Chinland Club Columbus Tlawnnak

Kan ram le miphun Kawl cozah kut in khamhnak caah, mi pakhat asiloah mibu pakhat riantuannak lawng a zaa lo. Mipi kan zapi tein-biaknak le vawleilei komh in-artlang in dir le tanrual a herh. Pastor thawk in, Krihfabu hruaitu dihlak, Evangelist le CNF tiang in kan i bawmh le tanrual lawngah, kan ram le miphun himbawm tein kan kilven khawh ding a si. Cu lo ahcun kan ram le miphun hi, Kawl cozah kut in kan him lai lo.

Cucu a fiang tukmi a si caah, ram le miphun caah chungkhar nupi fate kaltak in, Columbus ummi Lai miphun hawi hna tlawn awk ah, December 2 ah Indianapolis in, Chinland Club hruaitu Pu Tial Hmung le Victoria Camp ah caan sau ngai riantuantu Rev. Tluang Hre a rak kan tlawng. CNF Chairman Pu Zing Cung zong December 3 ah a a umnak Denver in Columbus a rak phan ve. Columbus i John Glenn International Airport ah Columbus upate nih kan va don.

Columbus, Ohio

Tinhmi le saduhthah mi cu Columbus ummi Laimi hna tlawn lawng silo in Chinland Club riantuannak caah mi tampi kan i tel khawhnak hnga ding caah, Columbus Chinland Club hruaitu hna nih an sawm caah zong ab a si. Columbus ummi Laimi hi Chinland Club cawlcanghnak thazaang a pe ngaimi an si. 

December 3 zan, 7:00-11:30 PM tiang, Columbus khuami 70 kuakap he biaruahnak kan ngei hna. Rev. Tluang Hre nih Victoria Camp ummi CNF hna harnak an tuarnak vialte a kan chimh tik ahcun, ngaih a chia. Lung a tha lo. Kan miphun ralkap hna harsa tuk in mipi nih kan rak chiahmi hna ruah ah, lungthin a kuai ngaingai.

A chimi cu a tampi. Amit nih a hmuh i a pumsa in a tonmi thil chim a duh lo nain chim lo awk a that lo caah, a kan chimh tikah mitthli aa hrual.....

Camp ah tirawk eidin awk an harsat ning, hnipuan hrukaih awk an harnak, nau pawimi hna an vitamin a chamhbaunak, ngakchia chuakka hna an vitamin a chamhbaunak, Tio le Lahva tikhu tangah khuachiat le that hmanh hngal in um a harnak, khua a sih tuknak kong, damlo caan i simum ei ding hmanh an ngeih lo nak, zarh khat ah coffee hrai khat hmanh an din khawh lonak; cu tluk harnak an tuar bu in CNF ralkap nih ram le miphun caah an nunnak an peknak le chungkhar hna zong nih harnak an tuarnak kong............

Hi vialte a chim tik ah, lungthin a kuai. Zeitin dah kan miphun ralkap hna le chungkhar hna kan tuah hna lai? Nang le kei nih kan Lairam le Lai miphun caah zeidah kan pek ve lai? timi a thar in a kan ruahter.

Ahlei ce in CNF nu-ralkap hna an i pumpeknak le harsat an tuarnak kong a chim tik ah, thinlung ah a celh in celh a si lo. Lai nusaltha hna upat hmaizah an tlak taktak ti kan theih tikah, khatlei ah lunglawmhnak zong kan ngei. Upat hmaizah zong kan pek hna. Lai ngaknu hna nih ram le miphun caah, Kawl ralkap doh ngamh in hriamnam an tlaih ngam cangmi dirhmun ruah ah, upat lo awk an tha lo. Chinland tuanbia dot khat a kaitertu nusaltha an si.

Hi zan ah, Pu Zing Cung nih biachimnak caan a ngeih hnu ah, biaruahnak zong sau ngai kan ngei rih hna. CNF aa thawkka in, SLORC le SPDC ralkap cozah chan tiang Kawl ralkap cozah riantuannak le CNF dirhhmun vialte lungthiang tein bia halnak le ruahnak kan ngei hna. Hmailei Kawlram kongkau vialte kong zong kan i ruah hna. 21st Century Panlong Hnatlaknak hi a taktak a si maw silo? timi kong in, Rohingya kong in, Nothern Alliance (KIA, AA, MNDAA le TLNA) tiang, Pu Zing Cung nih bia ruahnak le bia lehnak a tuah i, a tha kho taktak. Mipi an i lunghmuih ngaingai.

Rakhine Ram le Lairam nih Paletwa kan i cuhnak kong le Laimi zeitluk in dah tanlak kan hauh timi kong zong tampi a kan chimh. Laimi dihlak-biaknak le vawleilei he-Paletwa kan sunghnak hnga lo ding caah, thazaang le fimnak chuah a herhnak kong vialte a chim tik ahcun, Paletwa peng hi kan sung sual lai timi phan a um taktak.

"Paletwa hi a lam kip in Chin miphun nih kan bawmh le dirpi a hau. Kan ram a si caah kan ram a si peng ding zong a biapi tuk" timi kha a kan chimh tik ah, Laimi kan daithlang sual lai ti hi, phan a um taktak ti kha a kan cawnpiak mi zoh tik ah, Chin miphun kan tanrual a herh taktak ko timi a fiang.

CNF aa thawkka in hmuhtonmi tuanbia tampi a theitu le hngaltu asi caah, a biaruah a lum i, a nuam hringhran. Bia a kan ruahmi nih kan ram le miphuncaah, tuanvo kan ngeihnak zong tampi a kan theihter pinah, ram le miphun caah zeidah kan tuah ve lai? Kan pek ve lai? timi zong tampi a kan ruahter.

CNF Chairman nih Columbus a voikhatnak bik a kan tlawn a si i, mipi an i lawmh lawng siloin an i lunghmuih hringhran. Columbus ummi upa pakhat nih, "Pu Zing Cung cu, na nunning kan zoh lengmang ah, Mahattama Gandhi bantuk na si ee" tiah a ti phah. Upat hmaizah awk a tlak taktakmi Chin miphun hna kan pacan pakhat a si i, amah nih a kan tlawn tik ah kan mipi thazaang thar an ngah ngaingai i lawmhnak in an khat.

Air Force Museum Ah

December 4 cu khua a dawm ngaingai. Ruah zong a sur pah. Mui dup in a um ko nain, zingka tein kan tho i, Pu Zing Cung cu Dayton, Ohio ah a ummi United State Air Force Museum kan va zohpi. Dayton cu vanlawng sertu The Wright Brothers khua a si. Hi museum ah hin, vanlawng taktak 360 a um i, model an suaimi le research ca an sermi he cun vanlawng 400 renglo a um. Khuaruahhar in a lianmi museum a si.

NASA lei fimthiamnak kong zong tampi an piah chih. Hi museum nih hin, USA minung fimnak hi zeitluk in dah a san timi fiang tein a langhter. Hi museum chung i an piahmi vanlawng le NASA thilri hna zoh ah,  "Pathian sermi minung hi, hi tluk lawmmam in maw an rak fim le an thluak a that ko hnga?" timi ruah ah, minung nih "sernak thluak" an ngeihmi a sannak hi fiang tein hmuh khawh a si.

Hi museum hi vawleicung ah a hlun bik le a lian bik Air Force Museum asi. Kum khat ah minung 1,300,000 hrawng nih an zohmi a si. Pu Zing Cung cu CNF ralbawi bik pakhat a rak si caah, amah caah theihtlei si ve seh ti kan ruah caah kan kalpinak a si. Columbus in meng 64 tluk a hla.

Kan tlun pah ah, "Zeidah na khuaruah a har cem?" tiah ka hal i, a ka lehmi cu, "Hlanlio fimnak a rak thancho hlan, Wright Brothers chan i, vanlawng engine an serning le thirhri ngerh (chingcu) an sermi kha ka khuaruah a har cem. A um ballomi umter kha kuaruahhar asi bi ko. Cun Rader tlaih khawhlomi B2 Bomber kha" tiah a ti.

Apollo 15 Module hmai ah

Hi Museum ah hin, vanlawng an ser ka in, Vawlei Ralpi-I in vanlawng vialte a dotdot in an um. Ralpi-II in, Korea Ral, Vietnam Ral tiang an hmanmi vanlawng hna zong an piah hna. Persian Gulf War (1990-91) lio vanlawng zong tampi aa tel. A ropui taktakmi museum a si.

Hi museum ah hin, chanthar raltuknak vanlawng a si mi-F15, F16, U2, B2, F22 tiang in a tling dih. Ralpi-II lio i minthang bik vanlawng a simi B29 (Nakasaki i A-bomb thlatu) zong a um. Hiroshima le Nakasaki in an thlakmi A-bomb phun tiang zong an chiah dih hna. Chanthar nuclear bomb lianlian-Thermo Nuclear Bomb timi MARK-14 tiang in an chiah hna. Hitler cozah sermi miakpi, vanlawng le bomzuang (missiles-V1&V2) zong an um i, khuaruahhar an si.

Russia le USA thlapa cung kai an rak i zuamnak in, USA nih 1969 ah a kainak tiang an piah dih. International Space Station kong zong an piah. Hubble Telescope kong tiang in an piah dih hna i, thil khuaruahhar a si ko.

Ralpi-II lio i Pre. Roosevelt nih a rak i citmi President Vanlawng in Bill Clinton chan tiang citmi President vanlawng (4) zong an um hna.  Pu Zing Cung zong a chung dihlak a lut viar. Aa lunghmuih hringhran. Hriamnam a hmuh ah, CNF ca zong ah a mit a thi tuk hringhran. Cozah he cabuai cung i chonhnak ding caah, "Kan thazaang kan thawn hmasat a hau ee" tiah a ti peng.

Bia kan i ruah pah; hman kan i thla pah. Cuticun zing 9:00Am-12:00 Pm tiang Air Force Museum cu kan zoh. Caan dih hmanh kan thei manh lo. Pumh ding kan si than caah, Columbus lei panh in kan tlung than hna. Tlun pah ah ECBC biakinn hmun le certual zong a kan zoh piak pah i, kan i lawm hringhran.

ECBC Biakinn Hmun Ah

Museum chung ah

Zarhpini chun zong kan Krihfabu (ECBC) ah a kan pumhpi. Indianapolis in Chinland Club hruaitu minung 8 zong an van ra ve. Solo le Hlaremh a kan sak piak i, kan i lunghmuih hringhran. Pu Zing Cung zong special biachimnak caan a ngei i, mipi an i lunghmuih hringhran.

Rev. Tluang Hre nih Luke 2:1-7 cherhchan in, Thawngtha a kan chimh.  Biaknak le politics hi thenrawi awk a that lo zia le Bible zong ah mah le khuaram te an rak hlawm tawnnak kong a kan chimh. Judah miphun zong nih an khua an hlamnak le ram le miphun an tanhnak kha a kan cawnpiak i, mipi caah theihtlei taktak thawngtha a si.

Rev. Tluang Hre nih, CNF camp i an harsatnak le cu tluk har bu te ah dawtnak an ngeihnak le ram ca an i pumpeknak kong tiang a kan chimh tih ahcun mitthli a luang. A thawngtha nih a rami vialte a kan zuamcawh: "Kan nih nikhat tikik thawl khatte tal in kan ram le miphun caah rian kan tuan kho ve lai lo maw?" timi a kan ruahter.

Zarhpi zan ah Chinland Club hruaitu hna hruainak in, Pu Zing Cung le Rev. Tluang Hre nih zantim 12:00 Am tiang biruahnak a kan ngeih than.

Pu Zing Cung zong nih hmailei Kawlram hi zeitindah kan si lai? Chin miphun teh zeitindah kan si lai? timi kong a kan ruah. Cu bia kan theih tikah, khatlei ah lung aa lawm i, khatlei ah thin zong a hung, thin zong a phang, khing zong a rit. Kan tuanvo zong a kan theihter.

Cucaah tutan Chinland Club a kan tlawnmi cu, Chinland Club ca le Columbus Laimi a thahnemmi theipar tampi a chuak lai tiah zumhnak ka ngei.

December 5 zinglei 7:30 Am ah Pu Zing Cung cu Columbus in Denver ah a zuang. Pu Tial Hmung le Rev. Tluang Hre zong, ECBC Biakinn hmun ah thlacamnak an ngeih dih hnu ah, Indianapolis leiah an kal ve.

Caan tawite lawng kan umti ko hna nain, hi meeting ah bia phun zakip te kan i ruah hna i, hi tonnak nih hin ram le miphun caah thathnemnak zeimawzat cu a chuahpi lai tiah ruahchanknak ka ngei!!!

        -------------------------------------------------------------------

Chinchiah:

Hi cate in Pu Zing Cung le CNF ralkak pe chungkhar dihlak upat hmaizah kan pek hna. An kan tlawn caah kan i lawm hringhran. Pathian nih an mah le rian cio ah thluachuah vanluh pe ko hna seh!!