Mandalay University kan kai lio ah, Kalaymyo lei in tlunkal peng asi. Kalewa le Monywa kar hi tilawng cit in tlunkal zungzal a rak si. A har nain a rak nuam tuk. Ihnak le hmunhma kan ting setsai bal lo. Tenhnak thalo ah i tenh cio a rak si. Kawl pawl thil zuarmi zong cuticun tenh cio a rak si tawn. Tilawng cung i ka tonmi thil nih "Kawl nih kaa lawng in mi an biaknak kong" tam tuk ka hmuh. Cu bia cu zeidah asi tiah "Ka-dawh" (kan biak) ti khi asi.
Voikhat cu tilawng kan i tet tuk. A khah bak in kan khat. Kawl nutungnu pakhat cu kan lak in i tenh i kal a hau. "Ka-dawh...ka-dawh" ("Kan biak hna...kan biak hna..kan biak hna...") ati thluahmah a kan lamhpah thluahmah. Kan cung bak in a kal. Kan i tet tuk caah a mawh lo. A biafang ning tein char ahcun, "Kan biak. hna..kan biak hna" ti i ke in lamh thluahmah khi asi ko. "Biak" ti tung i ke in lamh cu biak asi lo. Kaa lawng in biak asi. Lungthin le tuahsernak in aa tel hrimhrim lo.
Kan rak i cit tawnmi Chindwin Tivapi tilawng
Cu bantuk thiamthiam ion Buddha bata minung tampi cu, pura kam ah thla an cam. Atawka pir ko in an kun ahcun "pathian" thei khun an lo. An thlacam tiphul cu a tha tuk i duh a nung tuk. Mi hmuh hngan ahcun pathian bia bik le thei bikmi an lo. Paya--paya--paya an ti ahcun mi ciammam an si.
Asinain cucu an nunnak le tuahsernak ah aum lo. Mi tampi cu "mi hlen, khapaih-hnaih, thilfir, lihchim le ningcanglo nunnak ah a zit in an I zi." An paya khi, kaa le hmur cung lawng ah a um. Cucaah khi biafang khi, pura umnak area chung hmanh ah a nguh lo. Tlangtang an phak tik ahcun a raal dih cang. Khi hmur cung lawng i a ummi "paya" timi bia nih khin, an nunnak ah zeihmanh rian a tuan lo. An ziaza ah thathnemnak a chuahpi lo. "An paya rr(pathian) nih a fial taktakmi hna, dinfelnak, dawtnak, zaangfahnak, mi zawnruahnak, mah duhnak kaltaknak, a hmanmi ruahnak le tuahnak" timi hna cu pakhat hmanh an nunpi ti lo.
Cucaah 'paya....paya" an timi cu "pakpalawng lawngte an si" Cucaah Kawlram uknak, naingaizi, sipuazi, luhmuhzi, ram thanchonak le mipi nunnak ah dinlonak a khatl; hrawkhrawlnak a khat. Cucaah vawleicung ram sifakbik le a corrupt bikmi ram pakhat ah kan um. Aleng in zoh ahcun kan pura le biaknak inn le lungphun phunphai a tam ning chim awk a tha lo. Asinain kan biaknak cu kan nunnak ah a lang kho tuk lo. Cucaah an mah Buddha bata Kawl hrimhrim nih, "Kaa nih cun pathian pathian ti, kut nih cun a kenkip te dah" tiah an ti phah.
Hi tluk in khuk bil zongah lungthin cu "pathian" he thlat ngai khawh asi
United Theological Seminary i Bible sianginn ka kai lio ah, Kenya pa hawitha taktak ka ngei. Cupa cu mi capo, mi nuam le nih huam taktak khi a si. Duh a nung ngai. A caan ahcun "Bawipa nih thluachuah in pe ko seh" ti khi nih bu salam le zoh lo salam hna in a ka ti tawn. Midang zong a ti tawn hna. Ka ruat. Mah hi a chim lai ah hin, "A thinlung tak maw asi hnga? Bia sawhsawh ah dah a hman hnga? Zei bia dah ka chim timi hi a ruat taktak hnga maw? A chimmi bia cu biadawh le tha tuk asi nain BIATAK in a chim maw?" timi khi ka ruat tawn.
Pathian timi le Bawipa (Yahweh) timi kong chim cu Judah mi hna nih cun an rak upat tuk i a chim hmanh an chim ngam lo. Kan nih nih hiti nih bu le capo salam bantuk in, zoh setsai lo hna in kan chim tikah BIATAK in kan in kan chim maw ti ka rua theu tawn. Pathian cu BIATAK asi caah velhle le hmunrcung lawng in a min chim ding asi lo.
Biatak ruah ruah setmat a hau. Kan thinlung, nunnak le tuahsernak ah um taktak lo in "Bawipa..Bawipa ti le Pathian..Pathian" timi cu, tihnung asi. Jesuh zong nih pei a ti kha.."Bawipa..Bawipa tiah a ka timi paoh nih vancung pennak chungah an lut dih lai tinak asi lo" (Matt. 7:21). Judah mi hna nih cun Pathian timi le Bawipa timi bia hi, hman an tih tuk i ahuaha lo in an rak hmang ngam lo. Cucu Krihfa zumtu nih ruah chih a hau.
Bawipa timi le Pathian min hi kan chim lengmang hi, a tha ko nain, thinlung le nunnak ah a um tung lo ahcun, hmurcung bia lawngte an si. Pathian cu chunglei a zohmi Pathian asi caah kan chim bak in a rak theih colh. A thinlung in maw a chim? Style in a hmurcung lawng dah? ti hi tha tein a theih.
USA Laimi tampi cu, Bawipa..Bawipa...Pathian Pathian ti ahcun, kan huam ngai nain, tax return tuah caan a zaat tikle lihchim duh caan a phak tik ahcun, Bawipa le Pathian timi hna cu, a umnak hmanh kan thei ti lo. A ruang cu lengphawthual le hmurcung lawng in Bawipa....Bawipa kan ti caah le hmurcung lawng in Pathian...Pathian kan ti caah a si.
Cucaah, "Bawipa nih thluachuah in pe ko seh" timi le "Pathian nih thluachuah in pe ko seh" timi bia kan chim lai ah i ruahta a hau. Kan hmurcung lawng hna in kan chim sualnak ahcun, cucu "hmur cung lawng Pathian" asi caah, Pathian min a sawhsawh in hman tu khi asi sual hnga maw ti ruah a herh. Hihi zumtu taktak nih cun then thiam a hau.
Hmurcung lawng in Pathian ti cu, Pathian min nincanglo le a sawhsawh in hman asi caah, thluachuah hmuhnak asilopinah Pathian thinhunnak asi lai.
Zeicatiah, Sinai Tlangpar in Pathian nih Israelmi nawlbia (10) a pekmi hna ah, Bawipa nih hitin a nawl apek hna:-
"Bawipa nan Pathian min cu ningcang lo in hmang hlah u...Ningcanglo in ka min a hmangmi cu dan ka tat hna lai" (Exodus 20:7)"
Pathian min nincang lo hman cu thluachuahnak tu silo in chiatserhnak le dantatnak tu asi caah Pathian min ningcanglo in a hmangmi kan si sualnak hnga lo, Krihfami nih ralrin a herh!
Nawlbia (10) Laknak Sinai Tlang
No comments:
Post a Comment