No News Is Good News

"Good News" ti cu Laiholh in leh ahcun, "Thawng Tha" tinak asi ko. Baibal chung "Thawngtha" (Gospel) kha chim duhmi asi lo. Chim duhmi cu, ni fatin kan theihmi thawngpang chung in thawngtha kha a chim duhmi asi.

Asi ahcun, "Good News" timi cu zeidah asi hnga? Hihi ruah awk ngai asi. Mirang nih an timi cu, "Good news timi cu thawngthang (news) theih lo khi asi ko" tian an ti. "No news is good news" tiah an ti.  Hihi ruah tikah a dik taktak. 

Zeicatiah nihin ni ah thawngthang (news) hi a tam tuk. Lairam in, Kawlram in, USA kan umnak tiang thawngpang hi chim cawk asi lo. Rel cawk asi lo. Continent (6) chung in thawngthang hi chim le rel cawk lo in a um. Pehtlaihnak (communication) a tha deuhdeuh i, thawngthang theih a fawi chin lengmang; a rang chin lengmang fawn. Acheu cu "bia an chim hlan in, cucu a chim dingmi cabia asi" tiah President biachim ding hmanh khi, theih cia khawh in aum cang. Cu tluk cun vawleicung ah thawngthang hi a rang i, a tam cang.

Asinain cu vialte thawngthang (news) vialte zoh tikah, thawngchia lawngte deuh an si. Atanglei thawngpang lawngte hi thawngthang ah theih an si khun:

"Zawtfah le mithi kong, khawnden kong, raltuk kong in, innkang meitet, tilian meisul, lamrawk, mincim, thlichia hran, mangtam, lihnin, rambuai, tapaih-hmoh, tlaihkhih le tazacuai, mithah lainawn, lamsul le khuaram rawhnak, damiah taih, cozah sipuazi tlak, hruaitu sual, hruaitu palhnak, fidi-fitlaw zumhtlaklo nunnak, nuva then, bank rawk kong le innlo cimh kong"

tibantuk lawngte theih an si. Kan news pawl hi, cu thawngpang tello in a tlam a tling kho lo. Hihi an chim duh khunmi asi i, thawngthang ngaih paoh ahcun, thawngtha theih nakin thawngchia theih hi a tam deuh zungzal. Cucaah Thawngthang (News) zatuak ah 99 cu "thawngchia" an si. Zeicatiah thawngthangmi lakah thawngtha chim cu a tlawm tuk. 

Tahchunhnak ah, US Pre. Obama nih thiltha a tuahmi hi rel cawk le chim cawk ding asi lo. Asinain Obma kong an chimmi le kan theihmi cu, "A chamhbaunak, a thatlonak, azumhnak a hmanlo timi kong, Muslim asi tiah lih an chimmi kong, Constitution kong achimmi cu ruat thei ti lo in chiathat khat umnak nawl apek hna timi kong, 666 asi timi kong le achiatnak lawngte..." theih asi. 

Cuvebantuk in Kawlram hruaitu Pre. Thein Sein te hna zong an si. Kawlam caah thil tha chim cawk lo an tuah ko nain, cu thawngtha cu thanh a um bal lo i, Tein Sein nih a tuah lo mi thawngchia lawngte hi theih asi tawn. Daw Aung San Suu Kyi zong cu hlan cu a kan hruai rih lo. Ram thlennak caah heh tiah tha kan pek i kan duh caah kan sawi rih lo. Amah sin in thawngchia kan thei rih lo. Hipin ahcun NLD an cah cang caah, mipi dunning le mipi lungtlin cu har tuk kaw, Suu Kyi sin in thawngchia deuh lawngte theih khawh asi cang. Pastor le Krihfabu chairman le Evangelist zong an thatnak nakin an chiatnak thawngchia tu hi theih deuh asi ve thiamthiam. 

Laimi kan sining tlawmte zoh u sih. Laimi cu sifak kan si caah, Laimi caahcun sifahnak thawngchia zong hi a tam duh ngai. Ramdang in telephone i chonh poah ahcun, chungkhar nih an chimmi atam deuh cu, "Kan har, kan dam lo, tangka kan ngei lo, rawl kan ngei lo; kan innlo a tet, thil man a sang tuk, midang vial cu zat an kuat hna, telephone na kan chawn lo, cucu kan herh khakha kan herh..." timi thawng hi thanh peng asi. Cu zong cu Laimi tampi caah thawngchia an si kho ve. Zeicatiah umnak ramkip ah, harsa le tirawl ei kho fangfang in a nungmi chungkhar kan rak tam tuk ve caah asi.

Cun Laimi caah thawngtha le thawngchia hi hmunkhat ah an ra duh ngaingai. Tahcnunhnak ah, "Canphio inn sak kan i tim" tiah telephone a ra hnga. Cucu thawngtha asi. Asinain a hnu ah, "Tangka ting 10 kan herh, kan chambau..." timi tu cu thawngchia asi. "Na farnu kha an puak le an i nuam tuk" timi cu "a herh tuk lemlo mi thawngtha" asi. Asinain, "Caw le vok kan that le ting 20 kan dih le nanmah kan in bochan ko hna" timi cu thawngchia taktak asi. 

Thihnak kongah, Laimi hi alettalam ummmi miphun kan si caah, thihnak kong ah thawngtha le thawngchia hi an ra duh ngaingai. "Ka pa lung ka donh" timi cu thawngtha asi nain, "Sia le vok ka thah le ting 15 ka dih le nanmah bochan in ka tuahmi asi" timi cu, thih hnu thirual awih asi le aherh tuk ti lo mi thil tuahnak thawngchia asi. Nun lio ah, glucose dur khat hmanh cawk piak duh tung lo in, thih hnu ahcun, "Ka nu le pa thlan ka siam hna le ting 15 kan dih" timi cu thawngtha lakah thawngchia taktak asi. "Laimi cu thih hnu ah thilri cawk piak hmangmi miphun kan si." Cu lawng silo in, "Anungmi ca nakin  athimi ca a ruat deuhmi miphun kan si." Hi thawngchia hi Lairam ah a tam tuk. Hihi miphun tumchuknak nunphung pakhat asi. "Hawi ka hgnar ve le motor cycle ka cawk" timi cu thawngtha asi. "A remhnak le datsi rawnnak ka ngei lo ve na va ka arin ahau" timi cu thawngchia taktak asi than. 

Cucaah minung nih thawngpang kan thehimi tam deuh paoh cu, thawngchia deuh lawngte an si. Thawngtha kan theihmi cheukhat cu thawngchia an ra ti than hawi. Cucaah kan theihmi thawngthang tam deuh poah cu, Thawngtha a um bal lo. Zeicatiah thawngtha nih cun lunglawmhnak lengmang a chuahpi i, lunglawmhlonak tlawmte aa telmi thawngthang paoh cu, "thawngchia cazin ah aa tel." 

Cucaahcun, Laitlang le Kawlram lei in siseh, na umnak ram lila chung in siseh, na Krihfabu le pawngkam in siseh, zeihmanh thawngpang na theih lo ahcun, va lawm ko. Na tha va nuam ko. Na hna va ngam ko. Lungdai tein va um ko. 

Zeicatiah "No news is good news" ti pei asi fam cu!!!