Tuksapur Mandalay Thawnginn

A kum cu 1993 asi. Voikhat cu Mizoram khua pakhat ka va tlawng. Cuka khua pakhat ah Lai ngaknu dawh ngaingai, Parte, a um (Amin taktak asi lo). Ata le he an umti. Amah cu mi pumrua tha, mingo le muisam dawh ngaingai asi. A that le a tha, a fim le a fim fawn. Amah inn ahcun hawi he kan tlungti tawn. Kan tlunkal ah a kan dawt tuk.

Bia kan i ruah pah in, thawngpang ka hal. "Na ta he lawng nan um i, atu hi na nu le pa hna an nung rih maw" ka ti.

Aka lehmi cu, "Kan chungkhar tein Pu Kio Luai bu ah kan rak lut i, cozah nih ka pa an tlaih caah kan nih Mizoram ah kan zam. Ka nu cu athi cang. Ka pa cu, Mandalay Thawng ah an thlak. A thawng kan theihlonak asau tuk cang. A thih le nun zong kan thei lo. Kan sia a herh tuk ee. Kan mah zong kan thawng a kan thei ve ti lo" tiah a ti. An zumhnak le pawmmi ruangah thawng an tlakmi asi. Zei bantuk asi hmanh ah zumhnak ruang ah thawng a tlak ngamm cu, pasal rian asi ko tiah ka ruah.

Ka zoh hna ah ka zaang an fak tuk. Ka lung a tha bak lo. "Kum zeizat dah thawng nan i theih ti lo?" tiah ka ti. "1988 buai lio ah an tlaih i, atu tiang kan thei ti lo" tiah ati i, kum 4-5 cu asi cang. An tafar in ka zoh hna ah ka khuaruah an tam tuk.

Cucaah "Na pa a thih a nun hi kan hlat piak hna lai" tiah bia ka kamh. A fanu te nih "Na hmuh sual ah" tiah ati i, cakuat tawite a tial.

Voikhat cu Mandalay ah thil lak ah ka va zuang than. Mandalay Thawnginn umnak Nandwin ah cun ka va kal. Ton khawh sual ah ka ti i changreu fang kuahra  man ka cawk i, zingka tein thawnginn hmai ahcun ka va tlar ve. Ni a lin, dornak a um lo i, a harsa ngaite.

Mandalay Thawnginn hi hlanlio Mindon Min chan i an sakmi Mandalay Nan-dwin chungah a  ummi asi. Thawnginn lian taktak asi. Tlakrawh senmi a sang taktakmi in an kulh. Mandalay Thawnginn i thawngtlak hnu ahcun zamnak ding hrimhrim hi a um kho ti lo. Zeicatiah a thawng boah awk athat lo pinah Mandalay Nan-dwin an kulnak kutka vialte cu ralkap nih suimilam 24 chung an cawngh caah asi. Cupinah pe tampi a kaumi tii in an kulh rih caah, zamnak ding a um kho lo.

Ahar khunnak pakhat cu, Mandalay cu ni a lin. A lum tuk. Nandwin cu tlakrawh sang ngai in an kham caah thli a up i a kan uam ngai. Thawnginn cu tlakrawh sang taktak in a kulh chap rih. Tlakrawh cungah thirhling in an kham rih. Achung cu canphio inn a zurzur in an sakmi asi caah a linh ning cu chim awk thalo ding asi. Minung nih le an tam tuk. Naingaizi lei thawngtla zong tampi an chiahnak hna asi. Tihnung le tuksapur thawnginn ah an chiahmi pakhat asi.

Ka caan a zaat tikah ka min an van au i, changreu he cun ka va kal. A fanute cakuat cu ka changreu chungte ah hngete ngaw te in ka zual i ka sanh chih. Asinain changreu cu an samh dih i cate cu an chuah. "Hi ca hi ziah na sanh" tiah an ti i, "A fale nih biatawite an cahmi asi i nan phung ka theih lo caah ka sanh ko" tiah ka leh hna. Cai ko in an ka hro.

Minute (5) bia nan i ruah kho an ti. Mui cu thlalang chung lawng in kan i hmu kho. Telephone in chonh asi. Hna an cheh tuk caah, zeitluk thang in ka au zong ah din te lawng in a ka theih. Hmaitonh tein kan i chawn ko nain, USA le Kawlram chonh bantuk in telephone chung ahcun a hla tukmi a lo.

Bia tam ruah awk a tha lo. "Na fale an dam ko. Ka va hmuh ko hna. Cu ka khua ah an um. Na chuak ve te ko lai. Na lung dong hlah. Pathian rak bochan ko. Thla kan in campiak lengmang" ti vial lawng ka chim. Ka min le khua ka chim i, cuticun kan caan a dih. Ngaihchia ngai in ka lawi.

Cu ni cu khua ka ruat. Sungte pa ka va hmuh khawhmi cu ka lung aa lawm ngai. Zeicatiah a thih le nun zong an theih tilomi an pa ka hmuh piak khawh hna caah, ka mission a tlam a tlin caah a si. Mizoram phanh lai le thawng thanh lai zong ka ngaih ngai.

Thla tam nawn ka rauh hnu ah, Sangte umnak khua cu ka va phan than. Na pa kha ka va hmuh ko. Kan i chawn kho ko. A dam rih tiah thil sining cang vialte cu ka chimh hna. An nih zong an rak i lawm tuk ve.

Khua ka ruat. Minung hi thil fate thatnak kan i tuah piakmi nih lunglawmhnak tam tuk a rak chuahpi. Kan pa a nung ti an theih tikah, Sangte le a ta cu lunglawmhnak thanuamnak in an khat.

Mizoram zong cu ka phan kho ti lo. Mandalay Thawnginn zong ka phan kho ti lo. Kha ka va tonmi Sangte pa kha a dam rih hnga maw? Thawnginn chung in a chuak cang hnga maw? Afale he hna an i hmu cang hnga maw? Asiloah thawnginn chung hna ah a thi sual hnga maw? ti khi ka ruat theu tawn.