India Ah A Chuakmi Khaubawk Hi Kawlram Caah Thinphan Ding A Si Maw?

Khaubawk nih kan ngakchiat lio ah, kan lo thlaikheu a rak hrawh ngai a um len. Cucaah ka pa nih kahthek a ka tuah piak i, heh tiah khaubawk ka rak kap tawn. Cucu ka philh kho bak lo. Khaubau hi minung kan eidin tirawl caah ral nganpi a si.

Khaubawk hi, Bible Biakam Hlun chan in, Israel le Egypt ram hrawng ah harnak a rak chuahpitu a si timi kan hmuh. Nihin ni tiang zong in, an tih ngaimi a si. Khaubawk nih kan mah chan chung ah, Ethiopia le Africa nichuahchaklei ah mangtam a rak tlunter ko. Mangtam ngaingai an tlunter lo hmanh ah, eidin cinthlak sunghbaunak tam taktak cu an chuahpi zungzal.

India ram Rajasthan le Madhya Pradesh ah an eidin hnu ah a bawkmi khaubawk

Thingkung hawng le hnah zong mah tin an ei hna

Tu kum January hrawng ah Africa nichuahchaklei kuakap ah, Scientist pawl nih "Schistocerca gregaria" tiah an timi "thetseram khaubawk" (Desert Locust) tampi an chuak. Blog zong ah ka tial cang. Cu khaubawk cu thli a hrannak lei hawih in an zuang tawn i, an zuan a rang ngaingai. An lian i an paw a kau. Cu khaubawk pawl cu thetse ah an bawk. Tii an tit i, an karh tuk. A run bak in an zuang i, an zuannak lamcung ummi eidin awk thami a hringmi paoh cu an ei dih hna. Tihnung taktakmi mangtam tlunter khotu khaubawk an si.

Naite June thla ah thetseram khaubawk pawl cu, India ram New Delhi hrawng an rak phan. India cozah i cinthlaknak zung zong an thin a phang i, an lau ngaingai. India ram ramkulh 7 chungah an karh ciammam i, kum 70 chungah khaubawk nih harnak fak bik a pekmi hna kum a si tiah an ti. Mipi caah harnak tampi an chuahpi. Atu lio ah India ah a bubu in a run bak in a rak zuangmi hi a tlawm bik ah million 80 an si lai ti a si. An karh pah changmang rih. Hi khaubawk zong hi, khuacaan aa thlengmi he aa pehtlai ti a si.

January ah Africa ram ummi kha June ah India hi tin an phan

Hi thetseram khaubawk hna hi, thla ruk chungah a let 400 in an karh i, Kilometre-killi pakhat chung ummi khaubawk nih nikhat eimi thil hi, minung 35,000 ca nikhat eidin he aa zat ti a si. Atu lio ah thetseram khaubawk nih a tlak hna caah minung million 42 hi eidin harnak an tong i khaubawk tlaknak area ummi bawmhnak caah US $312 million bawmhnak a herh tiah UNO nih an ti.


Hi khaubawk hi Africa zong ah an karh cuahmah rih. Atu hi Ethiopia le Kenya tiang an karh. Thlanglei deuh ah Uganda ram tiang an phan. Thah cawk ding an si lo caah, minung caah ral nganpi an si tiah an ti. An zuan tik ah hin, million tam tuk an si a tih in tih an nung ti a si. Nichuahlei ah India ram tiang an phan cang. 

Kenya hruaitu pawl nih an timi cu, innkhar kharkhumh lio caan ah rak chuah caah, thah ding le doh ding zong hi a har khun ko tiah an ti. Vancung in sii kah lawng hi kan control khawhnak hna an si i, saram le satil caah tih a nung ve hawi le a pawi tuk tiah an ti.Africa hruaitu pawl nih an timi cu, hi khaubawk a karh ning hi a tam tuk i kum 70 chungah a tam bik a si men lai an ti. Khaubawk nih hin, minute pahnihthum ah an mahnak in a rit deuhmi eidin hi an ei manh ti a si.

Africa ram ah khaubawk nih thinghnah an but i an ei lio

India ram khuapi cung i an zuan lio

A tu lio ah India zong ah hin an karh taktak i, eidin cinthlak tampi an hrawh cang. Covid-19 nih harnak pek a si. Khaubawk nih harnak pek a si rih. Cun ni le a lin tuk fawn i, India zong lam kip in harnak an tong.

Hi khaubawi hi nichuahlei ah an van i thawn ziahmah i, India ah cun an karh ngai cang. Kawlram hna a phan sual te lai maw timi zong Kawl cozah cinthlaknak lei zung pawl zong nih an ruat ngai. A tu tiang ahcun phan ding aum rih lo nain, India ramri ummi-Rakhine Ramkulh, Chin Ramkulh le Sagaing Ramthen le Kachin Ramkulh- pawl hi, ralrin khun an herh khun ti a si.

Khaubawk million tampi India ram ah an rak lut 

Naite ah Sagaing le Kawlram a laiva hrawng ummi khaubawk lianlian kha datkhuainak an tuah hna tikah, atu India a phanmi thetseram khaubawk phun an si lo ti a si. Cun Rakhine Yoma tlangthluan, Lai tlangthluan le Naga tlangthluan hna nih Kawlram le India ram hi an kham caah, hi khaubawk hi Kawlram taktak ahcun an rak lut lo men lai tiah ruah a si. Cun thli a hran lo ahcun a zuan an i harh ve caah, Kawlram tiang taktak hi cu, khuasik a tlak hlan ah an phan theng lai lo tiah Kawlram cozah nih an ruah.

India in Bangladesh cu a nai pin ah, a thli hranning zong aa lawh caah, Bangladesh hi cu an phan te kho men tiah ruah a si. Hi khaubawk zong hi, Africa in aa semi an si. Ram tampi ah harnak a chuahpi manh cang nain, Africa ram mi kha nan "nan chuahter, nan siammi a si" tiah mawh phurh awk an tha lo. A mah kokek tein a chuakmi an si ko caah, an duhmi thil an si lo.

Nihin ni tiang ahcun Lairam cu khaubawk cun kan him rih ko. Khaubawk hi khua lum lio ah a chuakmi an si. Lairam ahcun March in September tiang hrawng an um kho. Phan ding cu a um rih lo.

Asinain India ram he aa naihniam ummi paoh cu ralring tein um le cawlcangh kan hau ko hna. Zeicatiah hi bantuk khaubawk run hna kan Lairam a phanh sual ahcun kan sifah chinchap ah, harnak le sunghbaunak tampi a kan tonter khawh. Cucaah Laimi dihlak nih, harnak a kan pe khotu khaubawk phunphai paohpaoh cu, kan thah khawh chung in thah hi, rian pakhat a si.

-----------------------------