Columbus Ah Gospel Concert Sunglawi

Columbus khualai

Columbus ah tuahmi concert hi ECBC Building Fundraising caah ECBYF hruainak in tuahmi a si. Concert cu April 22, 2017 ah sunglawi taktak in Stiles Elementary School, Columbus ah kan tuah. ECBC Krihfabu chungtel hi 750 hrawng kan si i, minung 600 kuakap nih concert an zoh kho. Kan caah Concert Sunglawi taktak a si.

Thawknak ah Saya Van Nun Tluang nih thla a kan campiak. Praise and Worship hruainak in nuam taktak in minutes 15 caan kan hmang hmasat. Concert chung ah lawmhnak biatawi catialtu keimah le Upa Sang Kung nih chimnak kan ngeih.

Tutan Concert aa phundannak le sunlawinak khun cu Mizoram in hlasakthiam minthang Vanlalsailoa aa telmi le Laimi mino hlasakthiam mithang hna-Emily Ngun Hlei Sung, Esther Van Hnem Sung le Rem Rem-nih a kan telpimi a si. Columbus khua ah, hi bantuk hlasakthiam minthangmi hna nih, Gospel concert an tuah te lai timi cu, ruah awk a har ngaingai i, Pathian khuakhan taktak ah kan ruat.

Hi concert rami vialte cu, upa in ngakchia tiang lunglawm thanuam tein kan i tel hna i, cu ko cu a miak tuk. Tangka nih cawk khawhmi a si lo tiah kan ruah i, kan Krihfabu caah philh awk thalomi Concert Sunglawi taktak a si. Kan i lunghmuih taktak.

Concert hruaitu hna Sansan le Pa Iap

Concert chung ah hlasatu ah Pu Vanlalsailo nih a kan telpi khawh. Amah hi West Phaileng, Aizawl District in a si. Presbyterian Krihfabu chungtel a si i, USA hi voi hnihnak a rat a si. Khua kip ah thawngtha a chim pah in, hla in Pathian riantuan pahmi a si. Mizoram ah tang 12 tiang a kai hnu ah, Pathian riantuantu hi biapi deuh ah a ruah caah sianginn a chuak i, bia le hla in Pathian thawngtha chim ah hmun kip a tlawngmi a si. Amah bantuk in, Thawngtha chim zong a thiam i, hlasak zong a thiam i, hawikomh zong a thiammi pa hi, Lairam le Mizoram ah tam an chuak lai lo tiah ka ruah. Mi za ngaingai a si.

West Phaileng (Ref. Exploremytrip.com)

Mizo gospel hlasakthiam minthang Vanlalsailoa

West Phaileng (Ref. Exploremytrip.com)

Concert thawknak Praise & Worship

Nu Emily Ngun Hlei Sung le Esther Van Hnem Sung cu Indianapolis ummi an si. Laimi nih Youtube le video in hmuh lengmangmi an si. Atu lio Laimi hlasak thiammi ah minthang bikmi chungah aa telmi an si. ECBC concert ah a kan telpi khawh caah kan i lawmh lawng siloin kan i lunghmuih tatak. Kum tampi hlasa kho rih dingmi Laimi mino an si i, an mah an rat khawh caah lawmhnak in kan khat. An hlasakmi ngaih kan chim hrim lo. Gospel Concert a tuahmi nih cun, hi hna pahnih hi sawm ding hrimhrim an si. A kan nuamhpi tuk hringhran.

ECBC nih Krihfabu chung in hlasakthiam Nu Rem Rem (Tluang Zi Par) le Pa Bawi Hu Lian zong nih an telpi hna. An nih pahnih hi ECBYF ah member chungtel an si. Nu Rem Rem cu Columbus ah college kai lio. Pathian nih hlasak thiam pahnih kan Krihfabu ah a kan pek i, an mah zong nih concert an sunlawiter khun. Mah bantuk hlasakthiammi ECBC ah chungtel kan ngeih hna caah, kan i lawm ngaingai. Pathian min kan thangthat.

Ka lawmh ngaimi pakhat cu Emily Ngun Hlei Sung a chuahnak khua cu, Tuipang khua a si. Cu khua in a chuak i a kenkip ah a thangmi nih, hi tluk in Laihla a sak khawhmi cu khuaruahhar a si. Tuipang khua cu kei zong 1993 ah ka rak phan bal i, khua nuam ngai a si. An khuakam ah lakphak tam ngaite an cin.

Cun Esther Van Hnem Sung zong cu Thantlang peng khua fate, Hmunthar in a chuakmi a si i, cu khua fate in mah tluk hlasakthiam hna an rak chuahmi cu khuaruahhar a si. Pathian khuakhan a si ko. Hmunthar cu a rawn tuk i, khuadawh tuk a si. Khuapi ah ser hna sehlaw zeitluk in dah a that hnga ka ti tawnmi khua a si. Hi khua fate in hlasakthiam Esther Van Hnem Sung zong a chuak ve.

Cu lawng siloin Rem Rem hi, a chuahnak le thannak cu Lunglei a si i, a hnu Burma an um ve. Mizo holh in a holh pengmi a si nain, Laiholh hi khulrang taktak in a thiam lawng silo in, Laihla duh tawk in a sak khawhmi cu khuaruahhar a si. Pathian thilpek a si ko ka ti. Cun Bawi Hu Lian cu Khampat khuami minote a si. Khampat cu miphun kip cawhna a si i, Laiholh hmanh an thiam hnga hme maw ti awk a si ko nain, Laihla dawh taktak a sak khawh tik ah, khuaruahhar a si ve. Khampat hi Mizo nih kan i thawhkehnak an timi khua a si i, Khampat ummi Bungpui zong hi a min a thang taktak. Nihin ni ahcun a cheuchum cu a tlu cang.

Vanlalsailoa a chuahnak khua West Phaileng dah ti lo cu, hlasatu pawl an chuahnak khua vialte hi ka phanh dihmi hna an si i, a liamcia caan kum tam nawl a kal cangmi ka van ruah ah, Columbus hna i hi tluk Concert Sunglawi kan ngeihmi van ruah ahcun, "Bawipa Pathian na tuahmi thil vialte hi ka ruah tikah ka lung nih a phan lo..." kan timi hla kha a tling theu tawn ko.

Cucaah tutan Columbus Concert cu a ropui tuk. Zeicatiah tutan concert nih a langhtermi cu, "Globalization ruahnak" kha a dik timi a langhter. Zeicatiah hlasakthiam Vanlalsailo cu West Phaileng khua chuak a si i, Emily Ngu Hlei Sung cu Tuipang chuak a si i, Esther cu Thantlang Peng chuak a si i, Rem Rem cu Lunglei chuak a si i, Bawi Hu Lian cu Khampat chuak a si i, cu a kenkip chuakmi Laimi hna cu, vawleicung ram ropui bik USA ah concert an tuahti hna. A tumtu pawl cu Laitlang khua kip chuak an si hna. An tummi thilri cu USA, Tuluk le Thailand chuak an si hna. A zohtu cu Kawlram khua tampi in a chuakmi an si. Cu Globalization idea cu, Ohio khualipi Columbus ah a cangmi a si.

Emily Ngun Hlei Sung

Emily chuahnak "Tuipang Khua, Saiha District, Mizoram

Esther Van Hnem Sung

ECBC mino hlasatu Rem Rem

Rem Rem chuahnak Lunglei khua

Bawi Hu Lian

Bawi Hu Lian chuahnak Khampat khua

Music tumtu hna cu Pu Duh Bawi Bik, Pu Bawi Biak Thawng, Pu Ngun Tling, Michael, John le Samuel Thawng an si. Sound zohkhenhtu ah Pu Bawi Tha Hu le a nau le an si. Michael le John nih a kan telpi khawh i, kan concert an hlnhlaiter khun. Tu zan concert cu a tum tu pawl hi, an thiam tuk i, ngaih a nuam tuk hringhran.

Concert lio music tumtu pawl

ECBC biakinn hmun hi acre 15 renglo a si. Columbus nitlaklei Galloway timi sang ah a um. Hakha certual kaoh certual pahnih kan fale caah kan tuah piak hna. Kan fale nih USA hi an ram taktak ah an ruah i, lungthin daite le hnangam tein Pathian an thangthatnak ding caah le an taksa, an thinlung, an thlarau aa lawmh i, a lamkip in an thanchonak ding caah, nulepa hna nih zumhnak nganpi he, certual pahnih zong kan tuahpiak nak hna a si. Ca an thiam lawng silo in, lentecelhnak lei le lentecelhnak zong ah thangcho hna seh timi kah saduhthahnak a si. Hmailei ahcun hi ka hmun ah hin, Galloway sang minung tampi nih an i tel khawh ve mi, "concert le festival" (puai phunphun) zong tuah kho ve te u sih law tiah saduh kan that.

ECBC Biakinn caah project suaimi cu $ 6.65 million a si. Biakinn le Sunday School ngakchia khan pawl le Office lawng sak ding a si rih. Biakinn hi todan saumi man ding a si i, a zapite minung 609 tlumnak ding in ruah a si. Motor parking space 205 a um lai. A vaam hi a hmailei cu "synthesis stone" timi siam chawmmi lung a si lai i, a vampang cu "metal" (thir) a si lai. Metal hi "cosmetic" (aleng in nalh) khawh a si. Tlanglei kap vampang hi metal asi ve lai. A tu i langhtermi cu cosmetic tuah ah hitin a si lai timi langhtermi a si. Atanglei hmanthlak hna hi, a taktak siloin computer in tuahmi an si. Hmailei ahcun a tlanglei kap hi cu minung karh ahcun kauh khawh ding a si.

Kan Krihfabu dirhmun in tuak tikah $3.65 million cu a tam ngai. Cucaah Building Fundraising Concert zong sponsor tuahtu Pu Ngun Tling bawmhnak in tuah a si i, a cungah kan lung aa lawm hringhran. Building concert tuahmi nih minung thinlung le ruahnak a thawnter. Kan i nuam taktak. Tangka in cawk khawhlomi lawmhnak le thlarau lei miaknak kan hmuh.

Laimi nih an awzai lawng theih lengmangmi hna hlasakthiam Emily Ngun Hlei Sung, Esther Van Hnem Sung le Evan Vanlalsailoa kan hmuh hna caah, lung aa hmuih khun. Kan i nuam ngaingai i, a dih tiang ho hmanh chuak lo in, khat phikphet in kan thu hna. Khual zong a kan telpi mi an um hna i, kan tam ngaingai. Concert zohtu vialte an i lawm i an i lunghmuih tuk cio hna.

Concert cu 9:30 PM ah, Pu Kam Bik nih thlacamnak in, lungrual tein kan ban.

Concert dih ah mino le hlasatu hna 

Hi concert tlamtlin khawhnak ding caah tuanvo latu ECBYF hruaitu Pu Cung Hup, Pa Tluang Za Iap, ECBYF upate dihlaka le ECBYF ngaknu tlangval dihlak cungah kan i lawm. Hlasatu le sponsor tuahtu vialte cungah lunglawmhnak kan chim kho lo. Pathian nih thluachuah pe cio ko hna seh tiin thlaza kan campiak hna.

Hi concert hi, ECBC Krihfabu tuanbia ah philh khawhlo dingmi concert a si. Taksa, thinlung le thlarau in hlawknak tam tuk kan hmu. Kum khat chung kan lungretheihnak le khingrihnak vialte concert ah kan thumh dih i, Bawipa kan thangthat.

Nikhat caan khat ahcun, Pathian thluachuahnak thawng in ECBC biakinn zong a dir taktak te ko lai timi ruahchannak kan ngei. Zeicatiah "Antam ci mu tia zumhnak ngeih hmanh ah, tlang nan thial khawh ko lai" tiah kan Bawipa Jesuh nih a kan kamh. Cucaah zumhnak fate kan ngeih ahcun, biakinn zong sak khawh a si i, Hall lianlian zong sak khawh a si ko. A biapi le a herhmi cu zumhnak lianpi a si lem lo. "Antam ci mu tia zumhnak fate ngeih a za ko."

A rauh hlan ah, Hall zong a dir than te ko lai timi ruahchannak le zumh ngamnak ngei bu in.................!!!

Pangpar hngaktu volunteer pawl

Concert Volunteer cheukhat

A zohtu hna thut bu hmanh in an i nuam tuk

A zohtu hna thut bu hmanh in cawl lo in an um kho lo

Vanlalsailoa hlasak lio

Vantha bik laksawng hmutu Pi Ngun Men laksawng lak lio

Sanctuary hi Oct 3, 2017 ah an lum lai

Sanctuary a thlanglei le a hnulei vam

Sanctuary a thlanglei kap. Hi ka area hi kauh te ding in reserve a si

Concert Advertisement sermi

-----------------------------------------------------------------------

Chinchiah

1. Tuipang le Hmunthar khua hmanthlak hi ka hmu kho lo i, ka tar kho lo. A ngeimi nan um sual ahcun haivunglian@gmail.com ah zaangfah tein ka kua u law ka lawm ko hnga.

2.  Biakinn sak cuahmah lio a si caah, ka tialmi ca hna hi, tlam a tling lo ngai lai i, remh le chap than a si te lai.

3. Music tumtu cu an tam deuh caah an khua kong ka tial kho hna lo.

4. Tuipang khua hmanthlak hi Beizakhai Bawi nih a ka kuat khawh i, a cungah lawmhnak tampi ka ngei. Ka rak phak lio he cun aa dang tuk cang. A thangcho tuk cang ti ka hmuh i ka lawm ngaingai.