Victoria Camp Ah Ngakhur Tha Taktak An Ngei

Victoria Camp Model

CNF headquarter hi Lahva le Tio aa tonnak pawngte ah a ummi a si i hmunhma rem ngaingai a si. CNF hruaitu pawl hi, hmunhma thim an thiam taktak tiah a hmumi paoh nih an ti. An area hi, rawn a kau ngai i, innlo ca lawng siloin, cinthlaknak zong a rem; zuatkhalhnak zong a rem. Ngakhur tuahnak zong a rem. Nihin ni ahcun khua nuam ngaingai a si cang ti a si.

Naite ah Pu Ngun Tling nih ngakhur tha taktak a van tuah piak hna i, Victoria Camp caah tuanbia thar aa tial cang. Victoria Camp a hmunh chung, hi tuanbia hi a hmun ve cang lai.

Hi hmun ah hin Pu Ngun Tling nih tangka tam ngai a hlut hna i, ngakhur zong a tuah piak hna. A ngakhur hi an kau ngai i, hmailei ahcun Victoria camp thanchonak caah thahnem santlai ngai a si te lai tiah ruahchannak a um. Victoria khuacaan remtertu, a dawhtertu le sipuazi ca zong ah, tampi thanchoanak chuahpitu ding zong a si te ko lai.

Pu Ngun Tling nih a chimmi cu, "Victoria Camp ummi zong rian kan tuah piak khawh hna ahcun, chungkhar caah rian an tuan cio lai i, chungkhar an pawcawmnak zong a thahnem deuh te ko lai" tiah a ti. Victoria camp hi a mah tawkzawn tein thanchonak rian zong tuan awk a rem ngai ding hmunhma a si tiah Pu Ngun Tling zong nih a chim.

Victoria Camp ngakhur

Victoria Camp ah hin, a tha ngaimi theset zong tampi chuah i, Thantlang le a pawng hrawnghrang khuate le Mizoram lei an herhmi zong tampi a pek khawh hna lai tiah a ti. Vawlei a that caah, camp hrawng ah hin, tawlreba, zawngtah, banhla, kawpihlum, antam, piat, daidim, khanghmung, tiamti, ruamau, hai le rungtuban cinnak zong a rem taktak tiah a ti. Cu ngakan tuahmi chungah eimi kawhra cin ding le ngakan pawngah vok zong zuat chih ding hi a rem taktak a si tiah a ti.

A tanglei hi ngakhur cawh tharmi hmanthlak an si. Lahva tii an pekmi a si. Ngakhur hi pakhat lawng aa lim rih. A kauh hi pe 400x90 a si. Ngakhur dang zong cawh ding (6) timh tuah lio a si. Ngaci 7,000 an tlah cang ti a si. Hihi CNF camp tuanbia ah, Mirang nih "milestone" tiah timi pakhat a si.

Hi ngakhur hna nih hin, Victoria Camp ummi hna caah tampi thathnemnak le thanchonak a chuahpi te lai tiah ruahchanak nganpi a um. Keimah hi Thau ah ngakhur pahnih ka ngei i, nga zuat hi zeitluk in dah a hlawk le a karh ran timi hi, tha tein ka theih ve.

Victoria Camp Ngakhur cawh lim ka

Victoria Camp Ngakhur ti thlah ka

Victoria Camp hi, khua pakhat bantuk in an ser khawh cangmi hi, Chin miphun caah a sunglawi taktak. WA khuapi Panghsan le Mong La te hna le KIA Headquarter Laiza a dang KNU le SSA headquarter tluk tha in sak khawhlo hmanh ah, a mah le tawk tein that taktak in sak ve a herh. Rakhine ralkap te hna zong an ram ah, mah bantuk si an duh ko nain an si khawh rih lomi a si. Kawlram cozah he i kahnak um lo in, daihnak tu tuah i, federal uknak ngeih khawh ding hi cu, a tlawm bik ah kan i tinh a hau i, cu kan phak hnu pin tiang zong a herh can paoh, CNF hi kan mipi nih dirkamh a herh ko. Hi lam dah ti lo cu, Federal hmuh khawhnak ding lam hi, a um ti lo.

CNF hna an i zuamnak thawng in le harnak tam tuk an tuarmi thawngin, a tu ah Victoria Camp ah thawng ngai le cak ngai in khua an sak khawhmi a si. Hihi Chin miphun caah thil tha taktak le lawmh awk tlak taktak a si. Hi camp aa rawklonak ding zohkhenh le bawmh cio hi Chin miphun kan rian a si tiah ka ruah. Thazaang, chawva, fimnak le ngeihchiah le zeidang zong in tanpi an herh ko.Camp Victoria hi, kan miphun symbol (hmelchunh) pakhat a si timi kha ruat in, kan dirti a herh ko.

Pumpak zong nih kan bawmh hna a herh. Bu kip zong nih kan miphun mission khan ah chiah i bawmh hi a herhmi a si. Kan miphun hi politics and thazaang he, biatak tein dirkamhnak ding ahcun channel dang a um ti lo. Hmailei zongah a um kho ti lai lo. Cucaah hi CNF channel lawnglawng in kan ram le miphun caah thuk bik in riantuan khawhnak channel a si. Cucaah Pu Ngun Tling nih ngakan a va tuah bantuk in, Laimi kan mirum le thilti kho zong nih, Victoria Camp a that deuhnak ding le a chng i ummi pastor, ralkap, saya/sayama te le ralkap nupi fale zong nunning sang deuh tein an nun khawhnak ding caah, kan miphun ningpi nih tan kan lak a herh.

Victoria Camp ngakhur 

Seh in theset a lak lio 

CNF hi a um peng i, kan miphun nih "Mahte tawlrelnak nawl" kan ngeih tiang an nun ding le thazaang an ngeih ding hi a biapi taktak. Kawlram ah hin, Khrihfa cu mi tlawmtuai kan si peng rih ko lai Tlangcungmi zong politics le zeidang ah namnehnak kan tong peng ko lai. Cucaah hmailei ah a har chin lengmang ding a si. Cucaah CNF an thawn ahcun kan miphun caah a tha chin lengmang ding a si. Victoria Camp zong tha deuh tein ser le rumra ngei deuh in tuah ding hi, Pu Ngun Tling bantuk in tanlak cio ding hi, Chin miphun kan rian pakhat a si.

Chin miphun nih hin, Israel theology kan ngeih a herh. Israel miphun an theology cu, an Pathian, an biaknak, an nunphung, an politics, an fimcawnnak, an tiram le an leilung hi aa tlai dih. An thlarau le an vawlei le an politics hi aa then kho lo. Cucaah Israel ram khi, ram fate a si nain an cah tuknak khi a si. Pu Ngun Tling hi, ram le miphun caah, aa pumpe bakmi a si. A mah hi, Columbus, Ohio ah khua sami a si. Victoria Camp zong voi tam ngaite a phan cang. Amah nih a chimmi cu, "Ngakan ah hin, fungtial nga zuat hmanh ah, kum khat ah ting tam tuk kan hmuh khawh lai i, nikhatkhat ahcun CNF hi mah tein an i todelh te ko lai" tiah a ti. Zumhnak le ruahchannak tampi a ngei ko.

Hmalei ahcun, hotel thami sak ding hi an saduhthah a si. Cun chungkhar tein va nuamhnak le dinhnak ding caah lentecelhnak te hna zong tuah ding le nuam tein, tiva hna va kal pah in le chungkhar dinhnak hna ngeih khawhnak ding tiang in riantuantu hna nih saduhthahmi a si.

Leikuang kaupipi tuahnak ding zong a um caah pawcawmnak ding zong ah a tha ngai ding a si. Cupinah hmailei ahcun "cinthlaknak kong research tuahnak" (Agricultural research center) hmun zong ah a tla kho ding a si. CNC camp ah hi, raltuknak he, cinthlaknak lei le saram zuatnak lei le fimnak a phunphun chuahnak center zong ah hman khawh a si ko lai. Cucaah kan miphun nih hi khua hi, Laiza bantuk hna in khua dawh le khua tha a si khawhnak ding ah hin, tan lakpi cio hna u sih law a tha ding a si.

Ram le miphun caah temtuarnak phun zakip te he rian a tuanmi CNF camp ummi vialte hi, Chin miphun a daw tukmi an si hna caah, Pu Ngun Tling nih ngakhur sunglawi taktak a tuah piak hna bantuk in, kan miphun nih biatak tein thlacampi le ngeihchiah chawva in tanpi hi, kan rian bak a si. Pu Ngun Tling pakhat lawng hmanh nih, mah zatzat thil a tuah khawh ahcun, Khrihfabu le mipi kan i bawmh ahcun Camp Victoria zong rumra ngei taktak ah kan tuah khawh dingmi a si.

------------------------------------

Lawmhnak

Hmanthlak pawl hi Pu Ngun Tling sin in ka lakmi an si. A cungah lunglawmhnak tampi ka ngei.