Noah Buanchukcho Bantuk Asimi "Lousiana State Tilian"

Louisiana ah kan nu a ule an um caah voi (2) ka phan cang. A niam deunnak rili kam taktak cu ka phan lo. Louisiana nitlak chaklei hriang ummi Shreveport khuapi lawng ka phan. Cu khua hmanh cu a san deuhnak ah a ummi asi nain, tiva le rawn a tam caah tilian nih a chuah hnawh ve lengmangmi asi. Atanglei map zoh ah, Louisiana hi zeitluk in dah tivapi an tam timi kha hmuh khawh asi.

Hi bantuk in tivapi a tam caah, Loisiana hi nawng nih a tlun hnawh lengmang i, atu zong nawng fak taktak nih a tlun hnawh than. Ruah a sur tuk caah a cheu hmun cu ni thum chungah lehmah 25 a phan i, ruah a zualhma taktak tinak asi. Tiva kawr vialte tii a khah dih caah, tii luannak aa ting ti lo i, hmun kip ah tii nih a khuh hna. Tii a thuh ning zoh tikah, Noah Buanchukcho bantuk asi. Hi tilian bantuk hi kum 1,000 ah voikhat lawng a ummi asi tiah an ti.

Louisiana tiva hna (Ref. www.geology.com)

Red River (Ref. thenewster.com)

Shreveport hmanh hi a san deuhnak ah a um nain tiva kam nelrawn ah a ummi asi caah, tii nih atu le tu a phum tawn. June thla i ka va tlawn hna zongah ruah a sur lo nain, Red River a hnalei ah ruah asur caah tii a lian ngaingai. Kan i chawhnak hmun khat cu chun ahcun a ro ko nain zanlei kan tlun lai ahcun thingkung lak bak in tii a rak luang cang. Tih nung ngaingai khi asi.

Red River le Mississippi River timi tivapi lianlian hi Baton Rouge khualipi chak deuh ah an i tong. A ronh tuk caah tiva a van i ton tik ah tii aa dilmi a tam tuk. Tiva a hnalei ah ruah tamtuk asur tik paoh ah hi tivapi pahnih kuakap hi a khuh peng hna. Innlo, motor, hlei le lamsul tamtuk a hrawh lengmang.

Louisiana hi tivapi a tam tuk. Tivapi le an tengnge hna hi an i ngerh i sur tah in an i tak. Cucaah tii a lianh tikah an luang kho ti lo. Cun rili tii nih hnalei ah a van nam ve fawn hna. Cucaah tii kha an pum i, tilian a chuah lengmangnak asi. A ronh tuk pin ah a niam tuk fawn i, cucu tih a nun khunnak asi. Achinchap ah US tiva lian bik Mississippi River a luannak hmun a si fawn. Hi tivapi hi a ronh tuk nak nelrawn ah a luan caah, Rili a luh lai ahcun ngerhnguai ngaingai. A ngerhnguai tuk caah tii aa dil a zual i, tilian a zualter chinchin.

Hurricain Katrina lio ah New Orleans tii nih a phum lio

Hurricain Katrina (Aug 23-31, 2005) lio zongah New Orleans khua cu Rili tii le Mississippi River tii lian nih a phum i, minung tampi an rak thi. Nihin ni tiang in New Orleans cu a hlan tluk a phan kho ti lo. Minung thawng tampi nih khua an chuahtak. Sipuazi tam tuk a tla. Innlo tam tuk a hrawh i, nihin ni tiang a cheu cu an sa kho ti hna lo. Minung 1.245-1,836 an thi i, rawhralnak $108 billion man a chuak. Nihin ni tiang tha tein khua an ser kho ti lo.

Storm Isaac (2012) lio zongah hitin a rak phum hna

Nihin ni zongah ruah tam tuk asur caah, Louisiana cu tii nih a phum than i, abik in Baton Rouge khua hna cu tam taktak a hrawh. Khua chung inn 80% cu an i rawk lai tiah ruah asi. Minung 11 an thi cang i, 20,000 himnak ah an khamh cang hna. 8,000 tluk cu zohkhenhnak inn ah an chiah hna. An tem ing taktak. Mizaw, tar, a thau tukmi le ngakchia ca ko ah an tuar khun. US cu an rum tuk caah le insurance a um caah an tuar khawh i asi.

Laimi cu harnak kan tuar setsai bal lo. 2015 i Hakha leimin hmanh nih harnak tam tuk a kan pek i, Louisia bantuk in tilian hi atu le tu tuar u sih law zeidah kan va lawh ve hnga ti ka ruat. Louisiana cu an tuar ngaingai. Zeicatiah Mississippi River hi ruah a tam tuk caan ahcun a lian lengmang i, tilian le nawng hi Louisana ca ahcun hrial awk thalomi thil asi.

Minung an temtuar taktak. Tar cheukhat nih an chimnak ah, "Kan chan chungah tilian cu voi tam tuk kan tong nain, hi bantuk hi kan hmu bal lo" tiah an ti. Hurricane Katrina nakin a zual deuh ti asi. Tii a zor rih lo caah, tilian nih sunghbaunak zeitluk dah a chuahter timi hi an tuak kho rih lo. US President Obama zong nih "Hi hmun hi National Disaster Hmun" ah a chiah. Tangka tampi bawmhnak an tuah te lai. Nihin ni an tuaknak ahcun, rian a rak tuanmi (qualified) mi cu tilian ruang i riantuan lo a um chung kha zarh khat ah $247 an hmuh khawh lai ti asi.

USA minung cu an thinlung a thawng tuk. Mah tluk rawhralnak an ton zongah kan ram kan ser than lai tiah an ti. An lung a dong lo. Sceintist nih an tuaknak ah, tilian le nawng hi a caancaan te lawng ah a tlung i, mah bantuk tilian hi kum 500-1,000 chungah voikhat tibantuk lawng hna a chuak an ti. Asinain Louisiana hrawnghrang tilian hi a tu le tu a tam deuh chin lengmangmi a lo tiah an ti.

USA mipi hi uar an umnak cu mah bantuk tilian a van chuah bak i, hmun kip in an tilawng (boat) an van i ken i, din lo ngacha bak in minung khamh ding an kawl hna. Ann innlo rian kaltak in, midang khamh le bawmh kha an rian biapi taktak ah an chiah. An lungthin hi a ropui tuk.

Atanglei hna hi atu lio tilian nih a chuahpimi rawhralnak hmanthlak cheukhat an si. "Hmanthlak pakhat cu bia ka thawngkhatnak in a sullam a um deuh" an ti bantuk in hmanthlak zohnak in, zeitluk in dah Louisiana Nawngtlungmi hi a fah timi cu theih khawh asi ko.

Dawr tampi a hrawh

Innlo thatha an chuahtak hna

Highway lianlian zong phum a timh hna

Tii a tam tuk cang caah kulhak an bauh piakmi

Innlo thatha cu boat bantuk in tii chungah an um ko

June thla ah hi innpi zong ka va phan ve

Highway Lianlianzong a phum hna

Khua vialte cu hitin tidil bang an cang

Mississippi Tivapi liammi cu tih a nung ko

Dawr lianlian zong an chuahtak ko

Cunglei in van cuanh ahcun ngaihchia asi ko


Tii ruangah an sipuazi zong tampi a rawk

Mipi nuamhnak hmun zong a phum dih hna

Inn lianlian zong a phum ngacha ko hna

Vawlei ah a hmunmi thilri an um lo timi alanghter

Nuam tein lennak chungkhar inn cu chuahtak an si

Minung hawi khamhnak ca riantuan lio asi

Tii nih innlo thatha dolh a timh cuahmah hna

Nuam tein chungkhar khuasaknak inn cu hitin an pil ko

Midang khamhnak caah hitin an cawlcang hna

Saram zong tampi an i tap ve

Innlo thatha zong hitin a phum hna

Minung khamh ding in aa chawkmi hna

Pumpek riantuantu pawl an sunglawi tuk

Inn kip ah hitin minung an kawl hna

Mizaw damnak inn zong an i rawk hna

Vawlei cung thilri hna hi ngaihchiattertu hna an si ko hi?

Thlan zong tampi tilian nih a phum i a hlai hna

Thlan dawhdawh zong an i rawk

Thih chinchap ah thih hnih le thih thum bantuk in tuar asi

Louisiana mipi an temtuar ngaingai. Innlo, lamsul, dumhau, motor le dawr aa rawkmi vialte hna nih, hi vawleicung thilri le chawva hna hi a hmunlomi an si timi kha an langhter thannak asi. Thlati chuak in thi deng in kawlmi hi vawleicung chawva le ngeihchiah hna hi, adonghnk ahcun kan ngaihchiatnak le mitthli tlaknak hna an rak si kho ko.

Cucaah hlaphuahtu nih "Vawlei sithat lungdaihnak kha ka duh ka kawl lengmang...Ka hmuh cang tiah ka ruah tikah an nih an lo dih cang..." tiah atimi kha a dikmi asi. Vawleicung sithat lungdaihnak hna hi kan kawl lengmang hna. Kan hmuh cang tiah kan rak ruah tik ahcun an nih an rak loh lei hna an si cang.

Cucaah tu chun nih ah Krihfami nih kan herh cemmi cu "Pathian theih, amah zumh, amah bochan in nun i, zei bantuk thil kan ton hmanh ah, lungsi hnangam tein nun khawhnak" ngeih kha asi. Pathian ah, lungsi hnangamnak ngeih lo ahcun, vawleicung thilri hna nih hin lungsi hnangamnak an chuahpi kho lo.

A temtuarmi tilian nih a chuahhnawhmi vialte hna, Pathian tu nih hnem ko hna seh. An innlo zong an remh khawh thannak hnga Bawipa nih hnem ko hna seh. Harnak an ton cuahmah bu ah, Pathian ah lungsi hnangamnak ngei hram ko hna seh.
----------------------------------------------------------
Chinchiah:
Minung khamhnak ca riantuan dihlak hi ca hin upat hmaizahnak ka pek hna. 

US Khua Dawh "Shreveport" Ah Caantawite Tlawnnak

April 29-May 1 tiang, Agape Baptist Church, Dallas, TX ka va tlawng hna. Kan tunu, Lg Tawk Hlei Par, nursing degree la ding asi caah, Mahy 2 (Nikhatni) ah Louisiana State ummi Shreveport timi khua dawh ngai a voi hnihnak ka va tlawng than. A voikhatnak cu zan ah ka phan i, a thaizing zingka tein ka kir colh caah, an khua hi zei a lawh ka thei lo.

Tutan ka va tlawn cu zan 10:00 Pm ah kan phan. Ka tluninn nih "Hi khua ah Tongzangmi pastor pakhat a um" tiah an ti. Duak tiah khua ka  ruat. MIT ka kaipi hawi Rev. Kham Za Nang asi bak lai tiah ka ruat colh. "Rev. Kham Za Nang asi maw?" tiah ka hal hna. "Asi" an ti. "Hei au u" tiah ka ti. A tlai ngai cang nain, an hei auh. A caan cu 10:30 tluk asi cang. Pa Nang he cun kan i chawn. Hawikawm tha tuk kan si. Kum 19 kan i hmu ti lo. Amah zong a um kho ve lo.

"Ka it cang nain ka rak ra lai" tiah ati. An chungkhat nu he an rak ra. Zan 12 tiang bia kan i ruah. Kan biaruah a dong kho lo. "Hawi thar kawl law hawi hlun philh hlah" an ti bang, Pa Nang hi ka philh khawhlomi hawi tha pakhat asi.

A mah hi MIT ka kai lio ah hawikawm tha tuk kan si. Eiding ti, umkal ti, lengvaka ti le lakphakti ding ti lengmang kan si. A dam lo ah "Ka zul" ati i ka va zulh tawn. Ningani zan paoh hi Krihfabu a va leng tawn hna i, rawl ka rak lak piak tawn. Atin hnu ah Daw Kyi Lakphak dawr ah kan va thu i, rawl ei ka zul tawn. "Saya Sang Awr inn len ka duh" ati i a herh zat in ka va lenpi tawn. 1997 degree kan hmuh hnu in kan i tong ti lo. USA a rak phan i, thlanglei ah a um ti lawng ka theih, A umnak khua ka thei lo.

Mah zan ahcun ruahlopi in kan i tong. A nupi fate he innlo rep tein khua an rak sakmi ka hmuh tikah ka lawm tuk ve. Krihfabu an dir. Dawng 30 tluk an si. Inn ngeimi dawng 16 hrawng an si. Amah zong inn 4/5 pi a cawk cang. A thluak a tha. Pathian aa bochan. Mi nuntha taktak asi. Kan i tlak i kan i kawm tuk.

Amah nih a thaizing Nihnihni cu khua kan lenpi lai a ka ti i, zingka 9:00 ah a rak ka lak. Shreveport khua cu a ka chawhpi. Cu ceu cun Shrevport kong tampi a ka chimh. Hmunhma zoh nuam tam nawnte a ka chawhpi. Ka hmuhmi tete hi careltu caah theihtlei asi theu lai timi ruahchannak ka tialmi asi.

Shreveport Khua Casino

Shreveport khua hi Louisiana State nitlak chaklei a kilte ah a ummi khuapi pakhat asi. Ramkulh pathum-Texas, Luisiana le Arkansas-ramri ah a um caah, "Thumkomh Ramkulh khua" (Tri-State) tiah an tinak hmun ah a um. Shreveport hi State pathum tonnak hmun asi bantuk in, sipuazi le nunphung khualaili ah a tla i, a umnak hmun hi Ark-La-Tex region tiah min an sak.

Shreveport hi Louisiana ramkulh chungah lianh ah pathumnak asi i, USA ram pumpi ahcun 113 nak asi. An nih cu "County" timi min hmang lo in, "Parish" tiah an hman i, Caddo Parish i an zungpi umnak khua asi. An khualaicer ah Red River timi tiva lian ngaingai a luang. Khua a umnak hi a niam ngaingai caah Red River tilian nih a khuh tawn i, rawhnak zong a tong lengmang.

Louisiana hi a rawnh pin ah, a niam ngai. New Orleans hna le bang cu a niam tuk ah Rili nakin pe 1-2 kar a niam deuh i, a cheu hmun ahcun pe 7 a niam deuh ti asi. Louisiana hi tiva a tam ngai. Tiva tam deuh cu chaklei in thlanglei ah an luang. Red River le US tiva lianbik Mississippi River hna hi, Baton Rouge khualipi chak deuh te ah an i tong i tii tam tuk an zawi. Rili he aa naih caah tii nih atu le atu a phum tawn. Nihin ni (Aug 16, 2016) zong ah Baton Rouge khuapi i inn 80% cu tilian nih hrawh dawh asi an ti. Livingston Parish ahcun, suimilam 24 chungah ruah lehmah 21 a sur i, cucu Louisiana State ah ruah tambik a sur kum 1962 nak in lehmah 1 lawng a niam deuh ti asi. Tutan tilian hi, Harricane Sandy hnu ah tambik asur asi an ti. Nihin ni tiang, minung 11 an thi i, inn 40,000 a rawk cang. Minung 20,000 cu an khamh manh hna i, 8,000 cu innlo dawrnak inn (shelter) ah an chiah hna.

Ka va tlawn lio zongah Red River le a pawngkam tivate cu an lian ngai i, motor lam hi a hnur vatvat an si. Thingkung lakpi in tii an luang cuahmah ko.

Mississippi tilian nih inn a phummi

Red River nawng tlun lio (2016)

Shreveport khua a chaklei ah Bossier City timi aum. Cu khua pahnih cu Red River nih a dan hna i, hlei sangpi in aa peh. Shreveport-Bossier City Metropolitan Area ah hin minung 441,000 (2010) ah an um.

Shreveport hi 1836 ah Shreve Town Company nih an rak tlakmi asi. Cu company nih Texas Trail timi tlanglam le khualtlawnnak ah an hman tharmi Red River aa pehnak ah khan khua ser an duh i an tlakmi asi. Hi lio caan ah, Texas hi aluatmi ram pakhat a rak si i, Republic of Texas ti a rak si. Hlan ahcun Texas hi Mexico ram ah a rak um.

Hlanlio ahcun tlanglawng, motor a rak um lo caah, tiva khualtlawn hi biapi bik a rak si. Red River hi tilawng tampi umkalnak a rak si i, Shreveport hi thilri i cawkzorhnak hmunlai ah a rak cang. Louisiana hi sal tampi zuarnak hmun a rak si i, Shrevport ah sal zuarnak dawr (slave trade market) zong a rak um. Sal zuarnak rian zong biatak tein an rak tuannak khua asi. Cu sal an tefa hna cu, nihin ni tiang an hmun i, Shreveport cu Mirang nakin minak an tam deuhnak khua pakhat si.

Nihnihni zanlei cu kan nu a u fanu, Tawkte nursing degree a lakni asi. Downtown Shreveport ah kan va kal. Minung tam ngai degree an la. Cu chungah Mirang 6 tluk lawng an i tel. Degree lak a rami vialte zong 99.5% cu Minak an si. Adang 0.5% tluk lawng hi, miphun dang kan si lai tiah ka ruah. 2014 cozah tuaknak ah 54.70% cu Minak an si i, 41.16% hi Mirang an si. Atangmi cu Asian, Native American le Sapanish an si.

Hi khua hi French miphun ram a rak si i, Mirang nih an rak cawkmi hna asi caah, an lam le thil min tete hi Frenh min a tam ngaingai. Degree lami nurse pawl min zong cu French min deuh lawngte an si.

Hi khua ah hin, Air Force lian ngai a um i amin ah Barksdale Air Force Base tiah min an sak. Raltuknak vanlawng museum zong a um nain, kan kal manh ti lo. Hi vanlawngtual hi a lar ngaingaimi le ralkap tampi riantuannak hmun a si i,  "911 lio ah Pre. Bush zong a khualtlawnnak in an rak zampinak le a rak i thuhnak vanlawng ralkap sakhan asi." A pawng tiang kan kal i, alang lawng in kan zohta i, kan kir than.

Horseshoe Casino cungah. Alangmi inn zong hi Casino an si

Pa Nang he ka tlunnak inntual ah kan i thlakmi asi

Mirum sang kan lennak inn pawl an si

Shreveport downtown inn pawl

Shreveport Downtown

Dallas-Shreveport lampi umnak

Louisiana hi thingkung a tha ngaingai

Shreveport khua hi khua nuam le khua dawh ngai a si. Innlo a tha ngai. Pa Nang nih, mirum sang ah a ka lenpi. Cuka sang cu innlo an tha i, a thianghlim ngaingai. Cu sang cu, bo cungah a um i Maymyo bantuk in a dai i aa dawh. Hmunhma dawh le nuam taktak asi. Kaltak sian ding in a um lo.

Horseshoe Casino (www.tripadvisor.com)

Cuka hmun in, Horseshoe Casino caan tawite kan va zohta. Cuka cu Tiddim mi tam ngai rian an tuannak hmun asi. Cuka ah zohphu ngai asimi cu "The $1,000,000 Wall" an timi asi. Tangka $100 ca lawngte vam ah an benh i, million pakhat bak an benh. Cucaah "The $1,000,000 Wall" tiah an tinak asi. Vam i tangka mah ti benh sawhsawh cu a pam tuk ti awk in a um nain, mah zoh ruah ah minung tam tuk an rak kal i, a let tam tuk in an miak ve thiamthiam.

The 1,000,000 Million Wall

The $1,000,000 Wall cu hihi asi

Cucu kan zoh dih in, Tiddim hna rian an tuannak Restaurant ah a ka dangh.
Cuka ah ka khuaruah a har ngaimi cu, a rami paoh nih ngaikuang asenmi kheng lianlian in an i cah i heh tiah an ei hna. Minung pakhat nih pawng 3-4 cu an ei theyu lai tiah ka ruah. Pa Nang cu ka hal i, "Louisiana cu ngaikuang a chuah cemnak pawl asi i, hitin thut hnawh i kheh i ei asi ko. Na duh ve maw? Pawng 4-5 in kan cah lai" tiah ati i, ka khim tuk cang caah kan ei ti lo.

Golden Nugget Casino

Shreveport-Bossier Metropolitan khua hi khuaruahhar ngai asinak cu, hi khua ah hin CASINO lianlian tam ngai a um i, cu casino pawl cu minung tampi rian an tuannak le an pawcawmnak hmun asi. Laimi zong mi tam ngaite casino ah rian an tuan i, an nihlawh zong a sang ngaingai ti asi.

"A khua cu a lian tuk lo nain, zei ruang ah dah hi tluk in casino a tam?" tiah ka hal hna. An ka lehmi cu, "Texas ah casino tuah khawh asi lo. Cucaah mirum pawl nih Texas he ramri khua asimi Shreveport ah hin casino hi zatzat an tuahnak asi" tiah an ka ti. Texas minung tampi an rak i celh ve lai tinak asi.

Red River cung lawngah, "riverboat casisno" timi "tilawng cung casino" hi (6) bak aum. Cu hna cu Sam's Town Hotel & Casino; Eldorado Resort Casino; Horseshoe Casino & Hotel; Margaritaville Resort Casino; DiamondJacks Casino & Resort le Boomtown Casino & Resort an si. Hi casino hna hi suimilam 24 chung on mi an si.

USA ram pumpi ah, Lasvegas dah ti lo cu, Shreveport-Bossier khua ah hin casino a tam bik nak hmun asi an ti. Hi casino hna hi an lianh pinah hotel he an peh chih hna i, minung an hlunhlai taktaknak hmun an si. Khua chung inn sang deuh le inntha deuh paoh cu casino deuh lawngte an si.

Eldorado Casino

Casino hi micheu caahcun sipuazi loh riprepnak hmun asi i, a cheu caahcun an rumnak le riantha an tuannak hmun asi ve. Casino kal nih a lem cangmi hna cu, an dirhmun a fawi ti lo. Chungkhar innlo aa rawkmi an tam tuk ti asi. Shreveport tu cu Laimi hi riantuannak lawng an hman i, aa rawkmi pakhat hmanh an um rih lo ti asi i, lung aa lawm ngaite.

Casino lianlian an si

Shreveport hi khuaruahhar asi nak pakhat cu, cangai le ngaikuang a rak tam tuk. USA ka dang nakin a den zong aa deng deuh fawn. Hi khua hi, Red River kam ah a um i, cu tiva cu Mexico Rilikuai ah a chuakmi asi caah, ngaikuang le nga a tam taktak. An zuatmi zong a tam tuk fawn rih. Pa Nang nih cun rawl a ka dangh i rawl kan ei. Ka khuaruah a harmi cu, minung tar tete hna nih ngaikuang senmi pawng 3-4 pi an cabuai khat in an i hunh i an kheh i an eimi asi. Heh tiah an kheh i an ei. Ngaikuang chuahnak ram asi caah, ngaikuang cu ei cawk lo a rak si.

Shreveport ah hin Barksdale Air Force Base timi raltuknak vanlawngtual lianpi a um i, cuka cu B52 pawl an chiahnak hmun asi. Terrorist nih World Trade Center vanlawng in an pahni "911" lio ah Pre. George W. Bush an rak zampinak airport asi. Hi hmun ah hin, atom bomb zong an chiahnak hmun asi i, ral i tuk sual ahcun hi hmun hin atom bomb zong zuanpi colh ding asi tiah an ti.

Barksdale Air Force Base ah Air Show an tuah lio

Barksdale Air Force Base

Shreveport khua hi tiva, hlei, tibual le fingtlang tete an um pah caah um a nuam ngaimi khua asi. A cheu hmunhma cu innlo an tha ngai. Laimi tam deuh an umnak hmun cu khua a hlun ngai. Innlo cu an i dawh nain sipuazi a tlaknak deuh hmun asi caah, innlo chuahtakmi tam ngai aum. Louisiana hi movie tampi an i thlaknak hmun asi i, USA ram pumpi ah California le New York changtu asi. Shreveport zong ah hin movie tam ngaite an chuah.

Shreveport ah hin, college sianginn tha ngaingai zong a um. Cuka college pawng ahcun, ka hawipa he kan va leng. College tha ngaingai an si. Cu ka ahcun hman zong kan i thla len.

Zingka in zanlei tiang Pa Nang nih a ka chawhpi. Kan i nuam tuk. Tawkte degree la ding asi caah zanlei 4 tluk ah kan rak tlung than. Saya Za Thawng Cin le Tawkte hawinu te zong an rak phan ve. Zanlei 7:00 PM ah degree lak cu asi.

Degree lak dih hnu ah inn ah kan rak tin than. Zanriah kan eiti hna. Kan u le nih eidin tawr in an cah. Kai lunghmuih ngaimi cu "Ngaikuang sen" kan eimi asi. Cu ngaikuang cu Shreveport hrawngah tam tuk hringhran a chuahnak asi caah, eidin dawr kalnak paoh ah minung pakhat nih pawng 4-5 hi an i thuthnawh i ei asi ko. Kan mah ca zong cu tam tuk an cah. Ei cawk ding asi lai lo tiah ka ruah nain, kan kheh lengmang i kan ei lengmang ko. A donghnak ah kheng lian taktak khat cu, ek lak kan ei. Ei ah a thaw deuh chin lengmang i mi a lem ngaimi ngaikuang asi.

Ngaikuang Sen

A thaizing Nithumni ah Pastor Za Thawng Cin te nih an ka phurh Dallas lei ah ka tlung than. Shreveport le Dallas karlak hi, lam a tha. Thingram a hninghno taktak. Hmun rawn deuh lawngte asi. Khawn maw ka tete ;awng ah tlangbo le kuar tete an um. Shan ram ko a lo i, lung a leng ngai. Lamkam ah satil zuatnak hmunhma dawhdawh an um i, khua cuanh a nuam tuk hringhran. Motor lam hrawn hi cim a um lo. Cuticun Saya Za Thawng Cin te nih Dallas Forthworth International Airport ah an ka thlah i, kan umnak Columbus leiah tlun ka thawh.

Ka khualtlawnnak caan tu a tawi tein, tuanbia a ngei ngaingai vemi Shreveport ka caam chungah thil theihtlei tampi ka hmuh i lunglawmhnak in ka khat.

Dallas-Shreveport karlak lampi hmun khat

-----------------------------------------------------------------------------------------