GPS In Tah Khawh Rihlomi "Hkakabo Razi Tlangpar"

Hkakabo Razi tlangpar pawngah Mark Jenkins

Hkaka Borazi tlangpar hi, Kachin Ramkulh a chaklei ah a um.Himalaya Tlangthluan he aa pehtlaimi Dandalika Range (Tlangthluan) pehpar ah a um. Kawlram chungah a um i, Kawlram, India le Tuluk ramri pathum aa tonnak kam teah a um. Khua hriang tuk ah a um caah le a tlang hi a kai a har tuk caah, nihhin ni tiang ah Hkakabo Razi hi pe zeizat ciah dah asan timi hi GPS in an thei kho rih lo i, vawleicung ah a san dik tein theih rihlomi tlang minthang pakhat asi.

Hkakabo Razi tlang le tlangtang tupi hmawng

Hkakabo Razi hi, Kawlram ah tlang sang bik pakhat ah ruah asi. Nihin ni an theih khawhmi chung ahcun, Nichuahthlang Asia zong ah a sang bik tiah ruah asi. 1925 ah British survey nih an rak tah hmasat i, an tuaknak ah pe 19,296 a sang tiah an ti. Asinain Hkakabo Razi tlangpar kai hi, a chen tuk caah, lungpang aa dar tuk caah le Tibet lei in a rami thli a kih tuk caah, mi tampi kai an i tim nain tampi nih an phan kho lo. Nihin ni tiang ah hin, Hkakabo Razi hi GPS hmang in a tah khomi an um rih lo i, GPS hmang in a pe dik tein an chim kho rih lo.

Hkakabo Razi ni nitlakchaklei deuh Kawlram-Tuluk ramri ummi Gamlang Razi tlangpar hi pe 19,259 asang tiah GPS in an theih caah, hi tlang hi Hkakabo Razi nakin a sang deuh men lai tiah ruah asi. Hi tlang nih hin, Kawlram le Nichuahthlang Asia ram ah tlang sangbik min thatnak aa cuh ve tiah an ti. Hkakabo Razi hi GPS hmang in zeizat ciah dah asan timi theih asi rih lo caah, khaw zeidah asang deuh taktak timi zong fiang tein an chim kho rih lo.

Hkakabo Razi kai hna hi ahar khunnak cu, Kachin ramkulh hi tupi a chah tuk i horkuang an thuh tuk caah asi. Tiva, hawrkuang an thuk i, Hkakabo Razi phanh hi a fawi lo taktak. Cakeu, rul, lit, cangvat tam taktak an um caah, umkal zong tih a nung ngaingai. Hkakabo Razi tlangpar kuakap vialte hi, January 30, 1996 in ramhual ah an chiah. November 10, 1998 in National Park ah an chiah i, Hkakabo Razi National Park tiah min an sak.

Tlangpar tang a niamnak bik cu thingram tamtaktak an keu i, tlang sannak ah far phun zong an keu i, thilnung tam tuk hringhran a um caah, hi hmun hi thingram lei fimnak cawngmi, saram lei fimnak cawngmi, leilung lei fimnak cawngmi hna caah, hlathlai awk a tlak taktakmi hmunhma pakhat asi tiah an ti. Hi bantuk in tupi hmawng lak bak in pe 19,000 renglo sangmi tlangpar pi a hung chuak zuai i, a dawh zong aa dawh tuk ti asi.

Haa bantuk in aa thakmi Hkakabo Razi tlangpar

Hkakabo Razi hi minung umnak he meng tam ngai aa hlat. 2014 ah Hkakabo Razi tlangpar hi, GPS in tah aa timmi American minung National Geographic expedition team (nu 2 le pa 3) zong tlangpar phan kho lo in an kir. Cu hna cu:-Renan Ozturk, Mark Jenkins, Cory Richards le tlangkai tawn Emily Harrington, team hruaitu Hilaree O'Neill an si.

Nu pahnih Emily le Hilaree hi pe 18,108 tiang pin cu a kai an kai kho ti lo ti asi. Pa (3) hi pe 18,841 tiang an kai hnu ah, a kih tuk pin ah, eidin, mei le khua nih a muih phuat hna caah, "thih phan ah" an kir than. Tlangpar an phan dengmang ko nain, an phan kho thai lo i, lungrawk taktak in an kir.

September, 2014 ah Kawlram mi pa (2) zong GPS in Hkakabo Razi tlangpar tah ding an i tim. Tlangpar kuakap an phak ah, an dahmei rawl a dih i, an thawng a dai; zeihmanh an thei kho ti hna lo. An mah khamh ding ah a kawltu hna, helicopter zong a tla ve i, pilot pakhat a thi. Nunnak (3) a liam. Nihin ni tiang an ruak an hmu hna lo. Cu hna zong cu pe 18,996 tiang kan phak tiah thawng an rak thanh hna i, an dahmeirawl a dih caah zeihmanh thawng an thanh kho ti hna lo.

National Geographic expedition catialtu Mark Jenkins nih ca a tial ning ahcun, Hkakabo Razi hi Potao in ding tein kal ahcun meng 69 lawng ahla nain, ding tein kal awk a that lo caah an zulhmi lam cu meng 151 a hla ati. An kalning lam cu map a suaimi chung ah hitin a tuak.

Potao in meng 68 a hlatnak Gawle khua tiang motorcyle lam asi. Gawle in khua khat hnu khua khat pal lengmang hnu ah, Kawlram chaklei bik ummi khuate Tahongdam khua tiang meng 61 ke in kal asi. Tahongdam ahcun, Khampa Tibets miphun minung 200 tluk an um. Cu ka khua in a chaklei cu khua a um ti lo. Tupi, tiva, horkuang, thingram le tlang lawngte asi cang.

Tahongdam khuate in Hkakabo Razi tlanghram umnakhmun (Base camp) tiang hi, minung an um ti lo. Meng 22 chung cu minung umlonak ram asi. Tlanghram umnakhmun cu pe 13,217 a sang. Cu hmunhma phaknak ding caah ni 17 an rau. Achaklei kap in, Hkakabo Razi tlangpar kaknak ding kha an thim i, umnakhmun (camp) kha 1,2,3,4 in an kai ziahmah. Camp 4 nak hi, pe 18,579 a sang an ti.

Camp 4 nakin, National Geographic expedition team pawl cu, tlangpar kai an i tim nain in, a celh an celh ti lo i, lungrawk taktak in an kir. Nihin ni tiang Hkakabo Razi hi pe zeizat dah a san ciah timi hi GPS in cun theih asi thai ti lo.

National Gographic team (Tlang zumte khi Hkakabo Razi asi)

Hkakabo Razi tuanbia zoh tikah, tuanbia an tialmi aphun aa dang ngai hna. 1986 ah Russia nih an tuaknak ah pe 18,671 asang tiah an ti. 1972 ah American nih an tuaknak ah pe 18,865 asang an ti; ASTER GDEM V21. nih 2011 a tuaknak ah pe 18,878 tiah an ti. British nih 1925 survey an tuahnak ah pe 19,296 asang an ti.

Hkakabo Razi hi a kai a har tuk pin ah tih a rak nung tuk ti asi. Cucaah Japan tlangkai thiam taktakmi Takashi Ozaki hman nih hin, 1995 ah voi hnih tlangpar phak aa zuam nain a rak tlolh. September 1996 ah aa zuam than i, amah le Tibet chuakmi Nyima Gyaltsen nih Hkakabo Razi tlangpar cu avoi khatnak bik ah an rak lamh khawh hmasat. An mah hi Hkhakabo Razi tlangpar lam hmasatmi an si.

Takashi Ozaki cu Himalaya Tlangthluan i tlangsang tampi a kaimi asi i, Himlayan veteran" tiah an timi asi. 1980 ah "vawleicung tlang sang bik Everest tlangpar hi a chaklei kap in akai hmasat bikmi pa asi."  Takashi Ozaki nih cun, Asia Times ah hitin a chim, "Fiang tein ka chim khawhmi cu, Hkakabo Razi tlang cu vawleicung ah kai a har bikmi le tih anung bik mi tlang asi; zeitik hmanh ah thinphan timi ka ngei bal lo nain, hi tlangkai tluk in cu hlan ah ka thin a phang bal lo" tiah a rak ti (Amah hi Everest tlang a kainak ah 2011 ah a thi).

Takashi Ozaki le a hawipa nih Hkakabo Razi tlangpar cu an phak khawh i, Hkakabo Razi tlangpar hi 5881 meter a sang tiah a fehter nain, chanthar tlangtahnak GPS cu a ngeih lo caah, GPS in cun pe zeizat ciah dah asan timi hi, nihin ni tiang theih khawh asi rih lo.

2013 ah Andy Tyson timi "Titon based guide" nih American-Burmese expedition team pakhat kha, Hkakabo Razi he innpa tlang asimi Gamlang Razi ah ah a kaipi hna. Russia tlangtahnak (topographic ma) le Google Earth chung map te zoh chih in, a tuak tikah, Gamlang Razi a ngaingai tiahcun Hkakabo Razi nakin a sang deuh tiah a rak ti. GPS in a tah tikah pe 19,259 a sang. British nih an timi Hkakabo Razi nak cun, pe 37 a niam deuh.

2014 Kawlram tlangkaimi Ko Aung Myint Myat le Ko Wai Yan Min Thu nih August 31 ah, tlangpar kam hmun khatkhat an phanh khawh. Hkakabo Razi cu Kawlram nih an i uanthlar ngaimi tlang pakhat asi caah, "Hkakabo Razi hi Kawlram  le Nichuahthlang Asia ram ah, tlang sang bik asi ko" timi hi, fianter an duh caah an kaimi zong asi. An tlangpar taktak an phanh hlan deuhvak ah, GPS in an tahmi an rak kuat manh mi cu, pe 18,996 asi. An dahmeirawl thazaang a dih caah an kua kho ti lo. Hi hna an thi i, Hkakabo Razi hi GPS ning in cun pe zeizat ciah dah asan timi theih asi thai ti lo.

National Geographic team pawl tlangpar phanh lai ah an i din

National Geographic expedition team nih cun Andy Tyson team American-Burmese expedition team nih an hmanmi GPS bantuk bak an i ken nain, tlangpar phanh hlan in an kir than (Acunglei hman i vur khuhmi tlang zum te khi, Hkakabo Razi tlangpar cu asi).

Cucaah Hkakabo Razi hi pe zeizat ciah dah asan timi hi GPS in cun theih asi rih lo. Cucaah "Gamlang Razi maw a sang deuh, Hkakabo Razi dah?" timi zong nihin ni tiang fiang tein theih asi rih lo.

Nikhat khat i Hkakabo Razi tlangpar ah mi pakhat nih GPS in a tah hlan chung paoh cu, Hkakabo Razi hi pe zeizat ciah dah a san timi hi theihfian asi kho ti lai lo. Zawn damh lawng in theih khawh asi ko rih lai.

----------------------------------------------------------------------

Zohchunhmi Ca

1. Mark Jenkins, "Point of No Return," National Geographic, September, 2015.