International Harvest Garden Ah Cinmi Lai Anhringso

Commissioner le hawi le he dum chungah (Aug 3, 2016)

Dayton, Ohio ah kum 10 leng khua kan sak hnu ah, October 4, 2008 ah Columbus ah kan rak i thial. Laimi kan mah chungkhar he 37 lawng kan rak si. Cu lio ahcun Emmanuel Chin Baptist Fellowship tiah min kan rak i bunh i, Pu Ram Lian Thang inn ah kan rak i pum. June 1, 2009 in University Baptist Church ah kan rak i pum i, minung 100 kan rak phan deuh lo.

Columbus ah dum hi i tuah kho ve sehlaw a tha hnga tiah kan ruat lengmnag. Lam kan hmu kho lo. Ahnu ah ESL kainak ah volunteer in rian a rak tuanmi Mirangnu he kan i tong hna i, amah nih lam a kan kawlpi. Franklin County i Commissioner zungah kan va ton hna. Meeting voi tampi kan ngeih hnu ah, Gantz Road ah dum a kan pek.

Cu dum cu tlakrawh inn a hlunmi cungah a um. Vawlei an van kalh ciammam i, lung, tlakrawh kuai le thetse a tam tuk ning chim awk thalo asi. Cucaah an chuahtak. "Tuah awk a tha lai lo" tiahhawng an ka thanh. Dum cu ka va zoh. "Laitlang khi tluk a harnak hmanh ah pei dum kan tuah cu. Kan i zuam lai i kan tuah khawh ko lai" tiah ka ti hna.

Cucaah thlai cin caan a tawi ngai cang nain hmailei dum ngeihnak caah tiah kan ti i, High School siangngakchia le mino nih loh-aa kan pe i, lung le tlakrawh vialte cu kan char dih. Ton 2-3 cu asi men lai tiah ka ruah. Thlai cu tlawmpal kan cin i, a dih zau colh.

A kumvui cu dum cu kan tuah than. Anthur, mai-an, hamhhmui le hmathak an tha taktak. Laimi kan duhmi eidin tete asi i, lung a rak i lawm tuk. Cozah nih cu hmun cu siangin ah kan herh an ti than i, an cawk than hna. Cucaah dum dang ah a kan thial than.

Cu dumdang ahcun hmunhma a rem i cinthlaknak vawlei a tha. Anhringso an tha tuk hringhran. Member kan karh i dum kan i za ti lo. Cucaah commisioner zungah kan chim than i, acre kau ngaite a kan pek chap.

Cuka dum ahcun (1) Laimi; (2) Somali Bantu; (3) le Grove City sang i a ummi pawl caah ti in, hmun (3) ah a kan then. Laimi hi a tuahmi kan tam cem caah, kau bik a kan pek. Grove City nih an tuah khawhlomi zong, Laimi a kan pek tawn. Cucaah 2016 cun Laimi chungkhar dihlak nawn dum an ngei hna.

Laimi an cinmi hna cu (1) Anthur aphunphun; (2) Mai-an; (3) Anfangkha; (4) Sawmpi; (5) Sentok; (6) Bawnbok; (7) Hamhhmuai; (8) Zungpa-te tii; (9) Salari; (10) Putinan; (11) Makphek; (12) Ram-ansa; (13) Anhling; (14) Hinnuh-nuai; (15) Antam aphunphun; (16) Antam tawba ngei phunphun; (19) Phazian phunphun le (20) Adang American thlaihnah pawl an si.

Hi dum nih hin atanglei thil tha tampi a chuahpi:-

1. Lai duhmi mah anhringso te eidin khawh asi
2. Organic anhringso asi caah ngandamnak ca a tha khun
3. Dawr kal hau lo in mah dum chuak an ei caah tangka a dihmi a tlawm deuh
4. Laimi cu lo tuahmi miphun kan si caah, an thinlung a nuam
5. Hmunkhat ah an umkal ti hna i, hawikomhnak le biaruahnak a tha
6. Kutke cawlcanghnak rian asi caah damnak zong asi
7. Somali le American minung he zong ngamhtlak deuhnak asi
8. Dum hna kan ngeih tik ahcun America ram hi kan ram asi ve ti in kan hmuh
9. Columbus hi USA ah dum tambiknak khua asi i, khua dawhtertu dum asi.
10. Minung nih rian kan tuan tikah thinlung damnak asi

Khuai tlanh ding caah pangpar an cinmi asi

USA nih dum an tuahning ah cawn awk tlak ngai asimi le Laimi he kan ruahnak aa dangmi pakhat a um. Kan dum kam le dum laicer ah acunglei hmanthlak ka chiahmi pangpar hi tam ngai an cin hna. "Ziah hi pangpar hi nan cin? Zuar ding ah maw?" tiah dum coodinator nu ka hal.

"Asi lo. Khuai tlanh ding ah kan cinmi asi. Khuai tam deuhdeuh an rat tik ah, nan cinthlakmi eidin hna hi khuai ruangah a theipar an tha deuh lai timi kan ruah caah asi" tiah a ti.

Lailei ahcun khuaivah, khuaifung le khuai-ik te hna hi kan cinthlakmi theipar tha an chuah khawhnak ding caah tuanvo ngeitu cem an si i, kan nih cu an thathnemnak kan thei lo i, heh tiah kan thahnawn hna. Laitlang zongah kan cinthlakmi a theipar tha seh tiah ahcun, khuai phunphun hi kan thahnawn hna lo le karhter a herh ve. 

Sawmpi le anthur an si

Anthur phunphun

Antampawl le anthur bur hna

Sentawk zong an cin chih hna

Sentawk a cang in cinmi an si

Somali cu Fangvoi deuh lawngte an cing

Zungpa-te tii le anthur an si

Anthur an lawh lio hna

Sawmpi ruang

Zungpate-tii asi

Dum lei tuanvo latu cheukhat he

Comissioner zung in dum zohtu pawl he

Sentok an cinmi

Commissioner John he dum chung ah

A linh tuk pinah hmathak ka tehter hna i a thak tuk hna lio asi

Somalia Bantu hruaitu pa le John

Lai anthur a thaw taktak mi asi

Thur-zaam timi phun asi

Laimi kan kaa a kan thawtter cemmi

Anthur phunphun

Lailei mai-an

Lailei mai-an

Bawnbok le Sentok

Khuai caah dum kamah pangpar cinmi

Khuai caah cinmi pangpar

John le a hawi le tlun an i thawh lio asi


John O' Grady hi Franklin County Board of Comissioners i an thim hnu ah, amah nih hin Franklin County hi USA rampi chungah a tha bik, tlawn bikmi le zoh bikmi hmun pakhat ah a canter tiah a tuanbia an tial. Mi nuntha taktak, capo le nih a huammi asi. Kan i ton caan zongah heh tiah capo kan chimti tawn.

August 3, 2016 ah International Harvest Garden len ah commissioner zung in, minung 6 an ra. Somali hruaitu le kan dum coodinator nu zong an ra ve. John cu lungthin kau taktak ngeimi asi. Kan dum laicer ah, "Mah khi zei thei dah asi?" tiah makphek aa dawhtaktakmi te kha a ka hal. "Makphek asi; a thak taktak; na tep duh maw?" tiah ka hal. "Ka teh duh ko" tiah ati i, pakhat cio ka pek hna. Nu cu an ei ngam lo. Pa pahnih nih pakhat veve an ei. Pa pakhat cu zat ceu lawng a ei. Commisioner pa nih pakhat a ei.  A thak tuk i, tii tor in a din.

"Makphek ei zuamnak kan tuah i ka tei viar hna" tiah ati. An dum ah makphek a cinmi hmanthlak zong a ka piah ve. Keimah Laimi hmanh nih rawl lo cun pum khat ei a har ngai i, anih cu a thah siling te pum khat a ei. A thawng bak. A thlan zong a chuak viar ve. Miphun dang i nuam hna seh tiah, kan eidin a kan hnek piak i a tehmi zong mifim an sinak a lang i, ka upat ngaingai.

John O'Grady hi chungkhar unau 12 lakah ahniang bik asi. A nupi cu Pamela Hykes O'Grady asi i, a fale 4 cu Elizabeth, Jack, Patrick le Erin an si. Nupi fate a daw taktakmi asi lai tiah ka ruah. An tlun lai te ah, Garden Coordinator nu Beth nih a tuahmi pangpar dur lak ah aa dawh bik te kha a lak i, "Hihi kan nu caah ka put lai?" tiah ati i, aa lak. "John, nihin fah fimnak na sin in ka lakmi a um i, kei zong nih pangpar dur pakhat cu ka lak ve lai" ka ti i, ka tinpi ve. Inn ka phak tikah kan nu aa lawm tuk ve. Ka mithlam ah a cuangmi cu "John nupi zong aa lawm tuk ve ko lai" timi asi.

MSNBC in reporter nih John interview an tuah lio asi

Amah a ra lai ti an theih caah MSNBC in reporter zong an ra i, TV news chuah ding caah interview an tuah. Sau ngaite bia an ruah. Kan mah zong interview tawitete a kan tuah ve. Dum cu ni a lin taktak. Zing 11:00-12:30 an um i, an tlung than.

Hi dum tuahnak ah Franklin County cozah nih tangka tampi an dih. Dum kalhnak, kulhnak, tii, tipipe le herhmi vialte a kan tuah piak dih. Ngengpi nih anhringso zong a rak ei tawn i, cu zong cu a kan ven piak rih. An caah thathnemnak zeihmanh kan ngei lo nain, hi tluk a kan dawtmi cu lunglawmh lo awk a tha lo. Dum in a chuakmi eidin a cheu cu "Ohio Food Bank" ah an hlut hna i, sifak santlailo nih free in an rak i lak hna. Kan nih Laimi kan cinmi cu American nih an ei tuk rih lo caah, hlut awk zong a tha tuk rih lo.

John O'Grady le commissioner zung riantuantu dihlak cungah lawmhnak chim cawk lo kan ngei. International Harvest Garden hi Laimi le Somali kan caah a rak tha tuk. Kan biakinn lampi ah asi caah, umkal pah ah Krihfabu chungtel hna zong an tang kho pah hna i, an i nuam tuk hna.

Cucaah International Harvest Garden hi, Columbus Laimi tampi caah taksa, thinlung le thlarau in lawmhnak a kan petu dum pakhat asi. Pathian thluachuah kan relnak zong asi. 

----------------------------------------------------------------------------------------------

Chinchiah

Atanglei te hi International Harvest Garden konglam le phungphai an tialnak asi.

USA Ah Cin Khawhmi Lai Anhringso

Semnak kan Lairam ah hin, khuacaan le hmunhma a niamsan hawih in anhringso eidin tampi a chuak ve ko. Ramtang ah anhringso eidin a thawmi tete tampi an um. Nihin ni ahcun zeimawzat cu inn ah cin an si cang.

Tahchunhnak ah, hnahcang, tialbawp, anhling, tiamti, khanghmung, zawngtah le hmunhma hawih in eidin phun dangtete an um. Dongkuar, tuaihmawng, cangai-an te hna zong ei khawh an si.

Laimi nakin Mizoram minung khi anhringso eidin tam deuh an eimi aum. Tahchunhnak ah, baibing, cing-it, thingthupi hna hna hi Mizo nih cun an ei ngai hna i, Laimi nih cun kan ei tuk lo.

Lairam eidin hna hi Kawlrawn zong ah cin khawh an si i, a cheu cu USA zong ah chin khawh an si ve. Acheu cu a kihnak ah cin khawh an si lo i, a lumnak hmun lawngah cin khawh an si. Laimi nih kan eidin ngaingaimi atanglei eidin hna hi USA ah tam ngai Laimi nih kan cin cang hna i, lunglawmh awk ngai asi.

1. Anthur aphunphun
2. Mai-an
3. Aithing
4. Ram-ans
5. Hamhhmuai aphunphun
6. Bawnbawk aphunphun
7. Sentawk aphunphun
8. Sawmpi le pe aphunphun
9. Pusinan le saleri aphunphun
10. Makphek aphunphun
11. Antam tamnem le tampawl aphunphun
12. Anhling
13. Hinnu-nuai
14. Kawhra-hnah (Kayun-yuat)
15. Anfangkha aphunphun
16. Hmaihremte
17. Khachuan phunphun (chuanpi, chuan-awng, chuante)
18. Kamphe
19. Baa phunphun
20. Nannan le citani ca hmanmi aphunphun

Hi hna hi USA Laimi dum ah ka hmuh tawnmi hna an si. USA ah hmun kip ka tlawng i, Laimi nih an cinthlakmi tete ka ngia tawn. Lairam eidin hna hi USA ah an nung kho ve maw? Sipuazi caah cin khawh an si lai maw? America minung nih an ei duh ding in market kan ser kho ve hnga maw? Indian le Arab hna nih cun an eidin hi American minung an eiter khawh ngai cang hna i Lai tirawl hi teh kan duhter ve hna hna hnga maw?" timi ruah awk a um.

Naite July 29-31 ah Houston, Texas ka va tlawng. Hotel ah zan (2) ka riak. A zan (3) nak cu Rev. Van Thawng Lian (Isaac pa) te inn ah ka riak. An inn cu a tha ngaingai. An area zong a kau ngai. Zanlei sangah an inn dum kam ah kan i chawk. USA ah ka hmuh bal rih lomi Laitlang anhringso tete an cin hna i, an rak tha ngai. Acheu anhringso an cinmi cu, USA ah ka hmu bal rih hna lo. An mah inn lawng ah ka hmuh hna i, kai lawm ngai. An cinmi hna cu an nun lawng sislo in an rak tha ngai. Eidin tlak zong an si cang hna.

An cinmi anhringso USA ah ka hmuh ballomi hna cu atanglei (5) hi an si:-

1. Anphui
2. Danh-ta-lun
3. Tihmaihrem
4. Khui-toh hnah
5. Khanghmung

Cu an dum an cinmi zoh tikah, Texas bantuk a lumnak hmun ahcun Lairam le Kawlram eidin tampi cin khawh asi lai timi a fiang. Hmailei ahcun sipuazi caah a thahnem lai tiah ruahchanknak a um. Rev. Van Thawng Lian te inn an cinmi anhringso cu duh an nung ngai i, zohchun ding ah hika ah ka van chiah hna. Theihtlei ngaite an si.

Khui-toh ruang asi. Kawlram eidin asi.

Hmathak thakte asi. Akung alian i a tlai a tha taktak.

Retei tlai le Antam tampawl an si. 

Kawlram ah an ei ngaimi "danh-ta-lun kung"

Thal caan i a thaw khunmi Anphui 

Tipi-hmaihrem asi. A tlaika te asi.

Lairam eidin thawbik pakhat "Khanghmung" asi.

Sangphawthei le tipi hmaihrem

Rev. Van Thawng Lian Inn hmai

Rev. Van Thawng Lian te dum kam tibual asi. 

Ka philh khawhlomi cu, Atlanta, Georgia kan rak tlawng i, Laimi nih an cinmi eidin zoh ah, khuaruahhar asi. Atlanta khua i sentawk (hmaihrem), anthur, hmathak cu khuaruahhar in an kung a sang. Sentawk kung hi minung cancan an si. Kawlram hmanh ah cutluk hmaihrem, bawnbawk le anthur kung sang cu ka hmu bal hna lo. Ka khuaruah a rak har tuk.

Hmailei ahcun Lairam i kan eidinmi anhringso paohpaoh hi, USA ah luhpi le cin ve a herh. An mah American nih an ei duh ding in kan tuah thiam ahcun sipuazi caah a tha tuk ding an si.

Hlan ah Japan Sushi hna zong an rak ei tuk bal lo. Asinain market ah an chiah i, duhsah tein an zuar lengmang tik ah, kum 100 a tlin tik ahcun sushi hi USA ah ei bikmi tirawl pakhat ah a tla cang. Lairam anhringso le eidin hna zong, hi hnu kum 100 ahcun USA ah Laimi kan i cawmnak sipuazi rian zong ah an cang kho ve te ko lai.

JC Penney Nunnak Ah Pathian Aa Phuannak

JC Penney dirhtu James Cash Penney

Rumnak nih nuamhnak, lunglawmhnak le thanuamnak cu a chuahter khawh nain, a cawk cun a caw kho hna lo. Zeicatiah cu thil hna cu, aleng lei in a rami siloin chung lei in ara mi an si caah asi i, chawva in cawk khawh an si lo. Minung hi Pathian nih aa lawmmi siter a kan duh nain, lawmh hi a rak har tuk.

Cucaah Jesuh nih a biapi taktak in a kan cawnpiakmi cu, Pathian dawtnak theih, zumh le bochan lawng ah, "lunglawmhnak le lungsi hnangamnak" kha hmuh khawh asi ti kha asi. "Pathian kha pakhatnak ah chiah" i lunglawmhnak le lungsi hnangamnak ngeih hmasat hnu ah, zeidang hi cu "chap nan si ko lai" tiah ati.

Zeicatiah minung cu "ngeihmi hnihkhatte ah aa lawm khomi le lungsi hnangamnak a ngeimi" si hi a rak herh tuk. Paul zong "a ngeihmi hnihkhatte ah nunzia a thiam i, lunglawm le lungsi hnangam tein nunnak a ngeih" tikah vawlei hi a caah sullam a ngei tuk hringhran (Matt. 6:24ff0; Phil. 4:11ff).

Cucah Jesuh nih Pathian riantuan aa thawkka tein, minung caah a herh taktakmi thil (2) a kan cawnpiak. Cu hna cu "chawva le vancung pennak" kong asi. Nunzia thiam le hman zia thiam ahcun, "chawva le vancung peknak" hi aa ralkahmi an si lo. Asinain, "Krihfami zumtu caah zei thil hi dah hmai suang ah kan chiah hmasat awk asi?" timi tu hi a biapimi thil cu a si.

Jesuh nih cun, "eidin tirawl le hnipuan nakin Pathian kha biapi ah chia hmasat a kan fial. Nawlbia (10) zong nih, Pathian kha pakhatnak ah chiah a kan fial. Zeicatiah Patian kha hmaisuang le zeizongte hrampi kan chiah ahcun, zeidang cu amah ta viar asi caah akan pek ko lai ti kha, Bible cawnpiaknak asi.

Asinain, minung cu Adam chan in hakkaumi kan si. Thlarau le Pathian nakin mit hmuh khawhmi thilri tu hi biapi deuh ah a chia tawnmi kan si. Vawleicung rumnak le sunpar lianhngannak hna nih, "lunglawmhnak le lungsi hnangamnak a chuahpi lo timi le cu thil hna cu a hmunmi an si lo i caan tawite ca lawng an si" timi hi kan theih ko nain, kan nunpi kho tawn lo.

Cucaah "zeitluk ngeih zong ah lungsi hnangamnak timi ngeih khawh asi ti lo. Tangka million zeizat ngeih zong ah a za timi aum fawn lo. Hakkauhnak chung tu ah khan, a pil in pil chin lengmang asi. Pathian pennak kha pakhatnak a chialomi minung tampi cu, an nunchung hman cawk lo ding tangka ngeih zong ah, an hna a ngam kho ti lo. Lungthin a dai kho ti lo. Thin a phang i lungretheih le khuaruahhar vansannak in an khat tawn. Cucaah "mi nih hi vawlei pumpi hmanh co sehlaw a nunnak a sungh tung ahcun zei dah a thahnem" timi ah khan an chuak theu tawn.

JC Penney timi mirum pa tuanbia zoh tikah, "tangka nih lunglawmhnak le hnangamnak taktak a caw kho lo" nain Pathian biatak nih cun "lungsi hnangamnak a chuahter khawh" timi hi fiang tuk in a kan chimh. JC Penney tuanbia hi Krihfa vialte caah zohchunh tlak tuanbia asi caah, zohchunh dingah ka van tial.

JC Penney hi riantuan huam le mi fel taktak asi. $2000 in, April 14, 1902 ah Kemmerer, Wyoming ah dawr fate a rak dirh. An zuarmi thilri cu thilri, suingun, belkheng, seh phunphun, innchung thilri, electronic thilri, thukbawih le kedanh tibantuk an si.

JC Penney dawr hmasat bik (www.panoramio.com)

JC Penney pa cu Hamilton, Missouri i Krihfabu fate, Primitive Baptist Church ah pastor a rak si. A pa nih a rak cawm kho setsai hna lo i, kum 8 asi in nangmah tein rian na tuan lai thilri na cawk lai i sianginn na kai lai tiah an rak cawnpiak.  A pa nih, "Nunnak timi hi a fawi lo. Tlamtlinnak (success) timi cu caan saupi rianhrang tuannak lawng in hmuh khawh asi. Asinain Golden Rule (Sui Phung) na zulh i, midang kha upatnak le dinfelnak in na pehtlaih hna ahcun, phun dangdang in thil aa mer lai i, a theipar a tha ko lai" tiah a rak cawnpiak tawn.

Rianhrang tuan le dinfelnak in rian a tuan. A pa cawnpiaknak bantuk in Krihfa zumhnak kha sipuazi tuahnak hrampi ah a chiah. A dawr than ning a rang taktak. Khuaruahhar in thluachuah ahmu. Dawr fate in thawkmi cu 1912 ah dawr 34 a ngei i, 1917 ahcun State 22 ah dawr 175 an on. 1924 ahcun dawr 500 nak an on khawh cang. 1928 ah dawr 1000 nak an van on i, an miakmi tangka lawng hi 190,000,000 aphan (2016 phaisa in tuak ahcun 2.62 billion a si).  1929 ahcun dawr 1,400 a ngei cang.

A rum tuk caah, ka dawr le sipuazi zeitluk in dah a than lai timi lawngte a ruat.  Passtor fapa asi ko nain, sipuazi  aduh tukmi asi caah anunnak ah Pathian bochan tuk lem lo i, rumnak le chawva kawlnak ah a lungthin a rak kal deuh.

A dawr le ngeichiah hna cu a tlu kho lo dingmi vampang bantuk in a ruah lio ah, 1929 ah ruah lo pi in USA sipuazi a tla ciammam i, US tuanbia ah ahar bikmi "The Great Depression" timi a rak chuak. An sipuazi a tla tuk i, "stock" (thil man) vialte aa rawk dih. JC Penny zong cu a dawr pakhat hnu pakhat an rawk; atangka ngeihchiah vialte an lo thluahmah. A nupi le fale he hmanh an i theithiam kho ti lo.

A ngeihchiah vialte an lo dih deng pinah "singles" timi damlonak a van ngei. A lung a rawk. A eiding kho ti lo. A it kho ti lo. A nunnak ah, lungsi hnangamnak pakhat hmanh a ngei kho ti lo i, mah le mah thah tiang khua a ruat. Adonghnak ah, a hawi hlun pakhat nih Battle Creek, Michigan ummi sizung pakhat ah na um ah a tha lai tiah ati i, cuka ahcun a va um.

Zankhat cu aa tengtele. A celh ti lo. A it kho ti lo. Ka thi ko lai tiah khua a ruat. Zei bantuk sii an pek zongah a dam kho ti lo. Cucaah arkhuang in tuan taktak in a tho i, innleng ah a chuak. Culio chapel in a ngakchiat lio a theih tawnmi music hlate a van theih. Cu hlate cu "God will take care of You" (Pathian nih an zohkhenh ko lai ZBC.52) timi asi.

A kal kho setlo nain tlun nawnnan in doctors le nurses tampi an umnak chapek ahcun a va lut ve. Cu lio ah mi pakhat nih "Thil a ritmi le re a theimi hna ka sinah ra u law, dinhnak kha nan hmuh lai" timi bible kha a van rel.

Cu cangka cun JC Penney cu thlarau in tharnak a van hmu. "Pathian nih a ka zohkhenh ko lai" timi zumhnak a van ngei. Cu hlan ah a ngeih khawh ballomi, lunglawmhnak, ruahchannak le thanuamnak a van ngei. Cuticun a van dam i, sipuazi biatak tein a van tuah than. Kum tam nawn hnu ah, duhsah tein a sipuazi kai hram aa thawk. Tharnak a hmuh hnu ah a rak chimmi cu hitin asi:

"Kha caan te theng ah khan, thil pakhatkhat ka cungah a cang. Asinain zeidah a cang timi cu ka fianter kho lo...Cucu khuaruahhar nunnak thlennak asi i, cu caan thawk in mi phundang pakhat ka si thai cang. Pathian sunparnak kha ka hmuh i, cu hnu ah tipil in ding le biakinn ah member si ding kha ka tim."

JC Penney nih chapel in, Pathian bia a theih dih tik ahcun, lawmhnak le hnangamnak in a khat. Mitthli he thinlung kuai in thla a cam. "A nunnak ah aa fianmi cu "A zumh te lawng zum ko" ti hi a si. Tharnak a ngei ko cang nain, 1942 tiang cu tipil a ing lo i biakinn zongah member asi lo. 1950 lawngah biakinn ah member asi.

Hrinthanak a ngeih hnu ah Samaria Mitha riantuan hram aa thawk i, Penney Retirement Community in Penney Farms (Florida) te hna a tuah. Christian Herald Makazin le adang biaknak bu 100 tluk a bawmh hna. Kum 95 asi ah a thi.

JC Penney nunnak nih a kan cawnpiakmi cu, "Phaisa le vawleicung rumnak hna biapi chiah ahcun, lungsi hnangamnak a um lo; Pathian pennak kha pakhatnak ah chiah i, Golden Rule timi zulh ahcun minung hi rum khawh asi" timi asi. JC Penney cu Pathian pennak kha biapi bik a chiah hlan cu, lung sivanghnak in aa khat i, Pathian pennak kha a chung i a um hnu ahcun lungsi hnangamnak in akhat i zeidang vailte zong chap chih asi than ti kan hmuh. Cucu JC Penney nih a zumhnak ah hniksak a del bakmi asi.

Zumtu caah abiapi mi cu "lungsi hnangamnak ngeih" hi asi. Golden Rule zulh i, Pathian kha pakhatnak chiah zong ah, rum lo khawh asi ko. Sifah khawh asi ko. Asinain JC Penney bantuk in va rum lem lo zong ah, Pathian kha hmasat bik le hrampi bik chiah i, nifatin nunnak ah Pathian duhnak tuah kha biapi bik ah a chiami hna caah cun, lungsi hnangamnak le lawmhnak tling kha a um."

Asiahcun careltu tah "Pathian pennak maw pakhatnak ah na chiah? Vawlei ngeihchiah dah? Atu lio na nunnak ah lungsi hnangamnak le lawmhnak na ngei kho maw? Na chawva le ngeihchiah in, lunglawmhnak le lungsi hnangamnak na caw kho lai maw? Hi vawlei pumpi hmanh hi co law, na nunnak thlarau na sungh tung ahcun zeidah a miakmi a um?"

-----------------------------------------------------------------------

JC Penney Headquarter (Ref. www.fortune.com)

-----------------------------------------------------------------------------------
Chinchiah

1. Nihin ni ahcun JC Penney cu U.S Store vialte lakah a lian bikmi store pakhat asi. 2015 ah dawr US ram pumpi ah 1,060 a um. Riantuantu minung 100,000 leng an ngei. Headquarter cu, Plano, Texas ah a um.

2. JC Penney timi cu James Cash Penney timi a tawinak in tialmi asi. A nun chungah nupi voi (3) a ngei. 1929 Sipuazi tlak ruangah nupi le chungkhar he zong thennak a rak tong bal. A nunnak ah harnak tampi a tong ve i, atar lei ahcun Pathian ah lawmhnak tling a comi asi.



JC Penney Lungthin Thlengtu Hla

"God Will Take Care of You"

Be not dismayed whatever betide
God will take care of you
Beneath His wings of love abide
God will take care of you

God will take care of you
Through everyday o'er all the way
He will care for you
God will take care of you

Through days of toil when heart doth fail
God will take care of you
When dangers fierce your path assail
God will take care of you

God will take care of you
Through everyday o'er all the way
He will care for you
God will take care of you

God will take care of you

.................

Colubus "Free Clinic"

USA hi ram tha taktak a rak sinak cu, khuakip ah sifak santlai lo caah "Alakka in i zohter khawhnak sekhan" hi tampi a rak um. A caan belte cu hngahngan hna a hauh deuh tik le a tuan tuk in kal ahau timi bantuk hna asi caah, harsatnak tete cu a um ve nain, acheu cu appointment lak khawh an si i, a zia ngai fawn. Mit, haa le chonh khawhmi zawtnak le zeidang damlonak alakka sekhan hi tam tuk a rak um. Cucu USA a thatnak le a sunlawinak pakhat asi. 

Ngandamnak lei zohkhenhnak hi a man a fak tuk nain, free in tampi an tuah piak hna. Cozah nih a dihmi cu a liamh than tawn hna. Free clinic pawl hi an i dannak pakhat te cu, mi cungah dawtnak le zaangfahnak an ngei. Dawtnak taktak in timhtuahmi asi caah, an hmurka a tha ngaingai i, lungthin zong zaang an damter ngai. 

October 4, 2008 in Columbus ah kan pem i, Kawlram in a rami refugee tam deuh cu medicaid an ngei hna i, sekhan piah a fawite. Asinain medicaid ngeilomi caah free sekhan hi a rak herh tuk ve. Columbus hi Laimi caah nun a fawi ngaingaimi khua pakhat asinak cu, rian a tam pinah rian an tha ngai. Inn hlan man aa deng, lamsul atha; sizung le sianginn an tha. Khua a thianghlim i, "crime" a tlawm. Khua chung bus system a tha i, umkal a fawi. 

Cupin ah a that khunnak cu "Free clinic" hi a tam tuk. Sizung lianlian le sizung tha tampi a um caah, zohkhenhnak a fawi. Cun Ohio State cozah nih medicaid a tuahmi zong hi a rak tha tuk. State dang ah medicaid a hmu ballomi zong Ohio ah medicaid a hmumi tampi an um. 

Cucaah Columbus hi USA khua vialte lakah refugee tambik an phanhnak khua pakhat ah a tla ve cang. Atu ah Somali ram refugee hi 40,000-50,000 an um lai ti asi. Africa in Nigeria, Gana, Liberia, Eritrea, Jiboti, Ethiopia, Rawanda in tam ngai an um rih. Cun Iraq, Syria le Palestinian le Russia refugee zong an tam ngai rih. Cun Botan le Nepal ram in refugee hi 15,000 leng an um lai ti asi, Kawlram cun 1,000 kuakap lawng kan um. 

Atanglei hna hi Columbus i Free in i piah khawhnak Free Dental Clinic le Free Eye Clinic pawl an si. A cheu cu insurance ngeilomi pawl piahnak lawng asi. A cheu cu fee ah $5; $10; $20; $40 tibantuk tete lawng an lak hna. A cheu cu sii zong free in an pek rih hna. Hihi Columbus khua i khusak tuntuknak ah thin a phan lo ning le hna a ngamnak thil pakhat asi. Zawtfah tikah insurance ngeih lo zongah phan ding a um tuk lo. 

Hika website ah mit, haa, chonh khawhmi zawtnak le zeidang damlonak free sekhen vialte a um dih:

1. Haa piahnak http://www.freedentalcare.us/ci/oh-columbus

2. Mit le naupawi le zeidang damlonak http://www.publichealth.columbus.gov/

Top 9 clinics in or near Columbus

1. Vineyard Free Health Clinics - Dental Clinic

6000 Cooper Road
Columbus, OH - 43081

(614) 259-5428
Clinic Full Details

Dental exams, fillings, extractions & cleanings. No bridgework, orthodontics or dentures. Does not provide on-going care. Must be uninsured. No Medicare or Medicaid & at or below 200% of poverty level. Christian affiliated. Must call for an appointment. By appointment only. We provi

Clinic Full Details

2. Parsons Avenue Dental Center

240 Parsons Ave.
Columbus, OH - 43215-5331

614-645-7487
Clinic Full Details

Our hours of operation are Monday through Thursday 7:45am until 4:30pm and Friday 8am until 3pm.Clinic will see dental emergencies at 7:45am daily on a first come, first serve walk-in basis. You will need to have the following with you: Photo ID, either proof of income or a dental insurance card, an
website
Clinic Full Details

3. Lower Lights Christian Health Center

1251 W. Broad Street
Columbus, OH - 43222

(614) 274-1455
Clinic Full Details

Limited dental services available to health center medical patients. Sliding Fee based on income for the uninsured. Dental minimum fee is $ 20.00.

Clinic Full Details

4. Vineyard Free Health Clinics - Fifth Avenue Dental

171 East 5th Avenue
Columbus, OH - 43201

(614) 259-5428
Clinic Full Details

Walk-in clinic for residents of any zip code. Must be uninsured, no Medicare, no Medicaid, & at or below 200% of poverty level. Patients will be seen on a first come, first served basis. Dental exams, fillings, extractions and cleanings. No bridgework, orthodontics or dentures. Does not provide on

Clinic Full Details

5. Vineyard Xenos Fourth Street Free Dental Clinic

171 E. 5th Avenue
Columbus, OH - 43201

(614) 259-5428
Clinic Full Details

Routine dental exams including x-rays, cleanings, fillings and some (limited) extractions. Generally, we will not do wisdom teeth extractions. No bridgework, orthodontics or dentures. Hours: Every Thursday. Patients need to call & schedule an appointment Walk-ins will be seen if spots are availa

Clinic Full Details

6. West Side Health Center Dental Clinic

2300 West Broad Street
Columbus, OH - 43204

(614) 859-1830
Clinic Full Details

Franklin County residents only. Low cost dental care. Fillings, exams, cleanings and extractions (no wisdom teeth). Medicaid and private insurance accepted. Sliding Fee Scale based on household income. To qualify for the sliding fee, you must bring 2 current pay stubs (within the last 30 days) or S

Clinic Full Details

7. Stowe Baptist Church Emergency Dental Care

911 South Parsons Avenue
Columbus, OH - 43206

(614) 443-1120
Clinic Full Details

Emergency dental care (Extractions only). Donation of at least $10 per extraction requested. First come, first serve on Monday nights. (Usually the first 12 persons are seen). Door will open at 5 pm for the waiting room. Call Mondays if you need information.
website
Clinic Full Details

8. East Central Health Center Dental Clinic

1180 East Main Street
Columbus, OH - 43205

(614) 645-5541
Clinic Full Details

Franklin County residents only. Low cost dental care. Required co-pay for the uninsured will be explained at the time an appointment is made. Accepts most health care insurances and Medicaid. By appointment only.

Clinic Full Details

9. Capital Park Family Health Center

2365 Innis Road
Columbus, OH - 43224

(614) 416-4325
Clinic Full Details

Hours: Monday - Friday, 8:30 a.m. to 5 p.m. By Appointment Only, No Walk-ins.
website
Clinic Full Detail

------------------------------------------------------------------------------------------------

Biadonghnak

Free tein mi a zohkhenhtu hna cu kan caah "Good Samaritan" an si. Pathian nih thluachuah pe ko hna seh.