Halleluijah Timi Biafang Hman Tikah?

Krihfa tampi nih, hlasak le thlacam lawng siloin, bia kan i chonh hmanh ah, "Hallelui-jah" ti hna kan hmang tawn. Cucu thil chia cu asi lo nain, kan hman ning hi a hman tawn maw timi cu ruah ding a um ngai. Kan hman tik ah a hmangtu nih kan i fian in maw kan hman? Fiang set lo in dah kan hman? Kan ka in khiti kan ti tikah Pathian khi aa lawm hlei hnga maw? Kan lungthin tello hna in "velhle" hna in kan hmang tuk sual maw timi ruah ding aum.

Lairam le Kawlram ah crusade hi voi tampi ka kai. Cu i cawnpiaknak tampi ka theihmi cu, "Hallelu-jah ti hi kan ti awk hrimhrim asi. Hiti kan ti tikah Pathian aa lawm. Hallelu-jah ti hi ningzah ding asi lo. Piangtharmi nih cun Hallelu-jah ti ding asi? Hi lawnglawng hi, Pathian min kan auhnak ah kan i khahnak asi" tiah an ti tawn. Cucu careltu nih zeitin dek na ruah?

Krihfa tampi cu hawi nih an hman cio ai tiah, nawlcawn in sullam theilo in  ahmangmi kan tam tuk. Acheu cu kan lung zongah a chuak lem lo mi, cawnpiaktu nih hitin an ti awk asi? Hitin nan zumh awk asi? Hitin nan pawm awk asi? ti kha a kan fial tawn caah, asullam zong thei lem lo in, a hmangmi tampi kan um tawn. "Amen" hmanh hi zapizaran nih cun a sullam a thei lomi kan tampi kho men.

Miphun dang holh biafang kan hman tikah hin, cawnpiaktu zong nih "asullam thei tein cawnpiak a herh. Cawnpiaktu hmanh nih sullam thei set huaha lo in, a hmangtu hi lungbuainak men fangfang tiang hrawng in hmanter hi thiltha asi lo." Zei miphun biafang kan hman zongah kan hmanmi biafang sullam kan i fian aherh. Fian ah a tha fawn.

Nihin ni Laimi Krihfa tampi ruahnak ah, "Hallelu-jah ti a chimmi paoh cu a piangthar khun le khamh aa fiang khun le hawihlei zumhnak sang khun ah kan ruah hna. Cucu Hallelujah nih a sawh duhmi asi hrimhrim lo."

Krihfa tampi nih kan hmanmi bible biafang cheukhat hi, asullam kan thei lo nain, cawnpiaktu nih "uar lak in" a kan cawnpiak i, asullam hngal lo bak in kan hman than tawn. Pathian min le bang hi cu asawhsawh in ahmangmi kan tam tuk lawmmam. Cucaah Hallelu-jah zong hi Laimi Krihfami nih kan hman tikah, kan lung a fian bu tein kan hmannak ding hi, a herh ngaingai.

Hallelu-jah timi hi, "Zeicadah kan hman? Hihi nan hman hrimhrim lai tiah Cathiang nih a kan cawnpiakmi asi maw? Hallelu-jah timi hi amah Hebrew holh theng in maw hman ding hi Cathiang nih a kan cawnpiak? Mah le holh te hmanh ah asualnak a um hlei hnga hme maw? Hebrew holh in hman zongah Laiholh in hman zongah Pathian nih cun a thei veve ko hnga lo hme maw? Cathiang bia vialte Thiang Thlarau, Pathian, Bawipa ti hna zong Hebrew holh in hman lem tunglo? Cu hna zongah Laiholh in kan hman ko hna ah, Hellelu-jah zong Laiholh hman le Hebrew holh hman aa dannak aum maw zei?" Cu vialte cu ruah hmasat a herh.

Hallelu-jah Asullam?

Halleluijah timi hi "Hallelui-jah" timi cafang komh in chimmi asi. Hi biafang hi, Hebrew holh "halal" (to praise) ti le "jah" (jah=yah of HWH) timi biafang in a rami asi. Mirang holh in leh ahcun, "Praise ye the Lord" tinak asi an ti.

Lai holh in leh tikah "halal" cu "thangthat siseh" ti khan asi i, "jah" cu "Bawipa" (Yahweh) tinak asi ko. Cucaah "Hallelu-jah" timi cu "Bawipa thangthat siseh" asiloah rem deuh seh tiah ahcun, "Bawipa thangthat si ko seh" timi he aa khat.

Cucaah Hallelujah theng kha Hebrew holh in chim theng hi a herh maw? Lai holh in chim khawh asi ko ahcun timi ruah a herh. Laiholh a um ko ahcun Mirang le Kawlholh le Mizo holh hna va hman theng hi uar hlei ding asi hme maw? Lai holh in aa chim khawh ko ahcun, Hebrew holh va hman theng zong cu Pathian nih a theih deuhmi asi hlei hnga maw? timi ruah zong a biapi ngai fawn.

Hallelujah Thawknak

Hallelujah aa thawknak hi fiang tein theih asi lo. Hi kongah ruahnak phun (2) a um. Ruahnak pakhat cu Hebrew hla phuah hmasat bikmi chung i an rak hmanmi hla-bia pakhat asi tiah an ruah. Acheu nih cun hi biafang aa thawknak taktak hi, Hebrew asilomi miphun hna biaknak asiloah vawleilei hla in aa thawkmi asi i, Pathian kong a rak i tel theng lo ti asi.

Baibal ca zoh tikah, Hallelujah biafang hi Psalm ah hin voi tambik a lang i voi (25) alang. RSV bible zoh tikah, Psalm 111 &112; 104, 105, 115 le 116 aa thawknak ah an lang; Cun 106 le 117 aa thawknak le donghnak ah an lang. Psalm 135 chung zongh ah aa tel. "Great Hallel" tiah an timi Paslm 146-150 ah a donghnak an lang.

Bible cheukhat ahcun Ps. 145 le Pss 113-118 ah an telh chih i, cucu "Egyptian Hallel" (Egypt thangthat hla) tiah an ti. Cucu kumtin biaknak puai (lanhtak puai, deu puai le pekchanhnak puai) ti bantuk hna ah an hman tawn.

Judah baibal ah rel chih lo mi ca (non-canonical Jewish writing) timi "Tobit 13:8, 3Maccc 7:13" hna ah an lang. Hlawtmi baibal hla (apocryphal psalm) hna le rabbi cauk pawl ah tam ngai an lang.

Hallelujah hi "alleluia" tiah Latin Bible LXX ahcun an leh. Cucu Biathlam 19:1,2,3 le 6 ah an lang. Vancung mirum tampi nih an hlasakmi chungah aa telmi asi. Biathlam ahcun "thangthatnak hla" ah aa telmi asi. Cucaah Krihfa hla le carelmi hna ah hlan lio tein "hallelujah" hi an rak telh ve nak asi.

Laihla cauk zongah "Hallelujah" timi cu tam ngaite kan hmuh. Atu lio hmanmi CACC nih 2012 i an chuahmi Krihfa Hlabu (Laiholh) ah, Hallelui-jah timi biafang hi voi 39 a lang. Abase ah voi hnih aa nolh mi he cun 41 a lang.  Hi hla cauk chung ah Halleluijah voi tambik alanghnak hna cu Hla Number 144 ah asi i, voi (17) aa tial; 141 ahcun 6 alang i 463 ahcun 5 alang.

Baibal cauk pumpi alangmi nakin Hla cauk i a langmi a tam deuh. Aruang cu Halleluijah timi biafang cu hla chung ah an hmanmi biafang a rak si caah asi. Bible chung i alanghnak vialte zong, "hla lawngte ah an si." Kokek ahcun, biachimnak le thlacamnak ah an hmanmi an si lo. Cucaah bible prophet hna le hruaitu tampi nih an hmanlonak asi i, David le Vancungmi choir lawnglawng nih a rak hmanmi biafang asi ti kha, Cathiang chungah kan hmuh.

Baibal Chung Ah Zeitindah Aa Hman?  

Protestant nih Bible hi uk 66 kan ngei. Biakam Hlun ah uk 39 a um i, Bikam Thar ah uk 27 aum.

Biakam Hlun cauk 39 chungah Hallelu-jah kan hmuhnak cu uk khat Psalm chung lawngah asi. Acunglei ah kan tial cang. Biakam Thar uk 27 chungah voi khat te lawng a lang i, cucu Biathlam ah asi. Cucaah bible uk 66 chungah uk hnih lawng ah kan hmuh i, uk 64 ahcun a um lo.

Atuanbia zoh tikah, hihi "hla" ah an rak hmanmi asi. Biakam Hlun zongah hla ah an hmanmi biafang a rak si. Biathlam chung zongah "vancungmi mirun choir nih an sakmi teinak hla ah aa telmi biafang pakhat asi." Biathlam chungah an hmanning hi, "thangthatnak (praise) ca i hla in an sakmi asi." Pathian sinah zaangfah nawlnak maw, duhmi halnak maw ti in, thlacamnak ca an hmanmi asi lo."

Hallelujah hi, akokek tein thangthatnak (praise) caah an rak hmanmi asi. Cuticun Krihfa hla ah an van hman. Hla minthang "Hallelu-jah Chorus" hna an van ser i, minthang taktakmi hla ah an van hman hna. Lai Krihfa Hlabu zongah, biafang voi tam ngaite aa hmang.

Cun Hallelujah timi biafang hi, thangthatnak lawng ah siloin, Krihfa hna nih "chawngthlang relnak bantuk ah an van telh."  Cu hnu ah chan tiluan a van kal lengmang i, micheu nih thlacamnak ah an van hman. Cuticun nihin ni ah, biachimnak ah siseh, thlacamnak ah siseh, phungchimnak ah siseh an van hman mi biafang pakhat asi. A kokek tatktak ahcun "thangthatnak" (praise) ca a rak si.

Cucaah Krihfa pek, Judah biaknak pek nih ruah dingmi cu, hallelujah timi biafang hman le hman lo ruangah, Pathian nih minung a kan hmuhning khi aa dang ding asi lo. Hi bia cu Siangpahrang David nih Psalm chungah a hmanmi biafang asi. David hlan ah "Patriach" timi Judah hringsortu hna-Abraham, Isac, Jacob hna nih an hmang lo. Hruaitu lianngan asimi Moses, Joshua le biacaihtu hna nih an hmang lo. Cun vawleicung mifimbik timi Solomon te hna zong nih an hmannak kong hi, baibal ah a um lo.

Baibal zoh tikah, khuaruahhar ngai asimi cu, Prophet hna nih hallelujah hi an hmang bal lo. Prophet lian timi Isaiah, Ezekiel, Jeremiah le Daniel zong nih an hmannak kan hmu lo i, Prophet hme timi Hosea, Joel, Amos, Obadiah, Jonah, Mikah, Nahum, Habakkuk, Zefaniah, Haggai, Zekariah le Malakhi zong nih an hmang bal hna lo.

Biakam Thar cauk zoh tik ah, Jesuh nih hallelujah hi voikhatte zong ahmang lo. Azultu le mipi kha hman zong a fial fawn hna lo. Cucu ruah awk ngai asi. Aherh lo caah maw asi hnga? Biapi ah a chiah lem lo ca dah asi hnga? A uar lem lo ca dah asi hnga" timi cu theih asi fawn lo. Hi  kong hrimhrim hi voikhatte zong a chim lo caah, biapi tuk ah a chiah lo bia zong asi kho men.

Zeicatiah Jesuh nih biapi ah a chiahmi thil cu anolh tawn; a chim than lengmang. Tahchunhnak ah, "dinnak, felnak, dawtnak, ngaihthiamnak, sual ngaichihnak, thianhlimnak, mi bawmhnak, biatak chimnak, thlarau, toidornak, lungnemnak, zumhnak, ruahchannak..." ti bantuk kong hna cu hmun tampi ah a nolh lengmang. Asinain Hallelujah kong ahcun Jesuh hi a dai bak. Zeihmanh a chim lo.

Cu lawng asi rih lo. Mithiang Paul cu Jesuh thawngtha tambik phuangtu le Krihfa biaknak dirhtu tiah timi pa asi. Amah zong nih hallelujah biafang hi, voikhat zong ahmang bal lo. Jesuh zultu asimi Peter le adang zultu 11 zong nih an hmang bal lo. Matthew, Mark, Luke le John le cakuat tialtu (Peter, James, Hebrew, Johan tibantuk) vialte nih an hmang bal lo. Biathlam lawnglawng nih voi 2 a hman. Cu voi 2 a hmanmi zong cu, vawleicung minung nih an hmanmi asi fawn lo. Vancungmi hmanmi biafang asi. Vancungmi nih an hman tik zongah, "thlacamnak le Pathian nawlnak ca hmanmi asi lo. Thangthatnak ca i hmanmi asi."

Biafunnak

Hallelui-jah timi hi biafang dawh le tha taktak asi caah, a hmang duh nih cun hman ding asi. Kan hman tik belte ah i fian bu tein hman ah a tha.

Kan tial cang bang in, Hallelujah biafang hi, Mirang holh cun "Praise ye the Lord" ti asi ko. Lai holh cun, "Bawipa thangthat si ko seh" ti asi ko. Hla ah thangthatnak ca hmanmi asi. Hebrew holh in hman le Mirang holh in hman le Lai holh in hman khi, Pathian caah aa dannak pakhat hmanh a um lo. Kawl holh in hman zongah aa dannak aum lo. Aa khat viar.

Cucaah i fian a herhmi cu, Hallelujah timi biafang hman lo hi, sual asi tiah ruah ding asi lo. Pathian theihlo asi ti in ruah ding zong asi fawn lo. Ahmangmi zong hi, Pathian an thei deuh, an piangthar deuh timi zong ruah ding asi fawn lo. Minung cu mah uar ning cio paoh hman ding asi ko.

Cun ruah rih dingmi cu, Hallelujah ti le ti lo ruang ah, minung hi a sual hleinak le a that hleinak aum lo. A thian hleinak le thur hleinak a um lo. Adin hleinak le dinlo hleinak a um lo. Zeicatiah Baibal nih a kan cawnpiakmi cu, Pathian cu lengphaw zohmi Pathian asi bal lo i, thinlung le chungrul zohtu Pathian asi caah, kan chungah a ummi tu kan sining te tu khi, a let tam tuk in abiapi deuhmi asi." Kan chimmi bia khi biapi tuk ah a chia lo. Zeicatiah kaa in a chuakmi cu thinlung aa tellomi biafang atam tuk caah asi.

Cucaaah a fawinak in chim ahcun, Hebrew holh hman duh asi le "Hallelujah ti ding asi" Mirang holh hman duh asi le "Praise ye the Lord" ti ding asi. Lai holh in hman duh asi le "Bawipa thangthat si ko seh" ti ding asi ko. Zeicatiah hi hna hi an i khat viar. Minung hmai ah aa dang nain Pathian hmai ah aa khat viarmi an si. "A bawnbok le mantat" bantuk lawng an si.

----------------------------------------------------------

Cauk Zohchihmi

1. Scott Nash, "Hallelui-jah." Mercer Dictionary of the Bible, (Mercer University Press, 1990).