Bawmh Herhmi Ca Bawmtu

Minung kan sinak ah hin, kan pawngkam ah bawmtu midang Pathian nih a thlah tawn hna. Cu bantuk in, kan mah zong bawmtu si ve ding in, a caan tete ah Pathian nih a kan thlah ve tawn. Midang caah lunglawmhnak chuahpitu le bawmtu si hi, Pathian duhnak tuah asi.

Mi vialte cu kan bawm dih kho hna lai lo. Sihmanhsehlaw a caancaan ahcun bawmh a herh taktakmi minung pawng ah Pathian nih a kan thlah hramhram tawn. Cu bantuk zawn ahcun, "tih ding, fih ding, a nuam lo dingmi le thaditnak zong asi men ko lai." Asinain kan lungthin ah bawmh duhnak thinlung a chuah ahcun, hrial ding asi lo. Hi bantuk thil hna hi, accident in a cangmi an si lo. Aa tong sual mi an si lo. Pathian nih tinhmi (purpose) ngei tein a cantermi an si tawn.

USA ka phak hnu ah, Laimi asilomi, theihlomi midang caah ruahlo pi-in bawmtu ka sinak tete a um theu tawn. "USA ah nan theihhgnalh lo pi motor nan phur hna lai; tih a nung tuk, taza hna an i cuai sual hna lai?" tiah an ti tawn. Cucu ka thinlung ah a caam ngai i, theihlomi bawmh hi ka phannak a um ve ko. Risk asinak zong a um taktak ko nain, a caan ahcun zumtu Krihfami caah, risk zong lak pah a hau tiah ka ruat. Voikhat cu, London (UK) in a rami, NATO ralkap pa zong sau lakte ka rak phurh bal. A dang pakhat cu "mi sifak ngai pa" atu ka tialmi pa kong hi a si.

October 4, 2008 ah Columbus khua ah kan i thial. Ka rian umnak cu Columbus in meng 64 hlatnak, Dayton khua kam ah a si. Nikhatni in Ningani zarh khat ah ni (5) rian ka tuan. Umkal a har ngai caah, lungthin hliphlauhnak ah tiah, ka kalnak lam hi ka thleng tawn. A caan ah I-70 ka zul; a caan ah Old National Road timi (Rd.40) ka zul tawn.

Voikhat cu Rd. 40 lei in kal ka tim. Coumbus khua ka van lonhka, Galloway sang ka phak ah, thil rit ngai in aa phurh i, thilri chia nawn he a kalmi pa pakhat ka hei hmuh.

Ka lonh hnu ah ka ruat i, "Khi pa khi kan pin lei khua West Jefferson hrawng ummi asi men lai. Amuisam ka zoh ah lungthin tlawm le mi sifak asi men lai. A thil khi rih ngai dawh asi. Ziah lailei thil phurh bak in pei thil a phurh ko khi. Phurh pah a tha men ko lai" tiah ka ti i, ka hngah. Emergency mei ka piah i lamkam ah ka dir. Motor dang zong an kal tung ko nain, ahohmanh an dir bal lo. Dir phung zongah an ruahmi asi fawn lo.

Ka pawng a van phak i, "Hello Sir, Khawika dah kal na timh? Zeital kan bawm kho lai maw?" tiah ka ti. Amuisam ka zoh ah, sifak ngai ding a lo. Lungthin zong hawi can tuk lem lo ding khi a lo. Cucaah ka zaang a fak chinchin.

"Ee. Na ka phurh khawh ahcun ka lawm tuk ko hnga. Springfield ah ka kal lai ka ti?" tiah a ka ti. Springfield cu ka kalnak ding lam asi ko caah kan phurh pah ko lai tiah ka leh. Amah belte ka tlai pah cang le a khua taktak cu kan luhpi manh lai lo. A nainak bik datsi dawr ah kan thumh te lai mu?" tiah ka ti i, ka phurh.

A thil cu a rat rit ngai. Ka cawi i ka motor hnulei ah ka chiah i, a nih a hmai ah ka thutter i, ka phurh.

Ka charnak hmun in a kal duhnak khua cu meng 40 tluk a hla rih. Cai taktak in kal hmanh ah, a thaizing lawng ah a phak ding asi. I-70 le Rd.40 aa tonnak Springfield khuakam ummi meiti dawr (gas station) cu kan phan. Lampi bia kan i ruah pah ah, sifak ngaite asi kha ka theih. Ka zaang a fak tuk i, ka zaal ah ka sanhmi $5 te ka chuah i, "Thil pakhatkhat va ei pah te" ka ti i, ka kaltak.

"Kha ni le caan ah khan lam dang in rak kal ning law, kha pak ha bawmtu ngei lo in zeitluk in dah a tuar hnga? Ni le a lin fawn i zeitluk in dah a baat hnga? Kha ni le caan thengte i kha ka lam ngelcel ka zulhmi cu a caah thiltha tuk pei asi kha?" ti khi ka ruat tawn.

Kha ni ka tonmi te kha, motor kalmi caah cun, thil fate asi ko nain, ke in thilrit he a kalmi kha sifak pa caah cun, thil fate asi lo.  A awl mi zong asi fawn lo. A har taktakmi asi. Kha zanlei ah khan phur hlah ninglaw lampi motel ah riah a hau ding asi.

Khua ka ruat than i, Pathian nih tinhmi ngei tein kha ni le caan ah, kha ka lam thengte ah a ka thlah tiah ka ruat. Mi sifak pa pakhat caah bawmtu ka rak simi te kha kai lawm. Kai lunghmuih. Kan mui cu kan i hmu bal ti lai lo nain, kha ni le caan te kha a nih zong nih a philh ve ti lai lo.

Minung kan sinak ah hihi ruah a hau. Bawmh a herhmi cu bawmh ding an si. Na pawng ah bawmh ding a herhmi an chuak theu tawn lai. Cucu aa tong sual tiah va ruat hlah. An mah bawmtu ding ah Bawipa nih a ka thlah tiah na ruah ahcun, na ruah bantuk tein va bawm ko hna. Na kut na samhmi te le na ke kar khat na hlanmi te kha, Bawipa caah rian na tuan asi. Midang caah lawmhtertu, zaang damtertu, thanuamtertu, damtertu le an i tinhmi tlamtlintertu si ding cu Bawipa duhmi rian asi.

Jesuh zong Judah ram i a tlawnlen lio ah khan, amah a herhmi zawnte ah a va chuak tawn. Jerusalem i aa chawh tik zongah amah a herh taktakmi hna, mitcaw, kebei, thichuak, hnachet, mizeng, mi thinghmui, awkhlawh, mi sifak le mi damlo hna sin ah, a va chuak duk theu tawn. Cuka ahcun thil khuaruahhar (miracle) a va tuah tawn. Nangmah le keimah zong hi, midang caah Pathian nih miracle chuahtertu ah a kan hman khawh ve timi ruah a herh.

Kan Bawipa Jesuh Krih zong a pa nih, midang caah bawmtu si ding in a thlah tawn bantuk in, nang le kei zong hi, amah fapa caan aiah midang ca riantuantu le bawmtu si ding in a kan thlah ve tawn. Cucaah Bawmh Herhmi Ca Bawmtu si ding cu, Bawipa duhnak tuah asi ko timi hi zumtu dihlak nih theihfian a herh!