 |
| Victotia Camp |
Mi Zei Dah Kan Si? (Who we are?)
Meeting kan tuah dih hnu in le biakinn ah thawngtha kan i hrawm dih hnu in, Chin miphun nih kan ruah dingmi le tuak dingmi biahalnak (4) ka thinlung ah a chuahter.
(1) Lai (Chin) miphun hi zei dah kan si (Who we are?)
(2) CNF hi zei dah an si taktak? (Who they are?)
(3) Lai aa timi nih kan ram le miphun caah zei dah kan pek ve?
(4) Laimi nih kan tuanvo kan tuan maw?
Hi biahalnak hna hi, Laimi dihlak nih kan ruah a herh. Hi hna hi kan ruah lo ahcun, "Mi zei dah kan si ti zong kan fiang taktak lai lo i, CNF zong zei dah an si taktak?" timi kan fiang kho hlei lai lo.
Hi biahalnak vialte ka ruah hnu ah, Columbus meeting hi kan caah cun theipar tha a chuahtertu meeting ah ka ruah. Zeicatiah hi meeting ah zei hmanh thuhmi um lo in kan i hal hna i kan chim hna (Azapite cu ka tial lai lo).
Kan theih ballomi Camp Victoria ummi hna kan miphun ralkap (CNF) hna nunning taktak (real life) kha fiang tein a kan theihter. Cu hlan ah mi tampi nih kan rak ruahmi cu, "CNF hi, ramdang nih an bawmh hna; NGO hna nih an dirpi hna; EU tibantuk cozah hna nih an bawmh hna le an i nuam tuk rua???" tiah mi tampi nih kan ruah. A cheu nih "Kah daihnak an tuah cang le bawmh an hau ti lo" timi zahzat kan si.
Camp Victoria ah caan sau ngai a thu dirmi nih, kan miphun ralkap hna an temtuarnak le harsatnak a chimmi cu, celh ding a si lo. Nu hrin fanu cio? Nuhrin fapa cio? Sining tha an duh ve ko. Cawnnak sang an duh ve ko. Ram dang ah kal in nun nuam tein nun zong an duh ve ko. A nuamhnak khuapi le hmunhma nuam ah um an duh ve ko nain, zei ca dah hi bantuk nunnak hi zei ca dah an rak i thim deuh hnga? timi ruah lo awk a tha lo.
Laimi tampi nih cun Victoria Camp kan ti ahcun, Laiza bantuk, Manapalaw bantuk in kan ruah men lai. A si naisai rih lo. A lang cun fingtlang aa dawh caah duh a nung ngai nain, a chung ah a thudirmi hna ca ahcun, harnak chim cawk lo an tuar (Hmanthlak zoh chih).
Victoria Camp timi cu, "Teinak Camp" ti asi nain, a chung ah tei dingmi ral tam tuk a um rih. Kawl ralkap doh hlan ah doh ding ral tam tuk an ngei. Sifahnak, tirawl-eidin harnak, zawtfahnak, khuacaan harsatnak, thilri-hnipuan ngeihlo, sianginn ngeihlo, biakinn ngeihlo, pastor ngeihlo, dumhau ngeihlo, thinphannak, ngeihchiatnak, lungretheihnak, lunglennak le hmailei zeidah kan si lai timi tinhmi ngeih awk a tha tuk lo mi....chim cawklomi ral doh ding an ngei.
An tuarmi harnak kan chim cawk lai lo. Tio le Lahva tikhu le khuasik an tuar. Chun ah nilin khua-al an tong. Innlo riahnak inn tha-thi le a um fawn lo. An innlo hna cu, Laimi sifak bik khua hmanh a tluk hna lo. An hruaitu pakhat nih, "Kan di hna cu, arfi thlapa rel khawh dih in an var ee. Thli cu hurhur in zalawng tein innchung ah an lut ko" tiah ati. Pastor quarter cu "Nichiar tii toih lo ahcun a buan tuk i a khu tuk ee" tiah a ti. Cu vial cun an innlo mitthlam ah suai khawh asi cang. Victoria Camp hmanh cu tluk asi ahcun, camp dang cu mitthlam ah suai khawh dih asi cang.
Cu dirhmun in "Kawl cozah he, Kawl ralkap he zei tin dah artlang in an dir khawh lai? Zei tin dah bia an i ruah khawh lai? Cabuai cung i biaruahnak ahcun "fmnak, thiamnak, hngalhnak lawng zong a za lo. Power (thazaang a herh)" timi hi Lai miphunpi kan fian a herh. Camp Victoria khi, Laimi caah kmiphun aiawhtu hna headquarter a si. Kan miphun thazaang khi Camp Victoria zoh in a lang kho.
Cucaah Victoria Camp hi, Laimi nih kan zoh sawhsawh ko lai maw? Khi camp khi, Kawl nih zei an rel lo ahcun nangmah le keimah zong zei ah a kan rel lo chih cia" ti kan theih a herh.
Camp Victoria ah caan saupi thudirmi Rev. Tluang Hre nih an harnak kong cu cat lo in a chim. CNF nih an harnak hi chim an duh lo i, a tuar tein an tuar ko ee. Kan miphun nih zeitluk in dah an har le an re a theih timi kan rak thei lo ee ati. A chimmi chung ah thinlung a khoih bikmi cu, "Nau a pawimi nu hna eidin a chiat ruang i thlano an theih tuknak, an damlonak, an kutke a hihnak le nau chuakka hnuk an i zaat lo nak le an vitamin baunak a chimmi ko" a fak khun in ka thei.
Karen le Kachin cu an rum deuh i, chan tampi ral an do kho. Chinland ah dothlennak a donghlonak ding caah, CNF kan fale an dam le an thawn a herh taktak. Chungkhar an khim le ngandam a herh taktak. Cucaah Laimi nih pumlawng lomi kan Chin ralkap hna le an fale zoh sawh awk an tha lo.
Ralkap van zoh rih hna u sih. Pa ralkap cu pa an si. An temtuar zong ah a zia deuh. CNF nu-ralkap ngaknu tete, thilri an ngeihlonak kong, eidin an harnak kong le ngaknu no tete an damlonak kong le an vitamin a baunak kong kan theih ahcun, mitthli a luang. Thinlung akuai. Upa thangthat awk tlak le hmaizah awk tlak taktak an si. Asinain an harnak kan hrawmpi tung hna lo ahcun zeidah a thahnem timi ka ruat. Nu nih nu kong theih deuh a si. Lainu hna nih zeidah nan tuah lai? Hi dothlennak ah Lainu vialte tel dih a herh ko hnga lo maw? Hmun kip um Lai nusal tha hna nih an harnak zei tin dah nan hrawmpi hna lai? Abik in ram rumthawng ummi Lai nusal tha hna nih nan chanh hna lai maw?
Rev. Tluang Hre ka halmi a ka chimhmi nih ka thinlung a ka kuaiter taktak. A chimmi cu hitin asi: "Camp Victoria in gospel team kal ding in hla kan cawng. Kan i tim tuah dih cang. Kal caan a rak phan i, 'Saya kan kal lai lo. Kan kal ngam lai lo' tiah an ti i an i leet viar ati. Cu tik ah, "Ziah nan kal ngam lai lo?" tiah ka van hal hna. An ka lehmi cu, "Saya, uniform lawng pei kan ngeih cu. Thilri thlennak hni le angki kan ngei tung lo an ka ti i, ka ngaihchiat bak hi ka celh lo ee" tiah a ti. Cu sining ruah ah, Victoria Camp i Lai nusaltha hna tuanbia cu kan fiang viar cang lai tiah ka ruat.
Ram tha kan um tik ah, voi tampi cu midang harnak khi kan ruat lo hrimhrim. Syria le Iraq ral ram te hna harnak, Kachin ram te hna harnak, a theih lawng kan theih i, ngaih nuam sawhsawh bantuk ah an cang. Asinain Victoria Camp harnak theih ahcun hnarno a tam. A celh in celh a si lo.
Rev. Tluang Hre nih a chimmi a tam lengluang. Cu chungah ka philh khawhlomi cu, hihi asi. Victoria Camp kan kal lai ah, "An har ngai le nan taklawng cun kal hlah u" tiah a kan ti i, heh tiah kan tuaktan hna i, facang tun 20 le chiti le zeidang eidin aphunphun he kan va phan. Ahmun kan phanh cu, an i lawm tuk. "Saya ra hlah u law, thaizing zeidah kan ei hnga? tiah pei kan khuaruah a har cang cu. Rasen tun (2) lawng a um cang ee" tiah a kan ti a ti. Meh kong cu chim ding a um lo. Rasen hmanh khim tein an ei lo ti a si caah.
Pastor cu ka hal. Nifatin zeidah an tuah? Zeitluk in dah eidin an har tiah. An harnak chim hi an duh lo nain, na ka hal caah ka chim ko lai:
"Victoria Camp ummi hna hi, an temtuar taktak ko. An dam lo caan ah si mum ei ding a um lo. Rai nih a fanh hna. Khuasik ahcun chum a zaam i, chun tiang khua chiat le that hi theih khawh a si lo. Asinain zingka tein ralkap cu an tho i, an i cer. An mah le an tuanvo rian cio an tuan. Chun nitlak din lo in an tuan peng ko. Lakphaktii din awk zong an ngei lo. Zarh khat ah lakphaktii hrai khat hmanh an ding kho lo ee ati. An eidin a chiat caah, an derthawm ngai ee. Lakphaktii hmanh zarh khat ah voikhat lawng an ding kho."
"An fel tuk. Keimah din ding ah tii in, coffee ka kenmi a um. Rawl a ka chumh piaktu CNF ralkap pa kha, ka tuah piak ve i, 'Coffee ding u sih" tiah ka sawm. A ka lehmi cu, "Kei ka hawi le an ding ve lo. Cucaah ka ding lai lo" a ka ti i, a ding duh lo. Cun kei zong ka ding kho ve ti lo. Cucaah kan pahnih nin dinglo in kan um. Ahnu ah, nu-ralkap tu kan va pek hna. Cuticun asi le ei zong ah kaa a thaw lo. Din zong ah kaa a thaw lo ee" tiah a ti.
Cucu an har lio caan zong ah, CNF nih ralkap upadi (code of military) fek tein a dirpimi le an zulhmi a si. Ralkap taktak nunzia cu, cucu an si awk a si. Mah lawng him le mah lawng khim a ngah lo. Khim ah khim ti, tam ah tam ti cu, ralkap tha hna lungput le nunnak asi. Cu CNF pa lungput bantuk tein CNF tampi an nun caah, nihin ni tiang Kawl cozah zong nih upat hmaizah awk tlak an si.
Chungkhar ngei ve mi le harnak tampi ramdang ah a tuarmi ka si ve caah, ka theihthiam ngaingai. Ram hruaitu tampi hna cu an rum theng bal lo. Acheu cu an thih ah leiba zeimaw zat a thihtakmi ram hruaitu tampi an um ve hna.
CNF hruaitu tam deuh cu, an rak har ngaingai hna timi hi, keimah mithmuh a si ve. Zeicatiah ramkhel rian an tuan. Tangka kawl caan an ngei lo. Nifatin nunnak ah tangka a herh peng fawn. Tangka lo in nun a ngah lo. Lahkhah le an ei fawn lo. Cucu an dirhmun asi. Cu hmanthlak suai ahcun, an sining a fiang dih ko lai.
Cucaah Laimi dihlak nih kan mah tein bia kan i hal a herh cang. Victoria Camp i, pumlawnglo ummi kan nu le hmanthlak ruah a herh. Vitamin a bau taktakmi fano cawnmi nu le hna; vitamin bau taktakmi ngakchia chuakka hna; derthawm ngai in sianginn a kaimi ngakchia hna; Tio le Lahva tikhu le khuasiak lakah khua a sami ralkap hna; si mum khat din awk a ngeilomi raifanh le zeidang damlonak in a ril ko mi hna; zarh khat ah voi khat hmanh lakphaktii a ding kho lo mi hna; thilri thlennak a ngeilomi nu-ralkap ramdawtu tete hna......
Laimi u le nau dihlak nihin ah, question tampi ruah ding kan ngei. Kan tuanvo kan tlolh tuk sual maw? Laimi hi zeidah kan si? Kan ruahnak zeitluk fang dah kan si? Miphunpi ruahnak kan ngei kho ve lai maw? Kan ram le miphun cu Kawl miphun le cozah kut in him seh ti kan duh ah, zeidah kan pek ve? Kan i sensomi le pekchanhmi a um maw? Zeidah a hram kan saih ve?
Nang le kei nih kan mah pumpak, khua le tlang cio te lawng kan ruah ahcun, Chinland timipi khi Kawl nih an dolh dih ahcun, na khua, na tlang, na peng khi a him hlei lai maw? Kan khuaram a him lo ahcun kan miphun a him hlei lai maw? Kan miphun a him lo ahcun kan Krihfa biaknak le kan zumhnak cu a him hlei te lai maw?
Cu question cu tha tein i hal cio ahcun, kan miphun ralkap hna le an umnak khua hi, tanh lo awk a tha lai lo dah tiah ruat bu in!!!!!
No comments:
Post a Comment