Semnak Lairam

Thursday, December 22, 2016

Amarillo City Kong Theihtlei Tlawmpal

Amarillo (Ref. wordpress.com)

Biahmaithi:

Amarilllo khua kong hi, ka theihnak a sau ngai cang nain, tlawnnak caan ka ngei kho bal lo. Nov 22-27 tiang ACCC Krihfabu ka va tlawng hna i, cucu a voikhatnak bik Amarillo ka phanh a si i, ka lawm ngai.

Amarillo hi Laimi tampi an rak umnak le pawcawm kawlhawlnak khua pakhat a si. USA um Laimi nih biakinn kan ngeih hmasat biknak khua zong a si. Laimi caah tuanbia phurtu khua pakhat a si i, careltu caah theihtlei a si theu lai timi ruahchannak ka ngei.

Amarillo Khua le a chehvel+

A Umnak

Amarillo hi, Texas Ramkulh nitlak chak a kil lei deuh ah a um. Nitlaklei ah New Mexico State, nichuahlei le chaklei ah Oklahoma State an um. A umnak hrawnghrang ah khua lian bik le cawzorhnak hmunlai (commercial center) pakhat a si. USA ah lam min thang I-40 cungah a um. Nichuahlei ah Okalahoma City le nitlaklei ah Albuquerque he I-40 nih a peh hna. I-40 hi nichuah-nitlak a kalmi lam a si.

I-40 nih Amarillo khua hi a laicer bak in a pal. I-40 hi USA ah sau ah pa (3) nak a si. Meng 2,555.10 a sau. Nitlaklei ah Barshow, California ah I-15 in a dong. Nichuahlei ah Wilmington, North Carolina ah N.C Highway 132 ah a dong. Hi bantuk a saumi lam nih a pal caah, Amarillo hi khualtlawngmi an tamnak zong pakhat asi.

Atang hmanthlak (2) hi, The Cross of Our Lord Jesus Christ kan zoh pah ah, motor cung in ka thlakmi an si. An lam hi a ding tuk. Catlang rin bantuk a si. Lamkam "sign" an tarmi le vailamtahtung i zawn ding in hmantlak ka sel i, ka thlak khawh ngelcel caah kai lawm ngai.

I-40 (Nichuahlei kalmi, Amarillo pawng)

Vailamtah zawnte kan kal liote tinh in ka thlakmi si

Lamsul

Amarillo khua hi lamsul a tha. Midland he lam an tuahning pungsan aa lo. Khuachung lam a kau i, a phei. Trafic light a tha. I-27 le lampi mi I-40 hi khualai ah an i tong. U.S. Routes 60, 87, 287 le 66 zong an i tong hna. Lam tam ngaite aa tonnak khua a si caah, a hlunghlai ngai.

International Airport pakhat an ngei. NASA astronaut min, Rick Husband chuankhan in, Rick Husband International Airport tiah min an sak. Rick Husband hi, Amarillo khua ah a chuakmi a si i, February 1, 2003 Columbia space shuttle accident lio ah a nunnak a liammi NASA Astronaut pakhat a si. An airport cu a kau ngai. Terminal pakhat lawng a um. Airport panga-Dallas-Love Field le DFW; Denver, Las Vegas le Houston hna he direct vanlawng pehtlaihnak an ngei.

November 2014-November 2015 karlak ah khualtlawngmi 330,000 nih, hi airport hin an zuang. Tambik an zuannak cu Dallas Love Field a si.

Rick Husband Int. Airport cung in zohnak (Ref. flickr.com)

Rick Husband, NASA Astronaut

Amarillo Rick Husband Int. Airport (Vanlawngchung in ka thlakmi)

Milu

Texas State ah minung tam ah 14 nak a si. Potter County i khua lian cem a si. Texas Panhandle timi are ah khua lian bik zong a si. Khuachung in sang a cheukhat cu Randall County zong ah an va tel ve.

2015 ah Amarillo milu hi 198,645 an si tiah an ruah. Hi chung ah Mirang hi 77%; Minak 6.6%; Asian 3.2% an si tiah an ruah. 2010 ah Minung 190,695 an rak um. Cu chungah Mirang hi 146,867; Hispanic/Latino hi 54,881 renglo; Minak 12,632; Asian 6,072 an si. American Indian 1,480 an si i, a dang cu kahpia lawngte an si. Amarillo Metropolitan Area ah hin 236,113 an um lai tiah ruahdamh a si. USA metropolitan area lianh ah 182 nak a si.

Amarillo ah Kawlrammi zong tam ngai an um. Laimi (Chin) hi 800 hrawng an um i, Krihfabu zong (6) an um. Karen hi 2,000 tluk; adang Kawl, Rakhine Kala le Mon tibantuk hi, 1,000 tluk an um lai tiah ruah a si. Kawl Dawr lian taktakmi zong a um i, USA ah a lianbik Kawl dawr a si men lai. Cazin hi char ngaingai a um lo caah, abuaktlak in tuakmi a si.

Kawl an tam ko timi a langhtertu Kawl Dawr "Aye-za-bu"

Amarillo Tuanbia Tawi

Amarillo hi a kokek min cu "Oneida" ti a si. Texas nitlak-chaklei Pandandle timi hmunhma ah a um. A thlanglei deuh ah, Llnano Estacado hmunram (region) a um. Llano Estacado timi cu Spanish holh a si i, "Staked Plain" (Tlangborawn; kungpin-myint) ti a si. Cabuai bantuk in a rawnmi borawn tinak a si (Kawlram ahcun Shan Kungpin-myint tibantuk). A rawn tuk ko nain, a umnak hi a san ngainak hmun ah a va um caah, hmun nuam ngai a si.

Amarillo hi tlanglawng a rak um hlan ahcun, khua fate a rak si. Kum zabu 19 a donghnak lei ah Forth Worth-Denver Tlanglawnglam an van cawh tik ah, Amarillo hi satil zuatnak le sathahnak hmunlai ah a rak cang. Cuticun cawkzorhnak khuapi (commercial center) ah duhsah tein aa ser.

Amarillo hi, alengphaw zohnak ahcun zei huaha a si lomi a lo nain, khua dintuai lo pakhat a si. Min zong aphunphun te a ngei. Zeicadah min phunphun a ngeih ti ahcun, a khua ah thiltha tampi a chuah caah a si. Amarillo hi, "Laimi Caah Nazareth" bantuk a si. Zeicatiah "Nazareth cun zei thil tha dah a chuak bal? (John 1:46)" tiah mi nih an ruah lio ah, chawva dihlak nih cawk khawhlomi "Khamhnak thawngtha phurtu" Krih lennak khua ah a rak cang diam.

Cu bantuk in, Amarillo zong hi, Nazarenth bantuk Laimi caah khuahriang ngai a um nain, a chungmuru ah a dintuai lo. Cucaah min phunphun zong an bunh. Zeitluk in dah khua men lo a si ti kan zoh ta lai.

Nihin ni ah, USA pumpi ah saa tambik a chuahnak khua a si. Hi khua pawng i a ummi Pantex hi, nuclear hriamnam an sernak le phoihnak sehzung a si i, Amarillo ah minung tambik rian a petu company a si. Nuclear hriamnam an sernak a si caah, Amarillo hi "Bomb City" ti zong a si. Pantex umnak zong "Atomic City" tiah an ti. Naite ah V-22 Osprey hybrid vanlawng zong an ser caah, "Rotor City, USA" an ti than. "A mui in zoh hlah a an in ngai" tibantuk khua sunglawi a si.

Hi khua ah hin Helium timi gas tampi a chuah caah, "Helium Capital of the World" tiah an ti rih. Hi khuapi hi "The Yellow Rose of Texas" ti zong ah auh a si. A ruang cu Amarillo timi hi, Spanish biafang ahcun a "Eng" (Yellow) ti a si.

Pantec Nuclear hriamnam sernak (Ref. knoxblogs.com)

Amarillo area hi, zoh tik ah thetse ramcar bantuk in a rocarmi a lo nain, tiram a that ngai caah, satil zuatnak le cinthlaknak a rak rem tuk. Cucaah satil zuatnak lei le sa chuahnak ah minthang a si takak a si. Hi ram satil zuatnak hi, an kau tuk. US satil zuatnak hi, hi ti lawmmam an kauhmi hi, khuaruahhar taktak a si. Ka leng manh lo i ka sia a herh ngaingai.

A khua pawng ah, satil zuatnak dum "ranch" lianlian an um. Cu hna lakah minthang bik cu XIT Ranch (1985-1912) a si. XIT Ranch hi acre 3,000,000 a kau. Voikhatte cu satil 150,000 an rak zuat ti a si. Nihin ni ahcun an khar cang.

A dang minthang taktakmi cu, JA Ranch a si. Cu satil zuatnak hmun cu, 1877 ah Charles Goodnight le John George Adair nih an rak derhmi a si. Adair a thih hnu ah, Adair nupi le Goodnight nih cu satil zuatnak hmun cu an rak i hrawm. 1887 in Adair nupihmei Cornelia Wadsworth nih satil dum cu amah lawng nih a rak co i a thih kum 1921 ah a mah ta ah a cang.

JA Ranch. Hmuh ka duh ngai nain ka hmu manh lo.

April 1887 ah J.I. Berry timi pa nih Forth Worth-Denver City Tlanglawng lam kam zulh in tii a thatnak hmun ah khua a rak tlak. Cucu Ragtown tiah an rak ti. Cucu tu chun Amarillo khua hi a si.

Texas ram um vevemi, Berry tlakmi khua le Colorado City nih, an khuapi thar cu chawleh chawhrawlnak hmunlai ah canter an duh veve. Khuapi si an i cuh. Berry tlakmi khuapi nih August 1887 ah County zunghmun sinak a co, Potter County tiah min an sak.

Satil a tam i, tlanglawnglam a that caah le county zunghmun sinak a co caah, Amarillo khua cu "satil zuarnak market khuapi" ah aa chuah. Nihin ni tiang in USA ah sa tambik a chuahnak cu, Amarillo a si.

Hi khua a pem hmasatmi hna hi an min ah Oneida an rak ti hna. Cucu ahnu ah Amarillo tiah let a si. Cu biafang a ratnak hi "a engmi" (yello) timi in si dawh a si. Zeicatiah Amarillo Tibual le Amarillo Creek tivate hrawn ah, thal chuakkate i, ramtang ah a parmi pangpar eng a tam tuk caah asi men lai tiah an ruah. A cheu nih Amarillo Creek kam ummi vawlei engmi chuankhan in sakmi min a si lai tiah an ruah.

Cu hnu June 1888 ah, Henry B. Sanborn le chawlet hawi Joseph F. Glidden nih, a kau taktakmi ram an cawk i, khuathar an tlak ve. "Amarillo hi a niam deuh i ruahtii tam caan ah tii nih a phum khawhmi hmun a si" an ti i, vawlei kha heh tiah an cawk i, minung kha an thialter hna. Thialnak a dihmi tangka tiang an bawmh hna i, atu Polk Street timi ah thilri zuarnak market zong an rak tuah.

1889 ah Berry area cu tii nih a rak khuh taktak i, minung tampi cu Sanborn hmun ah an rak i thial. Cuticun Sanborn khuapi cu 1893 ah county zunghmun ah a cang than.

Tlanglawng lam a pem tik ah, Amarillo cu khulrang taktak in a thang. 1890 hnu ah Amarillo khualipi cu vawleicung pumpi ah "satil tambik an kuatnak hmun" ah aa chuah i, minung zong tam taktak an karh.

Kum 1900 hnu ah hi hmun ah hin, changvut le adang eidin tampi a chuah caah changvut rialnak seh tampi an van ser i, eidin sernak khuapi ah aa cang than. 1918 ah Amarillo area ah Natutal gas tampi an hmuh i, ahnu kum (3) ah meiti zong tampi an hmuh than i, meiti le gas company tam ial Amarillo area ah an rak lut.

1927 ah U.S cozah nih "helium" tam taktak aa tel chihmi Cliffside Gas Field an cawk , cozah nih helium cu an cawh. Amarillo Helium sehzung zong an rak dirh. Cu sehzung cu kum tam nawn, vawleicung ah helium tam bik a chuahtu a rak si. U.S. National Helium Reserve hi Cliffside ummi, Bush Dome Reserviour timi ah an chiah.

Amarillo hrawng hi rawn an kau tuk. Cinthlaknak le satil tam tuk lehpek an rak zuat caah, thingram vialte a rak kawng dih. Ram tha tein an cin chap lo caah ram a rak rawk tuk.

Cucaah 1930 hnu lei ah khua a hrem i, ram an thi dih caah, pawngkam rawhnak a rak chuak. 1930-1940 kar ah khua a hrem i harnak tampi a rak chuak. Abik in 1935 ah Dust Bowl timi vawleiphit khu nih, Texas, Kansas le Okalahoma hrawng cu, vur bantuk in a rak khuh. April 14, 1935 le bang cu leidip thlichia a hran tuk caah, "Black Sunday" tiah an rak ti. A pumh zong an i rak i pum kho hna lo. *

Amarillo zong harnak tam taktak a rak tong. Cucaah pam a tlung i, an khua caah sipuazi a rak tla taktak. Minung an zaw; satil an thi; inn kha vawlei nih a khuh dih caah minung an um kho lo i, khua a cheukhat cu an rak chuahtak. Cucu "Khuapi lungrawhnak" (city's depression) tiah an rak ti. Amarillo zong harnak fak taktak a rak tong. Hi bantuk thil a chuah thanlonak ding caah, Texas ah hin pawngkam ah thingram cin a biapi taktak timi a langhter. Ralrin chung an herh taktak.

Image result for dust bowl in Amarillo in 1935

1935 Dust Bowl

Ralpi Pahnihnak a rak chuakmi nih, Amarillo Army Air Field a chuahter. Cupinah Pantex Army Ordance Plant timi bom le kuan sernak sehzung zong a chuahter. Ralpi Pahnihnak a dih tik ah, cu sehzung pahnih cu an khar. Cold War timi lio, 1950 ah Pantex Plant cu an on than i, nuclear hriamnam sernak sehzung ah a cang.

1951 ah Army Air Base cu an cawisan deuh i, Amarillo Air Force Base tiah an ti i, B52 bomber pawl an rak chiah. Ralkap riantuanmi le an chungkhar tampi Amarillo ah an ra i, cu thil nih Amarillo sipuazi tlak (depression) a rak damter.

Cuticun 1950 in 1960 karlak ah Amarillo cu biatak tein minung an karh than i, 74,443 in 137,969 ah an i chuah. December 31, 1968 ah Amarillo Air Force Base cu an kharmi nih minung zornak a chuahpi i, 1970 ahcun 127,010 lawng an rak tang. An sipuazi duhsah tein a kai than i, nihin ni ahcun Amarillo area hi, minung tampi an umnak khuapi pakhat ah a cang i, Kawlram mi zong tampi an umnak khua a si ve cang.

Zoh dawhmi le a nuamhnak hmunhma hna cu, I-40 le Highway 66 aa tonnak ummi-Cadillac Ranch (Cardillac motor piahnak) le Big Texan Steak Ranch (Rawl-dawr lian) an si. Highway 66 hi khualai in a kalmi a si. Downtown ummi Civic Cener zong hi, len nuamhnak hmunhma a si. Vawleicung ah rang min cazin laknak le zuamnak nganbik pakhat The American Quarter Horse Association zong hi, Amarillo ah a um.

Dintii Laknak

Amarillo area hi a rawnh tuk caah, tii a luan a har ngai. A vawlei nih tii a dawp asiloah a khu in a chuak asiloah Amarillo Lake ah an va luang. Amarillo in nichuah-chaklei meng 20 tluk hlatnak ah, Canadian River a um. Cu nih cun diltlang pe 200 nawn sang a ser i, cuka ahcun tibual dawh taktak Lake Meredith an siam. Cu tibual cu Texas Panhandle region dintii an laknak a si.

Lake Meredith hi acre 16411 a kau i, a thuh biknak hi pe 127 a si; a buaktlak in pe 30 a thuk. Hi tibual nih, khuapi (7) tii a pek hna. Naite ah ruahtii a tlawm caah, hi tibual hi hmailei ah a reu sual te lai maw tiah an phan ngaimi a si. Hi khua khua (7) nih tha tein kilven le zohkhenh a herhmi tibual sunglawi taktak a si. Hi hmun hi picnic le retreat tuahnak ah a rem taktakmi hmunhma a si.

Lake Meredith (Rf. wordpress.com)

Leitang Thilchuak

Amarillo hi Panhandle Field timi meiti chuahnak kam ah a um. Cu field cu meiti le gas tam taktak a chuahnak hmunhma a si i, acres 200,000 renglo a kau a huapmi area a si. Cu area nih cun- Hartley, Potter, Moore, Hutchinson, Carson, Gray, Wheeler le Collingsworth-countries vialte a huap dih. Pottter County area cu USA ah natural gas tambik cawh ding a umnak hmunh a si.

Meiti le natural gas tam tuk a chuah caah, Amarillo khua ah meiti he aa pehtlaimi sehzung (petrochemical plants) tampi a um. Meiti le gas tamnak hmun a si caah, hmaileipi ahcun hi hmun cu, USA caahcun Kuwait bantuk a si kho. Vawleicung ah "helium" tambik a chuahnak hmun a si. Pantex timi nuclear hriamnam sernak sehzung zong a um.

Satil tamtuk an zuat caah saa tam taktak a chuak. Satil i lannak dawr, Amarillo Livestock Auction Company cu private ta a si i, vawleicung ah a lian bik pakhat a si.

Fingtlang

Amarillo hi, Llano Estacado hmun chaklei deuhvak ah a um. Ilano Estacado Tlangborawn a si i, New Mexico nichuah-thlanglei in Texas Nitlak-chaklei tiang aa peh. Hi tlangborawn hi, Mirang nih "mesas" an ti. "Cabuai bantuk in a va bo i a rawnmi borawn" tinak a si. Nichuah-thlanglei ahcun pe 3,000 tluk a sang i, a sannak bik nitlak-chaklei ahcun pe 5,000 tluk a va sang. Mifim mi nih an tuak tik ah, meng 1 ah pe 10 tluk in a va sang ziahmah ti a si. Hi tlangcung borawn hi, North America borawn vialte lakah a lian bik a si.

Amarillo hrawng hi, khuaruahhar in a rawn. Ka ruahnak ahcun, rili in pe 1000 a phan lai lo tiah ka ruah nain, a rak si lo. A umnak a rak sang ngai i, Amarillo hi rili in pe 3,605 a sannak ah a rak um. Zeicatiah hi area hi Ilano Estacado timi Tlangborawn (Kung-pyin-myint phun) umnak hmun ah a um caah a si. Ka va phanh tik ah a kih zong a kik ngai i, ka khuaruah a har ngaite (Kan umnak Columbus khua hi, rili in pe 902 lawng a sang).

Amarillo hrawng hi a rawn tuk i, tlang um dawh khi a lo lo. Asinain Amarillo hrimhrim hi Tlangborawn cungah ah a rak um pin ah, a thlanglei meng 25 a hlatnak ah fingtlang dawh taktak-Palo Duro Canyon- a um. USA ah canyon lian bik pahnihnak a si i, The Grand Canyon of Texas tiah an timi a si i, tourist tampi lennak hmun a si.

Amarillo pawng ah hin, a dang thil khuaruahhar ngai a ummi cu, vawleitang ah a ummi "underground structure" timi "lungpang phun" a si. Cucu Amarillo Mountains tiah an ti. A kuarmi chung tu ah a ummi tlang pawl an si. Tlang taktak cu an bo; asinain hi tlang pawl cu vawlei aa ruangmi kha tii nih a khorh caah rawnpi ah tlang aa sermi an si.

Hi tlangpawl hi, Oklahoma i Arbuckles le Arkansas i a ummi Quachita he aa peh ti a si. A cheu cu vawleichung ah pe thawng tam nawn a thuhnak ah an um.

Hika hmun hi cu kan phan manh lo. Sia a herh tuk ko?

Cu tlang pawl cu, hlanlio meiti kawltu "oilmen" nih an rak hmuh hmasat. Hi bantuk tlang a sang bik cu, Potter County tangah a um i, pe 2,500 a sang. Cu tlangpar cu Amarillo in a chaklei meng 30 nak hla deuh ummi, Alibates Flint Quarries National Monument tangah a um ti a si.

Downtown

Amarillo khua minung hi, thlanglei le nitlak-chaklei ah deuh ah an karh. An sipuazi a tlak pah ve caah, downtown zong inn lawngmi a tam i, innlo rawk zong a tam ngai ve. A thar sak cuahmah mi zong a um. 1971 ah an sakmi Chase Tower hi dawt 31 a sang i, cucu an khua chung ah a sang bikmi inn asi. Adang inn sangmi cu Amarillo National Bank Plaza One le Santa Fe Building an si. An downtown hi a rawn tuk i, khua nuam ngai a si.

Amarillo Downtown

Park Minthang

Cozah nih Amarillo khua are ah park 50 an zohkhenhmi a um. A lian bik park hna cu, Medical Park, Thomson Memorial Park le Amarillo College's Washington Street pawng i a ummi Memorial Park an si. A linhsatnak ram ah a ummi khua a si nain, park tha ngaingai tampi an ngeih caah, khua nuam ngai a si. Park nih an khua a hninhnoter i, khuacaan zong tampi a thatter.

Amarillo park pakhat? Vanlawng in ka thlakmi a si.

Pawcawmnak

Amarillo hi, Texas Panhandle timi area ah economic center a si. Eastern New Mexico le Oklahoma Panhandle region ca zong ah a si chih.

Meat packing hi Amarillo ah a tam bikmi rian a si. USA pumpi i cawsa cheuli cheukhat hi, Amarillo area in a chuak. Texas Cattle Feeders Association headquarter umnak a si. Hi khua hi Helium tambik chuahnak khua zong a si. 1999 ah Bell Helicopter Textron nih helicopter sernak sehzung zong International airport pawng te ah an on.

Amarillo ah tambik rian a petu company hna cu: Tyson (minung 3,700); Amerillo Independent School District (3,659) an si. Cu hnu a van changtu zapi zaran riantuannak cu, BWXT Pantex, Baptist St. Anthony Health Care System, Walmart, United Super Market, Bell Helicopter Textron, Owens-Corning le ASARCo an s.

Amarillo are hi a rawn tuk. Mit dong a si. Cinthlaknak vawlei acre 14 millions tluk a um. Cuka ahcun fangvawi, changvut le laa an cin hna. Satil rawl ca ram le soybean zong tampi an cin. 2000 hnu ah cawhnuk chuahnak sehzung zong an dirh hna i, cawhnuk tam taktak an chuah.

Amarillo ah hin, BSA sizung hi a lian bik le minung tambik rian a petu hna sizung a si. Amarillo ah minung tambik riantuannak hmun ah (4) nak a si. 2015 U.S. News le World Report nih an tuaknak ah, BSA nih minung 2,700 rian a pek hna. Ihkhun 312 a um i, nikum ah mizaw 20,957 an zoh hna ti a si.

BSA Sizung (Ref. BSA news)

College

Amarillo Collge hi kum (2) college a si i, siangngakchia 10,000 an um. Community collage a si. Wayland Baptist University; Texas Tech Health Sciences Center at Amarillo School of Pharmacy; Texas Tech University at Amarillo; West Texas A & M University hna an um. Texas State Technical College nih an tuahmi sianginn tengnge pakhat zong a um rih. Hi khua ummi, Laimi mino tete zong college kaimi, Engineering lei le MC lei kaimi zong an um hna i, lung aa lawm tuk.

Amarillo College

Tourist Hmunhma

Amarillo hi, lam tampi aa tonnak hmun a si. Cun khuapi minthang pahnih-Albuquerque le Okalahoma-kar ah a um caah tourist an tam ngai. An khuachung ka chawh tikah, motels, restaurants le curio dawr tam taktak ka hmuh hna. A khua le milu rup lo in, hotel le motels a tam.

Thil pakhat belte nih ka lungthin a ka tuaitam nawn. Zeicatiah a cheu motel lianlian le hotel thatha kharmi le aa rawkmi an um caah a si. Krihfa upa ka hal hna i a ruang an thei ve lo. Sipuazi a tlak ca maw a si hnga? Tourist a tlawngmi an tlawm deuh ca dah a si hnga timi cu ka ruat ngai.

Amarillo hrawng hi zoh nuam tampi a um. Satil zuatnak hmun, Lake Meredith, Splash Amarrillo, Amarillo Lake le The Cross of Our Lord Jesus Christ hi minthang an si (Ka blog ah hi cross kong rel ding a um).

Vailamtah satu an i tinhmi cu, "The Cross Ministry" a si i, "Vailamtah Thawngtha" ti a si ko. Minung zeizat nih dah hi vailamtahtung pi thawng in, Jesuh dawtnak an theih cang hnga?

A dang minthang taktakmi, Palo Duro Canyon State Park a si. USA ah Canyon lianh ah pahnihnak a si. The Grand Canyon of Texas tiah min an sak. Palo Duro Canyon a tlang pheiphah an tha tuk. A lang in cuanh tikah, hrawn a nuam tuk ding a lo. Kedanh tha te i danh i, chun nitlak chawh huamnak ding in a um.

ACCC Mino Pawl he Palo Duro Canyon Nelrawn Ah

Palo Duro Canyon State Park

Palo Duro Canyon cu, aa dawh tuk. A fingtlang, tiva, kuar, nelrawn, thingram, vawlei muihmai le tlang zumtete zoh ah, zoh cim lo an si. Kan kal lio hi, khua a dawm pah caah hmanthlak an fiang tuk lo. Thlizil a hrang pah fawn i, lunglen a zual. Lailei a ka ngaihter tuk hringhran.

US ka phanh hnu ah, kum 19 chung, rawn lawngte ah khua kan sa. Mah bantuk tlang phun hi ka phan bal rih lo i, lung a leng tuk. Laitlang a ka ngaihter. A hmun um hi cim a si lo. Chun nitlak in um huam ding in a um. Ka chan chungah, hi bantuk hmunhma nuam hi ka phan bal rih lo. Grand Canyon belte hi zeidek a lawh hnga? ka ti. Nikhatkhat ah Grand Canyon zong ka phan theu te lai timi, Palo Duro Canyon kan um lio ah ka ruat.

Palo Duro Canyon cu a nuam tuk. Tluntak sian ding in a um lo nain, minung cu caan le hmunhma ukmi kan si caah, sian lo zong ah zeitiawk tha ti in, sianlo bu tein hnulei chit in kan tluntak.

Donghnak

Hmuh ka duh ngaimi khua ka hmuh caah kai lawm. Ka lawmh lawng silo in ka lunghmuih i, a ka sawmtu ACCC Krihfabu cungah lawmhnak tampi ka ngei. Hi khua ah Laimi tampi an um caah le zoh nuam, hmuh nuam thil tha tamtuk a um caah, Amarillo hmuh cu careltu ca zong ah, na ngaichih lai lo tiah ruahchannak he!!

ACCC Biakinn (2008 ah cawkmi asi)

Hi tlang pheiphah dawh te khi kai sia a herh tuk

Palo Duro Canyon i tlang zumte pakhat

-----------------------------------------------------------------------

Chinchiah
1.
1. Amarilllo ka kal lio i, a ka chawhvahpitu ACCC mino hna, Rev. James Biak Peng le church chairman Duh Hnin cung ah lunglawmhnak tampi ka ngei.

2. Helium hi "gas phun khat" a si. A zaang ngaimi a si. Ralkap phurtu Airship le mipi phurtu (vancung zuangmi, minung citmi caah, an hman) caah an hman. Atom bomb an rak ser lio, Manhattan Project zong ah an rak hmanmi a si.

Sunday, December 18, 2016

Nang Snow Na Uar Ve Maw?

Ohio hi snow a tam ngai ve. Indiana le Michigan he aa lo. August 1997 ah USA ka phan. Snow hmuh lai ka rak i ngaih tuk. Cu lio ahcun khuasik hi a rak tuan deuh ngai. A voikhatnak bik snow hi November 20 hnu deuh aha rak tla. Cucu a voikhatnak bik snow ka hmu a si. Atu ahcun snow hi a tlawm chin lengmang.

Snow ka hmuh ah ka thinlung ah a chuakmi cu, "Zei tluk hmanh in sual ning law, Pathian nih cun hi snow bantuk in pei ka sualnak hi a vaarter khawh ko cu" timi a si. Misual si hmanh u sih law, kan sualnak hi, hi snow bantuk a vaar kho ve ko timi a langhtertu hmelchunhnak a si caah, snow hi Pathian dawtnak le velngeihnak a langhtertu thil pakhat a si.

Bible ah snow timi hi 282 a lang i, Bible cang 261 ah aa tial. Israel ram ah hin, a bik in Hermon Tlang cu snow nih a khuh peng. Aa dawh tuk caah, snow hi hla zong ah an phuah lengmang. Zion Tlang le Jerusalem hrawnghrang hi khuasik ahcun snow a tla peng. Cucah snow cu hlan chan in hmuh pengmi a si. Cucah Bible zong ah voi tam ngaite snow kong hi, a tialnak a si.

Hermon Tlang

Jesuh nih vancung pennak kong cawnpiaknak caah, mit nih a hmuh khawhmi thil kha tahchunhnak ah a hman tawn hna. Isaiah zong nih, "Minung sualnak hi senduk hmanh in sen sehlaw, Pathian nih cun snow bang a vaarter khawh ko" tiah, snow thiannak le vaarnak hi, tahchunhnak ah a hman ve (Is.1:18).

Snow a tlak fate, ka lawm. Zeicatiah snow nih keimah ka sining kong kha fiang tein hmanthlak a ka hmuhter caah a si. Snow rang taktak ka hmuh ahcun, ka zumhnak a fek deuh. Zeicatiah minung kan sualnak hi, snow bantuk in Pathian nih a ranter khawh ko timi kha, fiang tein hmanthlak a langhtertu a si caah a si.

Snow ka hmuh fate, "Keimah dinfelnak ruangah silo in, Pathian a velngeih lawnglawng in, ka sualnak vialte hi, hi snow bantuk in pei a ran dih ve cang hi" tiah snow nih, sual ngaihthiammi ka sinak, ka hmanthlak kha a ka hmuhsak. Cucaah snow cu ka uar khunnak a si.

Ram linsa in a rami miphun kan si caah, a cheu cu snow kan duh lo. Snow kan huat. Laimi cheukhat nih, "Snow hi a kan neng tuk" tiah an ti tawn. A linhnak ram in a ra mi kan si caah kan mawh lo.

Ka rak ti tawnmi cu, "USA chaklei i um ahcun snow hi huat khawh a si lo. Hrial khawh zong a si lo. Na duh zong duh lo zongah snow kha na rem a hau. Na duh i, na uar i, na nuamhpi kha a miak deuh" tiah ka ti tawn hna.

"Snow hi ngaknu he an i lo. Na duhmi ngaknu cu, aa dawh zong dawh lo zong ah, na uar i na duh; a pawng na um tik ah na lawm. Cu ve bantuk in, snow hi ngaknu bantuk in na duh i na uar ahcun na lawm ngaingai lai. Na hmuh lo tik ah na hlam lai" tiah ka ti tawn hna.

Ngaknu cu aa dawh lo te a si zong ah, uar hnu ahcun i nuamhpi le lawmhpi a si. A um lo tikah hlam le ngaih an si tawn. Snow a uarmi caah cun, a tlak lo tikah kan hlam zungzal. Cucaah "Ngaknu le snow" an i lo ka tinak a si.

Ka tlaihmi bia cu hihi a si. "U.S.A um vekvek ahcun, snow tlaknak khuaram ah um ding. Mirang ram um vekvek ah Mirang lakah um ding" ti a si.

Zeitluk a kih zong ah snow le khuasik kha duh le uar khawh ka zuam. Snow a thatnak le snow tlak a hlawknak lawngte ka ruat. A chiatnak ka ruat theng lo. Cucaah snow a tlak tik ah ka lawm i, ka nuam. Snow kha harnak petu zong a si ve ko nain, a thatnak tu tam deuh ka hmuh khawh.

Snow cu, leicung leitang tii a tamtertu; thli thiantertu; zawtnak rungrul thattu le pawngkam a thianthlimtertu a si. Minung ngan a dam deuh. Snow a tlak tam paoh ahcun vawleitang tii a tam i tichuak a tha i hydro electric ca tiang in thatnak tamtuk a chuahpi. Snow tam kum ahcun, thingram a tha khun i, leikung le cinthlak a tha khun.

Snow a tlaknak ram ahcun, kan duh zong, duh lo zong ah, a tla thiamthiam ko. Snow thatnak tu kha kan zoh i, kan duh le kan uar ahcun, kan i lawmpi khawh i, cucu a thami le a miakmi a si.

Snow duhnak le uarnak ngeih hnu ahcun snow a tlak paoh ah a nuam i, snow a tlak lo paoh ah, kan hlam. Zeicatiah "Snow le ngaknu cu an i lo." Asiahcun careltu nang "Snow na uar ve maw?"

Khuasik lio snow thlak hlan

Snow a tlak hnu ah hitin a si (2015)

Acunglei hmanthlak pahnih hi, kan inn pawng a si. Snow a tlak hlan le a tlak hnu epchunnak a si.

Snow thlak hlan (2015)

Snow tlak hnu (2015)

Acunglei hmanthlak pahnih hi snow a tlak hlan le a tlak hnu epchunnak a si.

Snow thlak hlan le tlak hnu (2015)

Atanglei hmanthlak hi December 13, 2016 ah a tlami snow hmanthlak an si.

Park

December 14, 2016

(2015)

2016 kan innhmai far kung

2013 Snow

Ka fale 2014 Snow cung ah (-9 degree F a si)

Westland High School pawng snow (2016)

Westland HS (2016)

Snow at Westland HS (2016)

Atanglei hi Mansfield, Ohio ummi Snow Trails timi a si. Normandy United Methodist Church, Dayton, Ohio ah Youth pastor ka tuah lio ah, mino pawl he snow lakah skii kan rak i cit tawnnak a si.

Snow Trails

Wright Brother's Inn, Dayton, Ohio

Wednesday, December 14, 2016

Baltimore Ah 2016 Chungah Minung 300 An Thah Cang Hna

Baltimore khua hi 1729 ah an tlakmi khua a si i, khua hlun taktak a si. Washington DC in nichuahlei kap, I-70 nichuahlei a donghnak ah a um. Hi ka khua hi, khua dawh le khua nuam ngai a si. US ah minung tam lei ah 29 nak a si. Baltimore Metro area ah minung 2.7 million an um i, USA ah lianh ah 21 nak asi. Baltimore timi taktak ahcun 620,961 (2010) an um.

Baltimore ah miphun kip ah um i, 2010 Milurelnak cazin ning zoh tik ah, 63.7% cu Minak an si; 29.6% cu Mirang le 2.3% Asian an si. Baltomore ah hin, Lai (Chin) miphun zong tampi khua an sa. Laimi Krihfabu hmasa pawl a simi Chin Baptist Mission Church (CBMC) zong nih hi khua ah biakinn lian taktak an cawk. Cu biakinn zong cu Mara le Kachin hna nih an hman ve i, a hlunghlai ngaingai. Hi khua ah, Kachin le Kawl zong an um ve hna.

Baltimore downtown

Baltimore ah a min a thang taktakmi John Hopkins University le John Hopkins Hosptal an um i, cu hna cu Baltimore ah rian tam bik a petu hna an si. Baltimore Int. Airport (BWI) zong hi a lian ngainagi i USA ah aa manhlobikmi 22 nak a si. Baltimore hi, tuanbia khua pakhat a si. Zeicatiah USA ah minung 100,000 a um hmasat khua cu New York a si i, Baltomore hi a pahnihnak a si caah a si. Cu tluk cun a min a thangmi le aa dawhmi khua pakhat a rak si bal ve.

Vawleicung cu thil sining aa tleng lengmang i, Baltimore zong a phunphun in aa thleng ve. Hi khua ah miphun kip an karh tik ah, miphun ruang ah lamzawhnak, buainak le gang cawlcanghnak a tam i, thil phun tampi ruangah sipuazi a tla. Innlo man a tum i, minung rian lo in tampi khua an sa. Mizaza nih an chuahtak. Inn lawngmi a tam tuk. Sipuazi a tlak tik ah, cozah zong harnak an tong.

Tahchunhnak ah Baltimore School hna cu 2016 ah hin, tangka million 129 a chambau ti a si. Detroit zong Bankruptcy a phanh bantuk in, Baltimore zong Bankruptcy a phan lai lo ti khawh a si ti lo. Nihin ni ah Baltimore ah hin, homeless hi 2011 ah 4,000 an um ti a si (2012 ah USA ram pumpi homeless hi 633,782) an si.

Baltimore homeless hi kum chiar in an karh ti a si caah, nihin ni ahcun an tam ngaingai lai tinak a si. CBMC ka tlawn lio zong ahcun, an biakin ah homeless pa cu ihkhun tha taktak aa tuah i, puanbu he a it ko. "Ziah hihi nan thial lai lo maw?" ka ti hna i, "Kan thialter te ko lai" tiah an ti. Atu cu a um ti lo tiah a hnu ah an ka chimh. Cu tluk in Baltimore hi a dirhmun a chia.

CBMC Biakinn, Baltimore, MD

Hi bantuk in sipuazi a tlak tikah, homeless an karh lawng silo in, ritnak sii a karh; gang an karh; aa zuarmi an karh. Sualnak le mithah lainawnnak a karh i, Baltimore hi USA ram pumpi khua tihnung bik (10) lakah aa tel lengmang.

Ka lung a that lo ngaimi cu, tu chun ah thawngpang a chuakmi cu "2016 ah Baltimore ah nizan in minung 300 an thah cang hna" ti a si. Chicago ah mi tambik an thah hna i, 700 renglo an thah cang hna. Baltimore hi a tam pawl tak a si ve cang. Cu News a chuakmi ka hmuh ah ka lung ah a chuakmi cu, Columbus in Baltimore ah June, 2016 ah vanlawng in ka zuan lio i, ka pawng a thumi pa Paul timi pa ka lung ah a chuak i, hi ca ka tialnak a si.

June, 2016 ah CBMC Krihfabu ka va thlawng hna. Columbus in direct vanlawng ka cit. Ka pawng ah Mirang pa, pa no nawn, pumrua tha le balah tha ngai a thu. T-Shirt angki te aa hruk i, kan thuti. A nih thlalangawng kam ah a thu. A muisam ka zoh ah, ralkap si dawh ngai a si.

Ka thut pah ah, "Hello, how are you?" tiah ka hei ti. Cuticun kan pahnih in kan hei thu ko. Bia hna a caancaan ah ka va ruah pah.

"Nang khawi dah na um?" tiah ka hei ti. "Baltimore ah" tiah a ka leh. "Ralkap na si maw?" tiah ka hei hal colh.

"Ka si lo. Police tu ka si. Los Angeles ah training ka kai i ka tlun lei a si" a ti.

"Kum zeizat dah palik na tuan cang? Nupi na ngei maw?" tiah ka hei hal.

"Kum 3 ka tuan cang. Nupi ka ngei rih lo. Girl friend lawng ka ngei" a ti.

"Nangteh khawika ram in dah na rat? Baltimore ah maw na um?" tiah a ka hal.

"Kawlram mi ka si. Columbus ah ka um. Atu hi CBMC timi Krihfabu nih an ka sawm i, ka va tlawng ta hna lai ka ti" tiah ka ti.

Lawmhnak mithmai he, "Ka kut heh tiah a ka tlaih. Pastor maw na si?" a ka ti i, "Aw, pastor rian ka tuan" tiah ka leh.

"Kei zong Krihfa pei ka si ve cu. Ka lawm tuk ee" tiah a ti.

"Pastor na tuannak a sau maw? Nang tah kum zeizat dah na si?" tiah a ka hal.

"Pastor cu 1996 khan ka tuan. A caan ah sianginn ka kai pah" ka hei ti.

"Ka kum zeizat dah a si hnga tiah na ruah?" tiah amahtu ka hei hal chin.

"Kan zoh lengmang ah, 34/35 na si lai tiah ka ruah?" tiah a ka ti.

"A si lo. Atu 50 ka si" cang tiah ka chimh. A khuaruah a har. "Na no tuk ee?" tiah a ti. "Kan nih Asian cu kan tar a har deuh ee" tiah capo in ka hei leh.

Paul nih, "Kei ka kum hi teh zeizat dah a si hnga tiah na ruah?" tiah a ka hal.

Ka zoh ka zoh i, "Kum 28 na si lai" tiah ka leh.

Amit kaupi in aa au i, "Zeitin dah na theih khawh? Hmai zarh Ningani khi kum 28 ka tlinnak a si. Prophet maw na si?" tiah a ka capo.

"Prophet ka si lo. Kan zoh, kan zoh i, kum 28 cung cu na kai bak lai lo" timi hi, ka theih khawh ko tiah ka ti i, a khuaruah a har chinchin.

A ngaingai ti ahcun, ka theih ca i chimmi siloin ka zoh i, zawndamh in ka chim khawh sualmi tu khi a si.

Kan tum lai te ah, "Paul, Baltimore cu, USA ah cime a sannak cem pei a si cu? Hi ka riantuan hi na tih lo maw?" tiah ka hei hal.

"A si hrim. Ka tih ko. Asinain training ka dih ka in, hika khua ah rian ka hmu i, ka um peng ko" tiah a ti.

Cuticun "Hman i thla u sih aw" ka ti i, hman kan i thla. "Blog ah ca ka tial tawn i, ka rak khumh te lai mu" tiah ka ti i, "Ee law, rak khumh te" a ka ti i, ka khumh te lai ka ti nain, caan aa tet tuk caa, tu zan ceu ah ka khumh khawh.

Paul he vanlawng cung ah kan thut ti lio

Cuticun biaruah pah in kan zuang i, lamtawi sau hmanh kan thei lo. Baltimore kan phan.

Kan tum lai te ah, "Pathian nih thluachuah in pe ko seh. Nupi tha te in pe ko seh. Na lam va tluang ko seh. Hi vawlei i kan i ton than lo zongah, van ah kan i tong than te lai. Have a good day" tiah a kut ka tlaih i, cuticun kan i then.

Kan i then lai te ah, "Pastor, thla rak ka cam piak ve mu?" tiah a ka cah ta.

Kei zong nih, "Aw ka rak in campi ve lai?" tiah ka ti.

Tu zing ah, "Nizan ah Baltimore ah minung 300 nak an thah cang hna" tiah an chim bak in, ka thinlung ah a chuakmi cu CBMC ka tlawn lio i, vanlawng cung i ka tonmi Palik officer Paul kha a si.

"Bawipa a rian a tuannak ah, him tein va um ter ko. Community caah thahnem santlai siter law, mi tampi caah bawmtu le vengtu tha si ko seh. Damnak le nun khuasaunak va pe law, lunglawmhnak le hnangamnak va pe ko" tiah thla ka cam piak ve.

A nun le dam zong ka thei lo. Asinain thla cu ka campiak ko. Zeicatiah "Pastor, thla rak ka campiak ve" tiah a timi bia te kha, tu chun ni ah ka hnathlam ah a len peng caah a si!

Khuadawm Nih Bawipa Sunparnak An Langhter

Dragon Khuadawm tiah min ka sakmi, Columbus

"Kokek thil vialte lakah aa dawh bik le khuaruahhar bik a si" tiah ka ruahmi cu, khuadawm a si. Zeicatiah vancung aa dawhnak a langhtertu le Pathian sunparnak langhtertu thil pakhat a si caah a si. Pathian le khuadawm hi Bile zong ah an i pehtlai ngai. Cucah Bible nih khuadawm timi bifang hi voi tam a hman.

Bible nih hin khuadawm hi biapi ngai ah a rak chiah. Biakam Hlun le Biakam Thar zong ah, khuadawm hi a biapi ngaimi thil pakhat a si. Job nih cun, "Khuadawm cu Pathian aa thuhnak a si a ti" (Job 22:14). Khuadawm le a chah taktakmi muihnak nih Pathian kha an tuam (Psalm 97:2) tiah hlaphuahtu nih a ti.

Israel saltangmi kha Egypt in an chuah lio ah khan, "Pathian nih chun ah khuadawm in" in a rak hruai hna (Ex. 13:21-22).

Paul nih cun, "Jesuh hmanh khi, van i khuadawm lak ah kan va ton lai" a rak i ruahchan (1 The. 4:17). Mithiang Johan nih cun, "Mi fapa kha, khuadawm var taktakmi aa cit kha ka hmuh" (Biathlam 14:14) a ti.

Cutluk in Bible zongah hin, khuadawm hi voi tampi Pathian he an i pehtlai.

Khuadawm hi khuaruahhar a si rihnak cu, ruahtii zong ah aa cang kho; tikhal le vur zong ah aa cang kho. Luklak ah tihnung in a um nain luklak ah khawi hme a um ne van ti awk in an tlau diam than. Khuadawm hi "hlen a hmang." Cucaah "Iang a ngei." Aa dawh lio caante ah hman thlak a haumi a si.

Khuadawm cu aa thlen ning a rang tuk. A caan ahcun "velhle" bantuk a si. Atu te a chuak i, a tu te ah a lo than. Atu te ah duh a nung i, a tu te ah tih a nung than. Bible nih, minung cu "minmei tian bang a lo ko"(Job 7:9) tiah a kan epchun mi khi, a tu te a chuah zaumi le a loh zaumi epchun in a chim duhnak a si. A dik tuk. Khuadawm cu aa tlennawn a rang tuk.

Khuadawm hi khuaruahhar a si khunnak cu, nilin a phentu le ngaidul zong a si. Asinain a hmun lo. Thli hran ning hawih in ngaidul cu aa thial diam tawn. A caan ah lunglawmhnak asi i, a caan ah aipuannak zong a si. A caan ah a van kan dulh rua lai kan ti lio ah, ka dang ah aa mer diam. Chim awk a tha lo. Cucah velhle ka tinak a si.

Khuaruahhar a si biknak a dang pakhat cu, a muisam aa thlen a fawi tukmi a si. Luklak ah, muisam a phunphun le color a phunphun ah aa thleng zau. A caan ah varcur in in a um. A caan ah a muih bak in a mui i, a nak fawn. A caan ah pah khawhlo ding in a chah i, a caan ah thli bantuk a pan than. A caan ahcun duh a nung tuk i, a caan ah tih a nung tuk. Mimhlau a lek i tek a tlak tikah tih a nunning a zual. Vanlawng in khuadawm chahnak chung zuan tikah tih a nung khun.

Thlicia kan inn cung a hran lio

Khual ka tlawn caan ah ka nuamh cemmi pakhat cu, khuadawm hmanthlak a si. Zeicatiah khuadawm cu, a hnu ka rat tik ah ka thlak than te lai ti awk a tha ti lo. A rem lio caan te khi, caantha ah ruat in, thlak a hau mi a si. Cucaah aa dawh bik lio caan le duh a nun bik lio caan ah thlak a hau.

Khuadawm hi zeitluk in dah duh an nun? Zeitluk in dah tih an nun? Zeitluk in dah a muisam le pungsan aa thlen timi hi hman ka thlak tawn hna. Hi hmanthlak hna i, USA ram chung i ka chawhvaihnak ah ka thlakmi pawl an si. Hi khuadawm hna hi aa dawh lawng siloin Pathian sermi thil le a lamkaltu hna an si ko. Hi khuadawm hna nih, Pathian sunparnak an langhter.....

Indiana Nitlak lai

Thanksgiving Day (Amarillo)

Amarillo (Nov 28, 2016)

Dallas (DFW pawng, 2015)

Columbus zanlei sang

Columbus zanlei sang (inn kha Kroger store a si)

Chun laicer ah a chuakmi khuadawm, Dayton (2015)

Columbus zingka (International airport cung)

Easter Sunday, Columbus (2015)

Columbus, Ohio

Tornedo bantuk khuadawm Columbus

Columbus-Charlotte kar zuan lio

Columbus-Houston (Khuadawm lak chawh a nuam tuk ding a lo)

Atanglei khuadawm hmanthlak hna hi Houston in Detroit lei ka zuan lio thlakmi an si. Khuadawm cu duhsah tein an mui aa thleng. Detroit kan phanh hlan ah a color cu an sen chin lengmang. Aa tong thiam ngaimi cu vanlawng kan tum lai ah, pakhat hnu pakhat in ka thlak thluahmah. Vanlawng ke nih vawlei a tongh lio bak khi, nitlaklei in Nika liam aa thawk bak a si ve.