Lai holh hi, a tlinnak le tlinlonak a um ve. Lai holh hi holh hmete a si ko nain, Lai holh biafiang cheukhat cu Mirang le Kawl nih an ngei hna lo i, leh awk zong an tha ve lo. A fian in fianter awk lawng a si kho. Biafang cheu khat cu kan hman lo caah a thi te dingmi zong an um ve hna.
Lai holh hi tampi ka hlathlai i, Bible chung ummi biafang hi ka theih lo mi a tlawm ngai. Asinain Esther cauk 1:3 a donghnak lei a ummi biafang "tuavon" timi hi ka thei kho bak lo. Lairam ahcun a theimi an um kho men ko nain, USA ahcun an har ngai lai tiah ka ruat.
Tleicia kan pa Rev. Dr. David Van Bik hi, Lai holh le Lai ca a rak thiam taktak. A tialmi hi an tha tuk. Biafang a hmanmi zong an tha ngaingai. Esther chung 1:3 ah a ummi "tuavon" timi zong hi, chan thar mino tampi nih cun an thei theng ti lai lo. Kei zong nih ka thei ve lo. Bible lettu a m ah le a thi fawn cang i, a theimi an har ngai.
Hi biafang hi ka lung ah a tapnak a sau tuk cang. Cucaah a fale nih an theih men lai tiah ka ruah i, a fale pahnih-Rev. Dr. Rolin Vanbik le Dr. Kenneth Vanbik ka hal hna i, an thei ve lo. USA i pastor tam deuh ka hal hna i, an thei ve lo. Tar tam nawn ka hal hna i, an thei ve lo. Cucaah hihi Kawl biafang maw a lak hnga maw? Zei biafang dah a lak hnga timi khi kum tam ngai ka ruat. Bia le lampeh ah a chuah caan ahcun mah biafang "tuavo" kong hi ka hal theu tawn hna i, an thei kho bak lo.
Voi khat cu kan umnak Columbus ah kum upa bik a simi Pu Mang Bik ka hal i, "Tuavon timi hi zeidah a si? Kan Lai holh a si maw?" tiah ka ti.
"Si ee. Tuanvo timi cu Lai holh bak a si" a ti i, a sullam a ka chimh. Amah zong nih hin fiang tein a chim kho tuk lo. Aa harh ngai ve.
Mirang Bible King James ahcun Esther 1:3 nak cu hi tin an tial:
In the third year of his reign, he made a feast unto all his princes and his servants; the power of Persia and Media, the nobles and princes of the provinces, being before him.....
Mirang ah "the nobles" timi hi Lai holh cun "tuavon" timi cu a si. Hihi Lai biafang te a rak si ko. Noble timi cu "Sal an si lo. Miluat an si. Mipi sawhsawhnak in nunning, politics le uknak lei ah a sang deuhmi" minung pawl an si.
Lairam dirhmun in chim cun, hlan lio ramukbawi chan ah, ramukbawi taktak a si tunglomi, sal zong a si lo mi, mi sawhsawh a si ko nain, khuachung ah uknak, hruainak, ram kongkau ah a chanchan in a sang deuhmi le upatmi pawl khi "tuavon" timi cu an rak si.
Mirang holh in cun "nobles" timi cu, "belonging to a hereditary class with high social or political status" tiah an leh i, a chanchan in zatlang nunnak (social) le politics ah a sangmi pawl kha nobles timi an si. Cucu Esther 1:3 ah kan hmuhmi "tuanvon" cu an si.
Tahchunhnak ah, Mirang an kaika ah, Thantlang ah Lal Luai hi, ramukbawi a rak si. Cinzah a rak si. Thantlang khua ahcun sal an rak um. Sal zong a si lo mi, ramukbawi zong a si lomi, Cinzah zong a si thenglomi asinain Lal Luai nih aa bochanmi "upat tihzah awk a tlakmi khua chung mifim thiam le mi zaza kha, tuavon timi cu an si ko. Kawl nih "Kung-athayi-sih luci" timi khi an si. Hi bantuk minung cu, khua le ram chungah tihzahmi, hmanmi,bochanmi, ruahnak halmi, uktu hna caah bochanmi timi kha an si.
Hi biafang te zong hi biafang tha le tling ngai a si caah, Laimi nih kan hman ngai ding a si. Hi ca relmi paoh nih, hi a sunglawimi Bible biafang te zong hi thathnemnak a si ko lai tiah ruahchannak ka ngei. Hi biafang a loh lo nak ding caah, Bible ah a rak hmangtu tleicia kan pa Rev. Dr. David Van Bik cung zong ah lunglawmhnak tampi ka ngei. A ka fiantertu Pu Mang Bik cung zongah lawmhnak ka ngei.
No comments:
Post a Comment