Church of Nativity timi Jesuh chuahnak hmun biakinn
Christmas ulh hi zeitik set in dah aa thawk le December Ni 25 theng hi Christmas ah an hman timi cu a tuanbia tling tein theih khawh asi lo. Duh sah tein a chuak i a thlen lengmang hnu ah, December Ni 25 hi fehter a rak si. Cu Ni kan hmannak cu kum thawng in a si cang. Jesuh hi December 25 theng ah a chuak lo kho men. Asi ahcun "Jesuh hi zeitik kum, thla le ni hrawng ah dah a chuah hnga?" timi zoh hnik hna u sih.
Bible nih Jesuh chuah kum, thla le ni kong pakhat hmanh a tial lo caah dik tein hngalh khawh ding asi lo. Sihmanhsehlaw, minung tuanbia kalning, Jesuh chuah lio Rome Siangpahrang tuanbia, Judah ram uktu hna, Judah nunphung le khuacaan hawih in abuaktlak cun tuak khawh asi. Cucaah Baibal nih fiang tein chim hmanh hlah sehlaw, kan fian khawh tawk dingmi tlawmpal cu a um ve.
"Mifim (Magi)" an ra timi le tukhal nih an rak biak" timi bantuk sawhsawh in cun a tuan bia tial khawh le hngalh khawh ding asi hawi ti loh. Cucaah kan hngalh khawhnak tlawmte lawng aum. Cucu Matthew le Luke cauk chung in an si. Asinain Matthew le Luke nih Jesuh chuah kong an tialmi hi an i dan ngai caah fian awk a har ngai fawn. Bethlehem ah a chuak timi lawng ah an pahnih in an i khat. Mark le John nih cun Jesuh chuahnak kong an tial lo caah an kong caih ding aum lo.
Bible nih Jesuh chuahnak kong ah thil fiang tein a kan chimhmi hawih in, Jesuh hi zeitik kum le thla ah dah a chuah timi kan zoh tuah lai.
Matthew Thawngtha Chungin
1. Jesuh cu Siangpahrang Herod Ngan (Herod the Great) a bawi lio ah a chuak (Matt. 2:1-18). Herod hi BC 40-BC 4 tiang Judah ram uktu asi. Jesuh hi BC 4 hlan ah a chuak tinak asi.
2. Herod a thih lai kum hrawng ah hin, a pennak ram a ho nih dah a co te lai timi kongah a awlawk a chon lio ngai ti kha Judah tuanbia ah kan hmuh. A zumhlomi hna cu a fale le a nupi hmanh a thah ko hna. A pennak kong ah, Matthew zong nih, "Herod awlok chonnak" kong a kan chimh (Matt 2:3).
3. Herod nih nichuahlei mifim hna nih arfi a chuahnak kong an chim ning tein a caan kha a tuak (Matt 2:16). Herod hi mifim taktak asi i, khua tuaktan kho taktak asi. Bethlehem he a chehvel hna khua in ngakchia kum 2 ri in a tang vialte thah did ding in nawlbia a chuah" (Matt 2:16).
4. Cucaah order a chuah hi a thih kum silo in a thih lai kum BC 5 hrawnghrang ah asi kho men. Cu hrawng ah Jesuh hi kum 2 fai asi cang ahcun, Jesuh chuah hi a tlawm bik ah BC 7/6 kuakap asi a hau. Hi lio ah hin, atu bantuk in calendar hi a rak tha tuk lo. Kum zong tha tein rel le tuak khawh a rak si lo. A hrawnghrang lawng in chim khawh a si. Cucaah Jesuh chuah hi BC 7/6 hrawng ah asi a hau.
Bethlehem sang pakhat (Ref. www.citypicture.org)
Luke Thawngtha Chungin
1. Luke nih a biapi ngaimi a tialmi cu Emperor Augustus kong asi. Augustus cu BC27-AD 14 tiang a bawi. Cu chung ah "milu relnak a tuah" (Luke 2:1-3).
2. Augustus hi milurelnak tuah a duh ngai mi a si. Amah chan ah, voi (3) milurelnak atuah. BC 28, BC 8 le AD 14 ah a si. Luke nih Augustus milurelnak atimi hi, BC 8 i tuahmi asi lai tiah mifim nih ruah asi. BC 8 ah milurelnak an tuah ti asi ko nain, ram kildeng asimi Palestine ram hna i an rel tik khi cu BC 7 hrawng ah asi lai tiah mifim mi nih an ti. Cucaah Augustus nih Palestine i milurelnak a tuahmi hi cu, BC 7 tluk ah asi lai tiah mifimmi hna nih an tuak.
3. Abuaimi cu, Luke nih milurelnak kong ah a chimmi "Quirinius cu Syria ram governor asi lio" timi hi asi. Cun hi milurelnak hi, "a hmasa bik milurelnak" asi a ti (Luke 2:2). A buaimi cu Quirinius hi Augustus nih AD 6-7 lawng ah "Syria ram governor" ah chiahmi asi ti kha Rome tuanbia tialtu hna Tacitus, Seutonius, Dio Cassius le Jewith tuanbia thiam Josephus tialmi cauk in theih khawh a si. Hi Quirinius nih hin "milurelnak a tuah hi AD 6/7 ah asi i, cucu tax tuahnak caah a rak tuah (Lamkaltu 5:37). Hi milurelnak nih Judah ram ah tapung thawhnak zong a rak chuahpi. Asiahcun Luke nih milurelnak a chimmi le Quirinius kong hi aa kaih ti lo.
Cucaah aphi ruah a hau. Hi kong ah ruahnak phun (theory 2) a um.
(a) Dr. Richard P. Bucher nih cun, "milurelnak a hmasabik a hung um hi Qurinius cu Syria ah governor a tuan lio asi" timi ah hin Luke nih zeidah a sawh duh hnga? Theory pakhat a ummi cu, Greek biafang "first" (prote) tiah Baibal ah aa tial. Cucu Baibal ah hin "priority to" asiloah "before" tiah an leh tawn. Cucaah Luke 2:2 kha hitin leh khawh than asi "Hi milurelnak hi Qurinius cu Syria governor asi hlan ah a si" (This census was before Quirinius was governing Syria).
(b) E.M. Blaiklock nih cun, " Quirinius hi Syria ram i governor asi hlan ah, tuanvo pekmi riantuan ding in Syria ah a rak phan bal cang, ti kha hmuh khawhmi ca le tuanbia an um. Cu caan cu Jesuh Krih chuah lio hrawng ah asi. Cuka a va kalnak cu governor ca ah si lo in, hruaitu dang dirhmun in a va kal bia tu asi" tiah a ti. Cucaah, Quirinius hi Syria ah tuanvo pakhat he a va kal lio i, Augustus nih BC8) kong hi, Luke nih a chim duhmi "milurelnak" cu asi lai tiah an ruah.
Cucaah Jesuh chuah kum hi tuak setmat tik ah, Matthew le Luke chim ning in kaikhawh tik ah, BC 8/7 kuakap ah si dawh bik asi. Milurel ding in Augustus nih nawl a chuah hi, BC 8 asi ahcun Judah ram hrawnghrang i, thawng an hei theih tik, an i timhlamh tik le an rel taktak hi cu BC 7 chung hrawng lawng ah a si kho ding a si. Zeicatiah hlan lio ah atu bantuk in rang ngai in khual tlawn khawh a rak si lo. Cucaah Jesuh chuah kum hi, BC 7 khan ah asi lai.
Cu ti asi ahcun Jesuh chuah thla cu teh zeitik dah asi than hnga? Kan hngal kho hnga maw? December 25 cu asi kho hnga maw?
Bethlehem khuakam sang pakhat (Ref. www.haaretz.com)
Jesuh Chuah Ni?
Baibal nih Jesuh chuah thla le ni a kan chim lo. Cucaah zeiti hmanh in fianter khawhnak a um lo. Jewish tuanbia thiam Josephus zong nih a tial ve lo. Rome cozah tuanbia thiam hna zong nih an tial ve lo. Thawngtha cauk hna zong Jesuh thih hnu kum 50 hnu ah an tialmi lawngte an si tikah, Jesuh chuah thla le ni theih khawh ding asi ti lo.
Jesuh chuah thla le ni hi Baibal nih a chim lo caah, hmasabik Krihfa hruaitu cheukhat nih an ruahnak in si dawh bik asimi nih paoh an rak char cio. Clement nih cun "December 18" ati. Hippolytus nih "Jesuh hi cawn Nithumni ah a chuak men lai" tiah a ti. AD 243 hrawngah North Africa ram kuakap in min theihlomi nih ca an tialmi ah Jesuh chuah hi March 28 ah a si" tiah an tial.
December Ni 25 hi Jesuh chuahni asi tiah ati hmasattu bik cu, Hippolytus (170-236 AD) asi in a lang. Hitin a tuakning asi. Jesuh hi a nu nih pawi hram aa thawk hi, March 25 ah asi. Cu ni cu Judah ram ah thal chuah aa thawkka asi. Nau cu thla (9) an pawi caah, Jesuh hi December Ni 25 bak ah chuak tiah a ti.
December Ni 25 hi Krihfabu ni sunglawi puaini ah an rak hman hmasat biknak tuanbia kan hmuhmi cu Philocalian Calendar (AD 354) ah a si. Roman miphun tu nih cun cu Ni ah puai an rak tuah tawnnak hi AD 336 in an rak thawk cang. Cuticun nichuahlei le nitlaklei Krihfabu hna nih December Ni 25 cu duhsah tein an cohlan i, Christmas Ni ah a tlak thai nak asi.
Pakhat ruah ding a ummi cu December Ni 25 hrawng hi Roman miphun hna nih puai lianlian an tuah lio caan a si. Saturnalia timi puai hi December 17-23 kar ah an tuah. Saturnatlia cu "Saturn timi cinthlaknak lei pathian an biaknak puai asi." Brumalia timi hi December ni 25 ah an rak tuah tawn. Cu ni cu "Sol" timi "nika pathian chuah ni" tiah an timi asi.
Rome Pennak pi kha Krihfa ram ah a hung can tik ah le Krihfa hruaitu hmasa abik in Roman Catholic hna nih December Ni 25 bak ah Jesuh a chuak an ti tik ahcun cu ni cu ni biapi tuk ah a cang. Roman miphun an puai zong asi cia tik ah, cucu a lar chin lengmang i, an ulh chin lengmang. Mission riantuannak kha a karh i, Europe ram hna zong nih an rak ulh ve i, vawleicung ramkip nih December Ni 25 cu Jesuh chuahni asi tiah ulh asi. Cuticun vawlei lei puaini kha Jesuh Chuahni ah a tla thai ve.
December Ni 25 Cu Jesuh Chuah Ni Asi Kho Hnga Maw?
Hippolytus nih hin December Ni 25 hi Christmas asi tiah a rak ti tik ah hin, Baibal ah ruah dingmi thil an um. Cucu Judah ram khuacaan le an nunphung thil sining asi. Cucu tha tein a rak ruah chih lo bia asi kho men. December Ni 25 hi Jesuh chuahni asi khawh lonak a ruang (2) a um.
1. Jesuh chuah zaan ah "Tukhal hna cu ramlak ah an turun an cawng i ramlak (field) ah an um" (Luke 2:7-8) ti kan hmuh. Ataktak le a ngaingai tiahcun Tukhal hna hi Judah ram ah hin, December zan ah ram lak sawhsawh ah tuu congh khawh asi ti lo. Judah ram ahcun December hi a kik tuk. Cupinah ruah a sur pah lengmang i, hi thla ah hin zan ah khualeng ah tuu chongh le umphung asi ti loh. Tii hmanh khal lak tiang in akih caan asi caah innchung tu ah um caan asi cang ti asi. Cucaah Jesuh hi tuu hna duhpaoh in ramlak ah an riahpi hna caan "thal lio asilole khuasik tlakka te" ah chuak lai tiah ruah asi.
2. Jesuh nu le pa cu Roman miphun milurelnak ah an min pek ding in Bethlehem ah an ra (Luke 2:1-4) tiah kan hmuh. Judah ram khua caan le lamsul zoh tik ah, hi December ah hin cun Rome miphun hna nih milurelnak an tuah lai lo ti asi. A ruang cu khua a sik tuk; tii khalnak kik deuh tiang khua a sih tawn caah le ruah asur i lam a chiat caah hi caan hi milurel caan asi kho lai lo ti a si.
Siangpahrang Herod Inn
Jesuh Chuah Ni?
Jesuh chuah ni taktak cu kan thei kho lai lo. A caan tu cu khuasik tlak lai thinghnah tilh ka hrawng ah si dawh a si. Kan theih khawhmi cu Mary nih Jesuh a pawika te hi John the Baptist cu anu Elizabeth nih a pawi hnu thla 6 asi lio asi (Luke 1:24-36).
John hi zeitik ah dah an pawi i zeitik ah dah a chuah timi kan theih khawh ahcun, Jesuh chuah hi tuaktan khawh asi cang. Asinain John zong cu zeitik set ah dah a chuah timi baibal nih a kan chim lo.
Baibal nih a kan chimhmi cu, "John an pawika te ah a pa, Zacharias cu tlangbawi asi. Zacharias cu Abijah tlangbawi phu chung aa tel mi asi. Zacharias cu amah tlangbawi riantuan caan a phak tikah amah cu biakinn chung ah tlangbawi rian a tuan. Cu lio ah Elizabeth naupawi aa thawk ti kha Zacharias nih a theih (Luke 1:8-13) tiah kan hmuh. Zacharias biakinn chung a luh le um lio caan hi "rimhmui khangh lio le mi zapi aleng i thla an caam lio caan asi" (Luke 2:9,10). Hi an tuahmi phung hi Judah ram tlangbawi hna phung ning tein an tuah i, camcawhfung zuh in an khiahmi a si.
Judah tuanbia kum le caan kalning tuak tikah, Abijah tlangbawi chung tlangbawi asimi Zacharias biakinn chung a um lio caan hi, cu kum June 13-19 hrawng asi lai ti asi. Zacharias cu inn ah a tlung. A nupi sin a phan. Naupawi an i thawk colh. Cucaah Elizabeth naupawi aa thawk hi June thla dih lei asi kho. Cucaah thla (9) kan van chap ahcun, John hi a kumvui March ah a chuak ding asi.
John the Baptist le Jesuh cu thla (6) an i dang (Luke 1:26-44). John chuah thla March hnu ah thla (6) van chap ahcun, September thla dih lai hrawng ah Jesuh hi a chuak ding asi.
Bethlehem pawng tukhal pawl tlawnnak ramlak (Bing.com)
Biatlangkawm
Acunglei tialmi vialte fonhtonh than viar tik ah, John hi BC 8 June thla ah an pawi lai i, Jesuh hi Decmber ah an pawi ve lai. BC 7 March dih lai ah John a chuak lai i Jesuh hi Septermber ah a chuak ve lai. An pawi kum le an chuah kum an i khat veve lai.
Cucaah Jesuh chuah hla hi September thla a si i, ani cu a fiang kho lo nian, September a donghnak lei zarh asi lai. Hi caan hi cu "Tukhal hna zong khua caan thatlio asi caah, an tuu hna hi ramlak sawhsawh ah congh le riahpi khawh an si" (Luke 2:8) lio asi i, Luke nih a chimmi he aa caan a khat kho ding a si. Sibawi Luke nih ca a tial tikah, "Hi kong hi, a hramthawk tein tha tein ka dothlat cikcek hnu ah..." (1:3) tha tein a tialmi asi caah, Luke hi palh dawh asi lo.
Jesuh chuahnak le umnak khua aa telnak map
(Ref. www.yahoo.com)
Zohchunhmi Ca
1. "Herod," Mercer Dictionary of the Bible, edited by Watson E. Mills (Mercer University Press, 1990)
2. When was the Christ Born?, http://www.ucg.org/bible-faq
3. Quirinius, Mercer Dictionary of the Bible, 1990
4. Dr. Richard P. Bucher, Caesar Augustus, Quirinius and the Census, http://www.orlutheran.com/html/census.html
5. "Christmas," Mercer Dictionary of the Bible, 1990.
6. "Bible verses about Brumalia," http://www.bibletools.org/index.cfm/fuseaction
No comments:
Post a Comment