Kawlram Border Trade Camp le Miphun Thanchonak

Ram pakhat thanchonak caah, ramdang he sipuazi pehtlaihnak ngeih hi a biapi taktakmi thil asi. Ramdang he cawk-zawrhnak ngeih lo ahcun ram pakhat thanchonak a har taktak. Ram thangcho seh ti duh ahcun, ramdang he lamsul thatha ser le cawk-zawrhnak ah pehtlaihnak fek taktak ngeih a herh.

Ram khat le khat pehtlaihnak zoh tikah, tilawng, tlanglawng, vanlawng le motor lam in pehtlaihnak ngeih asi. Vawleicung ramkip dirhmun zoh tikah, zeitluk ram thangcho zongah motor lam pehtlaihnak hi a cak bikmi asi. Zeicatiah motor lam cu cawh a fawi. Lam hmemi zong ah motor hmemi a kal kho. Lam a din lo le aa ngerhnguai, a chukcho le a bingbo zongah motor a kal kho. Cucaah motor lam pehtlaihnak ngeih hi a biapi bikmi le a cak bikmi pehtlaihnak asi.

Kawlram cozah hi, Ne Win chan ahcun, border trade camp hi tam a rak tuah lo. "Close door policy" an rak hman caah, an rak i kilh tuk caah asi. Ramri sau taktak asimi India le Kawlram karah hmanh ah, hmun hnih- Mawre-Tamu le Hukong Valley- lawng ah border trade camp an rak tuah. Tuluk he cun Sweli ah pehtlaihnak an rak tuah. Thailand he cun Tachilate le Mesoh le Kawhtaung lawngah a rak um. Ralkap cozah chan ahcun tam deuh ngai an van on i, Rih te hna zong biatak tein an van hmannak asi.

NLD nih cozah caan tawite an tlaih chungah, Border Trade camp tuah hi a thatnak le biapitnak an theih caah, atu ah camp 7 on ding an timh tikah, thiltha taktak asi. Hi camp hna nih, khuachung ah thanchonak tampi a chuahpi lai. Ram le miphun thanchonak a chuahpi chih lai.

Hi trade camp thar pa sarih hna cu:-Maese, Thantlang, Paletwa, Mongla, Pansan (Wa ram), Ponpakyin (BP1) le Phaya-thonzu (Karen) hna an si. Myanmar-Loas ramri ah Kyainglat trade camp zong an on chungmi pakhat a um. Nihin ni ah, Kawlram nih hin Tuluk, Thailand, India le Bangladesh hna he ramri ah border trade camp 16 an on i rian an tuan. Atu a thar an onmi he cun, a zapite 23 asi lai tinak asi. Hi pin zongah tam chinchin on rih a herh (Nikhat caan khat ahcun Nukaitlang khua zongah border trade a um te kho ve mi asi). Hi khua hi Saisihchuak lampi cungah a um i, Bungtlang nih an tlakmi khua si.

Nukaitlang Khua

Hi bantuk on an timhmi a ruang cu ramri thilri cawknak karhter ding, cinthlak in a chuakmi eidin le thilri zorhnak le sehzung chuakmi thilri pawl i zuarhnak ding caa si. Hihi cozah nih an tuahmi National Comprehensive Development Plan (NCDP) hruainak tangah an chiahmi asi.

Hi ramri trade ruangah Kawlram cozah nih tangka tampi a hmuh i, April 1 in May 27 tiangah, US $819 million an hmuh ti asi. Kum khat chung ahcun tam tuk an hmuh cang.

Hi border trade camp hna Thantlang le Paletwa i an tuah khawh taktak ahcun, Lairam caah thanchonak ngaingai an si ve te ko lai tiah ruahchannak aum. Rih i Border Trade camp an tuahmi hmanh nih, Lairam caah thanchonak tam tuk a chuahpi i, atu Thantlang le Paletwa i tuah an timhmi hi, kan miphun caah thiltha taktak asi. NLD cozah cung zongah kan i lawmh awk ngaingai asi. An riantuannak ah mipi caah thil tha ngaingai an tuahmi asi.

Thantlang le Paletwa hmanh ah, cozah riantuan a tlawmbik ah 10-15 an i chap kho i, cu an thlahlawh in khua chung tangka lut dingmi hmanh hi, million lengmang asi cang lai. Zeidang sipuazi in lei a miakmi pin ah, cozah riantuantu an karhmi zong, ram thanchonak caah a thahnem ngaingai i, lunglawmh awk ngai asi. Hi hmun hnih i trade camp ruangah, Lairam sipuazi zong dot khat cu a van i thawn ve lai timi ruahchannak a um.