Vawlei Pa Zeizat Dah Aum?

Hlan ahcun, Nika hi aa mer i a tlami ah ruah a rak si.Vawlei tu hi Nika nih a hel tiah an rak ruah. Vawlei zong a permi le rili cungah aa vuanmi bantuk ruah asi. Asinain minung fimnak a thang i, tu chun ni ahcun, Nika kuakap hrawng i aa helmi Solar System timi pakhat chung te lawng hmanh hi, khuaruahhar in theih cawk lo ding thil in a rak khat timi kha an hmuh cang.

Solar System ah Nika umtuning cu hitin asi:-

Nika Kum                                         : 4.6 billion (4,600,000,000 kum)
Nika Helmi Vawlei                           : 8
Nika Helmi Dwaft (Khuvai) vawlei : 5
Nika ngeihmi thlapa                          : 181
Nika helmi lungtumzuang                 : 552,894
Nika kam um Comets (mei ngei arfi): 3,083
An i helnak area a dinnak in a kauh   : 11.65 trillion meng (1 tri=1000 billion)  

Thau i sianginn kan kai lio ah, science le geography kong a kan chimhmi ka philh kho bal lo. Kan Sayapa nih a rak kan chimh tawnmi cu, "Hi zeizongvialte (universe) ah hin, vawlei 9 a um" tiah a rak kan chimh. Cu cawnpiaknak cu college kan kai dih, 1991 tiang ah a dik in ruah asi.

Nika a helmi vawlei hna

Asinain fimnak, thiamnak, ngalhnak a thang. Huble Telescope an van ser i, vancung thil an hmuh ballomi thil tam tuk a van hmuh hna. Durbing lianlian an van ser hna i, nihin ni ahcun, vancung ah vawlei thar tam ngaite an hmuh. Cu vawlei hna cu "Planet" ah kan chia lai maw chia lo timi belte mifim tampi an i el tawn. A ruang tampi an chim. Vawlei timi ah chiahnak ding caah, a herhmi pakhat cu cu vawlei nih thlapa (moon) aa ngeih a herh ti asi.

Kepler durbing van i aa hel lio

NASA nih 2009 in Kepler Mission timi in vancung ummi thil tampi hlathlainak an tuah. Hi Kepler hi cu durbing tha taktak an bunhmi asi caah, cu hlan an hmuh khawhlomi vancung thil fatete zong tampi a hmu kho tu asi. Kepler telescope nih vawlei thar 1,284 a hmuh chap. Hi chungah 9 cu nunnak um khawhnak hmun (habitable zone) ah an um i, 550 cu lung in aa sermi vawlei an si tiah an ti.

Hi acunglei vawlei pin ah adang vawlei dang 1,327 a um kho rih men lai tiah an ti. Hi chungah 707 cu vawlei taktak si dawh an si lo ti asi. Kepler riantuannak hi 2017 ah a dong lai. Kepler nih aa tinhmi cu, "Hi kan vawlei pinlei ah nunnak aum ti hnga maw?" timi kawl hi asi.

Khuaruahhar thil asimi cu, 1988 hnu in thil a phunphun hmang in vawlei dang an kawl i, July 2, 2016 tiang ah hin, vawlei (planet) timi hi 3,443 an hmuh cang. Hi hna hi, "vawlei an i butnak" (planery system) hmun 2,571 a ummi lakah an hmuhmi hna an si.

Kepler nih a hmuhmi thilri hna zohchun in, kan mah Vankuai (Milkyway) pakhat lawng ah hin, lung in aa sermi vawlei tia asimi vawlei le Nika-bantuk asimi Arfi le Khuvai (Drwarf) phun hi billion 40 tluk a um lai tiah, NASA scientist pawl nih 2013 ah an chim. Cucaah kan Zeizongte (Universe) hi khuaruahthar taktak hmunhma pakhat asi ko timi kha, Kepler nih a langhter. Kepler nih hi kan Zeizongte (universe) hi theih aa zuam nain, theih ding tu a tam chin lengmang nak tu kha a langhgter!!

Kepler durbing nih a hmuhmi vancung hmanthlak

"Bawipa Pathian na tuahmi thil vialte hi ka ruah tikah  ka lung nih a phan lo" timi kha a donghnak cu a si lengmang ko.