Hakha Lihnin

Rungtlang Tlangthluan le Hakha khua 

Laitlang Tlangthluan hna hi, Everest Tlangthluan he aa pehtlaimi tlangthluan pakhat cungah a um vemi hmunhma asi. Tlanglei ah Rakhine Tlangthluan (Yoma) he aa pehtlai. Everest Tlangthluan le Rakhine Tlangthluan hi, lihnin tamnak hmun an si veve. Hi tlangthluan a chungmuru lungdar thluanpipi hi India Rili in Indonesia tikulh ah a va chuak i, vawleicung mithi tambikmi Indonesia Sunami zong kha hi tlangthluan pehpar ah a chuakmi a rak si.

Hlanlio zong hin, Lairam tangah lihnin voi tampi a chuak cang. Voikhat cu Hakha ka chawnh i, Rev. Dr. Henry Siang Kung nih aka chimhmi cu, "Lairam hi nai cikua i, lihnin a tam deuh chin lengmang" tiah a rak ti. Cucu US Geoligical Survey hna nih zeiti tal in an hlat in an thei hnga maw timi ka ruat i, online in ca tampi ka zoh. Lairam Lihnin kong ah hitin an tialmi ca pakhat aum. Hlan lio ahcun fimnak a cah tuk lo caah, an rak thei kho tuk lo nain, tu chan ah cun fawi ngain in ramdang in an rak theih khawh.

Hakha, Chin State, Myanmar in km 22 a hlatnak ah lihnin a um timi kong an tialmi asi. Nitlakthlanglei Km 22 cu Kuhchah Tlangtang le Cawngthia hrawng si dawh asi. Kuhchah Tlang le Zinghmuh Tlang te hna zong hi Everest Tlangthluan he an hrampi lungdar cu aa tlaimi an si. Cu lungdarpi cu Rakhine Tlang in Andaman Tikulh in Indonesia Aceh ram in, Java in a va peh thluahmahmi a si.

Lihninhnak Hmun               : Hakha in km 22 hlatnak
Lihnin thazaag(magnitude)  : 4.6
Lihnin thazaang phun          :Mb
      (magnitude type)
Hninh caan              : Ningani, October 2, 2015, 11:29 AM
USGS tuakmi          : M 4.6-33 km SW of Hakha, Burma (Hakha                                                              nitlakthlang lei)
USGS tuaktu           : Lihnin zohthiammi

Lairam tang ah hin, voi tam li a hnin cang. An din caah minung nih theih khawh an rak si lo. Atanglei hmanthlak hi, Lairam le Kawlram kuakap i vawleitang a cawlcangmi le lihninmi hmanthlak an si. Hi hmanthlak zoh in, Lairam zongah hin, a fak ngaimi lihnin hi hmailei kum tampi ahcun an chuak kho ve ko timi hi a fiater. Manipur State le Sagaing Division hna ahcun voi tampi lii aa hnin lengmang ko. Hi ramtang hna lung hi, Laitlang tang ummi lungdar he aa pehtlaimi an si hna.

Cucaah Lairam chung zongah khua kan tlak tik le innlo kan khuar tik ah hin, ralring deuh in tuaktan le innsak te hna zong a herh ngaingai. Abikin a ritmi lung le tlakrawh inn sak tikah, inn dirnak vawlei kha thuk deuh in cawh le fek deuh in inn sak a herh. Culo ahcun innlo rawhnak le sunghbaunak tampi a chuak kho mi asi.






Acunglei map ah hin, (1) ahringmi hi km 50 thuhnak ah aa hninmi lihnin asi; (2) a engmi hi Km 50-250 karlak ah aa hninmi asi; (3) a senmi hi km 250 nak thuk ah aa hninmi lihnin an si. A senmi aa rinmi hi Plate tectonics ramri asi i, Everest Tlangtluan zuahmah in a kalmi asi i, Mizoram le Bangladesh ramri tein a kalmi asi. Thlanglei ahcun Laitlang le Rakhine ramkulh nitlaklei in a kalmi asi. Cucu Adaman Rili tang in a kal i, Indonesia in Japan lei ah a kai thanmi asi.

13, 2016 ah Kawlram lihnin 6.9 scale a chuah hnu tlawmpal ah, Andaman Tikulh tangah 4.7 scale asimi lihnin a chuak i, tourist tampi launak a chuahpi. Cu lihnin pahnih zong cu Fault Line (Vawlei kak) aa tlaimi an si. Kawlram lihnin cu Sagaing Fault (Sagaing Vawleikak) timi tangah aa hnin i, Andaman Tikulh cu plate tectonic ramri kalnak pawngte ah aa hninmi asi.

Acunglei map zoh tikah Lairam khuakap ah naite lihnin tampi a chuak ko nain, an hmet caah rawhnak a chuak tuk lo. Lihnin hi vawleitang a thuh tuknak ah a chuakmi asi caah, zeitik dah a chuah lai timi hi, nihin ni tiang ahcun hngalh chung khawhnak fimnak aum a um rih lo.

----------------------------------------------------------------------------

Zohchihmi Ca

1. http://earthquaketrack.com/quakes/2015-10-02-11-29-24-utc-4-6-42
2. http://www.breakingnews.com/topic/myanmar/