Lairam Thingram Zohkhenh Herhnak Kong Daw Aung San Suu Kyi Bia

Naite ah Tikik Tikhawnnak Dam onnak ah Daw Aung San Suu Kyi a va kal ve. Hlan lio deuh ah, Chin State cu Kawlram bawi nih a philh bak in philhmi kan si. "Chin State hi khawi ka dah a um? Na kut dong sawh tuah?" ti hmanh ah, zawndamh hmanh in an rak sawh kho lo. Map hmanh ah motor lam kakhatte Kalaymyo-Tidim lampi le Kalaymyo-Hakha lampi pahnih lawng a ummi state a rak si.

Biapi ah a rak kan chia bak lo. Kan lamsul zong biapi ah an chia lo. Khua le innlo zong biapi ah an chia lo. Sianginn le sizung zong biapi ah an chia lo. Kan ram le miphun zong biapi ah a kan chia lo. Chin State pumpuluk cozah tangak budget le Yangon Saramdum budget hi aa zat ti a si. Chin State uktu santlaih lo zong a si. Kawlram Socialist Cozah santlaihlo zong a si. Aa buathua viar.

Kan ram Democracy phun deuh te ah a van i thlen tik ah le V.P. Pu Henry Van Thio hna a van um tikah, Chin State hi mithmai kan van ngei deuh ve i, Daw Aung San Suu Kyi hna Tikir khua a phanhnak a si. Thil khuaruahhar a si. V.P. Pu Henry Van Thio cung le Daw Suu cung zongah kan i lawm.

Daw Aung San Suu Kyi nih a chimmi tampi lak ah, thingkung le tupi zohkhenhnak kong a chimmi hi, Laimi ni biatak tein kan ruah a herh. A chimmi cu "Laimi nih thingkung nan hau tuk caah nan ram a phawng i a kawng dih. Thingram rawhnak nan tuar. Kachin ram cu an ram cung zuan tikah, thingram a hmawng tuk. A hninghno tuk. Nan nih ram cu thingkung a lotlau tuk cang. Nan thinghau ning le thing nan hman ning thlen a hau. Nan pawcawmnak lo tuah zong hi thlen a hau. Pawngkam zohkhenhnak ah nan i zuam deuh a hau...

Kachin ram cu ram rum an si. Hmunrawn a tam deuh. Ram rum le lung chuahnak ram a si caah, tlanglo tuah hau lo in cawmnak a tam deuh caah, Lairam he cun epchun awk a tha hrimhrim lai lo. Asinain Daw Suu Kyi biachimmi hi kan Lairam cozah lutlai hna le mipi nih biatak tein an ruah a herh. A dikmi a si i, Lairam caah a herhmi a si.

Thingkung cin hi Israel ram hna ahcun Jewish National Fund timi nih heh tiah tangka an kawl i, liamcia kum 100 chungah Israel ram ah thinkung million 250 an cin cang. Cozah bawmhnak an herh lo. Keimah zong nih $36 ka hlut i Israel ram ah thinlung kung hnih an ka cin piak ve. Laimi lakah Israel ram ah thingkung a cing hmasat bik ka si kho men. Thingkung cin hi ka uar taktak i, Israel ram zong ah ka hei cin ve ko. Nikhat caan khat Israel ka tlawn khawh ahcun Jewish National Fund an zung ah va len hrimhrim le an sining va hlat ve hrimhrim hi ka tinhmi a si.

Kenya nu Wangari Maathai nih Green Belt Movement ti in Africa ah thinkung a cin pi hna. 2011 ah a thi. A thih hlan ah Nobel Peace Prize an rak pek. Green Belt Movement nih nihin ni tiangah thinkung million 30 an cin cang. Nu pakhat cawlcanghnak bak in thinkung million 30 tiang cin cu a fawimi a si lo. Asinain tuah khawhmi a si ko. Lairam zong ah tuah khawhmi a si ve awk a si ko.

Asiahcun Aung San Suu Kyi bak nih a ka bak in a kan ti hnu ah, Laimi zeizat nih dah thingkung kan cin? Lairam cozah nih teh thingkung cinnak program a kan tuahpi maw? Krihfabu nih teh kan tuah maw? Khua le tlang nih teh kan i forh maw? Kan ram hi kan daw taktak maw timi hi, Laimi pakhat cio nih kan i hal taktak a herh cang.

Lairam le Kawlram a harnak cu kan lung fian a har tuk. Thuk pi in hmailei ca khua kan ruat kho lo. A tu lio ca lawng hi kan ruat. Cucaah Israel bantuk le Kenya nu bantuk hna cun rian kan tuan kho lai lo. A ruang cu kan thinlung hi a kan dawntu le khamtu a si. Laimi cu thingkung ramkung kan daw lo. Kan rem lo. Lairam ahcun chim lo in um ko cang seh. USA ram fim le ram thangcho kan phanh hmanh ah, thingkung thatnak kan thei kho lo. An rak cin ciami zong kan hau viar. Thingkung kan rem lomi hi, Laimi hi chan tiluan kan dawi khawhlonak a langhtetu thil pakhat a si.

Daw Aung San Suu Kyi nih Kalay in Thantlang in Tikir tiang helicopter in a hmuh dih tik ah, Lairam dihlak a hmuh ti tluk a si. Kan fingtlang le kan ram a phawnnak a hmuh dih hna ti tluk a si. Mifim tuk a si caah, Lairam ah hmailei ah zeidah kan ton te lai timi a hmuh colh ko. Kan thingkung ramkung a rawh tukmi hi, hmailei Lairam thanchonak dawntu le rawhnak chuahpitu ding a si, timi a hmuh caah a chimmi bia a si.

Lairam ah thingram a rawh ahcun, "tii a har lai; khuacaan aa rawk deuh lai. Nikhua a lin deuh lai; thli a chia deuh lai; cinthlaknak a har chin lengmang lai; atu Tikir Tikhawnnak dam hmanh kha a reu kho mi a si" timi a fiang. Cucaah Lairam ah thingkung zohkhenh le cinthlak a herhnak kong Aung San Suu Kyi nih a chim colh ko. Kan Laimi hruaitu tampi nih, Pi Suu Kyi bia hi fak pi in ruah le a tak in tuan i, thingkung cinnak project lianlian hi siam a herh.

Pi Suu Kyi cu, ram pumpi hruaitu a si caah, cu a chimmi bia hi Chin State cozah nih din tein ruah ding a si lo. Kan Chin State cozah zong hi biatak tein khuaruah an herh. Lairam cu Laimi nih kan ser awk bak a si. Lairam cozah nih Project tampi an ser i, cozah ah heh tiah tangka an hal kha a herh. Project suai lo in zeitindah central cozah nih cun tangka cu a tlakter lai? Daw Ang San Suu Kyi nih a chimmi bia kha biatak tein "action" lak i, Chin State ah thinkung million 300  cin kan duh? Project kan suai cang? Cu ka ah acre cu zat tibantuk in heh tiah suai i, cuticun Central Cozah ah budget ah tlakter ding a si.

Cuticun Lairam ah project tampi a um kho lai i, mipi rian tampi an ngei lai. Project lianmi pakhat ruang ah project dangdang le development dangdang a rat chih lai. Cun Lairam a hninghno fawn lai. Kan tiram a tha lai. Kan khuacaan a tha lai. Tii a tam lai. Cinthlak le zuatkhalh a rem lai. Thli a thiang lai i, kan ngan a dam lai. Thingkung a tam ahcun, a thatnak ding hi, chim cawk lo a si.

Cucaah Kawlram cozah lutlai bik nih an chimmi hi, tha tein "caan tha" ah ruat in, cu bia lila cu cherhchan le hman in Chin State cozah nih riantuan thiam le khuaruah thiam hi a herh taktak. VP Pu Henry Van Thio um lio te zong a si caah, Lairam caah  caan that lio te a si. Hi tluk caan tha hi Chin State cozah nih hman thiam le Project suai tik ah a lianlian suai ding a si. A hmetete tampi suai cu ram thanchonak taktak an si kho lo. Contractors i cuhnak le buainak men fang lawng a si.

Chin State cozah nih project tampi an suai lo ahcun kum zeizat hmanh kan hruai hna sehlaw, Lairam a thancho hnga tluk in a thangcho lai lo. Cucaah Daw Aung San Suu Kyi nih Tikir khua ah a chimmi bia hi, Chin State cozah nih zeitindah a phi kan chuahter khawh lai timi cu thuk taktak in ruah le lam kawl a herh!


                                             ___________________________



Chihchiah

Chin Ramkulh in a tlun lio ah Daw Aungsan Suu Kyi chimmi bia English in an chuahmi ka van tar chih. Hihi Myanmar Embassy, Washington D.C., nih an tialmi website ah an tarmi a si. A tlangpi cu, "Thingram a rawhmi ralrin peknak" ti bak a si. Lairam le Laimi ralrin a kan pek. Cucu Laimi nih kan fak pi in ruah awk a si hnga lo maw?

Warning on forest depletion

State Counsellor Daw Aung San Suu Kyi said when she flew to Chin State by helicopter she was delighted by its beauty.

“I also noticed Chin State needs to conserve the environment in the long run. What I mean is forest depletion,” said the State Counsellor. “We live in the world for a while. During the time we are alive, we, human beings, have to take responsibility to conserve the environment, including land and water resources.”
“We are not owners of land and water resources. We are caretakers. So, we have to understand that we have to conserve them and pass them to the next generation in good condition,” said the State Counsellor.
“Even more important is the socio environment, and all the national brethren of Myanmar have to take responsibility for their attitude, because the current generation has an opportunity, to a certain extent, to influence the attitude the next generation adopts,” she said.
“I would like to urge the current generation to make the best of use of opportunities to cultivate the next generation,” said the State Counsellor.