A Rum Bikmi Ramkulh 10 (USA)

GDP A Sangbikmi USA Ramkulh 10

USA ah ramkulh 50 a um. Hi ramkulh hna hi mah tein aa zohkhenh, aa ukmi le tangka zong aa tawlrelmi an si. Ramdang he duhpaoh in cawk le zawrhnak nawl an ngei. An ramkulh chung sipuazi hi an mah ramkulh cozah kut ah a um. Hi ramkulh 50 lakah GDP (Gross Domestic Product) a sangbikmi ramkulh 10 hna cu hitin an si (2010 Cazin in). Apinleiah ramdang GDP he aa tlukmi ram cio epchunnakah kan langrhter chih ve.

Ramkulh.           GDP/GSP    GDP Aa Tlukmi Ram

1. Califor            1.46 trillion       Italy

2. Texas             1.30 trillion        Mexico

3. New York      1.11 trillion        Mexico

4. Florida            754 billion         Turkey

5. Illinois            644 billion          Indonesia

6. Pennsylvania   575 billion          Switzerland

7. New Jersey      497 billion         Saudi Arabia

8. Ohio                 483.4 billion      Poland

9. Virginia            427.7 billion      Taiwan

10. N. Carolina    407.4 billion        Iran

USA rampi nih 2010 ah a chuahmi GDP hi vawleicung ah a sang bik a si i, 14.66 trillion a si. Acunglei ramkulh 10 nih hin, USA ram GDP zatceu renglo (55.05% ) an chuah. California State lawng nih, USA GDP i zatuak ah 13.34%; Texas nih 7.95% le New York nih 7.68% an chuah khawh. Hi ramkulh 3 nih, USA GDP dihlak i 28.97% an chuah khawh. Khuaruahhar in an thawng.

Asinain, hi ramkulh 10 hna hi, minung a tambik pawl zong an si caah, pumpak pakhat  tangkalut in tuak ahcun, a rum bik an si lo. Pumpak pakhat tangka lut tuak ahcun, Delaware hi a sangbik a si; minung pakhat comi thawng $69.77 asi; Alaska thawng 65.4 le Connecticut thawng 64.8 an si (Washington DC area hi khua pumpak in tuak ahcun a sangbik a si i, minung pakhat covo hi thawng 136.7 a si. "Thlapa chuih lawng a tang cang timi khua" hrimhrim asi ko). 

 Adang Laimi umnak ramkulh cheukhat lakah GDP sangbik ram cu Michigan hi a si. 2010 GDP cu billion 372.4 (san ah 13nak) a si. Indiana State GDP cu billion 267.00 (san ah 16nak); Wisconsin billion 251 (20nak); Kentucky billion 161 (28nak) le Kansas billion 128 (31nak) an si.  An sipuazi an dintuai hna lo. 

Zeicatiahcun Kawlram pumpi GDP (2010 est) hmanh hi billion 71.77 hrawng lawng a si. Vawleicung ram dihlak ah 86nak ah  a um.  Kawlram GDP zoh in, a cunglei ah kan tialmi ramkulh 10 hna an GDP hi zeitluk in dah a san timi cu fian khawh a si. California State pakhat lawng GDP hi, Kawlram GDP let 18 renglo a si. Khuaruahhar a si.  GDP cu kum khat le khat aa lawh lo caah, hihi 2010 GDP kong asi. Ohio GDP hi 2012 ahcun billion 500 leng a kai. Thailand, Malaysia te nak in a let in an GDP a sang deuh. 

Cucaah, USA le ramkulh pakhat cio nih chuahmi GDP sining zoh tik ah "Democracy Cozah le Ralkap Ukmi Cozah" hna hi zeitluk in dah, an thluak, thazaang le sipuazi an thiamning aa thlau timi, careltu thinlung ah a cuang theu lai timi ruahchannak he, hi ca hi ka tialmi a si.