Nihin ni ah, sikan ngei lo zong an tam chin lengmang. Tleirawl sikan ngeilo motor mawng an tam chin lengmang. Hi hna hi tih an nung tuk. Motor zong a mawng lo ding tar motor mawng an tam chin lengmang. Minung an karh bang, ningcanglo mawng zong an tam chin lengmang. Ramdang rami, licence lo mawng zong an tam chin lengmang. Lam le motor upadi theilo mawngmi zong an tam chin lengmang. Misual zong an tam chin lengmang i, mahthahnak tuahmi motor mawng zong an tam chin lengmang.
Cu lengmang tampi ruangah "Motor accident le zeidang accident thimi zong an tam chin lenmang" ti a si. Hi accident thihnak tampi cu kham khawh dingmi an si ko nain, an kham kho hna lo" tiah NSC nih an ti. A ruang cu a ho nih dah hi bantuk hi a chuahpi te lai timi kha theih khawh cia a si lo.
 |
| Motor hi ngamh tuk ding a si lo. Hi tin dongh khawh a si? |
2016 ah Americans minung 161,374 hi, khawndennak in an thi. Hi chungah 40,327 cu motor accident in an thi. NSC nih, tuan deuh ah motor accident in 40,200 tluk an thi lai tiah an rak chim chung i, an ti ning te a si ko an ti. Ritnak si-ai din sual ruangah, 37,814 an thi ve. Motor accident 4 ah 1 cu cell phone ruangah a si an ti. 2014 in tuak tikah, 2016 i lamcung accident thimi hi zatuak ah 14% a karh deuh ti a si. Kum 53 chung ah motor accident thimi an karh bik kum a si tiah an ti.
Motor accident tamnak a ruang hi US sipuazi a that deuhmi he zong aa ti a si. Sipuazi tlak lio (2008-2012) karlak cu minung nih motor an mawngh ning a tlawm deuh ti a si. 2009 in US sipuazi duhsah tein a kai tikah, kham khawh dingmi thihnak timi "ritnak si-ai" din sual ruangah a thimi hi an karh ngaingai ve i, cancer le lungzawtnak in a thimi changtu thihnak a si cang an ti.
Motor accident tampi cu lam speed limit an santer deuhmi ruang zong ah a si an ti. Atu lio US speed limit hi a liamcia kum hna nakin a sang deuh tuk cang (Ohio ah speed limit sang cem hi 65 a rak si; 2015 in 70 ah an kaiter. Research an tuah tikah speed kaiter hnu ah accident 10% a karh deuh ti a si).
"Nihin ni ah nikhat ah 442 tluk hi accident phunphun in an thi" tiah NSC President le CEO, Deborah Hersman nih a chim. "Hi thihnak hna hi kham chung khawhmi an si ko. Zeitindah kham awk a si ti cu kan hngalh ko nain, mipi lei kap in inn ah siseh, rian ah siseh, lamcungah siseh, himbawmnak le nundamnak hi biapi kan chiah thiam lo caah a si ko" tiah a ti.
USA i hi tluk accident vialte hi, "lengmang" timi ruangah an si deuh caah, kan nunnak a hrawk khotu kan si tawn lengmangmi hi ralrin a herh. Cu kan tuah tawn lengmang thilchia hi, hrial le sum khawh ahcun, accident tampi a zor lai. Voi tam deuh cu, a suallomi zong mi sualmi ruang ah tuar a si tawn.
USA ah Laimi zong motor accident in a thimi kan tlawm ti lo. Thih caan tlin maw a si hnga? Motor hi tih awk kan theih lo caah daithlang tuk in kan mawngh ca dah a si hnga? Lam le motor upadi kan theih lo ruang dah a si hnga? Lam speed kan zulh khawh lo ruang dah a si hnga? Asiloah USA khuacaan le lam naal umtuning kong kan theih lo ruang dah a si hnga? Hihi Laimi nih hlathlai ngaingai zong a herh ve cang.
Motor accident hrial khawhnak ding caah hin, Kawlram siseh, vawleicung ramkip ah bia le hla in forhnak an tuah i, cu zong cu nunpi kan herh ngaingai hna. Accident hrial khawhnak ding caah:
1. Zu na rit ahcun mawng hlah, na mawngh ahcun ri hlah
2. Zeitik hmanh ah lam upadi buar hlah (Abik in speed ah buar hlah)
3. Na mitkuh ahcun i din law mitkuh cim hnu ah mawng
4. Na baat tuk ahcun na tha i damh ta
5. Lam va cuh hlah. Mi kianh zia thiam va zuam.
6. Na kalnak ding lam tha te le tliang tein va theih cia
7. Lam a tu le tu va thleng hlah
8. Khuacaan le lam umtuning fian va zuam
9. Muizan, khuadawm, ruahsur le vur tlak caan i motor le lam upadi theih va zuam
10. Zei tik hmanh ah va hnawhhnam hlah. Tuan phanhnak in him te phanh a biapi deuh
11. Motor mawngh ka thiam tuk tiah va ruat hlah. A thiammi zong zong an accident kho.
12. Motor hi seh a si timi va philh hlah. A caan phak cun na chimhring kho lai lo.
13. Motor na mawngh tik ah, "Nunnak pakhat te lawng ka ngei" timi va ruat zungzal.
14. "Thihnak lam tawi, nunnak lam sau" an ti bang, himbawmnak tu kha biapi ah va chia zungzal.
15. Na motor tire, engine le oil phunphun tha tein va chek law va tuah peng.
16. Motor na mawngh tikah "style va thoh hlah." Highway khi certual a si lo timi va ruat zungzal.
17. Tihchuk ngamh chuk in motor va mawng hlah. Laklawh ruangah motor accident a tam khun.
18. Hnuhmai herlo le khua zoh lo in motor mawng hlah. Daite um lio ah midang nih pah khawh a si.
19. Nuamsul ah motor va mawng hlah. A herhnak lawng ah va mawng.
20. Na tinhnak hmun na phanh hlan paoh cu accident nak hmun a si peng timi va ruat zungzal.
21. Motor na mawngh ahcun "text" tial/rel hlah. Text na tial/rel pah ahcun mawng ve hlah.
22. Zurit bu motor mawngh le "text" tial/rel bu motor mawngh cu aa khat khan a si.
Hi a cunglei tip hna hi na nunpi ahcun, motor accident in tampi luat khawh a si. Mi nih dah an i pah sual ti lo cu, mah nih mi va pah sual cu a tlawm ngai. Pathian sinah thla na cam i, a cunglei Number 1-22 hi na nunpi khawh ahcun, nangmah le na chungkhar kha him ngai khawh a si ve ko!!
No comments:
Post a Comment