Vawleicung ah tikulh lian bik timi Greenland a si. Hihi tikhal nih a tuam peng i a tu cu duhsah tein tikhal an ti cang. Cu Greenland i nitlaklei ummi Baffin Island tikulh in ramkung phun 48 kha hmuhmi tete kha University of Colorado Boulder nih an lak hna i, "radioactive isotope carbon" timi thil hlun kum tuaknak in an tuak tik ah, cu ramkung (plant) hna hi a liamcia kum 40,000 in tikhal nih a rak tuam cang hna an ti.
Vawleipumpi lumnak ruangah, kum chiar tein tikhal ton 390 billion hi a ti viar ti a si. Tikhal tambik an titnak hmun cu, Alaska, South America thlanglei hriang bik le Arctic circle (vawlei a cunglei) cem hin a si an ti. A liamcia kum 50 chung ah hin, tikhal a timi ruangah rili tii hi kutpinam 1 a kai cang. 1961 chung lawngah, tikhal 10.6 trillion tons a tii dih ti a si. Cu a timi tikhal ti nih, U.S State a niam deuhnak ummi 48 hi, pe (4) tluk thukin, ti nih a khuh khawh hna lai ti a si.
 |
| Feshey Disko Bay ah aa vuanmi tikhal tlang |
Cu ramkung (plant) an hmuhmi tete le cu ka hmun i khuacaan aa thlengmi kong an zoh tikah, cu ka ram khua caan hi a liamcia kum 115,000 chungah a lum bik kum a si tiah scientist nih an ti.
Scientist nih an hlathlai le tuaktannak ah Baffin Island hi kum zabu tlawmpal ahcun tikhal pakhat hmanh a um ti lai lo ti a si.
University of California-Irvine nih an hmuhmi cu Antarctica Continent tikhal hna hi a liamciami kum 40 chung hi a dang hmunhma nakin a let (6) a tit ning a rang deuh ti a si.
Hi bantuk in tikhal tlang timi ruangah rilipi tii hi 1979 in tuak tikah, lehmah cheu nak sang deuh a kai cang tiah an ti. Hi rili tii a kaimi nih hin, rikilam khua tam ngai a hrawh cang. Vawlei zong tam tuk rili tii nih a lak cang. Tikulh tam ngaite a hrawh cang i, kum 2100 ahcun Pacific Rili cung ummi ram fatete hi tam ngai an rawk lai i, vawleicung ah refugee an karh te lai ti a si.
Tikhal an tit ning hi a rang tuk. Cupinah tikhal kha a tumtlangpipi in an i cheu i rili ah an i vuan. Cucu "Iceberg" tiah Mirang nih an ti. Nai July 14, 2018 ah Greenland Tikulh i khuate pakhat pawng ah, tikhal a tlang (iceberg) lian taktakmi a rak tla. Cu tikhal-tlang cu, pe 650 a kau i, rili cungah pe 300 a sang ti a si. Khua ah minung 169 an um i, 33 umnak cu an him lo sual lai ti an phan caah an zamter hna. Cu Iceberg cu certual pahnih tluk kau a si, tiah New York Times ah an tial
 |
| Greenland khuate pakhat cu tikhal tlang nih a nenh dengmang |
Cucaah vawleicung khua ah khua dawh le khua tha timi Venice Khuate hna, Bangkok, Jakarta, Dhaka le a dang khuatha tha tampi a hrawh lai ti a si. USA ram chung khua thatha a simi Miami, New Orleans, Boston, Los Angeles, San Francisco, Charleston (VA), Houston le a dangdang Florida le California khua hi tampi a hrawh te lai ti a si. Atu ah hin California rilikam tingtlang le innlo tam ngai hi Pacific Rili tilet nih a hrawh cang hna.
Cucaah khulrang tuk in a ti thluahmahmi Antarctica Continent tikhal thlang lianlian hna hi a tu ning tein an tit ahcun vawleicung hmun tampi ah rawhralnak a chuahpi ko lai tiah scientist pawl cu an thin a domh in an i domh ko cang.
 |
| California rilikam khua cheukhat cu rili ti nih hi tin a hrawh cang hna (2017) |
-------------------------------------------------
Zohchihmi Ca
https://www.msn.com/en-us/weather/topstories/melting-glaciers-in-arctic-reveal-land-hidden-for-40000-years-study-says/ar-BBSTGVO?ocid=spartandhp
2. Mirang nih "Iceberg an timi hi Laiholh cun "tikhal tlang" (a tum-tlang in a ummi tikhal) tinak a si.
3. Tikhal (glacier) timi cu tlang le vawlei langlo in a tuamtu tikhal pawl kha a chim duhmi a si.
3. Tikhal (glacier) timi cu tlang le vawlei langlo in a tuamtu tikhal pawl kha a chim duhmi a si.
No comments:
Post a Comment