Ram Thar Chuakmi South Sudan

                                  South Sudan

Biahmaithi: Vawlei ah ramthar pakhat a van dir. Scotland le Spain ram chung ramkulh cheukhat cu independent hmuh an duh. An izuam cuahmah. Turkey ram le Iraq ram kuakap Kurds pawl nih Independent ram ngeih an duh fawn. Vawleicung ah hmailei ah ram thar tam deuh chuah dawh asi. Cucaah hi Southern Sudan ram tuanbia te hi uar a um tuk caah ka van tial.

                                (Ref: Google image)

               South Sudan fingtlang dawh

Amin: Republic of Southern Sudan

Area: 239,285 sq miles. Kawlramnak in tlawmte a hme deuh.

Pawngkam Ram: Nichuahlei ah Ethiopia; Thlanglei ah Kenya, Uganda, Democratic Republic of Congo; Nitlaklei ah Central African Republic; chaklei ah Arab miphun Muslim nih an ukmi “Sudanram” hna an si; an khualipi cu Khartoum asi. Hi Sudanram hi zalawnnak a petu hna ram cu a si. Southern Sudan hi, ram nih a kulh dih i rili ah chuahnak a ngeilomi ram asi.

Khualipi: Juba timi hi Southern Sudan khualipi asi lai. Ramkulh 10 ah an then.

Zalawnnak Hmuh Ding Ni: July 9, 2011

Milu: Million 7-9 karlak hrawng si dawh an si. Tha tein theih asi rih lo.

Zung: English & Arabic. Tlangholg dang hna: Juba Arabic cu an ram khualipi kuakap tlangholh a si; Dinka holh hi milu 2 million tluk nih an hman.

                        Juba Khualipi (Ref: Google Image)

Biaknak

Pipu biaknak (traditional belief) biami an tam bik. Acheu nih Krihfa an tam deuh ti asi. Muslim asimi chaklei Sudan cozah le mipi nih an serhsat tuk hna caah, Krihfa biaknak akarh ngaingai. Hmailei ahcun Krihfa tam deuh an si te theu lai tiah an ruahchung. 

Thilchuak

Meiti, sui, ngun, thir, dar, tlawr le thinghak tam ngai a chuak. Vawlei a that caah, cinthlak le satil zuat in paw aa cawmmi an tam. Tii thazaang in timei (hydro electric) tampi tuah khawhnak ding hmunhma a um. Meiti tampi a chuah caaha thanchonak a um kho ngai dingmi ram pakhat a si. Sudan ram meiti 80-85% hi, South Sudan area chung ah a um dingmi asi caah, ramri kong ah an buai ngai rih. Ramsa le tichung saram nga phunkip tampi umnak ram asi. Vui zong tampi a um.

               An zuatmi caw hnuksur pawl

             Meiti cawhnak hmunhma pakhat

Tuanbia:

Southern Sudan ah hin, miphun 24 leng an um. Tupi a chah, cerh a tam caah, Arab muslim pawl nih a chung thukpi tiang an rak pil hnawh kho lo. Egypt nih 1820 kuakap in Sudan a rak uk i, cu hnu ceu in,  Southern Sudan tuanbia hi, theih awk aum lo. Mirangr nih Egypt hi 1922 ah independence a rak pek. 1947 ah, Mirang nih Southern Sudan hi Uganda ram ah kawmh chih ding in an rak ti ko nain, Juba Conference ah, chaklei le tlanglei Sudan hi fonh ding an rak ti i an rak fonh.

Cu caan thawk cu, Southern Sudan cu atu Sudan timi ram chung ah aa tel ve. 

Chaklei Sudan cu mingo deuhmi Arab phun an si. An biaknak ah Muslim an si fawn. Thlanglei Sudan cu minak taktak an si i, an biaknak ah “lawki” phun an rak si. Aa tlak baklomi ram ah an rak komh hna. Cucaah nihin ni tiang an itlak kho hlei lo i, raldohnak zong a chuahnak a si.

Hi Sudanram zalawnnak a hmuh hnu ah, hi Southern Sudan zalawnak hmuhnak ding caah, ramchung kahnak (civil wars) voi hnih tiang fakpi in a chuak. Cu ramchung ral pahnih ruang ah, hi ram hi thanchonak ah hnu ah a pil ngaingai.

A pakhatnak ramchung kahnak cu 1955 in 1972 ah a si. Hi raltuknak ah hin, Sudan cozah nih Anyanya tapung pawl kha a rak kah hna.  Cun SPLA/M (Sudan People’s Liberation Army/Movement) timi an dirh kum 1983 in 2005 tiang Sudan cozah le SPLA/M kahnak a chuak. Hi a voihnihnak ral ah hin, minung 2.5 million tluk an thi; minung million 5 tluk nih an ram an chuahtak i ralzammi (refugees) dirhmun an phan. Hi ral hi Africa continent ah ramchung ral a sau bikmi asi.

SPLA hi Kawlram chung tapung he an i lo. Sudan cozah zong an kah; a caan ah an mah Southern Sudan chung tapung dang zong an kah pah hna. SPLA hi a tlawmbik ah tapung buu dang 7 he ral an i tu pah ti a si. UN chimnak ahcun, ramkulh 10 lakah 9 cu hi raltuknak nih harnak tampi a pek ti a si. An men lo taktak. Tapung bu 7 he tuk pah bu in, Sudan cozahpi nawr cu a awl lo.

SPLA/M nih hin, Shilluk le Murle miphun tapung hna hi a tuk lio hna ah hin, khuate tampi mei in an khangh; nu tampi an tlaihhrem hna; mipi tampi an thah hna tiah ti asi. Mipi zong a phunphun in an hrem hna an ti. Sudanram States 25 chung ah, Unity State timi ahhin, SPLA nih inn 7000 tluk an khangh ti asi. Juba khualipi ummi International Aid agencies pawl zong nih hin, SPLA nih human rights buarnak tampi an tuah tiah an ti. 2010 ah. CIA zong nih hin, Southern Sudan ah hin, a ra laimi kum 5 chung cu mithah lainawnnak tampi a chuak kho tiah an rak ti.

January 9-15, 2011 ah Southern Sudan mipi hna nih Sudanram uknak in chuah le chuah lo nak  kong ah “refrendum” an tuah i, mipi 98.83% nih zalawnnak lak an duh. Cucaah, Sudan President Omar al-Bashir nih cu biakhiahnak cu a cohlan. Cucaah Southern Sudan cu, July 9, 2011 ah zalawngmi ram asi cang lai. Amin ah “Republic of South Sudan” tiah auh ding ti asi.

 An ram ah vui tampi aum. Ralkap le tapung nih tampi an thah

Caih Rih Dingmi

Southern Sudan hi cerhsup le tupi a tam. Meiti tampi a chuak; Sudanram pumpi meiti 80%-85% hi Southern Sudan in a chuak. Cucaah hi meiti hi zeitindah kan i thenhphawt ning asi lai timi kong ah caihkhan thlu rih lo a si. Cun atulio ah Northern Sudanram ah a ummi South Kordofan ramkulh i Abyei timi ramhmunhma pakhat kong ah an buai. Zeicatiah cu ram cu Southern Sudan nih kan ram a ti ve caah a si. 

Sudan President Omar al-Bashir nih hi ram hi, Southern Sudan nih an ram ah a chiah ahcun, Southern Sudan zalawnnak hi theihhngalhnak ka ngei lai lo tiah a ti ve. Hi ramhmunhma ruang ah, May le June 6, 2011 tiang in ramri ralkap kahnak zong a chuak pah rih.  Hmailei zong ah i kap te hna sehlaw theihlo asi.

Theihngalhtu Ding Ram Hna

Hi ram hi, Sudanram nih pakhatnak bik theihhngalh a timh. Egypt nih pahnihnak kan si lai ti a si. UN Security Council Zungzal chungtel ram 5 le African Union (ram 50 fai) zong nih theihngalh colh ding an timh. Ram aa then sual lai ti phannak a ngei deuhmi, Tuluk le Kawlram le Iran tibantuk hna nih cun theihhngalhnak ngeih ding an tim rih lo.

Cozah Thar

Min sak zong an  harh ngai. An ram ah miphun 24 fai an um. Dinka hi a tambik million 2 tluk an si nain, an ram an aiawh kho ve taktak lo. Cucaah min zeidah kan pek lai ti zong an i harh ngai i, Republic of Sothern Sudan ti hi a min si te dawh a si.

2005 ram uknak phunghrampi an sermi ning in ram hruai asi lai. President “cozah lutlai” (head of government) le Ralkaplei Lutlai (Commander-in-Chief) a si. An ralkap cu Sudan People’s Libration Army tiah min sak asi. SPLA/M dirhtu John Garang cu a pakhatnak bik an president a si. Amah hi July 30, 2005 ah a thih caah, mah bawmtu a rak si mi, Salva Kiir Mayardit  Southern Sudan president si ding in, August 11, 2005 ah biakamnak a rak tuah. Ram ukpennak nawlngeihnak cu, cozah le Southern Sudan Legislative Assembly cung ah aa hngatmi a si. Ram uknak phunghrampi nih adang tein Supreme Court zong a ser chih rih.

   Eco-taurism zong hi pawcawmnak pakhat a si

Biafunnak

Southern Sudan cu July ni 9 in, zalawnnak a hmu cang lai. UN Member 193 nak asi te dingmi a si. Hi ram zalawnnak a hmuhnak ding caah, minung nunnak tampi a liam; thlanti tampi a chuak; ralzam tampi an um; innlo dumhau lamsul tamtuk a rawk; tamtuk hma an pu; tamhalnak tam tuk in hnu ah zalawnnak an hmuh. “Freedom” timi hi a man a din lo. A man a fak tuk. Zalawnnak hmuhnak ding caah, mipi nih a man tamtuk an cawi. SPLA/M zong nih, Independence cu a har tuk ti an thei ko nain, an rak i thim peng. 

South Sudan hruaitu hna nih, Federal te lawng rak duh hna sehlaw, Sudan cozah cu a rak lam men lai. Harnak le tem innak tamtuk an tuar hnu lawng ah, Independence taktak cu an hmuh. Freedom taktak cu a man a rak fak tuk. Hi pin lei ah zeitin dah ram an i hruai lai? Tluang tein an kal kho te lai maw? Miphun le nunphung tam tuk aa cawhmi ram an si tik ah, fek tein ram an ser kho lai maw ti bel ruah ding aum rih.

Azeihmanh va si sehlaw, hi ram a dirmi nih hin, Kawlram le India ram ah hmanthlak ruah ding a kan pek ve. India ram le Kawlram chung tlangcungmi hna nih, “Federation lawng maw kan i tinh lai maw? Independence taktak dah?” Sothern Sudan tuanbia nih hihi a kan hal vemi biahalnak a si. Southern Sudan mipi nih zalawnnak hmuhnak ding caah, man tampi an cawi bantuk in, zalawnnak  hmuhnak ding caah, a man tampi cawi ve a hau ko hnga lo maw? A liamcia kum 10 lio ah, Southern Sudan nih independence a hmuh khawh te lai timi hi ruah awk a rak har tuk nain, nihin ni ahcun zalawngmi ram ah aa chuah ko cang. Hi bantuk chunmang hi tah Kawlram le Indiaram tlangcungmi hna nih manh ve ngam asi te hnga maw? 

Lairam zong ah hi bantuk cangdonh leikuang in cawmnak a si kho ve ko