Nu hrinmi minung paoh cu a chan a tawi i harnak in a khat. Pangpar bang in a hung par i a uai than ko. Thladem bang in a tli i aa peh lo. …..A ni hna cu rel piak an si. A thla hna cu zeizat an si kha Nangmah nih na ngalh..Nangmah nih "a lonh khawh lo mi ramri kha na ser piak" (Job 14:1,2,5)Hi ka zawn te ah ka van char duhmi cu, "lonh khawh lo mi ramri" timi hi a si.
Minung hi, zeitluk midawh, mifim, mirum, mithawng, milar le mithiam si zong ah, lonh khawh lo mi ramri a ngei. Kan ngei cio. Cu lonh khawh lo mi ramri a sertu cu, Pathian a si. Pathian nih a kan ser. Vawleicung ah a kan umter. Nunnak caan zeimaw zat a kan pek. Cu chung hmanh cu, harnak in a khat. A cheu caahcun nun hi a har taktak. Cucaah an si a vang i a thatmi zong an um. Job lila nih "nun hi a ka nor tuk" tiah a timi bantuk khi an si. Nun nih a rak normi hna hi, an rak tam tuk.
Nun nih a nor tuk hna caah, naite South Korea i hlasak thiam muidawh le cangtu miza taktak a simi pa minung pathum an I that ko. Titsa sinak in tuak ahcun an pam tuk. Aa nuam tuk rua tiah kan rak timi hna zong nuamhnak an rak ngei theng lo. Cu mahthahnak (suicide) hi maw an lonh khawh lo mi ramri a si ko hnga timi ka ruat.
Hi ramri hi lonh khawh a si hnga lo maw? Ka ruat than. Pathian khiahmi ramri hi cu kan lonh kho bak lo. A mah belte cu, ningcanglo kan nun i kan mah tein nunnak kan i lak ahcun, cu ramri cu naih khawh cu a si men lai. Mah nih zohkhenh thiamlo ruang, daithlan ruang, ralrin lo ruang le ningcang lo nun ruangah. Cu zong cu ka fiang lo. Asinain Pathian nih caan a kan khiah piakmi le ramri a kan chiah piakmi cu thawn khawh bak a si ti lo. Hlatter deuh khawh a si ti lo. Nun peh si chunh zong ah zei san a tlai lo.
Cu lonh khawh lo mi ramri cu, a sunglawi tuk. Zeicatiah pakhat lawng a si caah a si. Pahnih a um lo. Cucaah a sunlawi khunnak a si. Vawlei ah a tam tukmi thil cu a sunglawi lo i, "Paleng kheuh he an tahchunh tawn." Paleng cu a kheuh lio ahcun, char cawk lo in rang phung in a keu ko. Asinain thil a har tukmi cu, "sui le diamond" he an tahchunh. A ruang cu, a tlawm tuk caah a si. Rak tam tuk sehlaw, sui le diamond zong a sunglawi hlei hnga lo.
Hi minung nih kan lonh khawh lo mi ramri cu, cu sui le diamond nak in a let tam tuk in a sunglawi deuh. A ruang cu "ramri pakhat te lawng a si caah a si." Zei hmanh nih a cawk khawhlomi ramri a si.
Cu ramri phak hlan ah ralrin taktak a hau. Zeicatiah cu ramri cu khawika dah a si? Zei tik dah ka phak lai? Khawika hmun ah dah ka phak lai?" timi hi minung nih theihfian khawh a si lo. Hngalh chung khawh a si lo. Zeitluk fim zongah tuak le hgnalh chung khawh a si lo caah a si.
Ramri hi zei tik can paoh ah kan phan kho. October 2015 ah American Airlines pilot pakhat Boston in Phoenix karlak an zuan lio ah, vanlawng a mawngh cuahmah bu in a thi. Vawlei ah a tum manh lo. A ramri cu a thutnak pilot thutnak te kha a si ko. A thimi pilot nih vanlawng a mawnghmi cu minung tampi nih an rak i cit. Tih a nung kho taktak.
Naite November 24 ah, Russia ram Aeroflot pilot pa te zong vanlawng a mawngh lio ah a thi ve ko. Kum 43 thawng a si. Mino taktak, doctor nih a tu le tu chek mi an si ko. Vanlawng an zuan lai paoh ah chek mi an si. Cu hmanh an thih ahcun, kum 10 dan ah voikhat hmanh doctor aa piah lo mi nang le kei thihnak cu a lam a tam tuk.
Cu ve bantuk in pastor cheukhat cu phungchim lio ah an thi. Pastor pakhat cu tipil pek lio bak ah tibual chung in tisartlam nih a van dawh i a seh i a thi. Kawlram ah voi tampi cu, tikhur chung ah an va lut i, a thi colhmi an tlawm lo. Mintha minthang Dwe cu zan a ih thi kar ah a nunnak a liam. Vawleicung dawh ah minthang a simi Marilyn Monroe te hna an i kholhnak khan kam ah an nunnak a liam men. Michael Jackson te hna zohchia in an thi ko. Kan chim cawk lai lo. Cu ticun lonh khawh lomi ramri hi kan ngei cio hna.
Kan fian khawh lo mi cu, kan ramri hi khawika dah a si timi hi a si. Asinain kan fian bakmi cu hihi a si. Kan lonh khawh lo mi ramri pin lei ahcun, zeihmanh kan i kalpi kho ti lai lo timi cu a fiang bak. Kan motor, innlo, dawhnak, thawnnak, dollar, chawva, suingun le kan takpum cung i a ummi thilri hmanh hi kan i kalpi kho ti lai lo. Tangka tampi dih in thi deng kan cawnmi kan degree zong kan i kalpi kho ti lai lo. Kan thluak le fimnak zong, kan kaltak dih lai. Cucaah "cu ramri cu, zeizong te aa thlen dihnak ramri" a si cang.
Khi ramri khin cun, bawi le chia a um ti lo. Mifim le mihrut an um ti lo. Rum le sifah um a si ti lo. Mider le thawng an um ti lo. A dawh le muichia an um ti lo. A lar le lar lo an um ti lo. Minthang le thanglo an um ti lo. Zeizong te an thar i an i thleng dih cang. Thil hlun cu an lo dih cang. Thil thar viar an si cang. Zeizongte kan nun lio tuahsermi hawih tu in, biacaihtu Pathian nih bia a kan caih cio te ding khi a si. Cucu Bible cawnpiakmi ningte a si ko.
Cucaah ruah dingmi pakhat lawng a um. Kan lonh khawhlomi ramri pin lei cu, zeitik hmanh ah a dong ti lo mi thil a si. Vanram kai a si le a dong ti lo. Hell tlak a si zong le a dong ti lo dingmi a si. Cucaah fian a herhmi cu, "Ka lonh khawh lo mi ramri pin lei kan thlarau nunnak khi zeidah a va lawh te hnga?" timi a si ko. Cucu careltu nang teh tha tein na ruat bal ve maw? Na lonh khawh lo mi ramri pal ding ah na timcia cang maw? Na manh ve cang maw?
Na timh zong timh lo zong ah, lonh khawh lo mi ramri cu na lonh kho hlei lai lo. Cu ramri na phak hlan ah, Jesuh kha ka Bawipa le ka khamhtu a si tiah na ti kho ve cang maw? Na ti khawh ve lo ahcun lonh khawh lo mi ramri pin lei ahcun, Jesuh auh khawh le sawm khawh a si ti lai lo. Nang le kei nih kan ramri kan phak hlan te lawng ah, Jesuh hi kan Bawi ti khawh a herh.
Nang na ti ve cang maw? Na ti rih lo ahcun 2020 ah na nunnak lam an hruiatu zeidah a si lai? Na Bawi ho dah a si lai?
No comments:
Post a Comment