"Aihre" le Minung Ngandamnak

Aihre timi hi "Ai" timi ramkung (plant) pakhat chungah aa tel vemi ramkung pakhat a si. Mirang nih "plant" an timi hi Lai holh he aa naih bik cu "ramkung" timi a si ko. A hme zong um i, a ngan zong a um kho. Ai timi ah hi, aitial, ainak, aithing, aihre, aithur, aitek timi tiang aa tel kho. Aitek tu cu thingkung phun ah a um nain, "ai" timi chungah aa tel ve. A ruang cu "a no lio ah ai phun in a um caah aitek" tiah an tinak a si.

Ai timi thil hi, vawleichung ah a ummi an si caah, vawlei dat tampi an ngei. Ai paohpaoh hi, thawnnak dat an rak ngei ngai cio hna. A bik in aihre le ainak hi thawnnak an ngei khun. Ainak hna cu hlan ahcun a man a rak fak ngai ti a si. Ainak hi, ramtang ah a um i, a nak deuh le nak lo deuh in a phunphun a um. Cu ainak cu, chungthlet, senten, raifanh le ruhkhua fah ah a tha tiah an rak ti tawn. Ka ngakchiat lio ah, ka paw a fah i ka chung a that lo caan ah, ka pa nih ainak cu a va kawl i, a rak phomh i a rak ka dinh tawn. Damnak zong ka rak hmuh caan a um.

Aihre tawba

Hi ai timi ramkung lak ah hin, aiher hi hmannak a tam bikmi a si. Eidin tamhnak le eidin thawtnak ah hman bik a si. Pakistan, India, Bangladesh, Kawlram, Laos, Cambodia, Vietnam, Tuluk, Thailand le Sri Lanka ram ah an hman ngaingaimi thingram a si. Hi ram pawl ahcun aihre aa tel lo ahcun, eidin a tlam a tlinglo. Cu tluk cun an hman. 

Aihre hi, India, Kawlram le Bangladesh ahcun aihre hi sipuazi ca bak in an cin. India ahcun acre 40,000 hrawng hna an cin ti a si. Aihre hi Lairam zong ah a that tuk ve ko caah hin, sipuazi caah cin khawh dingmi a si ve ko. Lairam zong ah hin, tampipi in kan cin khawh ahcun, Lairam le Kawlram le Mizoram ah tampi kan zuar khawh ve men ko lai.

India ah acre 40,000 an cin ti a si (Ref. HAPPI Magazine)

Kawlram taizinse cauk ah aihre a thatnak an tial tik ah tampi a um. Cu lak ahcun "pawfah, pawpuar, paw thatlo le pawpi he aa pehtlaihmi nuamh lonak ca paoh ah a tha" tiah an zumh. Ruh a phin tik zong ah thlawpnak ah an hman. Nauno ngeimi nu hna nih, an vunhawng damnak, an phin zornak, zawtnak phunphun khamnak ca le nau an ngeihnak an chiatha phingmi zornak caah an hman ngai fawn. Cu tluk cun aihre hi nicuahlei ram ah sii ah an hmanmi a si. Hlan ahcun nichuahlei ram ah datkhuainak a um khawh lo caah, aihre chungah zeidah a um ti ngaingai cu an thei kho lo.

Aihre hi Mirang nih cun "Turmeric" tiah an ti. Nitlaklei doctors pawl nih an hlathlai tikah, aihre nih hin "rheumatoid arthritis (RA) timi ruh le hliahcang fah damlonak caah thlawpnak caah a tha ko tiah an ruah. Nitlaklei sii nak hmanh in, aihre hi a thatnak a tam deuh men lai tiah a ruatmi an tampi ti a si. Aihre ti tik ah, zeihmanh cawhlomi aihre dip kha chim duhmi a si. Cite le makphek cawhmi pawl meh caah hmanmi kha chim duhmi a si lo.

Aihre in an sermi sii

Aihre ah hin, Calcium le Potassium te hna a tam ngai caah, "Aihre in siammi calcium sii" te hna zong a um. Aihre 100 gram ah hin 0.2 gram cu Calcium dat a si. Sii dangdang zong an sermi tampi a um. The United States Department of Agriculture (USDA) National Nutrient Database nih an hniksak cangmi le an theihmi ahcun aihre dip lakphakti darkeu khat ah a tanglei bantuk in dat aum tiah an ti:

Calories   -   29
Protein     -   0.91 grams(g)
Fat (thau) -   0.3 grams
Fiber        -    2.1 grams
Sugar       -    0.3 grams

Cun darkeu khat aihre dip nih a tanglei nifatin herhmi zat hi a kan pek khawh ve:

Manganese   -   26%
Nifate Iron   -   16%
Potassium    -    5%
Vitamin C    -    3%

Aihre a phunphun in chuahmi (Bombay dawr)

Asinain zei thil paoh hi a hleihluan in ei ahcun ral a si kho. Cucaah ahre hi a tam bik ah nikhat ah lakphak darkeu pakhat cung cu din lo ding a si. Cu cung din ahcun a tanglei thil thalomi (5) a chuahter khawh tiah ruah a si.

1. Pawpi fahnak. 

A ruang cu "aihre hi a dat a linmi a si." Cucaah tam tuk din ahcun pawpi a phinter khawh

2. Kal-lung

Aihre ah hin, "oxalates" timi dat a um. Cu oxalates timi dat nih cun calcium timi dat kha a senghter hna I, calcium kha a ti kho lomi calcium (insoluble calcium) ah aa cang. Cu calcium a tit khawhlomi le a khalmi cu kal-lung a chuahnak hrampi a si.

3. Chungthlet le luakluak

Aihre ah a ummi dat hin, chungril lei caah rian a tuan bikmi a si. Tam tuk ei ahcun chung a thlet khawh I, luak zong a chuahter khawh.

4. Ziaklomi a um kho

Aihre chungah a ummi dat a cheukhat cu minung ni ziak lo khawh a si. Tongh ruang ah maw, eidin ruangah maw ziaklomi a um kho. Vunhawng a sen kho. Thawdawp a pihter khawh.

5. Thir-dat (Iron) a bauter khawh

Aihre ah a ummi dat nih hin, kan eidinmi chung I a ummi thir-dat (iron) hi a khalter khawh caah, taksa ah kallo in a umter khaw. Cucaah thir-dat a baumi hna nih cun aihre hi, tirawl eidin pin ahcun eidin chap ding a si ti lo.

Aihre hi, Laimi zong nih, mehhang tamhnak ah siseh, minung ngandamnak caah si seh, kan hman ngaimi a si. Cun kan vawleilei khuacaan he zong aa tlak caah, thanchonak ca zong ah kan cin khawhmi a si ve. Aihre thawnginn damnak kan hmuhnak pin ah, rumnak zong ah a chuahpi khotu thil a si ve caah, Laimi zong nih tam deuhdeuh cin le zuar khawhnak hmunhma kan ngeih khawhnak ding hi, biatak tein lam kawl ve ding a si.

-------------------------------------------------

Zohchihmi ca

1. 5 Side-Effects Turmeric (Haldi): How Much Is Too Much?
 https://food.ndtv.com/food-drinks/5-side-effects-of-turmeric-haldi-how-much-is-too-much-1746375

2. Everything you need to know about turmeric  https://www.medicalnewstoday.com/articles/306981#positive-side-effects

3. HAPPI Magazine
https://www.happi.com/issues/2017-02-01/view_features/true-to-his-roots/