Khuaruahhar Motor Accident

Motor accident hi khuaruahhar taktak a si tawn. Voikhat cu kan umnak Columbus ah kan church member accident. A motor mawnghnak lam cu suimilam pakhat ah meng 10 kuakap mawnghnak zung le warehouse umnak area a si. Lam cu a kuar nawn. Lam diltlang cu a san pin ah, a cung bik ah khin motor liam hlahseh tiah an khammi miring vawlei in lehmah 6 tluk sang in an khammi a si. Vur a tlak caah lam cu a naal Ngai.

A motor cu a naal sual rua. Lam diltlang a kai hnu ah miring vawlei in an tuahmi lehmah 6 sang an khammi le thir an khammi cungah a va kai I, aa bat. Biatak tein mawngh hramhram hmanh ah, cu tluk sang cu kai khawh ding khi a si lo. Vanthat ah minung cu an I khawng lo.

Kan member pakhat zong parking ah a parknak ah a liver a hei lamh sual I, cungpi ah a kai hnu ah burbuk lianpi tlu ko in a pah hnu ah, air conditioning she vialte rawk viar in a va pah. Kan member pakhat cu innchung ah lut ko in a pah ve. A dang pakhat cu innleng tung vialte kiak viar in a va pah ve hawi. Cucu speed tlawmte umnak ah a si ko. Vanthat ah minung cu an I khawng lo.

Motor accident hi a can ahcun ti sual le cangh sual le laklawh ruangah a si. A can ahcun phunglam zulh lo ruangah a si. A can ahcun mitkuh hnatam le baat ruangh a si. A can ahcun motor she-thilri thatlo ruangah a si. A can ah lam naal le cindam ruangah a si I, a ruang aa dang cio.
 Acheu motor accident cu "Tahlak ah nihchuak" tiah nih hna an chuak tawn.

Atanglei motor accident hi vawleicung accident vialte lak ah tihnung bik, nihchuak bik le "Movie" a lo bikmi a si. Zeitindah a can khawh ti khuaruahhar accident a si. A taktak a lo lo nain, a taktak a rak si.

Movie bantuk a simi accident

Daithlan hi minung nunnak ah hrawktu a si. Speed zong zoh lo le motor mawngh lio ah phone hna deh pah ti bantuk in, nungcanglo motor mawngh hi tih a nung tuk. A tanglei bantuk in ningcang lo in motor ka mawng lai tiahcun "Life Insurance tha taktak cawkta hmasat ah a tha."

Hi accident hi tu zing 5:25 Am ah a cangmi a si. French Street le 17th Street aa tonnak, Santa Ana timi khua ah a cangmi a si. NBC Los Angeles nih an tialmi ca a si. Palik nih an chimnak ahcun, sedan motor rangmi cu French Street ah chaklei hawih in rang taktak in a tli I, 17th Street a lai an khammi a pah I, van ah a zuang I, inn dot hnihnak ah a va lut ti a si. Motor kha a pumcheu a lut.

Palik nih capo in, "Hi tluk sang in a zuan khawhmi hi a zuanlei ahcun mark 10 kan pek I, a va tumnak ahcun tha tein a tum khawh lo caah mark 7 lawng kan pek" tiah an ti. A va pahmi inn hi, haa sekhan a si. A hmumi nih an chimnak ah, motor kha a kang ti a si.

Driver cu a chuak nain a chuak kho lo, tuan phan lo in aa thlai I, palik nih an va khamh tiang a rak I thlai ti a si. Driver le a pawng thumi cu din te lawng an I khawng lo I, a ho hmanh zong an khawngdeng hna lo ti a si.

Driver nih a timi cu, "Zu ka ding lo. Ka ri lo" a ti tik ah, khuaruahhar ding  a si lo. Palik nih an timi cu, "Ritnak sii a rak ding" tiah an ti. Driver le passenger cu an khua sizungah an kalpi hna I zeidah an lawh tiah an zohkhenh hna.

Sehlianlian in an cawi lio

Mah accident pakhat ruangah buainak tampi a chuak. Palik zong an ra. 10 Am ah motor cu an chuah. Motor mei hmittu ah LA Fire Department an ra. Inn hi a fekfuan maw fekfuan lo timi zoh ah Public Riantuantu zong an i inn hi a himbawm ding a si maw si lo an rak zoh. Motor chuah kha a fawi lo caah, Orange County in motor hrawhnak sehlian lian an ra I, an hrawh I an lak.

Orange County cu LA thlanglei deuh a si. Nai Siangbawinu ruak thlahnak khua Ontario I nitlak thlanglei ummi country pakhat a si. Naite zong ah mei tampi a kanghnak hmun a si.

LA hi khuapi taktak a si. Hollywood umnak zong a si, khua nuam le khua minthang a si. Zuding saei le misual zong an tam. Ritnak si ding zong an tam. Motor mawngh rang taktakmi an tam caah accident zong a tamnak khua a si. Hi accident zong hi LA dah ti lo cu, USA khua dang zong ah a um kho tuk ding a si lo. Accident mak taktak "Khuaruahhar Accident" a si ko.

Mizo ti ning cun, "A ropui taktakmi accident a si ko." Hi bantuk si na duh ve lo ahcun, "Zu va ding hlah. Ritnak si va tong hlah. Lam speed va luan hlan." Cuti na tuah I thla na cam ahcun, inn dot hnih cung kai tiang cun, na accident lo hrimhrim lai!!!