Lairam Ah Choir Saubik A Hruaimi

Krihfa biaknak le hla hi aa then kho lo. Zeidang biaknak cu hla a that lo zongah nunphung bantuk in an kal caah, an tluang ko. Krihfa biaknak cu hla he aa tlaih peng caah, hla a that lo le hlasak hlawp a tlo lo ahcun, a nuam kho ti lo. Cucaah Krihfa biaknak ahcun hla hi a biapi taktak. Krihfabu ah abik in "choir" athat ahcun, pumhkhawmh a nuam i, minung thinlung aa hliphlau.

Mizoram hi Krihfa ram kan ti nain, khuate ahcun choir a um kho tuk ti lo. Aruang cu buu a tam tuk caah asi. Aizawl, Lunglei, Lawngtlai tibantuk i Krihfabu lianmi lawngah choir an um kho i, khuate ahcun Laitlang bantuk in choir remh hi a um kho lo ti tluk asi ko. Cucaah Mizoram khuate pumh khi, a hlunghlai lo ngai tawn. Lairam ahcun khuate zongah mah le sining tawk tein hlacawn le choir sak a um ngai rih caah, kan i pumhnak a nuam ngaingai rih. Hi bantuk in Lairam khuate zongah choir tete kan ngeih khawhnak hi, choir hruaitu hna ruangah a hrampi cu asi.

Kawlram le Mizoram ah a kenkip ka tlawng. Hla hruaitu tampi ka hmuh tawn hna. Thantlang, Hakha, Kalaymyo, Mandalay, Yangon le USA khua tampi ah ka hmuhton hna. Hla hruaitu tam deuh cu, thlahlawh pekmi an si hna lo. An tha le a baa taktak fawn. An fimnak, an caan, an thazaang an chuahmi a tlawm lo. An mah tello in cun Krihfabu hi atluang kho bak lo. Hma a kal kho lo. Cu tluk in Krihfabu ah hla a biapit tuk caah, hlahruai zong an biapi tuk ve.

Krihfabu i hla hruaitu pawl kong hi ka ruat tawn. Lairam ah minthang tampi an um. Amin a thang lo nain, solfa a thiam taktak i, kum tam taktak hla a hruaimi minung pakhat kong hi tial ka duh. Cucu peng chung ahcun  athang lo nain tlang ahcun a thang mi pa a si.

1965 ah ka chuak i, tu kum hi k.50 ka tlin kum asi. Minung ka si ka theihka tein Thau khua ah solfa a rak chim tawn i, hla a rak hruai tawnmi cu Pu Van Ling asi. Midang nih tlawmte an van chawn caan zong cu a um ve nain, abuak tlak cun Thau Baptist Choir a kan hruaitu a rak si peng. Hitin tuak tikah, hla a hruainak hi kum 50 leng akai cang lai. Cucaah ka ruah tikah, Lairam ah choir hruaitu sau bik a tuanmi asi men lai tiah ka ruat.

Pu Van Ling cu hlahruaitu ka hmuhmi lakah ka khuaruah a har cemmi pa asi. A tefa an tam ngai. Tefa zeizat dah a ngeih ka thei ti lo. A fanu pakhat cu Ni Khun asi i, Thau ahcun hlasak thiam ngaingai asi.

Pu Van Ling nih Thau Baptist Choir asakpi lio hna (Photo: Pu No Thawng)

Pu Van Ling cu mi sifak ngai asi ko nain, Krihfabu caah aa pumpe taktak. Hlahruai lei ah Pathian nih "laksawng" apek bak ve tiah ka ruah.  An har bu le an dam lo bu te zong in, Thau khua solfa an thiamnak ding caah le Krihfabu hla an thiamnak hnga ding caah, kum tam tuk hruaitu asi.

Amah cu solfa a thiam. A aw a tha. Hla cawn le hlasak a huam. Ahuam zong a huam. Alung a sau taktak. Ngaknu tlangval hlacawngmi cungah dawtnak le duhsaknak a ngei. Ngakcia ngai asimi, atu le fale chan tiang in, hla a chimh huam hna. Ngakchia mino taktak sin zongah aa nuam kho. Cucu ka upat cemnak asi. Ngakchia mino hlacawng ka tete zong, biatak tein bia a ruah khawh hna. Lungsau taktak in hla a kan chim kho. Zeitluk in, mi kan nen zongah a kan in ko. Alungsaunak khuaruahhar asi. A caan ahcun hla kan thiam lo tuk caan ah, a ing a puan caan zong aum ve. "Nan i biatak lo; nan duh taktak lo" tiah a rak kan sik tawn. A caan ahcun a baa taktak tawn.

Xmas lai le Kum Thar lai tibantuk ahcun, a thla in hla a kan cawnpi. Zarh tha lai ahcun, zan chiar peh in hla a cawnpi khawh hna. Cu ko cu ka khuaruah a har. Riantuan thabat bu cun hlacawn a rak fawi lo nain, zanchiar a rak kan chimh khawh. Krihfabu caah aa pe kho taktak. Atu cu kum 68 fai hrawng asi cang men lai. Atu tiang hla a hruai ko rih tiah an ti. Ka khuaruah a har.

Pu Van Ling kong ruah tikah, "Solfa lei ahcun jubilee tuah piak aphu" tiah ka ti tawn. Thau ah um ning law cu, "Hlalei Jubilee" kan tuah piak hnga tiah ka ti tawn. Xmas le Kum Thar a phak lai poah ahcun, Pu Van Ling hi ngaih a um tuk. Mitthlam ah a cuang tuk.

Amah nih hin Thau khua ah solfa a kan chimh i, a cheu cu solfa thiam tete zong an chuak hna. Cu hna lak ahcun Pu Nun Hre, Pu Chan Hngak le Tleicia Pu Thang Bawi hna an si. Hihi kan mah chan ah solfa a thiam pawl an si. Pu Chan Hngak cu atu Germany ah a um cang i, amah hi hla zong tam ngaite a phuahmi asi. A hla phuahmi hi, Hakha-Thantlang hna zongah an sak len tawnmi an si.

Italy phungtluk ah, "Hla a sami cu an lungre a thei lo" ti asi. Lungre a theilomi cu an nun khua a sau an ti bang, Pu Van Ling zong hi hlasak a huam caah le hla lei ah thawtnak a ngeih caah, a nunkhua a sau ngai. 1996 khua ka um lio ahcun, mino sin ah aa tel kho rih. USA ka umnak hmanh kum 18 asi ve cang. Atu tiang Pu Van Ling cu Thau ah "Thau Baptist Krihfabu Choir" a hruai rih hna ti ka theih i, lunglawmhnak in ka khat.

Pu Van Ling bantuk hi, Thau khua ah an chuak ti hnga maw ti ka ruat. Cathiam sang asi lo; phungchim thiam asi lo; mirum zong asi lo; mi tthawng zong asi lo nain, Thau khua Krihfami kan caah, tambik tluachuah a kan phurhtu pasaltha pakhat a si. Pathian nih solfa, hla hruai huamnak le hla thiamnak hna hi, laksawng a pek bak ve mi a si. A lung a sau ning zong khuaruah har asi. Amah bantuk in solfa thiammi le hlahruai huammi hi, Thau khua hrawnghrang ahcun kan chan chungah an chuah ti lai ka zum lo. 

Pu Van Ling chuahnak khua "Thau"

Pathian nih Thaumi hi thluachuah a kan pekmi vialte lakah, Pu Van Ling bantuk in solfa thiammi le hlahruai huammi a rak kan pekmi zong, kan thluachuah lian taktak asi tiah ka ruat tawn. Pu Van Ling nih Thau a dawtnak hi, Thau khuami nih kan cham kho lai lo. A dawtnak hi zeitik hmanh ah kan philh kho ti lai lo. Thau khua Krihfabu kong kan chim fate, Pu Van Ling kong hi, chim a dai ti lai lo. Zeicatiah Thau Krihfabu tuanbia le Pu Van Ling hi then awk an tha ti lo.

Thaumi nih a kan dawtnak kan cham kho lai lo. Bawipa Pathian tu nih techin fapar chan tiang in thluachuah pe ko seh ti hi, ka thlacamnak asi tawn.

------------------
Chinchiah:

Hi capar hin Thau ah hla saubik ahruaimi Pu Van Ling upat hmaizahnak ka pek. Pathian nih thluachuah phunzakip le damnak le nun khuasaunak pe ko seh. Amen.