Bible Cauk Chungah Samfa Aa Tenh Timi Bia

Khrihfa tampi hi, Bible i Jesuh bia le Pathian bia nakin, midang nih tehtekhanmi, mangmanhmi, thil khuaruahhar tuahmi le zeidang larnak phunphai hi a zummi hi kan tam ngai tawn. Buddhist, Hindu le Muslim le Judaism nakin kan zual deuhnak tampi a um. Hi lak ah,Mizoram le Lairam Khrihfami zonhg mi tampi kan i tel ve. Africa pawl zong hi thil khuaruahhar phunphai an uar tuk. An nih le bang hi cu, an hruaitu nih tangka hmuhnak ah a hmangmi an tam tuk ti a si.

Pathian bia hi, tluangtlam tein zumh ding a si ko. Bible ca nih tuah u a timi tu tuah lo in, a leng thil tu kan va tuah deuh. Kawlram nelrawn um Khrihfami cheukhat cu, an damlo deuh ahcun thlacam nakin phungki sin panhmi an tam ngai. Molhtamh phun in um hrimhrim ahcun, phungki sin panh colh a si. Kan zumhnak hi a taktak a si maw timi check a hau.

Naite ah Lai Tlang in thawng pakhat a rak chuak. "Lai Tlang ah, pakhat nu aa lar i, Bible ah rak kau u law samfa pakhat paoh aa tenh lai. Cu Bible chung samfa cu tii ah rak ciah u law, nan din ahcun nan zawtnak a dam lai. Covid-19 zong in nan dam lai, tiah a si. Pastor pa na zum maw?" tiah an ka hal.

"Vawleicung ah thil si khomi tampi a um. Pathian nih a tuah duh ahcun a si kho ko. Satan zong nih a tuah duh ahcun a si kho fawn ko. Cucu kan mah tein tuak cio ding a si. Mah hi kong cu, Lai Tlang ka um lo hnu ah a cangmi a si. Nizan tihni te cangmi a si. Voi tam deuh cu, ka lar a timi hna hi, lar taktak zong a si kho. Mangcanghlan um bia zong a si kho. Lih tawnmi zong a si kho. Pathian pek taktakmi zong a si kho. Satan pekmi zong a si kho ve thiamthiam. Kei ka theih khawhmi a um lo" tiah ka leh hna. Asinain keimah pumpak cun ka zum lo. Mah bantuk zum phun ka si lo" tiah ka ti hna.

Cu ahcun Rev. Hrang Bik bia ka lungah a chuak. Rev. Hrang Bik a kan tlawn lio ah USA ah a pawmning ka rak hal. "Lairam le Mizoram i, ka lar a timi pawl hi na hmu hna maw? Zeitindah lar hi na ruah? Cun thlacam tik i tluk hna hi teh zeitindah na ruah ve" ka ti.

A ka lehmi cu,  "Vei aw, ka lar a timi hna hi, pakhat hmanh zumh ding an si lo. Kan va ton taktak hna le zei ngaingai an si lo. A cheu cu thur bembum hna in an rak um. Cun michem i tluk timi hna cu, ka zum lo. Ka pawm naisai lo. Zeicatiah Bible ah thlacam i tluk timi a um lo. Cun van le vawlei karlak ah thlarau phun tam tuk a um le zei thlarau nih dah a tlukter hna timi kan kan thei lo. Ka zum naisai hna lo" tiah a ti.

Mizo le Lai hi kan zumhnak ah, Bible nakin minung tonmi tu khi biapi deuh ah kan chiah tawn caah, kan pial lengmang. Kan zumhnak a hnek kho taktak lo. "Thil khuaruahhar" phun khi kan zum tuk. Hihi Judah mi he kan i lawhnak a si.

Jesuh nih, "Hmelchunhnak le khuaruahhar (thil) ka tuah lo ahcun, nan ka zum bal lai lo" (John 4:48) a timi hi Mizo le Laimi Khrihfa kan sining te a si.  

Laimi Khrihfa tampi cu, mi chimmi paoh kan zumh tawn caah, mah tein dirhmun fek le zumhnak fek kan ngei kho tawn lo. Pathian pekmi a bia umnak Bible nakin mi tehtekhanmi tuktak tu khi kan i za tawn. Cucaah phungchim thiam deuh paoh nih, a kan mer lengmang. Kan zumhnak hi a hnet kho tawn lo.

A tu i Lai Tlang ah "Bible chungah samfa aa tenh..." timi tuanbia hi a tu lawng a si lo. Mizoram ah hi bantuk he aa lomi tuanbia a um bal cang. Ka rak ka tonmi thil pakhat a um.

990-92 hrawnghrang ah a si. Nithla ka chinchiah ti lo. Mizoram ah a rak cangmi kong hi, Lairam tiang a rak phan. Cucu a tu chun Lai Tlang thil cangmi kong he, aa lo.

1988 in ram buai aa thawk. Zei tuah awk kan thei lo khual ka tlawng. 1990 hnu deuh ah Thau ah ka rak tlung. Kan innpa pa nih, "Mizoram ah ngakchia pakhat a chuakmi a um. A lu ah samfa pakhat hmanh a um lo. Cu nih a chimmi cu, Bible cauk chungah ka samfa ka tenh dih. Cucaah samfa ka ngeihlonak a si tiah a ti i, a thi colh. Bible cu kan keu hna hi, a tlawm bik ah samfa pakhat cu an um viar cio. Thau ah bible cu kan kau hna le samfa cu an um taktak" tiah a ti.

Cucu khuaruahhar tuk awk zong khi a um lo nain, an zumh cang ahcun an khuaruah a har ko. Bible cu chuk zoh in rel a si. Kan rel paoh ahcun a chung samfa tlak cu a fawi tuk. Cucu a cheu cu kan tuak kho lo. Mi chim paoh kha, tuaktannak ngeiloin kan zumh ko.

"A si tak ee. Ka Bible cauk kan kau ve lai" tiah ka ti. Lai Bible cu ka va lak i, kan kau. Samfa cu pakhat lawng hmanh um lo in a kenkip ah a tawi he sau he an um. "Khah na zum lo le a um bak ko hi" tiah an ka ti.

 "Aw, ka zohmi Bible peih a si cu? A um awk a si ko. Hi thamtham cu khuaruahhar ding a si tung lo. Kan samfa cu million in a ummi a si i, nifatin zan fatin a tlawng lengmang. Bible cauk lawng si lo in, hla cauk le zeidang cauk zong ah aa tenh cio ko lai" tiah ka leh hna.

"A si ne kun ahcun, ka zoh setsai lo mi le a caancaan te lawng ah ka relmi Judson lehmi Kawl Bible cauk ka ngei le kan zoh lai" tiah ka ti hna. Inn ah Kawlca in tialmi Bible cauk a thar cu ka va lak.

Cu Kawl Bible cauk cu a thar ngaimi a si. Keimah lawng nih ka hmanmi a si. A rel cu ka rel lengmangmi a si nain, a thar ngai. Kawl bible cuak cu kan kau. Genesis in Biathlam tiang bak tlap khat hnu tlap khat kan kau. Samfa cu pakhat te zong kan hmu lo.

A um ko nain kan hmuh lo bia zong a si kho ve thiamthiam ko nain, samfa cu fa khat zong kan hmu lo i, "Ziah hi Bible cauk chung zongah a tenh ne lo? Bible ca paoh ahcun aa tenh ve ding a si lo maw? Bible chung a ti caah, vawleicung bible vialte, Mirang bible le miphun dang bible vialter, a thar he a hlun he chung ah a um awk hrimhrim a si" ka rak ti hna. Ka Kawl Bible ca chungah a um lo caah, lungawtawm in an rak um.

Tutan ah Lai Tlang ah aa larmi zong hi, ruah deuh rih a hau. Zumtu hna nih hin, "Bible Pathian bia hi biapi ah chia lo in, a nih nih mang a manh, a nih a lar, a nih nih cu tin tehte a khan, a nih nih khuaruahhar a tuah..." timi thil khuaruahhar paoh khi zumh awk a si hrimhrim lo.

Jesuh nih, "Nan nih cu, thil khuaruahhar ka tuah caah le changreu le nga kha rawl ah ka canter ca pei nan rat ko cu." Thil khuaruahhar ka tuah lo ahcun nan zum duh lo" tiah a rak timi khi a rak dik tuk. Judah mi pawl hi, thil khuaruahhar a um lo ahcun Pathian prophet zong an rak zum hna lo. Jesuh hmanh khi an rak zum lo. Jesuh a bia a caihtu Herod hmanh nih khin, Jesuh hmuh a duh. A ruang cu thil khuaruahhar pakhat tal a tuah men lai tiah a ruah caah a si.

Nihin ni zumtu tampi hi, thik khuaruahhar hi kan zum tuk. Hihi Judah miphun he kan i lawhnak a si. Thi hi a si kho le si kho lo? Bible cawnpiak ning a si maw si lo, timi zong ruat lo in, chim thiammi nih an chimmi paoh hi kan zumh ko. Cucaah "Lai Tlang ah samfa hang an dinnak zong a si. A cheu cu a ciar in an ciar i an din ti a si. A cheu cu USA zong bible chung samfa hang cu rak ding ve u an ti le a dingmi an um ve ti a si."

Hihi Pathian zumtu tuah ding a si hnga maw? Bible cawnpiakmi bia a si hnga maw? Jesuh cawnpiakmi a si hnga maw? Pathian duhmi thil a si hnga maw?