Adolf Hitler Hi Krihfa Taktak Asi Maw?

Hitler zong thla a cam ve ko dah kaw?

Pathian hi "Hngawng cung le kaa lawngah um khawh ngai asi. Biaknak zong hi, thinlung ah nunpi taktak tunglo in, a lengphawthual in a tuah in tuah le a tanh in tanh khawh asi. Jesuh Krih kan zumhnak zong hi, thinlung chungmuru ah nung tung lo in, hngawngcung le hmur lawng ah  aum khomi asi. Kan thinlung ah um lem lo in, kutke le cawlcanghnak lawng zong in langhter khawh asi."

Vawleicung liamchia tuanbia zoh tikah, hruaitu politician tampi nih biaknak le Pathian hi an lamtluannak le luatnak ah an rak hman tawn. Ataktak an nunnak ahcun biaknak le Pathian hi an thinlung le tuahsernak ah a rak um bak lo.

Vawleicung mi sualbik pakhat ah ruahmi, Adolf Hitler hmanh hi, "thlacam tiphul a rak thiam tuk. Bia a chim fate, "Pathian timi bia hi voi tampi a chim theu. Asinain a lungchung in a pawimi alungput le tuahsernak cu phun dangpi asi. A thlacam, tiphul le biachim zoh ahcun, "Krihfa zumtu tha" ti lo awk a tha lo. Ram le miphun kong a chim fate, Pathian min a hman peng. Uktu a sinak ah Pathian a rak bochan tuk mi a lo. Ahmurka ah Pathian timi bia cu an rak cat ruam lo.

Asinain a tuahsernak zoh tik ahcun, "Pathian hi  kaa te lawng ah a rak um." A nunnak le tuahsernak ah pakhat hmanh Patian tihzahnak le upatnak a rak um lo. Judah mi a tuahto ning hna, a hrem ning hna le a thahnawn ning hna cu, tuksapur taktak asi. "Tuphaw aa khuhmi cinghngia" timi cu Hitler hi a rak si ko. A sualnak hi, degree in tah ahcun tah khawh ding asi lo. Cu tluk misual pa zong nih cun, "Pathian Pathian" tiah thlacam tiphul cu a thiam taktak.

Hitler zong hi thluachuah an rak pek ve ko

Hitler hi zeitluk in dah Pathian aa bochan le thlacam a thiam timi cu atanglei a thlacammmi biafang zoh in theih khawh asi:

"Atu suimilam caan thengte ah, Bawipa Pathian kha hi thil pakhat lawng hi ka hal: a zungral in thiltha kan tuah khawhnak hnga ding ca le kan riantuanmi hi Amah nih thluachuah a kan peknak hnga hi asi. Pathian nih a sermi minung kan si bantuk in, zeidang nakin a Liannganmi (Pathian) duhnak in nun ding hi a herh bik tiah ka ruah. Pathian nawlpeknak lo in, azei bantuk minung hmanh nih vawlei tuanbia hi an mersan kho lai lo i, minung a thawnnak cu Pathian khuakhannak lawnglawng in a si"

Hi bia hi Germany uktu Chancellor a rak si lio i a chimmi bia asi. A bia hi a mak tuk. Bia thuk taktak le Pathian bochannak bia taktak asi. Cu a chimmi bia ahcun, "inn pa dawt ding, mizaw le sifak zohkhenh ding, ramchung buaibainak kha doh ding" ti hi a rak chimmi asi. Hi bia hna hi, Krihfa tampi nih kan chim bikmi an si nain, kan tuah lem lomi an si tawn.

A rak chim rihmi cu, "Pathian sunparnak hi ka langhter than lai" tiah a rak ti. Cun "Ka tuahmi thil hna hi Aliannganmi Sertu (Pathian) hnatlaknak in ka tuahmi an si tiah ka zumh ko" tiah a rak ti rih.

Hitler nih a caancaan ah a chim tawnmi cu, "Jesuh zultu ka si" tiah a rak ti ve theu tawn. Micheu khat nih cun, Holocaust timi Judahmi tampi a thahmi hna zong hi, Krihfa hna min ruangah a thahmi asi tiah an pawm ko rih.

Hitler hi a ngakchiat lio ahcun Catholic Church ah tipil ingmi asi. Pulpit cung zongah a rak kai ve lengmang. Caan caan khat cu "tlangbawi" si zong a rak duh balmi asi. Asinain a nunnak zoh tik ah a hnu ahcun, "church member le Krihfa taktak sinak cu a rak i dang" timi kha hmuh khawh asi. Church member pakhat si khi, Krihfa taktak sinak a rak si lem lo timi kha, Hitler nunnak nih a langhter ko.

Hitler hi a thinlung a rak zer. Zeicatiah Krihfa hi a ka phahle tein a rak komh hna. Krihfa he lungrual tein kan dirti ko timi langhternak caah Nazi-Vatican Concordat timi biakamnak zong 1933 ah an rak tuah.

         "Cu biakamnak ah an tialmi cu, Catholic Church nih politics ah Adolf                   Hitler kha kan tanpi lai i, zalawng tein Pathian biaknak kha Hitler nih                 nawl a pek hna lai" ti asi.

1933 lio ahcun Hitler nih, Krihfa an thatnak kong hi tampi a chim i, "Pathian a um lo timi zumhnak hi ka huat tuk i, cu bantuk a zummi hna cu ramchung in ka hloh dih hna lai" tiah a rak ti. A taktak ahcun Hitler hi "Tuuphaw aa khuhmi cinghngia asi i, aphaw aa khuhmi cu Catholic Biaknak kha asi" tiah Comfort timi pa nih ati.

Hitler hi a lengphaw in Krihfa asinain a chung muru cu Jews lawng a huami silo in Krihfa zong ahuami asi thiamthiam. Asinain Krihfa nih dirpi lo ahcun a cak kho ding asi lo caah, a lengphawthual in Krihfa tha ngai aa lawhter. Tuanbia ah kan hmuhmi cu, Hitler nih Krihfa zong a rak hrawh taktak ko hna ti hi asi.

Hitler Minobu hruaitu Baldur von Schirach nih  Hitler party asimi, "National socialist movement nih aa tinhmi pakhat cu Krihfa pawl hi hrawh hi asi" a ti.

NAZi hruaitu le Hitler chungmuru dirkamhpitu Alfred Rosenberg  nih 1938 Congress meeting ah a rak chimmi cu, "Catholic le Protestant Krihfa pawl kan miphun lak in hrawh ding hi, kan Fuhrer aiawh in siseh, keimah ka thinlung tak tein siseh, kan i timhmi asi ko ti kha ka fiang ko" tiah arak ti.

1933 ah Germany sipuazi cu a rawk tuk. Minung zatuak ah 30% cu rian an ngei lo. Hi lio caan ah, Hitler nih "German hi atu lio ah, khamhtu a herh. Cucaah keimah hi Germany khamh khotu ka si" tiah amah tein bia a  khiak. Germany khamhtu ah aa hmu.

Hitler cu a thawn chin lengmang tikah, biaknak kha a ngaithiam duh ti hna lo. Cucaah Krihfa biaknak aiawh ah, "Reich Church" timi biaknak a ser i, cu biaknak ahcun "pathian a um ti lo i, Hitler kha pathian aiawh ah ruah asi."

Christopher Newport University i history Prof. Dr. Anthony Santoro nih, "Caan tlawmpal hnu ahcun, Hitler nih hin Hitler ah zumhnak le hngatchannak a ngei tiah ka ruah" tiah a ti. "Hitler nih Krihfami nih an fih bikmi Jesuh dohtu (anti-christ) system hi a rak ser ko" tiah Comfort nih ati ve. Nazis chungtel pawl nih, an Hruaitu (Fuhrer) cu Germany Messiah ah an rak ruah i an i nuam tuk ti asi.

Nazi tadinca Der Sturmer timi catialtu, Julius Streicher nih, "Thil hmun khat maw hmun hnih dah ti lo ahcun, Hitler le Jesuh hi i tluk tein epchun khawh ding in an rak um. Zeicatiah Hitler cu a lianngan tuk i minung a hme tukmi he epchun ding tlak a rak si lo" tiah a rak ti.

Hitler kong ruahnak phuangtu Joseph Goebbels nih, "Kan Fuhrer hi cu, Pathian thutdan le minung karah pehtlaihnak tuahtu asi. Fuhrer nih a chimmi biaknak paoh paoh cu, a sang bikmi biaknak a si zungzal" tiah ati.

Cucaah Hitler nih a sermi biaknak "National Reich Church" nih a biapi taktakmi tinhmi thil 30 a rak ngei i, cucu The New York Times ah 1942 ah an rak chuah. Cu an phungah a biapi taktak in an ruahmi cu:

1. Zeibantuk pastor, chaplains le priests zong nih biakinn ah bia chim khawh asi lai lo. National Reich biachimtu lawng chim khawh asi lai.

2. Bible vialte le mithianghlim hmanthlak vialte biakinn pulpit in nan thianh dih lai i, Mein Kampf timi cauk lawng nan chiah lai.

3. Vailamtah vialte zong thial dih i, Nazi tazaih "swastika" in thlen ding

4. Reich Church phungbia ah hin bible he ralkah taktak in phung an ser hna.

Hitler nih hin tuan deuh ahcun bible cherhchan in bia a rak chim lengmang nain, 1942 cun bible hi Judah mi "phan cawpmi tuanbia asi" a rak ti i, Germany ram chung dihlak ah an rak kham. Bible cu khammi cauk pakhat ah a chuah.

Hitler cu a ka cun Pathian Pathian ati i, a tuahsernak ahcun bible hmanh a huami asi. Cucaah Comfort nih, "Hitler nih hin Bible a huat ee" tiah a ti. "Amah (Hitler) nih hin amah nih a tuah chawmmi bible uk 100,000 a ngei i, cucu nihin ni tiang in khawnmaw ka ahcun a um rih nain, Hitler riantuannak a thei i a duhlomi hna nih tam deuh cu an hrawh cang hna" tiah Comfort nih ati.

Hitler bible cauk ahcun, Hebrew holh in an tialnak "hallelujah" timi zawn paoh kha an hlawt. Nawlbia Pahra zong an hlawt i, amah nih Nawlbia Pahra hitin a tial chawm:

* Na thi thianter law, upatnak na ngeihmi cu thianhlimter
* Na pupa hna rothil kha zohkhenh law karhter
* Pumpeknak le riantuannak in mipi caah nuam tein riantuan
*Na Fuhrer le na Bawi kha upat

Hitle nih hin Bawipa thlacamnak zong amah tein a tial i, Hitler mino paoh kha a chimter tawn hna:

Adolf Hitler, nangmah cu a liannganmi Fuher na si.
Na min nih kan ral hna kha therphang in a umter hna.
Nangmah i a Pathumnak Reich kha tlung cang ko seh.
Nangmah na duhnak lawng kha, hi vawleicungah phungbia asi.
Nifatin tein na aw thei ko u sih law, na hruainak in nawl kan pe ko sawh
          cuticun a dongh tiang na nawl kan zulh lai, kan Nunnak in nangmah kan in           thangthat lai
Pathian pekmi, Fuhrer lakah Fuhrer..., Hitler cu hlorh in um ko seh.
Ka nunnnak saupi in ka humhawk le ka veng ko sawh.
Nangmah nih Germany kha a herh tuk lio ah na khamh.
Ni fatinte changreu na ka pek caah kai lawm.
Ka sinah saupi um zungzal ko; ka kaltak hlah...
Fuhrer lakah ka Fuhrer bik..ka zumhnak, ka ceunak ka Fuhrer..
Hitler cu hlorh in um ko seh.

Hitler nih hin, amah le Krihfabu zong a ngei; amah bible zong  angei; amah hla cauk zong angei i, cucu Germany ah nichiar tein an rak sak. Cu hla cu hitin asi:

"Adolf Hitler cu kan khamhtu asi, kan pasaltha asi. Amah cu hi vawleicung dihlak ah a thianghlim bik mi pa asi. Hitler caah kan nung...Hitler caah kan thi...Kan Hitler hi kan Bawipa asi...amah cu vawlei thar raltha taktak in a uktu asi."

The Third Reich lio in Hitler bia chim lio

Hitin thil a tuah dih hnu ah, Hitler nih hin amah Reich Biaknak (national religion) zong a ser than. Cu biaknak a sermi cu zeidang biaknak nih an teinak hnga lo, zeidang biaknak paoh kha hrawh aa zuam. Cuticun Judahmi hna a thah hna. Cu a thahnak kong cu tampi theih asi cang. Asinain "Final Solution" timi "Adonghnak Timhmi" ahcun, Krihfa pawl hloh ding a rak i timh nain, cu kong cu kum 60 chung, a hohmanh nih an rak thei lo.

2002 ah Jews upadi siangngakchia pakhat nih cahmai 120 a ummi, 1940 lio i report an rak tuahmi kha a hmuh. Cu report ca cu OSS timi American thoh-hlanzi bu pakhat nih Ralpi Pahnih lio ah an rak tialmi asi. Cu Report cu "The Nazi Master Plan: The Persecution of the Christian Churches" ti asi. Cu ca ahcun, Germany ram chungah Krihfa pawl duhsah tein hrawh ding tling tein hitin an tial:

* Krihfabu chungtel a simi, Nazi party dirkamhtu hmang in Krihfabu lak ding
* Krihfa hruaitu paohpaoh kha an rian phuah, thawngtlak le thah ding.
*Chungtel kha cawnpiak i an pawmning thlenter ding
* Germany Third Reich timi zumhnak thar ngeihter ding

Hi lio caan ah, Germany ram Krihfa hi an rak cawl ngam bak lo. Zeicatiah Hitler kha an tih tuk caah asi. Krihfa mi tlawmte lawng nih Hitler biaknak thar Reich Church cu an rak doh. "Confessing Church" tiah aa timi minung 3,000 Hitler cu langhngan bak in an rak doh. Cu an doh ruangah a man a cawi ve.

Hitler nih athahmi Judah mi ruak cheukhat

Hitler nih aa thawh i, "Hi mawh phurmi pastor hna hi, a hlan ah an rak ruah le zumh ballomi, cozah thawnnak hi ka theihter hna lai. Tihnung an sinak tlawmte lunghrin ding ka hmuh zongah, ka kah dih hna lai" tiah a rak ti. Cucaah Confessing Church i pastor 700 tluk cu an tlaih hna i, thawng an thlak hna, a cheu an thah hna asiloah hrennak camp (concentration camp) timi ah an chiah hna.

Hitler Pary dohtu le Hitler thahnak ding tiang in khuakhangtu le Confessing Church dirhtu pakhat Lutheran pastor minthang, Dietrich Bonhoefer zong hi an tlaih i, April 9, 1945 ah Concentration Camp ah a thi. Hi chan lio i, Hitler doh cu hibantuk in dongh a rak si caah, an doh ngam lo. Tih  arak nung tuk.

Nazi Party dohtu Dietrict Bonhoefer

 Hitler nih hin, "Jesuh hi Pathian fapa asi i, vawlei Khamhtu asi" timi zawn te hi a duh bak lo. Cuka zawnte ah amah tu kha Jesuh bantuk dirhmun ah aa chia i, Germany khamhtu ah aa chia. A caancaan ahcun, Jesuh kong hi a chim ve lengmang nain, Bible nih a chimmi Jesuh kha cu asi lo.

Tahchunhnak ah, Jesuh hi Judahmi asi timi, Hitler nih cun a pawm lo ti asi. Bible Jesuh hi zeihmanh ah a rello ti asi. Luke nih Jesuh chuakhehnak kong, David hrinsor a sinak le Bible nih Jesuh kong ah Judahmi asinak a langhter mi vialte a pawm duh lo i, amah nih Jesuh cu cu bantuk, kha bantuk asi tiah a ti cawpmi tu hi, an rak pawm ti asi.

Hitler nih a phuahcawpmi ahcun, Jesuh hi "Aryan ci-thlah chungchuak asi" tiah a ti. Cu Aryan pawl cu "The Nazarene" an si ti zong ah ati i, cu hna cu "Judahmi i an ral nganbik pakhat an rak si."

Hitler nih hin, Jesuh hi Pathian sinak a ngei timi a pawm bak lo. Germany minung kha amah tu hi pathian bantuk in biak ding a rak hnek hna. Cucaah Krihfa pastor tam nawnpi a rak thah hna asilole thawng a rak thlak hna i, cuticun Krihfabu hrawh ding hi a rak i zuam.

1 John 4:3,8,18 nih a kan cawnpiakmi cu hitin asi.

"Mi pakhatkhat nih prophet ka si aa ti tung i, Jesuh kong ah biatak kha a cohlan tung lo ahcun, amah cu Pathian sin in a ra mi asi lai lo. Cu bantuk minung hna an thlarau cu "Krih-dotu" (anti-Christ) tu an si. Ahohmanh a minung hawi a daw lo mi cu Pathian a daw kho lo, zeizatiah Pathian cu dawtnak asi caah. Dawtnak timi ahcun tihphannak a um lo, asinain dawtnak taktak nih cun tihphannak a lohter" ti asi.

Cucaah Hitler asining, tuanbia, a tuahsernak chiakha vailte zoh tik ah le, Bible chung i Jesuh a pawmlomi le Jesuh hi Judahmi asi i, Pathian fapa zong asi timi a pawmlomi nih, Hitler hi Krihfa taktak asi lo timi a langhter. Krihfa ka si tiah va ti hmanh sehlaw, Krihfa taktak le Krihfa tha cu asi kho hrimhrim lo timi kha, a tuanbia zoh tikah theih khawh asi.

---------------------------------------------------------------------
Chinchiah

1. Fuhrer timi cu German holh asi i, Laiholh cun hruaitu tinak khan asi.

2. Mein Kampf timi cu German holh asi i, "Ka Cawlcanghnak" (My Struggle) timi asi. Hitler nih Hmailei Germany ca i a  ruahmi le aa tinhmi thil kong an tialnak ca asi. National Socialist hruaitu Adolf Hitler tuanbia a si. Volume I cu 1925 ah an chuah i, Volume II cu 1926 ah an chuah.

3. National Reich Church timi cu "The German Evangelical Church" tinak asi i, National Socialist ruahnak he aa tlak in hruaimi le cawnpiaknak Krihfabu asi. Cozah dirpimi Krihfabu asi.

4. Hi a cunglei capar hi atanglei online capar zoh chih in tialmi asi.

http://www.cbn.com/700club/features/churchhistory/godandhitler