Pastor Min Phunphun

Ka Semnak Thau Khua

Pathian dawtnak le velngeihnak thawng in, kan phuttawk lo in Pathian riantuan hi 1996 in ka rak thawk. Kan khua hrawng cu India ramri um kan si. Krihfabu kip aa cawhmi kan si. Micheu cu zumhnak le baibal kongah aa fiang bakmi an um bantuk in, aa fianglomi zong an um ve. Acheu cu cheuhra cheukhat kong aa fiang i, a cheu cu an i fiang ve lo.

1997 USA ka phak tiang, Thau ah pastor (3) achangchang in kan chuak. Kan cawnpiak khunmi aa dang cio in ka ruat. Kan mah cio nih, Thau ram caah a tha tiah kan ruahmi chim khunmi cu aa dang cio kho men.

Thau Baptist Krihfabu caan saubik a rak hruaitu kan pa, Rev. Hrat Ling cu "cheuhra cheukhat pek" kan fian khawhnak hnga, Bible cherhchan in tampi a kan cawnpiak. Cucaah micheu nih "cheuhra cheukhat pastor" an rak ti. "Baptist pastor cu cheuhra cheukhat kong lawngte an chim; an mah paw an i ruah caah asi" ti tiang in an rak ti. Thluachuah hmuhnak ca ka chim ti na lak ah, minchiatnak tu a rak si.

Rev. Dr. C. Duh Kam a tlung. BD ah thesis ah a tialmi cu, "Salvation Today" timi asi. Laimi kan si a fak tuk. "Thlarau khamhnak lawng silo in titsa khamhnak kan herh tuk rih" ati. Thanchonak (sipuazi) kong, India tlawnnak kong, satil zuatnak, cinthlaknak, khuathar zuan herhnak kong, khual tlawn le sipuazi tuah herhnak kong, sianginn kai herhnak kong vialte hi, Zarhpini chiar in a kan cawnpiak. Asinain amah chimmi a fiang kholomi cheukhat nih, "Sipuazi pastor" an rak ti. A va pawi hringhran dah ka rak ti tawn.

Thau khuathar 

Kei 1996 ah khua ah pastor tuan ka van thawk ve. Kei ka chim cemmi cu "Thau ram a fet tuk cang caah, saram, nga le va nan dawt lai. Ngakah bawh lo ding; bom puah lo ding; ngapawkek thah lo ding; parathlei tikah tii sah than ding; hru/sii hmang in nga thah lo ding; cangai le ngaikuang le dangte a rai lio ah thah lo ding; nga tii a tit le fano an cawm lio ah thah lo ding-ti hi ka rak chim tawn. 

Thau ram cu a phawn tuk cang caah, Khualubo dah ti lo cu nan duah hrimhrim lai lo. Theipi, khuhlu, kethei, tanthei le sarzuk zong mei khangh ruangah an tlai kho ti lo. Cun sakah ruah ah mei duah ti lo ding; voikhat mei duahmi nih thingkung billion in athah tiah ka rak chim peng. Vameihlai, Saibual, Lungkhawntlang, Vameithlai, Faiceu Tlang, Bualrawn hna hi, duah hrimhrim lo ding tiah ka rak aupi peng.  

Cinthlak ka forh ve hna. Keimah pumpak in rua ka cin. Mipi hmuh ding ah ka ti i, Tlawr kung tiang khua ah ka cin. Mandalay in thinkung phun dang deuh ka phurh hna i, khua ah ka cin hna. Cu tluk in Thau ram ah thingram hninhnonak tha ka rak pek. Far cin zong heh tiah ka rak forh hna nain minung lung a tho lo.

Kan inn hnulei ah tuaihmawng le Euclyptus thing ka cinmi

Ciriangtu, Thautu le Tlangliam hi ramsa humhimnak ah ser i ding tiah ka rak chim tawn. Thau Makazine zongah ka rak tial. Nikhatkhat ah "ecotourism" a um te lai i, saram zoh ruah ah, tourist tampi an ra lai i, tangka tampi kan hmuhnak te lai tiah, ka rak chim tawn. Pawngkam thilnung le saram humhimnak (ecology) kong tampi ka chim tikah, "thingram le saram pastor" tiah a rak ka timi an um ve. A va pawi taktak dah ka rak ti. 

USA ka phak hnupi ah, Thautu cu Ruakhua nih an hual timi ka theih. Rev. Hrang Tiam interview an tuahnak ca te zong ka rel. Ruakhua nih ka chunmang an tlinter tiah ka ruat i, kai lawm taktak. Rev. Neely Lai Uk a rak kan tlawng i, Thautu le Ciriangtu kha CRDP nih kan hual tiah ati tik ahcun, ka lawmhnak a tling chinchin. Naite ah Laitlang in a rak tlungmi pakhat nih, "Thantlang le Hakha cu ramri bak in aa dang. Thantlang ram cu a hninghno deuh tuk" tiah a chim tikah, kai lawm ngaingai. Thantlang cu thingram zohkhenhnak an fiang ngai cang ti kha hmuh khawh asi. Hakha lei zong nih hihi biatak tein ruah ve a herh.

Ramsa Hual caah a tha tuk dingmi Ciriang Tlang

Ka ruat than tawn. Thau khua in a changchang tein pastor phun (3) kan chuak. Cheuhra cheukhat pastor, sipuazi pastor le saram pastor cu kan chuak. Kan mah caan hawih cio in theipar cu an vui ko tiah ka ruat. Rev. Hrat Ling chan ah khua biakinn bawkte ah facang a thing bal lo. Bible biakam hlun ning tein, "Ka inn ah rawl um seh" ati bantuk te asi taktak. Rev. C. Duh Kam chan ah, India tlawng le sipuazi tuah an tam, Thau ah mirum kan i chap i, cheuhra cheukhat zong a karh deuh. Satil zua zong kan karh i, Malaysia kal a hung chuah tikah, Thaumi Malaysia ah tampi an kal khawhnak tiang a chuak ve. "Thau holh thiam ahcun Malaysia kal khawh asi ko" timi phungthluk tiang a chuak taktak.

Naite ah Pu Chan Rawl (Tial Mang pa) USA a rak kan tlawng. Thau kong cu ka hal. "Saibual le Lungkhawntlang kha thingthawh a tha tuk. Lo vah ding tlak in a um cang" tiah ati. Ruakhua pakhat nih, "Mualrawn kha thing thawh a that ning chim awk tha lo asi" tiah ati. Thaumi nih thingram humhim a herhnak hi kan fiang ngai cang tiah ka ruat i lawmhnak in ka khat.

Cu pinah, Hriawh va ah nga zong atam tuk. Thau ram ah sakhi hawk zong kan theih ngai cang tiah an ti i, lunglawmhnak asang taktak. Ka um lio ahcun sakhi zong ahawk kho ti lo. Kan dumdawi tuk hna le zaangfak tuk an rak si. Hriawh va zong a lawng bak ti tluk asi.  A rocar taktak. Kan chim ruang theng ah asi lai lo. TABC le CRDP ruang bik ah asi men ko lai. Zeisihmanh ah kan rak aupimi thil asi caah, ka lawmhnak a sang taktak.

Pathian a duhmi le a dawmi nih cun, a miphun le a ram a dawt tawn. Miphun dawt ahcun vawlei dawt a hau. Vawlei dawt ahcun achung ummi-thingram, satil, tizu nga tiang in dawt a hau. Pakhatte lawng dawt a ngah lo. Cucaah pastor phun tampi kan chuak ko lai. Pathian nih akan fialmi asi rua tiah kan ruahmi thawngtha cu kan aupi awk asi.

Hlanlio prophet hna zoh hna u sih. Moses aupimi cu Pathian nawlbia ding tein zulh i, cawhnuk le khuaihliti in a luangmi ram-Canaan ram co asi. Isaiah nih a aupimi cu, "dinfelnak, dingtein thil tuah, sualnak le dantatnak, saltannak le sal in luatnak kong an si. Nehemiah aupimi cu Jerusalem kulhnak vampang remh kong asi. Zerubbabel le Hagai nih a aupimi cu Biakinn saknak kong asi. Joshua aupimi le rian cu raltuk le ram ngeih asi. Biacaihtu hna an rian cu Israel mi hruai kha asi.

Cuticun Pathian riantuannak ah, mi dang nih min phunphun a kan vuah zong ah a pawi lo. Piangthar ti zong a pawi loh. Mihlim ti zong a pawi loh. Liberal ti zong a pawi loh. Cheuhra cheukhat pastor, sipuazi pastor, thingram pastor tiah min phunphun auh zongah a pawi lo. Jesuh zong min phunphun in an rak auh ve ko.

Angaingai tiah cun, Pathian riantuannak ah mi nih zeitin dah an ka ruah hnga timi bi biapi asi lo. Biapi asimi cu, "Kan miphun le ram nih a herh ko tiah kan ruahmi thawngtha tampi aupi tu asi."