Chin Relief and Development Program le Vision

Chin Relief and Development Program (CRDP) hi Lai Tlang le Kalay Nelrawn Lami le ramdang ummi Laimi hna nih, Lairam le miphun caah thanchonak rian zeitite tal in aa tuan kho hnga maw ti in dirhmi bu pakhat a si. Pumpak pekchanhmi, Krihfabu pekchanhmi hna hi CRDP a nunnak hrampi a si. CRDP hruaitu cheukhat cu ramdang ah caantawi training zong an kai hna i, Lairam ah zeitindah cinthlaknak le zuatkhalhnak kan thanchoter ve lai timi zong, chanthar fimthiamnak a va cawngmi zong an um. Ramdang fimthiam ngaingai kha Lairam ahcun aa hmang kho tuk rih lo nain tuahningcang (technique) cu an ngei ngai cang ko.

CRDP a vision cu "Lairam thanchonak ca" ti bak a si. Cucaah Lairam thanchonak caah a lamkip in khua an ruat i, an tuaktan. Cucaah Eden Thar ti in Thantlang ah "zohchunh dingmi dum" (model dum) dawh ngai zong an tuah i, nikhat ah arti pum 300-400 lengmang an chuahter khawh cang. Cu thil nih "Lairam ah mah tein arti a za in chuah khawh a si ve ko" timi a langhter ko. Tilionak tidil zong an ser i, tangka tam ngaite a lut cang.

Cinthlaknaklei zong ah khuate ah thlaici kip an kuat khawh cang. Zawngtah kheu le theihai kheu dangdang an ser i, hmunkip ah cinthlaknak lei karhnak rian an tuan. Tawlrelba cin ningcang zong an cawn i an chimh hna. Hi tawlreba cinnak nih hin, Lairam ah thiltha tampi a chuahpi te lai tiah ruahchannak a um. CRDP um hnu in cinthlaklei ah Thantlang Peng ah thanchonak tampi a um ti kan theih. Dum ah thilri tling ngai in an ngei cang i, cu zong cu thancho pakhat a si. USA in Thantlang tliungmi hna nih New Eden dum kal cu a nuam tuk. Lung aa hmuih tuk tiah an ti tawn. Cu hmanh cu zeihanglopi  a si ko.

CRDP Leikuang (Kalay Valley)

CRDP leikuang cawk ah tuanvo latu hna

CRDP nih vision a ngeihmi lakah a liannganbik vision pakhat cu Kabaw-Kalay-Yaw Nelrawn ah leikuang kan cawk lai i Laimi nih leikuang thatha ngeih ve ding le Lairam ah tirawl man deng deuh tein phurhtlunh khawh le cuticun Lairam mipi nih duhdim deuh tein nun khawhnak hi CRDP vision pakhat a si.  Cu vision tlamtlinternak ding caah, ramdang le Kawlram ummi hruaitu hna i bawm in, rian an tuan cuahmah i, a theipar tete zong a chuak ngai cang.

Kum khat hnu kum khat leikuang duhsah tete in an cawk i, nihin ni ahcun Kalay Nelrawn ah leikuang acre 27 an ngeih cang. Facang zong kum chiar in tun tam ngaingai a chuak cang. Hakha rawh lio zongah Laitlang ah facang tun tam ngai in bawmhnak an tuah khawh. Rian sunglawi taktak mipi caah an tuan. Naite ah tidawpnak seh zong leikuang ahcun an bunh cang hna i, hmailei ahcun hi leikuang hin facang tun tampi a chuak lai lai i, Laimi caah tuanbia pakhat an tial a si te ko lai tiah ruahchannak a um.

Leikuang caah ti dawpnak seh an bunh lio

Leikuang caah ti dawpnak seh an bunh lio

Ti dawpnak seh nih tii a dawp lio

Chanthar leithuannak seh in lei an thuan lio

CRDP Central committee nih an ruah tawnmi le vision cu Kabaw-Kalay-Yaw Valley ah leikuang acre 500-1,000 tiang hna i caw kho sehlaw, Laimi tampi rian kan pek khawh hna pin ah, a sifak tukmi Lairam ah hin kan miphun nih hin facang deng deuh in kan ei khawh lai. Cun tlanglo tuahnak hi kan chuahtak khawh deuh lai i, kan ram a hninghno lai i, Lairam hi Eden Dum bantuk in a nuammi le aa dawhmi a si kho lai timi tiang hi, CRDP upate nih vision an ngeihmi a si. Leithuan in, thlaici vorh in, a thlawh tuan in, seh sersiam le seh remh rian le sanseh facang rialnakin rian tampi kan serchuah khawh lai tiah ruah asi.

Lairam caah theipar tam tuk a chuak ko hnga ti hi a si. Cu vision a tlamtlinnak ding caah leikuang acre 27 te CRDP an ngeimi hi, a hram pakhat le aa thawknak thlaici a si cang. Lung aa lawm tuk. Mitthli le tah bu in Kalay-Kabaw Valley ah CRDP nih rian a tuanmi hi, nikhatkhat cu a theipar zun caan a phan te ko lai. Zei thil paoh hi fate in aa thawk peng ko. Mi tlawmte nih thawk a si peng ko i, Kalay Valley ah Laimi bu pakhat nih leikuang acre 27 an ngeih cang timi hi, miphun dang caah thil fate a si men lai nain Laimi caahcun tuanbia a si. Tuanbia hmanh ah tuanbia theihtlei le tuanbia sunglawi a si.

Leikuang man hi a fak tuk cang. Laimi kan ngeihchiah cun cawk ding a fawi ti lo. A tu lio hi caan tha a si. Hi lio caan ah Laimi nih biatak tein khua kan ruah lo le Kabaw-Kalay-Yaw Nelrawn ah vawlei kan ngeih lo ahcun, caan dongh tiang hmanh ah, kan ngei kho tuk ti lai lo. Laimi ramdang kan um lio le ram le miphun dawtnak kan ngeih lio le kan thinlung aa hlum lio te ah, Kalay-Kabaw Nelrawn ah innlo khuar le abik in leikuang tampi ngeih le cawk kan herh.

Zeicatiah Kabaw-Kalay-Yaw nelrawn ah Kawl miphun an cak tuk. An fek tuk cang. Khi ram khi kan ram tiah lak than ding cu a fawi ti lo. Asinain a vawlei hi kan ram a si kho ve i, cu ram ahcun kan nih zong hmunhma kan ngei kho ve. Kawlram cu zapite kan ram a si caah, Kabaw-Kalay-Yaw Valley zong Laimi caah a si ve. Khi ram ah mi leikuang ah aa hlawhfa lengmangmi Lai miphun si ti lo in, leikuang le vawlei a ngei ve mi Lai miphun kan si dingmi hi, CRDP a chunmang pakhat a si.

Cucu a tlinnak ding ahcun a ho dah a tuan lai? A ho dah thazaang a chuah lai? Cucu nangmah le keimah kan si. Thlapa kai khawhnak caah thazaang, rumnak le thawnnak hmanh ngei u sih law, "Thlapa khi zeitindah kan kai lai?" timi kan ruah lo ahcun, zeitikhmanh ah kai khawh a si lo. Cu ve bantuk in, zeitluk hmanh in Laimi hi va rum, va lian in va fim u sih law, Kabaw-Kalay-Yaw Nelrawn ah zeitindah leikuang kan ngeih khawh lai? Ram kan ngeih khawh lai? timi kan ruah lo, tuak lo le tuan lo ahcun, zeitikhmanhah ram kan ngei kho  lai.

A thangcho cuahmahmi Kalay Myo

Kabaw-Kalay-Yaw Nelrawn hi, neltawn tha taktak a si. Vawlei a tha. Tii a tha. Khuacaan a tha i, Kawlram caahcun "Canaan ram" bantuk a si. Tirawl le eidin a tam kho taktak. Hlanlio Shan le Kawl riangpahrang chan in a minthangmi nelrawn a si. Khuapi hlun tampi umnak le uktu bawi hna nih an rak i cuh lengmangmi nelrawn a si. Nihin ni zong ah, miphun kip nih mit a thitmi le cuhmi nelrawn a si. Hi hmun ah hmunhma ngeih cio an duh.

Hi nelrawn hi cu Kawlram a sunglawi peng lai. Chaklei Lai Tlangmi hna nih tirawl eidin kan laknak cu hi nelrawn hi a si peng fawn lai. India-Kawlram-Thailand Highway pi a peh dingmi hi Kabaw-Kaley nelrawn a pal dingmi a si. Hi lampi hi Malaysia-Singapore tiang aa peh te ding khi a si. Hi lampi a pem tik ahcun, Kalay Nelrawn hi a thangcho chinchin lai i, Kawlram ah sipuazi a that biknak hmunh pakhat ah aa tel te ding a si.

India-Kawlram-Thailand Highway 

Cu tluk i a sunglawimi hmunhma tha ah Pathian thluachuahnak thawng in, Laimi tam tuk khua an sa ve cang. Asinain a pawi bikmi cu Laimi vawlei ngeimi an tlawm. Cucaah hi hmun ah Laimi vawlei ngeih khawh nak ding in khuaruah le tuaktan cu kan Lai miphun nih biapi ah kan ruah ding le chiah dingmi thil biapi taktak pakhat a si.

CRDP nih aa tinhmi le hmaithlakmi vision a tlamtlin khawhnak ding caah, ramkip Laimi kan i tel a herh. Atu kum 2017 zongah Rev. Nawl Hmung le Rev. Van Duh Tling cu CRDP caah docawi ding le fung kawl ding in, USA ah an ra i khua tam nawn an tlawng cang. Cun CRDP vision a tlamtlin khawhnak ding caah, a voikhat bik CRDP Conference zong Columbus, Ohio ah December 9, 2017 ah tuah ding in timhlamh a si cang. A zan ah CRDP Concert zong sunglawi taktak in tuah ding in timhlamh a si. Iowa, DC, Indiana lei tiang in upa an ra hna. Hihi ram le miphun spirit pakhat a si i, a sunglawi tukmi a si.


Hi CRDP vision hi, a tlamtlin i ram le miphun caah theipar tha a chuah khawhnak lai, bu in siseh, pumpak in siseh, chungkhar in siseh Pathian sinah thlacamnak he tanlak cio le tel cio ding hi, a herh taktak timi ruahnak he!!!!!!!!