Cu dawr pawl cu khua pakhat i sang a nuamhnak le hmunhma a thatnak le umkal a fawinak ah an ser tawn hna i, a chung chawhvah le tlawnlen hi a nuam taktak. Umhar zong a pheng i, lungthin zong a nuam. Kan nih chungkhar hna hi, a caancaan ahcun khual hmanh kan tlawn khawh lo kan ti i, Mall ah kan chungkhar tein kan leng tawn i, kan i nuam ngai tawn.
Vawleicung thil sining aa tleng lengmang i, computer a chuah hnu le internet a um hnu ah thil aa thlening a rang taktak. Cu internet a chuah hnu ahcun "online shopping" a um hnu in, thil aa thlenning a rang chin lengmang. Online shopping zong ahcun "Ebay le Amazon" a chuah hnu in, vawleicung thil zuarning phundangpi ah aa mer. Abik in Amazon.com nih hin, thil fatete samkamh in, thil pipa motor le drone tiang an zuar tikah, vawleicung ah duhmi thil paoh Amazon.com ah cawk khawh dih ding in a um cang. Amazon ah thil a tlin tuk pin ah, an kuat ning zong a rang tuk fawn i, cuticun U.S Mall hi vawleicungah a ummi Mall in Online Mall dirhmun ah aa thial.
Cupin ah US mirum hi an haak a kau tuk. Zeipoh an mah nih tei dih, uk dih le ngeih dih an duh. Midang company nakin hmuh deuh le lianh deuh an duh. Company pakhat le khat "zuamnak" (competition) a sang tuk. Khuakip le sangkip thil cawtu kha an mah dawr ah kal viar hna seh ti an duh caah, dawr hi tam tuk lawmmam in an rak sak hna. Cuticun Online Mall a chuah tikah, dawr tampi cu an manh ti lo i, an tlaknak zong a si ve. Internet ruang lawng a si lo. Dawr tam tuk ruang zong a si.
Nihin ni Online Mall cu Amazon.com ah duhmi a tling ko cang. Dawr kal hau lo in, duhmi paoh cah khawh dih a si ti tluk a si. "Amazon.com i cawk khawhlomi cu, kan mah minung lawnglawng kan si" cang ti tluk in, thil a tling. Minung hi zuar awk tha u sih law cu, Amazon.com nih duh tawk in a kan kuat khawh rih lai. Cu tluk cun Amazon.com hi a cakc ang.
Nihin ni ah Amazon.com nih hin, vawleicung hmun kip ah rian an kauh thluahmah i, hihi hmailei ah zeidah a lawh te lai timi hi, chim awk hmanh a tha lo. Walmart Store te hna an rak karhnak in a let tam tuk in a karh ning a rang deuh.
Amazon.com bantuk in Online Mall an karh deuhdeuh tik paoh ah, U.S Mall lianlian cu an tumchuk i, an zor i, an i rawk thluahmah cang. Ka philh kho lo. 1997 ah Dayton i a ummi Salem Mall cu zan ah a tleu bak in a tleu. Minung a khah bak in kan rak i khak. 2006 a hung phak tik ahcun, cu Mall cu a thi bak i, theh hram an rak thawk. US ka phanhka ah rawl kan rak ei tawnnak, minung a kalh in an rak i kalh i, umhar caan i ka rak len tawnnak kha, a thi ko. Ngaihchia taktak khi a si. Cun 2006 tiang a hlunghlai taktak rihmi Columbus i Westland Mall timi zong duhsah tein a thi i, a donghnak ah Sears Store pakhat te lawng a tang. Cu zong cu Store Closing tiah kan hnu thla ah ca an tar cang. Mall cu 100% a thi ding a si cang.
Cuticun Online Store le Online Mall a karh deuhdeuh i, minung nih voidang tawn bantuk in dawr kal zong an huam ti hna lo. Inn chung in an duh le Hong Kong le Tokyo ah thilri an cah khawh cang. An duhmi eidin paoh online in order khawh a si cang i, thadi, zaangba, caan pam le meiti dih in lengchuah an huam ti hna lo. Cu ruangah Mall hi an thi chin lengmang i, hmai lei ahcun, Christmas Hla dawhdawh chuahmi ngaih pah in nuam taktak in kal tawnmi Christmas Shopping hmanh hi a um te hnga hme maw ti tluk a si cang.
Nihin ni ah Online Mall nih Vawlei Mall a lan tuk cang caah, vawleicung dawr cu pakhat hnu pakhat an thi cuahmah i, Mall lianlian zong an thi i, store lianlian a tumchuk kho lo ding in rak ruahmi zong an thi cuahmah cang hna. 2017 chungah dawt dihlak 9,000 US khuakip ah an khar lai ti a si. Khuachung dawr fatete zong an thi i, innlawngmi US ah tam chin lengmang cang. Nikhat caan khat ahcun, US khua cheukhat innlo cu an thi lai i, sang an thi lai. Cun khua zong a cheukhat cu a hnu ahcun an thi te hna lai.
Nihin ni Online Mall a karh tukmi nih a tumchuk kho lo ding ah ruahmi Walmart te hna hmanh a rawhter cang hna. January 15, 2016 ah Walmart nih USA ram chung i a ngeihmi dawr 154 kan khar lai tiah an rak ti. Cu kharmai lak ahcun, Walmart Express 102 aa tel; Discount Center 6; Super Centers 12; Neighborhood Markets 23; Sam club 4 le Puerto Rico ummi Amigo Store 7 aa tel. Vawleicung pumpi ah 269 kan khar lai tiah an ti.
Walmart nih Store tambik an kharnak State cu Texas ah a si i, dawr 29 an khar; North Carolina ah dawr 17 a si. Arizona ah 11; Alabama 9; California ah 9; Kansas ah 9; Louisiana ah 8; Georgia ah 8; Puerto Rico ah Amigo timi dawr 7 le Massachusetts 6 tambik kharnak state an si. Ohio ahcun pakhatte lawng an khar. Walmart hi tahchunhnak lawng ah ka tialmi an si.
Nihin ni ahcun, Target, Sears le J.C Penney te hna an khar thluahmah cang hna. Tahchunhnak ah 2014 ah dawr 33 an khar i, 2015 ah dawr 40 an khar. February 24, 2017 ah JCPenney nih, a ra laimi thla hna ah hin dawr 140 kan khar lai i, minung 6,000 hi tuan deuh ah pension pek ding kan ti hna lai ti a si. Nikum ah dawr 1,021 an ngei i, caantling riantuantu 105,000 an rak ngei hna.
J.C Penney nih an thanh bantuk in Sears Holdings timi "Sears le Kmark" zong nih dawr 150 kan khar lai tiah an ti ve. 2016 ah Macy nih dawr 100 kan khar lai an rak ti. 2017 chungah Macy's zong nih dawr 68 kan khar lai i, minung 10,000 rian kan ban hna lai ti a si. Stores fatete a dangdang zong bankruptcy a file mi tam ngai an um i, an i rawk hna.
Cutin vawleicung dawr lianlian an i rawk i, khuakip ah Mall Lianlian an thih cuahmah lio ah, Amazon.com tu cu an sipuazi a thancho tuk caah, minung full-time tuanmi 100,000 tu kum 2017 chungah kan hlan hna lai ti a si. 2018 zong ah kan hlan chap hna lai ti a si.
Kan umnak Columbus khua hmanh ah, inn lianlian an sak i Obetz le Etna timi sang ah minung 2,000 an lak hna. Hilliard ah data center tha taktak an sak than i, minung 250 tluk kan lak chap lai ti a si. Columbus area hmanh ah hin, Amazon cu rian a tam taktak cang.
Christmas le Kum Thar khar lio ah thil an zuarmi a tam tuk ko nain, naite January 4, 2018 ah Macy nih dawr 11 kan khar chap lai i minung 5,000 rian kan ban hna lai an ti. Columbus ahcun aa tel hraw lo nain Cincinnati ah pakhat aa tel. Hi bantuk in dawr 11 ah khar ahcun, $300 million kan tang deuh lai ti a si.
Cuticun dawr lianlian an thi cuahmah hi, khua tampi ahcun innlawng hi a tam ngaingai. Sipuazi a tlak cang hnu ahcun, inn lawngkarangpi cu man a ngei ti lo. A lakka pek hmanh in duh ding a si ti lo. Inn lawng tam tuk nak khua cu mithlakawkbar in a um. Ningti khi a si. Uico fir hmanh an vaak ngam lai lo ti tluk in a king.
"Vawlei caan tawi pennak hi an hmun lo. Hnangam pi ding le lawmhpi tuk ding an si lo" timi hi USA Mall nih an langhter ko." Jesuh nih vawlei ah nan chaw va khawng hlah u. Rungrul le cirik nih an ei khawhlonak hmun ah nan chaw va khong u..." tiah tiah a kan cahmi hi, biatak tein ruah a cu. US Bank hna zong an hmun lo i, Mall Lianlian i "Stock le Share" chiahmi zong an him lai timi ruah khawh a si lo.
Hi bantuk in dawr lianlian an kharnak hna a ruang bik cu computer cung in thil cawk a tam tukmi; company pakhat le khat hi an i zuam ruangah khuachung minung zeizat dah an um timi tuak setsai lo in dawr tam tuk an rak tuahmi; ramdang in thilman deng tuk in an zuarmi; American mipi a buaktlak in a hlan bantuk in tangka an hman khawh ti lo mi le tangka hloh an i sum deuhmi ruangah a si an ti. Abik cu Amazon.com le adang online store pawl ruangah a si tiah an ti.
 |
| Westland Mall i a donghnak bik an kharmi Sears |
Atu hi Columbus ummi Eastland Mall zong a thi cuahmah cang. Zeitikdah a thih taktak te lai timi cu chim khawh a si rih lo. USA khua lianlian mall zong duhsah tete in an thi te ko hna lai i, ni nikhat ahcun dawr tlawm ngai te lawng a tang te kho men!!!
No comments:
Post a Comment