Rev. David Lah le Bishop Gerald Glenn Zumhnak Hi Zeitindah Na Ruah?

Pastor David Lah le a hawile an tlaih hna timi thawngpang a chuah tikah lung a tha lo ngai. Kawlram polik nih Saya David Lah le a hawile pastors pahnih an tlaih hna i, Covid-19 he pehtlai in cozah chuahmi upadi an buar caah a si tiah an ti. A ruang cu Pastor David Lah cu Covid-19 zawtnak an hniksak tikah a ngei tiah an ti. An hawi le dang zong a ngeimi an um ve ti a si. An tlaihnak hna hi Yangon ah a si.

Cozah nih taza an cuaimi hna hi Pastor Saw Kwe Wah, U Saw Ray Gandi, Pastor David Lah le U Wai Tun a si i, taza an cuainak hna upadi pohmah cu Disaster Management Law nan buar timi caah a si. Covid-19 ruangah mibu um lo ding timi upadi an buar caah a si an ti. April thla chuakka tiang Yangon khua ah, Khrihfa biaknak cawlcanghnak an ngeih caah a si an ti. Yangon ah hin, mibu cawlcanghnak tuah lo ding tiah March 13 in Yangon ramthen cozah nih upadi an ser cang i, cu upadi an buar caah a si. "An sual" ti a si ahcun kum khat thawng thlak khawh a si tiah an ti. Coronavirus zawtnak hi Kawlram zong ah a karh ceumau i, minung 62 an zaw i, pahnih an thi cang.

Sual phawtmi hna lak ah hin, Pastor David Lah zong zawtnak a ngei ve tiah Nikhatni ah an ti. Myanmar's Ministry of Health and Sports nih, "Biaknak lei pumhnak an tuah caah, pastor tel chih in, Minung 13 zawtnak an ngei" tiah Nihnihni ah an ti ve. Hlasakthiam Myo Gyi zong tu hla chuak ka ah Yangon pumhnak ah a telpi ve hna i, a nih zong zawtnak a ngei ve tiah an ti. Pastor le Myo Gyi cu an umnak municipal zung nih an hniksak hna i, zawtnak an ngeihmi cu an hmuhmi a si.

Covid-19 zawtnak a ngeimi hna an umnak hmunhma le an i pumhnak Insein Township ummi Baptist Church vialte, Nihnihni ah cozah nih an khar dih hna. Minung luhchuah khawh a si lo tiah Yangon Regional Office nih an ti.

Kum 43 a simi David Lah zong zawtnak a ngeih caah, a mah he naihniam in a ummi vialte Covid-19 in zawtnak an ngei maw ngei lo tiah hniksak dih an si. Kawlram i Vice President Pu Henry Van Thio zong Pastor David Lah he February ah tonnak an ngeih caah, an mah chungkhar zong Covid-19 an ngei maw ngeilo tinak caah, an hniksak ve hna i, an nih cu an ngei lo ti a si. Vice President a va pumh hi cu cozah nih an kham hlan a si kho men.

Pastor David Lah and VP Pu Henry Van Tho (Credit: Irrawaddy News)

Pastor David Lah he aa tongmi le pehtlaihmi minung 30 kha an hniksak hna ti a si. A ruang cu mipi an thinlung a nuamh lo caah a si an ti.

Amah hi Kawlram i Khrihfa tamnawn chungah a lar ngaimi a si. Mi tampi nih an uar i, mi tampi he zumhnak ah aa ralkahmi zong asi ve. A thawngtha hi mi thinlung ah tuaitamnak a um pahmi a si an ti. Amah hi DREAM Ministry International timi bu a dirhtu a si i, 2014 in ramkip ah thawngtha chim in a vakmi a si.

Covid-19 in zawtnak a ngeih hlan ah, mitam deuh nih an zumhnak a pawm lo i, biaknak pumhnak hi tuah ding a si lo. Zawtnak nan i chawnh kho tiah cozah le mifim thiam nih an timi kha a pawm lo ti a si.

Jesuh zumh taktak ahcun kan zaw kho lai lo tiah a pawmmi a si i, a  mah nih a chimmi cu

"Nan Khrihfabu nih Jesuh hi biatak tein nan zumh ahcun, nan zawtnak nan ngei hrimhrim lai lo timi hi, aamah kan khan khawh hna" tiah a chimmi a si. 

Hi kong hi tha tein ruah a hau. Khua ka ruat ngai. Buddhist Pura ah a bu deuh kalmi teh an um ve hnga maw? An tlai ve hna hnga maw? Cun Facebook ah Yangon Medical Students pawl le sizung riantuantu pawl zan ah hla an sa i, an i chawk ve ko. Cu hna teh an tlai ve hna hnga maw? Yangon ah Tinkyan Puai a hmangmi mibu an um len ko. Cu hna teh an tlai ve hna hnga maw?" Tlaihmi hna hi Covid-19 positive ngeimi lawng maw an tlaih hna? Khrihfa lawng maw an tlaih hna?" timi ka ruat ngai.

Cun Khrihfami hi kan theology zong ruah a herh ve. Saya David Lah zong a zumhnak theology hi ruah than a herh ve. Voikhat cu USA ah mizaw kan zoh. A zual tuk cang. Mi pakhat nih "Pastor thlacam piak hna u sih. Pathian nih cun a damter khawh ko?" tiah a ti. "A thi ko cang lai hih. Thla cu kan cam lengmang ko. Hihi Pathian duhnak a si ko rua" ka ti. "Cam than ko hna u sih" a ti le thla kan cam than. A dang cu damnak maw an cam? Thihnak dah ka thei lo. Kei cu Pathian duhnak hi thihnak a si ko cang" ti kha ka thinlung ah a um caah "Bawipa na duhnak a si ahcun tuan ah la cang ko" ti tu in ka cam.

Pathian duhnak cu kan thei kho thlu lai lo nain, Pathian duhnak le tinhmi cu a rak um ve hrimhrim ko. Saya David Lah zumhnak kong hi, Khrihfa tampi nih thuk pi in ruah a herh. Pathian hi kan ruahmi paoh a ruat ve mi a si lo. A caan ahcun kan zumh ning paoh in a ummi a si lo. "Amah tuah duhmi a tuahmi Pathian tu a si tawn."

Khrihfa nih ruah ding tampi kan ngei,. Kan zumhnak zong a va thawng ngai men ko lai. Asinain kan zumhnak kan timi khi "Kan mah lei zumhnak lawng a si sual maw? Kan zumh bantuk khin teh Jesuh nih a kan zum ve maw?" timi ruah a herh. Kan zumh kan timi bantuk khi, Pathian duhnak teh a rak si ve hnga maw timi zong ruah a herh.

Kawlram cozah nih Covid-19 kong ah upadi phung tha tein an sermi um ko i, cucu biaknak kip nih zulh a herhmi a si. Vawleicung ramkip nih an tihmi le UNO pi hmanh nih aa buaipimi le US cozah hmanh nih "lock-down" an tuahmi a si. Cu tluk in tih a nung. Cucaah Covid-19 upadi cu, pumpak caah a tha. Mah chungkhar caah a tha. Mah khua le ram caah a tha. Mah cozah caah a tha. Mi vialte caah a thami a si. Biaknak kip-Hindu, Buddhist, Muslim le Khrihfa-vialte caah a thami a si ko.

Bible nih a kan cawnpiak: "Cozah nawlngeitu uktu hna kha an nawl va ngai hna u" (Rome 13:1) ti a si. Covid-19 hi, zeidang ruang ah chuahmi upadi a si lo. Mi zapi ngandamnak caah chuahmi upadi a si. Khrihfa vialte zong nih kan zulh dingmi a si. Saya David Lah le hawile zong nih zulh dingmi upadi a si. Ram uktu zong nih zulh dingmi a si.

Cun Khrihfa zumtu caah ruah ding tampi a um. Jesuh zumtu si ruang ah kan zaw lai lo timi zumhnak  ngeih cu  tha ko nain, Pathian duhnak a si le silo cu a ho hmanh nih theih khawh a si lo.

Bishop Gerald Glenn riantuannak New Deliverance Evangelistic Church

Nizan tihni te ah, Virginia ah Minak Pastor an bochan taktakmi a thi. A min ah Bishop Gerald Glenn timi a si. An Khrihfabu min cu New Deliverance Evangelistic Church, Chesterfield, Richmond, VA a si. Easter ni ah a thi. Biship Glenn hi March 22 ah a donghnak phung a chim a si. March 23 ah Virginia Governor nih minung 10 cung nan i pum kho lo timi nawlbia an ramkulh ah a chuah i, cu phungbia cu zulh a duh lo. Bishop Glenn nih a timi cu:

"Pathian hi a tu i buainak a chuahpitu rungrul nakin a ngan deuh timi fek tein ka zumh. Ka bia hi nan i cherhchan khawh ko" tiah a ti.

Cun "Keimah cu herhmi ka si. Pathian thawngtha chimtu ka si. Pathian he bia kan i ruah..." tiah a ti. "Kan biakinn ka khar lai lo. Thawng ka tlak tiang asilole sizung ka um tiang" tiah a ti.

Asinain April 11, 9:00 PM ah Bishop Glenn cu Coronavirus in a nunnak a liam. An church members cu an ngaih a chia tuk. Glenn a fanu, Mar-Gerie Crawley nih a timi cu, "Ka pa nih hin, nawlbia a buar caah a chimmi a si lo, mipi nih tihphannak an ngeih tuk caah a chimmi a si. Mi vialte hi innchung ah um awk a si" tiah a ti.

Kei zong nih hihi ka ti ve mi a si. "Coronavirus hi kan tih tuk ding a si lo. Coronavirus kan tih ruang le lungrethei le awklokchawng le vansangau in kan um awk a si lo. Pathian nih kan caan za a ti lo cun kan him ko lai. Pathian nih nan caan za a ti ahcun kan i veng kho lai lo. Minung lei kap cun tih ding le ralrin ding taktak a si. Asinain samfa nakin a let nga a fa deunmi virus cu hmuh khawh le tongh khawh a si lo. Kham awk zong a har tuk. Pathian nih nan caan za a ti ahcun kan thi ko lai. Zumhnak fek le ruahchannak tu ngeih ding a si" tiah ka ti tawnmi hna a si ve. Keimah zong nih ka tih lo. Asinain ka tih lo timi ruangah ka zaw lai lo, ka thi lai lo" timi a si hrimhrim lo.

Coronavirus hi mi vialte caah tih a nung bak mi rungrul a si. Flu le Influenza sawhsawh bantuk a si lo. Thahnak sii le khamnak sii a um rih lo. Minung cuap kha a doh i thaw a pihter khotu zawtnak a si caah, zawtnak a fakmi cu khulrang ngai in an thi i, tih a nung taktak. Hi zawtnak hi, nihsawh thlanglamh ding a si lo. Jesuh kan zumh bu le Pathian kan zumh bu in, minung sinak in ralrin a haumi zawtnak hrik pakhat a si.

Zumtu u le nau hna, Khrihfa zumtu na sinak ah, Pastor David Lah zumhnak le Bishop Glenn zumhnak hi nang zeitindah na ruah? Khrihfa nih hin, hi bantuk caan lio ah cozah nawlbia hi kan zulh ding maw a si? Zulh lo in dah kan um awk a si? Bible nih "uktu hna an nawlbia kha zul hna u" tiah a timi hi zeitin dah nang na fian ning a si?

------------------------------------

Zohchihmi ca

1. Irrawaddy News
2. Virginia pastor dies from Coronavirus after vowing to keep church open despite essential business order https://www.foxnews.com/us/virginia-pastor-dies-coronavirus