko. Kum tam tuk a si nain, ka philh kho rih hna lo. Dr. Hmuh Thang le hawile kha nihin tiang ka mitthlam ah an cuang. 

Italy ram Bergamo khua zong cu khua nuam tuk a si. Khua minthang a si. Tourist tampi kalnak a si. Biaknak ah Catholic an thawnnak khua a si. Paul le St. Peter te pawl nih an rak pal len vemi khua a si ko lai. Cu khua in Olympic champion pahnih an chuak. Cu khua zong cu Covid-19 tlangrai nih a chuah hnawh ve hna i, harnak tampi an tong cang ti a si.

Ralkap truck nih hi tin ruak an thiar  hna

Michela Moioli a pi cu nizan te ah a thi cang. A pu zong cu a chonh ve i, a tu hi thi ciomau in sizung ah an thlawp lio a si.

Sofia Goggia nih a chimmi cu, "Ralkap truck pawl nih ruak 65 kha thlanmual lei ah mei in khangh ding in an kalpimi hna, ruak thlahnak thawngpang ka theih" tiah a ti. 

Michela Moioli nih a chimmi cu, "Kan khua le inn hi, ralruknak hmunhma bantuk a si" tiah a ti. "A tu ahcun khuapi hi a ningpi in minung nih an chuahtak cang. Khuachung ah theihmi thawngpang cu, biakinn in a ringmi thihdar le mizaw/miruak lami motor thawnglawng hi a si ko" tiah a ti.

"Thlanmual zoh ahcun ruak hi uico-fa ruak bantuk in an ril lulh ko. Zeicatiah ruakvuitu an um ti lo caah a si. Inn khat pakhat paoh in coronavirus mizaw an ngeih hna caah a si." 

Covid-19 in a thimi hna Bergamo khua ruak pawl

Bergamo khua cu, a khua hi a lawng cang ti tluk a si. Minung muisam a leng ti lo. Chuahtakmi khua bantuk a si cang. Coronavirus cu le, mit hmuh khawhmi a si lo. Khawika zawn dah a um timi theih khawh a si lo. Mit hmuh khawhlomi ral in i ven ding cu a har tuk. Khawika lei dah ka zam lai ti awk zong a tha lo. Kan zamnak ah "virus a rak um ve lai maw? Um lo" timi zong a fiang fawn lo.  Cuticun Italy ram cu Coronavirus nih a tongh cuahmah ko.

Tu chun ni ah, vawleicungpumpi ah coronavirus in a zawmi 340,408 an um. 14,573 an thi cang. 96,010 an dam ve cang.

Italy ahcun nizan Rinni ah minung 793 an thi.  Minung pahnihnak tambik an thihni a si. Ram pumpi ah 4,825 an thi cang. Nilini khan Tuluk ram nakin mithi an tam deuh cang. Zarhpini ah 651 an thi than i, 5,476 an thi cang. Ngaihchia le tuksum a si. Laimi nih "puul" kan timi khi a si ko. Chungkhar ning in a thimi tam ngai an um kho cang men. 

Italy ram cu Pope umnak Vatican ramkhua umnak a si. Rome khualipi umnak a si. Peter le Paul an thihnak khua a si tiah ruah a si. Vawleicung Khrihfa tambik umnak ram a si ve. Coronavirus nih cun, miphun, biaknak, uknak, vunhawng, ramri a thim lo i, Italy ram zong a thuat cuahmah ve ko. 

Nihin ni ah, Italy ram ve lo bang. An ram cu thihdar tuknak in a khat. Miruak vui awk thalo in an um. Khua cheukhat cu an chuahtak cang. Minung million tampi innchung ah an i erh. Hi tluk tihnungmi zawtnak nih a dang Europe zong  den cuahmah i, USA zong a den cuahmah ve cang. Italy ram Olympic champion umnak khua zong an chuahtak cang hna. Vawlei ah hin a hmun dingmi an um lo. Aa rawk kho lo mi an um lo ti kha Bergamo khua nih a langhter ko. 

Bergamo khua ahcun, "thihdar thawnglawng a ring ko" an ti ahcun, ka ngakchiat lio i, Thau khua i nifatin tein a ringmi thihnak darkhing hawng kha, ka hnathlam ah a leng peng ko. 

Zeicatiah thih dar cu a ruam aa dang. Thihdar theih cu ning a ti. Li a leng. Tha a chia. Ngaih a chia. Tuk a sum. Thin a phang. Mining thinlung ah launak a si. Thihnak darkhing thawng i a pinlei thawng khi cu, 'ngaihchiatnak le lunglilennak aw thawng nih a zulh colh tawn caah a si." 

Hi Coronavirus thihnak dar hi, zeitik ah dek Italy ram in a daih te lai? Nihin ni ah chuahtak cangmi Olympic Champion umnak khua in thihdar hi zeitik dek a daih te lai? 

--------------------------

Zohchihmi ca

1. Thau khua i, tlangrai a rak tlun kum hi, June le July 1973 a rak si. Minung 39 an thi tiah Pu Nun Hre nih a ka chimh. Hi lio ah, Thau khua hi inn 175 um i, minung 1,000 hrawng an rak si. Kei cu tang (2) ka kai lio a si. 

2. AP Sport Write Andrew Dampf nih Rome (AP) ah tialmi ca zoh chun in tialmi a si.